Ol Woman We Oli Mekem Hat Blong Jeova i Glad

“[ Jeova] bambae i mekem i gud tumas long yu . . . Yu bambae yu kasem stret pei blong ol samting ya long hem.”​—RUT 2:12.

1, 2. ?Sipos yumi tingting dip long ol woman long Baebol we oli mekem hat blong Jeova i glad, olsem wanem samting ya i save halpem yumi?

 FASIN blong onagud long God i pulum tu woman blong tufala i no obei long oda blong king blong Ijip. Bilif i pulum wan woman blong rod blong putum laef blong hem long denja, blong haedem tu man Isrel we tufala i kam blong lukluksave ples blong hem. Gudfala tingting mo tingtingdaon i pulum wan woman blong sevem laef blong plante man, mo blong blokem wan man we Jeova i jusumaot hem, blong i no kilim ol man ya oli ded. Bilif long Jeova God mo fasin blong tekem ol narafala oli kam long haos, i pulum wan wido we hem i wan mama, blong i givim laswan kakae blong hem long wan profet blong God. Hemia sam nomo long ol woman long Baebol we oli mekem hat blong Jeova i glad.

² Taem yumi tingbaot fasin we Jeova i mekem long ol woman ya mo ol blesing we hem i givim long olgeta, yumi luksave se hem i no wari tumas we yumi man no yumi woman, be hem i wantem moa we yumi gat ol gudfala fasin long saed blong spirit. Tede, ol man blong wol ya oli ting se i moa impoten we yumi naes long saed blong bodi, no we yumi gat mane mo plante samting. Taswe, i no isi blong yumi holem tingting ya se i moa impoten we yumi strong long saed blong spirit. Be yumi naf blong holem tingting ya, olsem plante milian woman we oli onagud long God tede, oli stap mekem. Ol Kristin woman ya oli bighaf blong grup blong ol man blong God long wol. Oli folem fasin blong ol woman long Baebol we oli onagud long God. Oli gat bilif, gudfala tingting, mo fasin blong tekem ol narafala oli kam long haos blong olgeta, wetem plante narafala gudfala fasin tu. I tru, i no ol Kristin woman nomo we oli mas folem ol gudfala fasin blong ol woman ya bifo, be ol man tu oli mas folem ol fasin ya. Blong luk olsem wanem yumi save go moa blong folem eksampol blong olgeta, bambae yumi tokbaot ol samting we Baebol i talem long saed blong ol woman ya.​—Rom 15:4; Jemes 4:8.

Tu Woman We Tufala i No Obei Long King

3, 4. (a) ?From wanem Sifraha mo Pua i no obei long oda blong king blong Ijip blong kilim i ded ol pikinini boe we ol woman Isrel oli bonem? (b) ?Wanem ol blesing we Jeova i givim long tufala woman ya from we tufala i no fraet long king be tufala i ona long Hem?

³ Afta Wol Wo Tu, ol man we oli bin kilim plante grup blong man oli ded, oli pas long kot long taon ya Nuremberg, Jemani. Plante long olgeta ya, oli mekem eskius se oli kilim ol man ya i ded from we oli stap obei long oda blong wan haeman. Traem skelem fasin blong ol man ya wetem fasin blong tu woman Isrel, nem blong tufala Sifraha mo Pua. Tufala i laef long Ijip long taem blong wan king we yumi no save nem blong hem. King ya i rul long fasin we i strong bitim mak. Hem i fraet se ol man Isrel we oli stap long kantri blong hem bambae oli kam plante tumas. Ale hem i givim oda long tufala woman ya, we tufala i stap givhan long ol woman blong oli bonem pikinini, se tufala i mas kilim i ded olgeta pikinini boe we ol woman Isrel oli bonem. ?Olsem wanem? ?Tufala i obei long rabis oda ya? “Tufala i no kilim olgeta, tufala i letem olgeta oli stap laef.” ?From wanem tufala i no fraet long king? From we “tufala i stap ona long God.”​—Eksodas 1:15, 17; Jenesis 9:6.

