‘Stap Klosap Long God, Nao Hem Bambae i Kam Stap Klosap Long Yu’

Bifo Mo Afta—Ol Rul Blong Baebol Oli Jenisim Laef Blong Hem

TAEM hem i yang, Adrian i raf tumas mo i kros oltaem. From we hem i kwik blong kam kros, hem i stap faerap bigwan. Hem i drong, i smok tabak, mo i slip olbaot. Ol man oli save we Adrian i wan yangfala we i rebel agens long loa, mo hem i gat wan tatu we i soemaot we hem i sapotem fasin ya blong agensem gavman. Adrian i tokbaot taem ya i se: “Mi katem hea blong mi olsem ol rebel, mi putum strong glu long hea blong mi blong mekem oli stanap, mo samtaem mi putum kala red no wan narafala kala long hea blong mi.” Mo tu Adrian i gat wan iaring long nus blong hem.

Adrian i go stap long wan olfala haos wetem sam narafala yangfala we oli rebel. Long ples ya oli drong mo oli tekem drag. Adrian i talem se: “Mi tekem drag ya we oli kolem speed mo mi stikim mi wan wetem Valium mo eni narafala samting we mi save kasem blong mekem mi mi drong. Taem mi no gat drag no glu blong kam drong, mi karemaot bensin long trak blong ol man mo mi drong long bensin.” Rabis laef blong Adrian i stat mekem we ol man oli fraet long hem mo hem i kam raf moa we i bitim mak. I no gat man i wantem joen wetem hem. Be long sem taem, rabis fasin blong hem i pulum ol nogud man oli kam long hem.

Sloslo, Adrian i luksave se “ol fren” blong hem oli joen wetem hem jes blong kasem sam samting long hem. Mo tu, hem i luk we “fasin kros mo raf fasin i no stretem wan samting.” Hem i harem se laef blong hem i no gat mining mo i kros long hem wan, taswe hem i lego ol fren blong hem. Ale, Adrian i faenem wan Wajtaoa long wan ples we oli bildim haos. Magasin ya i pulum intres blong hem long mesej blong Baebol, mekem se Adrian i stat blong stadi long Baebol wetem ol Witnes blong Jeova. Adrian i wantem folem advaes ya: “Stap klosap long God, nao hem bambae i kam stap klosap long yufala.” (Jemes 4:8) From samting ya, Adrian i luk we hem i mas mekem ol rul blong Baebol i wok long laef blong hem.

Adrian i kasem moa save long Baebol, mo save ya i gat paoa long tingting blong hem blong mekem i gud mo i jenisim laef blong hem. Hem i kasem help blong winim fasin kros blong hem mo i lanem blong bos long hem wan. Paoa blong Tok blong God i jenisim bigwan ol fasin blong Adrian.​—Hibrus 4:12.

?Be olsem wanem Baebol i save gat paoa long laef blong hem olsemia? Save blong Baebol i halpem yumi blong “putum niufala fasin blong laef.” (Efesas 4:24, NW ) Yes, ol fasin blong yumi oli jenis taem yumi mekem laef blong yumi i laenap wetem save we yumi faenem long Baebol. ?Nao olsem wanem save ya i save jenisim ol man?

Faswan samting, Baebol i soemaot ol nogud fasin we yumi mas sakemaot. (Ol Proveb 6:16-19, NW ) Seken samting se, Baebol i talem long yumi blong soem ol gudfala fasin blong tabu spirit blong God, olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.”​—Galesia 5:22, 23, NW.

Taem Adrian i kasem save ol samting we God i wantem, hem i luklukgud long hem wan mo i luksave ol fasin we hem i mas wokem, mo ol fasin we i mas sakem. (Jemes 1:22-25) Be hemia i wan stat nomo. Antap long save we Adrian i gat, Adrian i nidim  blong gat wan strong risen we bambae i pulum hem blong wantem jenisim ol fasin blong hem.

Adrian i lanem se niufala laef ya we yumi mas putum i folem fasin blong God we i wantem ‘mekem yumi kam moa olsem hem.’ (Kolosi 3:10) Hem i luksave we fasin blong ol Kristin i mas sem mak olsem fasin blong God. (Efesas 5:1) Tru long stadi blong Baebol, Adrian i lanem ol samting we Jeova i mekem blong ol man mo i makem ol naesfala fasin blong God, olsem lav, kaen fasin, gudfala fasin, fasin sore, mo stret fasin. Save ya i pulum Adrian blong lavem God mo blong traehad blong mekem Jeova i glad long hem.​—Matiu 22:37.

Taem i pas, mo wetem help blong tabu spirit blong God, Adrian i winim fasin kros blong hem mo i lan blong bos long hem wan. Tede, hem wetem waef blong hem, tufala i bisi long wok blong prij, tufala i stap halpem ol man blong oli jenisim laef blong olgeta tru long save blong Baebol. Adrian i talem se: “Plante long ol fren blong mi blong bifo oli ded finis, be mi mi stap laef mo mi glad long famle laef blong mi.” Eksampol blong Adrian i pruvum se Baebol i gat paoa blong jenisim laef blong ol man blong i kam moagud.

[Tok blong makem poen pija long pej 25]

“Fasin kros mo raf fasin i no stretem wan samting”

[Bokis blong pija long pej 25]

Ol Rul Blong Baebol We Oli Wok

Ol rul blong Baebol we oli kam biaen oli bin halpem plante man we bifo oli kros mo oli raf, blong oli kam ol kwaet man:

“Yufala i mas traehad blong faenem rod blong yufala i gat pis wetem olgeta man. Ol fren. Sipos wan man i spolem yufala, bambae yufala i no givimbak fasin ya long hem bakegen. Yufala i mas livim hem i stap.” (Rom 12:18, 19) Letem God i jusum se long wetaem mo long hu nao i stret we hem i givimbak. Hem i naf blong mekem samting ya from we hem i savegud evri samting, mo evri panis we i kamaot long God i soem stret fasin blong hem.

“ ‘Sipos yufala i kros, yufala i no letem we kros ya i lidim yufala, blong yufala i mekem sin.’ Mo yufala i no stap kros, gogo kasem san i godaon. Yufala i mas no givim janis long Setan.” (Efesas 4:26, 27) Maet i gat gudfala risen blong wan man i kam kros sam samtaem. Be sipos samting ya i hapen, hem i no mas “stap kros.” ?From wanem? From we sipos hem i stap kros, filing ya i save pulum hem blong mekem wan samting we i rong, i save “givim janis long Setan” mo God bambae i no moa agri long hem.

“I nogud yu kros, i nogud yu faerap, i nogud yu wari. Ol samting ya i rod blong kasem trabol nomo.” (Ol Sam 37:8) Wan man we i no bos long ol filing blong hem bambae hem i no bos long ol aksin blong hem tu. Sipos hem i letem kros blong hem i kam antap, hem i save talem no mekem wan samting we i save mekem narafala i harem nogud.