‘Tijim Tok Blong God Long Fasin We i Stret Gud’

“Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.”​—2 TIMOTI 2:15.

1, 2. (a) ?From wanem ol wokman oli nidim ol tul? (b) ?Ol Kristin oli gat wanem wok blong mekem, mo olsem wanem oli soemaot se oli stap lukaot Kingdom fastaem?

 OL WOKMAN oli nidim ol tul. Be i no naf we oli gat enikaen tul nomo. Oli nidim tul we i stret long wok blong olgeta. Mo oli mas yusum tul ya long fasin we i stret. Olsem nao, sipos yu stap bildim wan haos, nao yu wantem joenem tu timba, i no naf we yu gat wan hama mo sam nil. Antap long hemia, yu mas save olsem wanem blong kilim nil blong i go stret long wud, i no benben. Sipos yu no save yusum wan hama, bambae i had blong nilim wan wud, mo ating yu save kam kros from tu. Be taem yu save olsem wanem blong yusum ol tul, yu save mekem gudfala wok we yu haremgud long hem.

² Ol Kristin tu oli gat wan wok blong mekem. Hem i wan wok we i impoten tumas. Jisas Kraes i talem long ol man blong hem blong ‘lukaot kingdom fastaem.’ (Matiu 6:33, NW ) ?Olsem wanem yumi save mekem samting ya? Wan rod, hemia blong wok strong olsem we faea i laet insaed long yumi, taem yumi talemaot Kingdom mo mekem ol man oli kam disaepol blong Kraes. Wan narafala rod, i blong mekem olgeta tok we yumi talem long wok blong prij i stanap long Baebol. Namba tri rod, i blong gat ol gudfala fasin. (Matiu 24:14; 28:19, 20; Ol Wok 8:25; 1 Pita 2:12) Blong karem frut mo haremgud long Kristin wok ya, yumi nidim ol stret tul, mo yumi nidim blong save olsem wanem blong yusum ol tul ya. Long saed ya, aposol Pol i soem nambawan eksampol olsem wan Kristin wokman, mo hem i talem long ol narafala Kristin blong oli folem fasin blong hem. (1 Korin 11:1; 15:10) ?Ale, yumi save lanem wanem from Pol we i bin mekem sem wok olsem yumi?

Pol i Wok Olsem We Faea i Laet Insaed Long Hem

3. ?From wanem yumi save talem se aposol Pol i wok strong blong talemaot gud nius, olsem we faea i laet insaed long hem?

³ ?Pol i wanem kaen wokman? Hem i wok olsem we faea i laet insaed long hem. Yes, hem i wok strong oltaem blong talemaot gud nius long olgeta ples klosap long Mediterenian Si. Aposol ya we i neva kam slak, i talem from wanem hem i glad olwe blong talemaot Kingdom, i se: “Mi mi stap talemaot gud nius blong Kraes, be mi no gat raet blong tok  flas from samting ya. Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.” (1 Korin 9:16) ?Pol i wantem sevem laef blong hem nomo? Nogat. Pol i no wan man we i stap tingbaot hem wan fastaem. Hem i wantem se ol narafala tu oli kasem blesing from gud nius. Hem i raetem se: “Mi mekem olgeta samting ya from gud nius, blong bambae mi save seremaot gud nius ya wetem ol narafala man.”​—1 Korin 9:23, NW.

4. ?Wanem tul we ol Kristin wokman oli yusum moa?

⁴ Aposol Pol i gat tingtingdaon, hem i luksave se hem i no mas dipen long save mo waes blong hem nomo. Olsem we man blong wokem haos i nidim wan hama, Pol tu i nidim ol stret tul, blong hem i save putum trutok i go long hat blong ol man we oli lesin long hem. ?Wanem tul we hem i yusum moa? Hemia Tok blong God, Baebol. Sem mak tede, yumi yusum Baebol olsem bigfala tul blong halpem ol man blong oli kam disaepol blong Kraes.

5. ?Blong karem frut long wok blong prij, yumi mas mekem wanem moa, afta we yumi ridimaot ol vas blong Baebol?

