Halpem Ol Narafala Blong Oli Bilif Long Tok Blong Kingdom

“King Agripa i talem long Pol se: ‘I no longtaem bambae yu pulum mi mi kam Kristin man.’ ”​—OL WOK 26:28, NW.

1, 2. ?From wanem aposol Pol i stap stanap long fes blong hedgavman ya Festas mo King Herod Agripa 2?

 LONG yia 58 K.T., King Herod Agripa 2 mo sista blong hem Benis, tufala i kam long taon ya Sisaria. Hedgavman blong Rom, Posias Festas i singaot tufala i kam. Taem tufala i kamtru long haos blong Festas, “tufala i kam long rum ya we oli stap mekem kot long hem. Ol nambawan kapten blong ol soldia, mo ol haeman blong taon oli stap, mo olgeta oli mekem ol strong kastom blong olgeta blong ona long king.” Nao Festas i talem long ol man blong hem, blong oli tekem Kristin aposol Pol i kam stanap long fes blong olgeta. ?From wanem aposol ya blong Jisas Kraes i mas stanap long fes blong hedgavman ya Festas, blong hem i jajem hem?​—Ol Wok 25:13-23.

² Tok we Festas i talem long ol man we oli stap, i ansa long kwestin ya. Hem i se: “King Agripa. Mo yufala evriwan we yufala i stap long ples ya tede. Man ya we i stap long fes blong yufala, olgeta laen blong Isrel long ples ya mo long Jerusalem tu, oli stap toktok oltaem long mi from. Oltaem olgeta oli stap singaot strong long mi se, ‘i no stret blong yu letem man ya i stap laef.’ Be mi mi no save faenemaot wan samting we hem i mekem, we i stret blong mi mi jajem hem from, se bambae i mas ded. Mo from we hem i talem se hem i wantem go long Rom blong talemaot ol poen blong hem long fes blong Sisa, blong Sisa i jajem hem, mi mi tingbaot finis se bambae mi sanem hem i go. Be mi no gat wan stret tok blong bisnes ya blong hem, blong raetem i go long Sisa. Nao from samting ya, mi tekem hem i kam stanap long fes blong yu, King Agripa, mo long fes blong yufala evriwan. Mi wantem yu yu traem luk bisnes ya blong hem, blong bambae mi save raetem sam tok blong hem blong sanem i go. Mi mekem olsem from we mi luk se i krangke blong mi sanem wan man blong kalabus i go longwe, be mi no save soemaot i klia wanem poen we olgeta oli faenem long hem.”​—Ol Wok 25:24-27.

3. ?From wanem ol lida blong skul oli putum poen agens long Pol?

³ Ol man oli putum poen agens long Pol se hem i lida blong wan rebelian. Sipos tok ya i tru, Pol i mas ded. Be Festas i soem se tok ya i no tru. (Ol Wok 25:11) Pol i no stap agensem gavman. Ol lida blong skul long Jerusalem nao oli pulum ol man blong tok olsem, from we oli jalus long Pol. Oli traem blokem wok blong Pol blong talemaot  Kingdom, mo oli no wantem nating we Pol i halpem ol narafala blong oli kam man blong Jisas Kraes. Ale, ol soldia long Jerusalem oli tekem Pol i godaon long Sisaria, wan taon klosap long solwota. Long ples ya, Pol i talem long olgeta se hem i wantem go talemaot bisnes ya long Sisa. Biaen, oli tekem hem i go long Rom.

4. ?King Agripa i talem wanem tok we yumi sapraes long hem?

⁴ Traem pijarem samting ya long tingting blong yu; Oli tekem Pol i go long bigfala haos blong hedgavman blong Rom. Nao Pol i stanap fored long wan grup blong ol man, we wan long olgeta i rul long bighaf blong ol teritori blong Rom. Ale, King Agripa i lukluk Pol, nao i talem se: “Oraet, mi letem yu nao blong yu talemaot ol poen blong yu.” Nao Pol i stat toktok, mo taem hem i stap gohed, wan narakaen samting i hapen. Tingting blong king ya i jenis. Yes, King Agripa i talem se: “I no longtaem bambae yu yu pulum mi mi kam Kristin man.”​—Ol Wok 26:1-28, NW.