⁴ Yes, tufala i trastem Jeova se bambae hem i lukaotgud long tufala. Mo i tru, Jeova i kam olsem wan “sil” we i blokemgud tufala, i no letem kros blong king i kasem tufala. (2 Samuel 22:31; Eksodas 1:18-20) Jeova i givim sam narafala blesing tu long Sifraha mo Pua. Hem i mekem se tufala i gat ol prapa pikinini blong tufala. Mo hem i givim blesing long tufala se nem blong tufala, mo stori blong ol gudfala wok we tufala i mekem, i stap long Baebol, blong ol man we oli kamaot biaen long tufala oli save ridim. Be nem blong king ya blong Ijip i lus finis.​—Eksodas 1:21; 1 Samuel 2:30b; Ol Proveb 10:7.

5. ?Olsem wanem plante Kristin woman tede oli olsem Sifraha mo Pua, mo bambae Jeova i givim wanem blesing long ol woman ya?

 ⁵ ?Olsem wanem? ?I gat sam woman tede we oli olsem Sifraha mo Pua? !Yes, i gat! Long plante kantri, ‘king i putum tok’ blong blokem wok blong tijim ol man long Baebol, wan wok we i save sevem laef blong ol man. Nating se man i save go kalabus no lusum laef blong hem sipos i brekem tok ya blong king, evri yia, plante taosen woman we oli no fraet, oli gohed long wok ya. (Hibrus 11:23; Ol Wok 5:28, 29) Ol woman ya oli lavem God mo oli lavem ol man raonabaot long olgeta, taswe oli gat strong tingting, mo oli no save letem wan man i blokem olgeta, blong oli no moa talemaot gud nius blong Kingdom blong God long ol narafala. From samting ya, plante man oli mekem trabol long ol Kristin woman ya mo oli agensem olgeta. (Mak 12:30, 31; 13:9-13) Be Jeova i save ol wok we ol gudfala woman ya oli stap mekem mo olsem wanem oli no fraet. Bambae hem i soem se hem i lavem olgeta, olsem hem i soem long Sifraha mo Pua. Sipos ol woman ya oli stanap strong go kasem ol samting i finis, Jeova bambae i raetem nem blong olgeta long buk blong Hem, we nem blong ol man “we oli gat laef” i stap long hem.​—Filipae 4:3; Matiu 24:13.

Wan Woman Blong Rod i Jenisim Fasin Blong Hem

6, 7. (a) ?Rehab i gat wanem save long saed blong Jeova mo ol man blong Hem, mo save ya i mekem wanem long hem? (b) ?Tok blong God i leftemap Rehab olsem wanem?

⁶ Long yia 1473 B.K.T., * long taon ya Jeriko long Kenan, i gat wan woman blong rod i stap, nem blong hem Rehab. I klia se Rehab i wan woman we i gat save. Tu man Isrel we tufala i kam blong lukluksave Jeriko, tufala i askem long Rehab sipos tufala i save haed long haos blong hem. Rehab i storian long tufala, i talemaot plante save we hem i gat long saed blong ol merikel we God i mekem blong tekemaot ol man Isrel long wok slef long Ijip. !Ol merikel ya oli hapen 40 yia bifo long taem ya, be Rehab i stap tingbaot olgeta yet! Mo tu, hem i gat save long saed blong ol faet we Isrel i jes winim, agensem tufala king blong ol laen blong Amoro, we nem blong tufala Sihon mo Og. Makemgud olsem wanem save ya i gat paoa long Rehab. Hem i talem long tufala man Isrel ya se: “Mi mi save we Hae God i givim kantri ya finis long yufala. . . . Hae God ya we i God blong yufala, hem i God blong heven mo blong wol ya.” (Josua 2:1, 9-11) Yes, save we Rehab i gat long saed blong Jeova mo ol wok we hem i mekem blong sevem ol man Isrel, i tajem hat blong hem, nao hem i bilif long Jeova.​—Rom 10:10.