⁵ Pol i save se, blong tijim ol man long Tok blong God long fasin we i stretgud, i no naf we hem i ridimaot sam vas blong Baebol long olgeta. Hem i mas “pulum” ol man. (Ol Wok 28:23) ?Olsem wanem Pol i mekem samting ya? Hem i yusum Tok blong God blong mekem ol man oli luksave mo oli bilif long trutok blong kingdom. Hem i mekem ol man oli tingting dip. Long Efesas, Pol i stap go long haos prea blong ol man Isrel blong tri manis, ‘i stap mekem plante toktok from we hem i wantem pulum olgeta blong oli bilif long kingdom blong God.’ Samfala, “hed blong olgeta i strong tumas, oli no save bilif long hem,” be samfala oli lesin. From wok blong prij we Pol i mekem long Efesas, ‘tok blong Jeova i goaot moa long evri ples, i kam strong moa oltaem.’​—Ol Wok 19:8, 9, 20.

6, 7. ?Olsem wanem Pol i leftemap wok blong prij, mo olsem wanem yumi save mekem i sem mak?

⁶ From we Pol i wok strong blong talemaot Kingdom, olsem we faea i laet insaed long hem, hem i ‘leftemap wok blong prij.’ (Rom 11:13, NW ) ?Olsem wanem hem i mekem olsem? Pol i no traem blong leftemap hem wan, mo hem i no sem tu blong mekem wok blong God. Long defren fasin, hem i tingbaot wok blong prij olsem wan bigfala ona. Pol i yusum Tok blong God long waes fasin mo wok blong hem i karem frut. Taem ol narafala Kristin oli luk frut ya, olgeta tu oli wantem traehad moa long wok blong prij. Long fasin ya, olgeta tu oli leftemap wok blong prij we Pol i mekem.

⁷ Yumi save mekem olsem Pol. Yumi save leftemap wok blong prij, sipos yumi yusum Tok blong God oltaem long fasin we i karem frut. Long olgeta haf blong wok blong prij, yumi mas traehad blong serem sam tok blong Baebol wetem ol man we yumi storian long olgeta. ?Olsem wanem yumi save mekem samting ya long fasin we i pulum olgeta blong bilif? Tingbaot tri impoten rod ya: (1) Yusum Baebol long fasin we i pulum ol man blong respektem tok blong hem. (2) Long kaen fasin, eksplenem tok blong Baebol mo soem olsem wanem tok ya i laenap wetem poen we yumi stap tokbaot. (3) Mekem man i tingting dip long ol tok blong Baebol, blong hem i save bilif long ol tok ya.

8. ?Wanem ol tul we oli givhan long yumi blong prij tede, mo olsem wanem yu bin yusum olgeta ya?

⁸ Tede, ol man blong talemaot Kingdom oli gat ol tul we Pol i no gat. Hemia ol buk, ol magasin, ol smosmol pepa we oli tokbaot Baebol, wetem ol kaset mo video kaset. Long ol yia jes afta long 1900, ol man blong prij oli yusum wan kad we oli givim long man blong i ridim, oli plei wan rikod long gramafon blong man i harem, oli toktok long laodspika we oli fasem long trak blong olgeta, mo oli toktok long radio. Ol samting ya i gud, be beswan tul blong yumi, hemia Baebol. Yumi mas yusumgud nambawan tul ya, long fasin we i stretgud.

Mekem Olgeta Tok Blong Yumi i Stanap Long Baebol

9, 10. ?Long saed blong fasin blong yusum Tok blong God, yumi lanem wanem long advaes we Pol i givim long Timoti?

⁹ ?Olsem wanem blong yusum Tok blong God olsem wan gudfala tul? Yumi mas folem advaes we Pol i givim long man we i wok wetem hem, Timoti: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.” (2 Timoti  2:15) ?Yumi mas mekem wanem blong “tijim ol man long trutok blong God long fasin we i stret gud”?

