I No Longtaem Nao Bambae i No Moa Gat Trabol Long Wol

!SIPOS yu naf, yu traem tingbaot sipos i no gat man blong brekem loa long wol ya. Sipos i olsem, bambae i no moa nidim polis, ol kalabus, mo ol kot haos no ol jaj. Mo tu ol wanwan man long wol ya bambae oli respektem laef mo olting blong ol narafala. ?Olsem wanem? ?Yu ting se samting ya i had blong i kamtru? Maet yu yu gat tingting olsem, be hemia nao gudfala jenis we Baebol i promes se bambae i hapen. I gud yumi tingbaot wanem we Baebol i talem long saed blong fasin ya blong brekem loa mo ol narafala nogud samting long wol ya.

Long buk blong Ol Sam, yumi ridim se: “Bambae yu no jalus long ol man we oli stap mekem samting nogud. Nating we ol man nogud oli stap win, be bambae yu no harem nogud from. Olgeta ya bambae oli lus olsem gras we i drae long draetaem. Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:1, 2, 11) Tru ya, i no gat man bambae i blokem God blong mekem ol promes ya, mo ol narafala promes blong hem, oli kamtru.

Rod we God i yusum blong mekem ol blesing ya oli kamtru, hemia Kingdom. Jisas Kraes i tijim ol man blong hem blong prea from Kingdom ya blong i kam mo blong ‘olgeta man long wol oli mekem samting we God i wantem, olsem we olgeta long heven oli stap mekem.’ (Matiu 6:9, 10) Klosap nao, aninit long Kingdom, ol man bambae oli no moa tingbaot blong stil no blong mekem trabol from we bambae i no moa gat man i pua, i no moa gat man i harem nogud long paoa blong narafala man, mo i no moa gat man we i tingbaot hem wan nomo. Tok blong God i talem se: “Yu mekem we bambae i gat plante kakae long ples ya, we bambae ol hil oli fulap gud long hem.” (Ol Sam 72:16) Yes, Jeova God bambae i givim long ol man long wol ya plante gudgudfala samting we i no gat en blong hem. Mo tu, wol ya bambae i neva harem nogud long fasin ya blong brekem loa, from we ol man long wol ya bambae oli holemtaet lav we oli gat long God mo long ol man raonabaot long olgeta.