⁷ Bilif blong Rehab i pulum hem blong tekem aksin. “Hem i glad” blong tekem tufala man Isrel ya i kam haed long haos blong hem. Taem ol ami blong Isrel oli kam blong spolem taon ya  Jeriko, Rehab i obei long ol samting we tufala i bin talem long hem blong mekem, nao hem i sevem laef blong hem. (Hibrus 11:31; Josua 2:18-21) I klia se ol wok blong Rehab we oli kamaot from bilif, oli mekem hat blong Jeova i glad. Taswe Jeova i pulum Kristin disaepol Jemes blong raetem nem blong Rehab wetem nem blong Ebraham we hem i wan fren blong God, blong ol narafala Kristin oli save folem eksampol blong tufala. Jemes i raetem se: “Yu traem tingbaot woman blong rod ya Rehab. God i mekem hem i stret woman long fes blong hem from we hem i lukaot gud long tufala laen ya blong Isrel we tufala i kam blong lukluksave Jeriko. Hem i tekem tufala i go haed long haos blong hem, mo biaen i sanemaot tufala i gohom long narafala rod.”​—Jemes 2:25.

8. ?From we Rehab i gat bilif mo i obei long God, Jeova i givim wanem blesing long hem?

⁸ Jeova i givim plante blesing long Rehab. Hem i mekem merikel blong sevem laef blong “Rehab wetem olgeta famle blong hem” we oli stap long haos blong hem. Jeova i letem olgeta oli kam stap ‘long kantri blong Isrel,’ mo ol manples oli mekem long olgeta ya olsem we oli stap mekem long ol laen blong Isrel nomo. (Josua 2:13; 6:22-25; Levitikas 19:33, 34) Be i no hemia nomo. Jeova i givim blesing long Rehab se hem bambae i kam wan bubu woman blong Jisas Kraes. !Tru ya, Jeova i soem bigfala lav mo kaen fasin long woman Kenan ya we fastaem hem i mekem wosip long ol giaman god! *​—Ol Sam 130:3, 4.

9. ?Olsem wanem fasin we Jeova i mekem long Rehab mo long sam Kristin woman long faswan handred yia, i save leftemap tingting blong plante woman tede?

⁹ Stat long faswan handred yia kam kasem tede, plante Kristin woman oli mekem olsem Rehab. Oli sakemaot rabis fasin ya blong slip olbaot, blong oli save mekem God i glad. (1 Korin 6:9-11) Sam long olgeta oli gruap long ol ples olsem Kenan, we i fulap long fasin slip olbaot mo we ol man oli ting nating long rabis fasin ya. Be, ol woman ya oli wokem bilif we i stanap long stret save blong Baebol, nao bilif ya i pulum olgeta blong jenisim fasin blong olgeta. (Rom 10:17) Taswe, yumi save talem long saed blong ol woman ya se, God “i no gat sem blong olgeta oli talem se hem i God blong olgeta.” (Hibrus 11:16) !Hemia i wan bigfala ona blong olgeta!

Woman We i Kasem Blesing From Gudfala Tingting Blong Hem

10, 11. ?Wanem trabol i kamaot bitwin Nabal mo Deved we i pulum Abigel blong tekem aksin?

¹⁰ Plante woman blong bilif long taem bifo, oli soemaot se oli gat gudfala tingting. Samting ya i mekem se oli sas long ae blong ol man blong Jeova. Wan long ol woman ya, Abigel, hem i waef blong wan rij man Isrel we i gat plante graon, nem blong hem Nabal. Gudfala tingting blong Abigel i sevem laef blong plante man, mo i blokem Deved, we biaen i kam king blong Isrel, blong hem i no kilim ol man ya oli ded. Yu save ridim stori blong Abigel long 1 Samuel japta 25.