¹⁰ Tok ya “fasin we i stret gud,” i kamaot long wan Grik tok we i rili minim “katem stret” no “katem wan rod we i stret.” Tok ya i stap wan taem nomo long Grik haf blong Baebol, hemia long advaes ya we Pol i givim long Timoti. Semfala tok ya, oli bin yusum long taem bifo, blong tokbaot wok blong brekem graon long plantesin, folem wan stret laen. Sipos wan man i pulum aean long fasin we i olbaot, nao ol laen we hem i katem oli kruked, samting ya i save mekem hem i sem long fes blong ol man. Pol i mekem Timoti i tingbaot se, blong kam ‘prapa man blong wok we i no gat sem long wok blong hem,’ hem i no mas gowe nating long ol trufala tijing blong Baebol. Hem i no mas talemaot ol prapa tingting blong hem. Hem i mas yusum Baebol nomo blong prij long ol man mo tijim olgeta. (2 Timoti 4:2-4) Long rod ya, ol man we hat blong olgeta i stret bambae oli kasem tingting blong Jeova, i no ol waes blong man. (Kolosi 2:4, 8) Samting ya i sem mak tede.

Fasin Blong Yumi i Mas Gud

11, 12. ?Olsem wanem ol fasin blong yumi i joen wetem wok ya blong tijimgud ol man long Tok blong God?

¹¹ Blong tijim man long Tok blong God long fasin we i stretgud, i no naf blong talemaot ol trutok long hem nomo. Fasin blong yumi i mas laenap wetem Tok blong God. Yumi “stap joen wetem God blong mekem wok blong hem,” taswe yumi no mas gat tu fes. (1 Korin 3:9) Tok blong God i talem se: “Yufala i save tijim ol narafala man. ?Be from wanem yufala i no save tijim yufala bakegen? Yufala i stap talem long olgeta se, ‘Bambae yu no mas stil.’ ?Be from wanem yufala i stap stil? Yufala i stap talem se, ‘Bambae yu no mas stilim woman blong narafala man.’ ?Be from wanem yufala i stap stilim woman? Yufala i stap lukluk nogud long ol narafala god, se oli rabis. ?Be from wanem yufala i stap stilim ol samting long ol haos blong wosip blong olgeta?” (Rom 2:21, 22) Taswe, blong tijim ol man long Tok blong God long fasin we i stretgud, ol wokman blong God tede oli mas folem advaes ya: “I nogud yu ting se save ya blong yu naoia, hem i naf blong givhan long yu. Yu mas trastem  Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”​—Ol Proveb 3:5, 6.

¹² ?Wanem frut i save kamaot taem yumi tijim ol man long Tok blong God long fasin we i stretgud? Tingbaot bigfala paoa we Baebol i save gat long laef blong ol man we hat blong olgeta i stret.

Tok Blong God i Save Jenisim Laef Blong Man

13. ?Wanem i save hapen long laef blong man we i folem Tok blong God?

¹³ Taem ol man oli lanem blong trastem Tok blong God, tok ya i save gat bigfala paoa long olgeta, i save givhan long olgeta blong mekem ol bigbigfala jenis long laef blong olgeta. Long taon ya Tesalonaeka, Pol i luk olsem wanem tok blong God i wok, i jenisim laef blong plante man we oli kam Kristin. Taswe, hem i talem long olgeta se: “I gat wan narafala samting tu we oltaem mifala i stap talem tangkiu long God from. Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret. Mo God i stap wok yet long laef blong yufala ya we i bilif long hem.” (1 Tesalonaeka 2:13) Long tingting blong ol Kristin ya​—mo ol narafala trufala man blong Kraes— waes blong man i nating nomo, waes blong God i antap olgeta. (Aesea 55:9) Taem ol man Tesalonaeka oli ‘kasem tok ya blong gud nius, i tru we oli kasem plante trabol, be tabu spirit i mekem olgeta oli harem gud tumas.’ Yes, oli soem gudfala eksampol long ol narafala we oli bilif.​—1 Tesalonaeka 1:5-7.

14, 15. ?Paoa blong Tok blong God i bigwan olsem wanem, mo from wanem?

¹⁴ Tok blong God i gat bigfala paoa, olsem we Jeova, Stamba blong tok ya, i gat bigfala paoa. Tok ya i kamaot long “God ya we i laef.” Taem hem i tok, ‘olgeta samting long skae oli kamaot.’ Tok blong hem i ‘mekem evri samting we hem i sanem hem blong i mekem.’ (Hibrus 3:12; Ol Sam 33:6; Aesea 55:11) Wan man blong hae save long saed blong Baebol i talem se: “God i no save seraot long Tok blong hem. Hem i no save go stap longwe long tok ya, olsem we tok ya i no blong hem. . . . From samting ya, tok blong God i no wan samting we i ded, olsem we i lus nomo afta we hem i talem; tok ya i wan nomo wetem God ya we i laef.”