5. ?From wanem tok blong Pol i gat paoa long Agripa?

⁵ !Tingbaot! Tok blong God i gat paoa long wan king, from we Pol i talemaot tok ya long fasin we i gud tumas. (Hibrus 4:12) ?Wanem samting i mekem se tok blong Pol i gud olsem? ?Mo yumi lanem wanem samting long fasin blong Pol we i save halpem yumi blong mekem ol disaepol? Taem yumi ridimgud ol tok blong hem, yumi luk tu bigfala samting: (1) Hem i tok long fasin we i pulum man. (2) Hem i yusumgud save we hem i gat long Tok blong God, olsem wan man blong katem pija long wud i mas yusumgud tul blong hem.

Pulum Man

6, 7. (a) ?Tok ya “pulum man” long Baebol i minim wanem? (b) ?Sipos yumi pulum ol man, olsem wanem samting ya i save halpem olgeta blong bilif long ol tijing blong Baebol?

⁶ Plante taem, buk blong Ol Wok i yusum tok ya pulum man long saed blong wok blong Pol blong tijim ol man. ?Olsem wanem fasin ya i joen wetem wok blong yumi blong mekem disaepol?

⁷ Buk blong Masta Vine, Expository Dictionary of New Testament Words, i talem se, long lanwis Grik long Baebol, tok ya “pulum man” i minim “winim tingting blong man” no “yusum ol tok we i mekem man i tingtinggud mo i mekem hem i tingbaot wanem we i stret, nao bambae hem i jenisim tingting blong hem from.” Stamba wod we tok ya i kamaot long hem, i givim tingting se man i trastem narafala. Ale, sipos yu pulum man blong bilif long wan tijing blong Baebol, yu pulum hem blong trastem tok ya, nao hem i stat bilif se tijing ya i tru. I klia se, sipos yu talemaot nomo ol tok blong Baebol long man ya, hemia i no naf blong mekem hem i bilif mo folem tok ya. Hem i mas suagud se tok we yu stap talem i tru, nating se hem i wan pikinini, wan man we i stap klosap long yu, wan man we yu wok wetem hem, no wan famle blong yu.​—2 Timoti 3:14, 15.

8. ?Yu save mekem wanem blong halpem man blong suagud se Tok blong Baebol i tru?

⁸ ?Olsem wanem yu save mekem man i suagud se Tok blong God we yu stap talemaot, hem i trutok? Taem Pol i toktok, hem i eksplenem ol poen i klia nomo, i pruvum ol tok blong hem, mo i soem se hem i rili bilivim tok ya wetem fulhat blong hem. Long rod ya, hem i pulum man blong jenisim tingting blong hem. * Taswe, i no naf we yu talem nomo se wan samting i tru. Yu mas pruvum samting ya. ?Olsem wanem blong pruvum? Fastaem, yu mas meksua se tok blong yu i stretgud wetem Baebol, i no kamaot long prapa tingting blong yu. Mo tu, yu mas yusum ol narafala tok blong pruvum ol tok blong Baebol we yu talemaot wetem fulhat blong yu. (Ol Proveb 16:23) Olsem nao, sipos yu talem se ol man we oli obei long God bambae oli laef long paradaes long wol ya, yu mas soem wan vas long saed ya, maet Luk 23:43 no Aesea 65:21-25. ?Yu save talem wanem blong pruvum se tok ya blong Baebol i tru? Yu save tokbaot sam samting long laef blong man ya. Maet yu mekem hem i tingbaot ol smosmol samting long laef we hem i haremgud long olgeta be hem i no pem, olsem naesfala kala blong skae taem san i stap godaon, gudfala smel blong ol flaoa, tes blong frut we i swit, no glad we hem i kasem taem i luk wan mama pijin i stap givim kakae long ol pikinini blong hem. Givhan long hem blong kasem save se, ol gudfala samting ya oli soem se Man we i Wokem yumi i wantem we yumi haremgud long laef long wol ya.​—Prija 3:11, 12.