¹¹ Stori ya i go olsem: Deved mo ol man blong hem oli putum haos tapolen blong olgeta klosap long ples we ol sipsip blong Nabal oli stap long hem. Oli kaen tumas long Nabal we hem i manples blong olgeta, oli lukaotgud long ol sipsip blong hem long dei mo long naet mo oli no askem pei from. Taem Deved i no moa gat kakae, hem i sanem ten yangfala man blong hem oli go askem long Nabal blong i givim smol kakae long olgeta. Hemia janis blong Nabal blong talem tangkiu long Deved mo ona long hem olsem man we Jeova i putumap. Be Nabal i mekem defren fasin. Hem i faerap long kros, i tok nogud long saed blong Deved, mo i sanembak ol yangfala man ya we oli no gat wan  samting nating long han blong olgeta. Taem oli go talemaot long Deved ol samting we i hapen, Deved i singaot 400 soldia blong hem, nao oli wokbaot i go blong faetem Nabal mo ol man blong hem. Be Abigel i harem nius long saed blong nogud fasin blong man blong hem. Ale, wantaem nomo, hem i girap, mo wetem waes fasin, hem i tekem aksin blong mekem kros blong Deved i godaon. Hem i sanem fulap kakae i go long Deved, mo hem wan i go luk Deved stret.​—Vas 2-20.

12, 13. (a) ?Olsem wanem Abigel i soem gudfala tingting wetem fasin blong stap tru long Jeova mo man we Jeova i putumap? (b) ?Taem Abigel i gobak long ples blong hem, hem i mekem wanem, mo wanem i hapen long hem biaen?

¹² Taem Abigel i mitim Deved, hem i askem wetem tingting daon blong Deved i fogivim man blong hem. Fasin blong hem i soem se hem i gat bigfala respek long man ya we Jeova i putumap hem. Abigel i talem se: “[Jeova] bambae i mekem we oltaem wan long olgeta we bambae oli stap kamaot biaen long yu bambae i king, from we yu yu stap mekem ol faet olsem we hem i talem.” Mo hem i talem se Jeova bambae i mekem Deved i kam lida blong Isrel. (Vas 28-30) Be Abigel i no fraet, hem i talem tu long Deved se hem i mas blokem kros blong hem, from we sipos hem i givimbak nogud fasin long man blong Abigel mo i kilim plante narafala man i ded, bambae hem i gat fol long fes blong God. (Vas 26, 31) Abigel i soem se hem i gat tingtingdaon, bigfala respek, mo gudfala tingting, mo from samting ya, Deved i lesin long tok blong hem we i stretem hem. Hem i talem long Abigel se: “!Mi mi presem Hae God! . . . Hem nao i sanem yu blong yu kam mitim mi tede. Mi talem tangkiu long hem from gudfala tingting ya blong yu, mo from samting ya we yu mekem naoia, we yu blokem mi, blong mi no go kilim man ya i ded.”​—Vas 32, 33.

¹³ Ale, Abigel i gobak long ples blong hem. Nao, wetem strong tingting, hem i go luk man blong hem, i talem long hem se hem i bin karem sam presen i go long Deved. Be, man blong hem “i drong, we i harem gud tumas.” Ale, Abigel i wet gogo drong blong hem i finis, nao i talemaot olgeta samting ya long hem. ?Nabal i mekem wanem? Hem i sek bigwan, nao wan strong sik i kasem hem, we bodi blong hem i hafded from. Hem i stap olsem go kasem ten dei, nao God i kilim hem i ded. Taem Deved i harem we Nabal i ded, hem i sanem tok i go long Abigel blong tufala i mared. I klia se hem i laekem tumas fasin blong Abigel mo i gat bigfala respek long hem. Ale, Abigel i glad nomo blong mared long Deved.​—Vas 34-42.

?Yu Yu Save Gat Fasin Olsem Abigel?

14. ?Wanem sam fasin blong Abigel we maet yu yu wantem kamgud moa long olgeta?

