Wan Kwestin

?From wanem Elisa i askem Elaeja blong givim “tu haf” blong spirit blong hem?

Smoltaem bifo we Elaeja i finisim wok blong hem olsem profet long Isrel, profet Elisa we i yang moa long hem, i askem samting ya long hem se: “Plis, yu letem tu haf blong spirit we i stap long yu i kam long mi.” (2 King 2:9, NW ) Long taem bifo, ol fasbon pikinini long famle oli gat raet blong kasem tu samting, be seken bon mo ol narafala pikinini oli gat raet blong kasem wan nomo. I luk olsem se Elisa i stap folem sem fasin ya long saed blong spirit. (Dutronome 21:17) Sipos yumi lukluk gud long stori ya bambae yumi save kliarem poen ya mo samting ya i save halpem yumi blong lanem samting tu.

Folem wanem we Jeova i wantem, profet Elaeja i putumap Elisa olsem man blong tekem ples blong hem. (1 King 19:19-21) Blong samwe long sikis yia, Elisa i stap olsem wokman blong Elaeja mo hem i wantem tumas blong mekem wok ya kasem we hem i ded. Long laswan dei we Elaeja i mekem wok olsem profet long Isrel, Elisa i no wantem lego tija blong hem. Elaeja i talem long Elisa se hem i no moa nidim blong folem hem, be yangfala profet ya i talem tri taem bakegen se: “Bambae mi no save livim yu.” (2 King 2:2, 4, 6; 3:11) Yes, Elisa i tingbaot olfala profet ya olsem papa blong hem long saed blong spirit.​—2 King 2:12.

Be i no gat Elisa nomo we i stap biaenem Elaeja olsem pikinini blong hem. Elaeja mo Elisa, tufala i stap kampani wetem wan grup blong man we ol narafala oli stap singaot olgeta se “ol pikinini blong ol profet.” (2 King 2:3, NW ) Stori we i stap long Seken King i soemaot se ol “pikinini” ya tu oli laekem tumas papa blong olgeta long saed blong spirit, Elaeja. (2 King 2:3, 5, 7, 15-17, NW ) Be from we tabu spirit i jusum Elisa nao blong i tekem ples blong Elaeja, ale Elisa i namba wan long olgeta pikinini ya long saed blong spirit we oli stap biaenem Elaeja. Yes, i olsem we hem i fasbon blong olgeta. Long Isrel bifo, fasbon boe long famle, i mas kasem tu haf long olgeta samting blong papa blong hem, be ol narafala pikinini boe oli kasem wan haf nomo. Taswe, Elisa i askem tu haf blong ol samting we Elaeja bambae i givim long hem long saed blong spirit.

?From wanem Elisa i askem samting ya long taem olsem? From we hem i save se bambae hem i tekem wan wok we i bigwan tumas​—bambae hem i tekem ples blong Elaeja olsem profet long Isrel. Elisa i luksave se sipos hem i wantem mekem gud wok ya we i bigbigwan tumas, hem i nidim paoa blong tabu spirit we i antap moa long prapa paoa blong hem, mo tabu spirit ya hem i wan paoa we Jeova nomo i save givim. Elisa bambae i nidim strong tingting mo fasin no fraet olsem Elaeja. (2 King 1:3, 4, 15, 16) Taswe, hem i askem tu haf blong spirit we i stap long Elaeja. Hemia wan spirit blong no fraet mo blong ‘wok blong Jeova oltaem nomo’​—hemia ol gudfala fasin we oli kamaot long tabu spirit blong God. (1 King 19:10, 14) ?Ale, Elaeja i mekem wanem?

Elaeja i save se Elisa i askem wan samting we hem i no save givim, be God nomo i save givim. Taswe, Elaeja i talem wetem tingting daon se: “Yu yu askem wan strong samting ya, be sipos yu luk mi taem Hae God i tekemaot mi mi gowe long yu, bambae yu save kasem paoa ya. Be sipos yu no luk mi, bambae yu no save kasem.” (2 King 2:10) Yes, Jeova i letem Elisa i luk, taem hem i yusum wan bigfala win blong karemaot Elaeja. (2 King 2:11, 12) Taswe, Elisa i kasem samting ya we hem i askem. Jeova i givim spirit ya we hem i nidim blong holem niufala wok ya mo blong stanap strong tru long ol traem we hem i kasem long wok ya.

Tede, ol tabu Kristin (we samtaem yumi kolem olgeta se grup blong Elisa) mo ol man blong God tugeta oli save harem gud tumas long stori ya long Baebol we i leftemap tingting. Samtaem yumi save kasem sam impoten wok mo yumi harem se wok ya i bigwan tumas long yumi. No, maet yumi no moa gat strong tingting blong talemaot Kingdom from we yumi faenem tumas man we oli no kea long gud nius no oli agensem yumi taem yumi prij. Be, sipos yumi askem strong long Jeova blong i givhan long yumi, bambae hem i givim tabu spirit long yumi, stret olsem we yumi nidim blong stanap strong mo blong holem wok blong yumi, nating se ol samting raonabaot long yumi oli stap jenis. (Luk 11:13; 2 Korin 4:7; Filipae 4:13) Yes, bambae Jeova i halpem yumi evriwan, ol yangfala mo ol olfala, blong yumi naf blong finisim olgeta wok we hem i givim long yumi, sem mak olsem we hem i givim paoa long Elisa blong hem i naf blong mekem bigbigfala wok ya we hem i kasem.​—2 Timoti 4:5.