9. ?Olsem wanem yumi save soem fasin we i no strong tumas long wok blong prij?

 ⁹ Taem yu traem pulum man blong bilif long wan tijing blong Baebol, yu mas lukaot se yu no bitim mak long fasin blong yu blong traem mekem hem i luksave. Sipos yu bitim mak, maet man ya i ting se fasin blong yu i strong tumas, nao hem i save satem tingting mo hat blong hem. Buk ya Ministry School i givim woning se: “Sipos man blong haos i tokbaot wan bilif we yu luksave se hem i laekem, nao yu yu talem stret long hem se bilif ya i giaman, ating hem i no save glad, nating se yu yusum plante vas blong Baebol blong pruvum tok blong yu. Olsem nao, sipos yu talem long wan man se plante lafet blong wol oli kamaot long ol hiten man, ating samting ya i no save jenisim filing blong man ya long saed blong ol lafet ya we hem i laekem. I moagud blong toktok long fasin we i no strong tumas.” ?From wanem tok blong yu i no mas strong tumas? Buk ya i talem se: “Taem fasin blong yu i no strong tumas, ol man oli glad blong storian, nao bambae oli kasem plante save we oli save tingting long hem biaen. Mo tu, rod bambae i open blong yu kambak mo storian bakegen. Fasin we i no strong tumas i save pulum man bigwan.”​—Kolosi 4:6.

Pulum Man Long Fasin We i Tajem Hat Blong Hem

10. ?Taem Pol i stanap fored long Agripa, wanem fastok blong hem?

¹⁰ Naoia, bambae yumi lukluk moa long tok blong Pol long Ol Wok japta 26. Makemgud fastok blong hem. Agripa i wan rabis man we i stap mekem nogud wetem sista blong hem Benis. Nating se i olsem, Pol i faenem wan gudfala samting blong talem long saed blong Agripa. Hem i se: “King Agripa. Mi mi luk olsem bigfala laki blong mi tede, from we yu yu stap, nao mi mi gat janis blong talemaot ansa blong mi long fes blong yu, from ol poen ya we ol laen blong Isrel oli stap talem agens long mi. Tok ya i tru tumas, from we yu yu savegud ol kastom mo fasin blong yumi ol laen blong Isrel. From samting ya, mi askem long yu blong yu letem tingting blong yu i longfala, blong harem olgeta tok blong mi.” ​—Ol Wok 26:2, 3.

11. ?Olsem wanem tok blong Pol i soem respek long Agripa, mo wanem gudfala frut i kamaot from?

¹¹ ?Yu makem olsem wanem Pol i luksave hae posisen blong Agripa? Yes Pol i singaot hem se King. Hemia i soem respek. Pol i waes blong jusumgud ol tok we i givim ona long Agripa. (1 Pita  2:17) Hem i talem se Agripa i savegud ol kastom mo loa blong ol man Isrel we hem i rul long olgeta, mo se hem, Pol, i glad blong stanap fored long wan king we i gat plante save olsem. Pol i no mekem olsem we hem i gud moa long Agripa from we hem i Kristin be Agripa i no Kristin. (Filipae 2:3) Long defren fasin, Pol i askem long Agripa blong mekem tingting blong hem i longfala blong harem ol tok blong hem. Yes, Pol i talem ol tok we i mekem Agripa mo ol narafala we oli stap, oli glad blong lesin long hem. I olsem we hem i putum wan fandesen we i save bildimap tok blong hem long hem, mo hem i soem se i no wantem rao.

12. ?Long wok blong talemaot Kingdom, olsem wanem yumi save tajem hat blong man?

¹² Taem yumi stap talemaot Kingdom, stat long fastok go kasem lastok blong yumi, i gud yumi mekem olsem Pol, yumi traem tajem hat blong man. Yumi save mekem olsemia, taem yumi soem trufala respek long man we yumi stap prij long hem, mo taem yumi rili intres long laef blong hem mo ol tingting blong hem.​—1 Korin 9:20-23.

Yusumgud Tok Blong God

13. ?Olsem wanem blong pulum man blong tekem aksin, olsem Pol i bin mekem?