¹⁴ ?Nating se yu man no yu woman, ating yu luk sam fasin blong Abigel we yu wantem tumas blong kamgud moa long olgeta? Maet yu wantem kam waes moa no gat gudfala tingting taem trabol i kamaot. Maet yu wantem lanem blong toktok long kwaet fasin mo no mekem i strong tumas long ol narafala taem oli kros long yu. Sipos yu wantem ol fasin ya, yu mas prea long Jeova. Hem i promes finis blong givim waes, fasin luksave, mo fasin blong tingtinggud, sipos yumi ‘prea wetem trufala bilif.’​—Jemes 1:5, 6; Ol Proveb 2:1-6, 10, 11.

15. ?Hu ol Kristin woman we oli nidim moa ol fasin blong Abigel?

¹⁵ Yu yu nidim tumas ol gudfala fasin ya, antap moa, sipos man blong yu i no bilif, mo i no wantem harem mo folem ol rul blong Baebol. Maet hem i wan man blong dring. Yumi hop se ol man olsem bambae oli jenisim fasin blong olgeta, olsem plante oli mekem finis. Samting we i givhan long plante man blong oli jenis, hemia kwaet fasin, bigfala respek, mo klin fasin we woman blong olgeta i gat.​—1 Pita 3:1, 2, 4.

16. ?Nomata wanem traem wan Kristin sista i fesem long famle blong hem, olsem wanem hem i save soem se fasin fren blong hem wetem Jeova i impoten moa i bitim ol narafala samting?

¹⁶ Nomata wanem traem yu fesem long famle blong yu, yu no mas fogetem se Jeova i stap oltaem blong givhan long yu. (1 Pita 3:12) Taswe, yu mas traehad blong kam strong moa long saed blong spirit. Prea long hem blong askem waes mo kwaet tingting. Yes, kam klosap moa long Jeova. Yu save mekem olsem taem yu stadi Baebol, prea, tingting dip, mo joen oltaem wetem ol narafala Kristin. Man blong Abigel i folem ol fasin we tingting blong hem nomo i wantem. Be Abigel i no letem rabis fasin blong man ya i spolem respek we hem i gat long man we Jeova i putumap. Hem i folem ol stret rul blong God. Long ol Kristin famle tu, nating se hasban i wan gudfala man blong God, be waef i mas luksave se hem wan i mas wokhad blong kam strong long saed blong spirit, mo stap strong oltaem. I tru, Baebol i putum wok long hasban blong i lukaot long  woman blong hem long saed blong spirit mo bodi. Be woman tu i mas luksave se, sipos hem i wantem we God i sevem hem, hem wan i mas ‘gohed blong wok had, ona long God, mo fraet long hem.’​—Filipae 2:12; 1 Timoti 5:8.

Woman We i ‘Kasem Sem Pei Long God We Ol Profet Oli Kasem’

17, 18. (a) ?Wanem samting i traem bilif blong wido blong Jarefat? (b) ?Folem tok blong Elaeja, wido ya i mekem wanem, mo Jeova i givim wanem pei long hem?

¹⁷ Long taem blong profet Elaeja, Jeova i lukaotgud long wan wido we i pua. Fasin ya blong Jeova i soem se hem i tinghae long olgeta we oli givim taem, paoa, mo olting blong olgeta blong sapotem trufala wosip. Long taem blong Elaeja, ren i no foldaon blong longtaem, ale kakae i sot. Wan wido mo smol boe blong hem we tufala i stap long taon ya Jarefat, tufala i hanggri, olsem plante narafala man long taem ya. Taem tufala i stap finisim laswan kakae blong tufala, profet Elaeja i kamtru long haos blong tufala. Hem i askem long wido ya blong mekem wan samting we i narakaen. Hem i save se woman ya i no gat kakae, be hem i askem long hem blong yusum laswan oel mo flaoa blong hem blong kukum “wan smol bred” blong hem. Hem i talem long wido ya se: “Hae God i God blong mifala ol laen blong Isrel, mo hem i talem se bambae flaoa ya i no save finis long besin blong hem, mo oel ya i no save finis long botel blong hem, gogo kasem taem we hem bambae i sanem ren i kam.”​—1 King 17:8-14.