¹³ Pol i wantem pulum ol man blong oli tekem aksin blong folem ol tok we hem i stap talemaot. (1 Tesalonaeka 1:5-7) Taswe, hem i traem tajem hat blong olgeta, from we hat nao i pulum man blong tekem aksin. Ale, yumi lukluk bakegen long tok we Pol i talem long Agripa. Makemgud olsem wanem Pol i ‘tijim Tok blong God long fasin we i stretgud,’ taem hem i tokbaot sam samting we Moses mo ol profet oli bin talem.​—2 Timoti 2:15.

14. Eksplenem olsem wanem Pol i pulum Agripa wetem tok blong God.

¹⁴ Pol i save se Agripa i rili wan man Isrel, mo hem i gat save long saed blong skul blong ol man Jiu. Pol i tingbaot samting ya taem hem i talem se hem i stap talemaot “sem tok nomo we ol profet mo Moses tu oli talemaot fastaem bifo,” hemia long saed blong Mesaea we i ded mo i laef bakegen. (Ol Wok 26:22, 23) Nao Pol i askem stret long Agripa se: “King Agripa. ?Olsem wanem? ?Yu yu bilif long ol tok blong ol profet?” Agripa i no save ansa  long kwestin ya. Sipos hem i talem no, bambae hem i spolem gudnem we hem i gat olsem wan man Jiu we i bilif strong. Sipos hem i talem yes, hem i soemaot long fes blong ol man se hem i agri long aposol Pol, nao maet oli ting se hem i wan Kristin. Ale, wetem waes fasin, Pol i ansa long kwestin blong hem bakegen, i se: “Mi mi savegud we yu yu bilif long olgeta.” ?Hat blong Agripa i pulum hem blong talem wanem? Hem i se: “I no longtaem bambae yu pulum mi mi kam Kristin man.” (Ol Wok 26:27, 28, NW ) Nating se Agripa i no kam wan Kristin, be i klia se Pol i tajem hat blong hem wetem Tok blong God.​—Hibrus 4:12.

15. ?Olsem wanem Pol i stanemap wan kongregesen long Tesalonaeka?

¹⁵ ?Yu yu luk tufala fasin we Pol i yusum taem hem i talemaot gud nius? Hem i givim save, mo hem i pulum man. From we Pol i yusum tufala fasin ya blong ‘tijim ol man long Tok blong God long fasin we i stretgud,’ sam man oli bilif long tok blong hem. Samting ya i hapen long taon ya Tesalonaeka. Pol i go long haos prea long ples ya, blong faenem ol man Isrel mo ol man blong ol narafala laen we oli stap ona long God. Ol Wok 17:2-4 i talem se: “Pol i mekem olsem we i stap mekem oltaem, hem i stap go insaed long haos blong prea long ples ya. Hem i stap tri wik long taon ya, nao long tri Sabat dei, hem wetem olgeta oli stap mekem plante toktok from ol tok blong Baebol. Hem i stap talem long olgeta, we Baebol i talemaot i klia we Mesaea bambae i mas harem nogud long bodi blong hem gogo i ded, mo we God bambae i mekem hem i laef bakegen. . . . Sam long olgeta oli harem se tok ya i tru, nao oli [bilif].” Yes, Pol i pulum ol man ya. Hem i mekem olgeta oli tingting dip, i eksplenem ol samting i klia nomo, mo i yusum Baebol blong pruvum ol tok blong hem se Jisas nao i Mesaea we God i promes blong sanem hem i kam. ?Wanem frut i kamaot from? Hem i stanemap wan kongregesen long taon ya.

16. ?Olsem wanem blong faenem moa glad long wok blong talemaot Kingdom?

¹⁶ ?Olsem wanem? ?Yu yu save lanem blong pulum ol man taem yu eksplenem Tok blong God long olgeta? Sipos yu mekem olsem, bambae yu haremgud moa long wok blong prij, mo bambae yu glad moa blong tijim ol man long saed blong Kingdom blong God. Samting ya i hapen long plante pablisa finis, taem oli folem advaes ya blong yusum Baebol moa long wok blong prij.