¹⁸ ?Sipos yu yu wido ya mo Elaeja i talem tok ya long yu, bambae yu mekem wanem? Wido ya blong Jarefat i luksave se Elaeja i profet blong Jeova, ale hem i “mekem olsem we profet ya i talem.” ?From we wido ya i soem kaen fasin long Elaeja mo i tekem hem i kam insaed long haos blong hem, Jeova i mekem wanem? Hem i mekem wan merikel, i givim kakae long wido ya, boe blong hem, mo Elaeja, go kasem we drae taem i finis. (1 King 17:15, 16) Yes, wido ya blong Jarefat i ‘kasem sem pei long God we ol profet oli kasem,’ nating se hem i no blong Isrel. (Matiu 10:41) Taem Pikinini blong God i prij long ol manples blong hem long Nasaret, hem tu i leftemap wido ya. Hem i talemaot gudfala eksampol blong wido ya, long ol manples blong hem we oli no gat bilif.​—Luk 4:24-26.

19. ?Plante Kristin woman tede oli mekem wanem we i sem mak long wido blong Jarefat, mo wanem tingting blong Jeova long saed blong ol woman ya?

¹⁹ Tede, plante Kristin woman oli mekem olsem wido ya blong Jarefat. Tingbaot se, evri wik, i gat ol Kristin sista we oli tekem ol seket elda mo waef blong olgeta oli kam stap long haos blong olgeta. Plante long ol sista ya oli pua mo oli gat ol prapa pikinini blong olgeta, be nating, oli tingbaot narafala fastaem. Plante narafala sista oli singaot ol brata mo sista we oli prij fultaem long ples blong olgeta, blong oli kam kakae long haos blong olgeta. Oli givhan tu long samfala we oli sot long sam samting, no oli mekem wan narafala samting blong yusum taem mo olting blong olgeta blong halpem wok blong Kingdom. (Luk 21:4) ?Olsem wanem? ?Jeova i stap lukluk fasin blong olgeta ya we oli rere blong lego sam samting blong mekem wok blong hem? !Yes, yumi sua long samting ya! “Oltaem God i stap mekem i stret nomo. Mo hem i no save fogetem ol  wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”​—Hibrus 6:10.

20. ?Long nekis stadi, bambae yumi tokbaot wanem?

²⁰ Long faswan handred yia, sam woman we oli onagud long God, oli gat blesing ya blong givhan long Jisas mo ol aposol blong hem. Long nekis stadi, bambae yumi tokbaot olsem wanem ol woman ya oli mekem hat blong Jeova i glad. Mo bambae yumi tokbaot eksampol blong plante woman tede we oli mekem wok blong Jeova wetem olgeta hat blong olgeta, nating se laef blong olgeta i no isi.

[Ol Futnot]

Tingtingbak

• ?Olsem wanem ol woman ya oli mekem hat blong Jeova i glad?

• Sifraha mo Pua

• Rehab

• Abigel

• Wido blong Jarefat

• ?Sipos yumi tingting dip long fasin blong ol woman ya, olsem wanem samting ya i save halpem yumi long laef blong yumi? Talem wan eksampol.

[Kwestin]

[Tok blong pija long pej 9]

Plante woman we oli onagud long God, oli obei long God, oli no lesin long “tok blong king”

[Tok blong pija long pej 10]

?Olsem wanem Rehab i soem gudfala eksampol blong bilif?

[Tok blong pija long pej 10]

?Yu yu wantem folem wanem fasin blong Abigel?

[Tok blong pija long pej 12]

Plante Kristin woman tede oli gat sem fasin olsem wido blong Jarefat