17. Talem wan stori blong prij long ples blong yu no tokbaot stori long haf ya, blong soem se i gud blong yusum Baebol long wok blong prij.

¹⁷ Wan seket elda blong ol Witnes blong Jeova i raetem leta i kam se: “Naoia, plante brata mo sista oli karem Baebol long han blong olgeta taem oli stap prij. Samting ya i givhan long ol pablisa blong ridim wan vas long ol man. Mo fasin ya i givhan long man blong haos mo long pablisa tu, blong oli tingbaot wok blong prij olsem wan wok we i joen wetem Baebol, i no wetem ol buk mo magasin nomo.” Long sam kantri, maet i no stret blong holem Baebol long han, from sam kastom no from sam narafala samting. Nating se i olsem wanem, yu mas wantem se ol man oli save yu olsem wan man we i yusumgud Baebol blong pulum ol man blong lesin long tok blong Kingdom.

Semfala Tingting Olsem God Long Saed Blong Wok Blong Prij

18, 19. (a) ?Wanem tingting blong God long saed blong wok blong prij, mo from wanem yumi mas gat semfala tingting olsem hem? (b) ?Wanem samting bambae i givhan long yumi blong karem frut long ol visit blong yumi? (Lukluk bokis ya “?Olsem Wanem Blong Karem Frut Long Ol Visit?” long pej 16.)

¹⁸ Wan narafala rod blong kasem hat blong man, i blong gat semfala tingting olsem God long saed blong wok blong prij, mo blong gat longfala tingting. God i wantem se olgeta man “bambae oli save trutok blong hem.” (1 Timoti 2:3, 4) ?Yu tu yu wantem samting ya? Mo tu, Jeova i gat longfala tingting. Fasin ya i mekem se plante moa man oli gat janis blong tanem tingting blong olgeta.  (2 Pita 3:9) Taswe, taem yu faenem wan man we hem i glad blong lesin long tok blong Kingdom, maet yu mas gobak plante taem blong mekem intres blong hem i gru. I nidim taem mo longfala tingting blong yu luk sid blong trutok i gru. (1 Korin 3:6) Bokis we i joen wetem stadi ya, “?Olsem Wanem Blong Karem Frut Long Ol Visit?” i givim sam advaes blong mekem intres i gru. Yu mas tingbaot se, laef blong ol man i stap jenis. Oli stap fesem olkaen trabol mo plante defren samting i stap hapen long laef blong olgeta. Maet yu mas gobak plante taem blong faenem olgeta bakegen. Be hadwok blong yu bambae i no blong nating nomo. Yu yu wantem se oli gat janis blong harem tok blong God we i save sevem laef blong olgeta. Taswe, yu mas prea long Jeova God blong askem hem blong givim waes long yu, nao bambae yu yu naf blong pulum man blong harem tok blong Kingdom.

¹⁹ ?Taem ol Kristin wokman oli faenem wan man we i wantem save moa long saed blong Kingdom, oli mekem wanem? Nekis stadi bambae i givhan long yumi blong save.

[Futnot]

?Yu Yu Tingbaot?

• ?Wanem i mekem se King Agripa i lesin long tok blong Pol?

• ?Olsem wanem blong tajem hat blong man?

• ?Wanem samting bambae i givhan long yumi blong yusumgud Tok blong God blong kasem hat blong man?

• ?Olsem wanem blong gat semfala tingting olsem God long saed blong wok blong prij?

[Kwestin]

[Bokis/Foto blong pija long pej 16]

?Olsem Wanem Blong Karem Frut Long Ol Visit?

• Soem se yu rili intres long ol man wanwan.

• Tokbaot wan samting long Baebol we man i intres long hem.

• Mekem tingting blong man i rere from nekis visit.

• Gohed blong tingbaot man ya afta we yu lego hem.

• Gobak kwik blong mekem intres i gru, maet wan no tu dei biaen nomo.

• No fogetem se mak blong yu i blong statem wan Baebol stadi.

• Prea blong askem Jeova blong mekem intres blong man ya i gru.

[Tok blong pija long pej 15]

Pol i pulum hedgavman ya Festas mo King Agripa, blong tufala i lesin long tok blong hem