¹⁵ ?Paoa blong Tok blong God i bigwan olsem wanem? I bigwan bitim mak. Taswe Pol i raetem se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.”​—Hibrus 4:12.

16. ?Tok blong God i save jenisim laef blong man olsem wanem?

¹⁶ Tok blong God long Baebol i “sap we i sap i winim naef blong faet ya we i sap tu saed.” I no gat wan tul blong man we i sap olsem Tok blong God. Tok ya i save go insaed olgeta long tingting mo hat blong man, i save jenisim tingting mo ol samting we man i laekem, i save mekem hem i kam wan wokman we i folem ol fasin blong God mo we God i glad long hem. !Man, tul ya i rili gat paoa!

17. Eksplenem bigfala jenis we Tok blong God i save mekem long laef blong man.

¹⁷ Tok blong God i mekem trufala fasin blong man i kam long klia ples, i no fasin we man i ting se hem i gat, no fasin we hem i soemaot long fes blong ol narafala. (1 Samuel 16:7) Wan rabis man i save kavremap fasin blong hem, i save mekem olsem we hem i kaengud, mo we i onagud long God. Ol man olsem oli giaman from we oli wantem go moa long ol rabis wok blong olgeta. Ol man we oli gat flas tingting, oli save mekem olsem we oli gat tingtingdaon, be long hat blong olgeta, oli wantem tumas we ol man oli leftemap olgeta. Tok blong God i save soemaot wanem i rili stap long hat blong man. Nao man we i gat tingtingdaon, Tok blong God i gat paoa blong givhan long hem blong finis long olfala laef blong hem mo ‘kam niufala man. Bambae ol man oli luksave se laef blong hem i folem trutok, mo i stret gud, i tabu.’ (Efesas 4:22-24) Mo tu, man we i gat fasin sem, ol tijing blong Baebol oli save jenisim fasin blong hem, blong i kam wan Witnes blong Jeova we i no fraet nating, wan man we i wok strong blong talemaot Kingdom, olsem we faea i laet insaed long hem.​—Jeremaea 1:6-9.

18, 19. Tokbaot ol stori long ol haf ya no wan stori blong prij long ples blong yu, we i soem se trutok blong Baebol i save jenisim tingting blong man.

¹⁸ Long evri ples, paoa blong Tok blong God i  stap mekem laef blong plante man i kamgud. Tingbaot samting we i hapen long Phnom Penh, Kambodia. Long ples ya, ol man blong talemaot Kingdom oli stap go tu taem evri manis blong prij long provins blong Kompong Cham. Ale, wan woman pasta long ples ya i harem ol nogud tok we ol narafala pasta oli talem agens long ol Witnes blong Jeova, nao hem i putum wan stret taem blong storian wetem ol Witnes long nekis visit blong olgeta. Hem i askem fulap kwestin long ol Witnes long saed blong ol lafet blong wol, mo hem i lesingud taem oli yusum Baebol blong givim ansa mo mekem hem i tingting dip. Biaen, hem i talem se: “!Naoia mi save se tok we ol narafala pasta ya oli stap talem i no tru! !Oli talem se yufala i no stap yusum Baebol, be tede yufala i yusum Baebol nomo!”

¹⁹ Woman ya i gohed blong storian evritaem wetem ol Witnes, hem i no wantem save long ol man we oli tok long hem se bambae hem i lusum wok blong hem olsem pasta. Hem i tokbaot ol storian ya long wan fren blong hem, nao ol Witnes oli stat mekem Baebol stadi long fren ya tu. Fren ya i laekem tumas ol samting we hem i stap lanem, ale wan dei, taem hem i stap long wan sevis long jos, hem i girap i talem se: “!Yufala i kam, ol Witnes blong Jeova bambae oli mekem Baebol stadi long yufala!” Smoltaem biaen, woman ya we fastaem hem i wan pasta, wetem sam narafala man bakegen, oli singaot ol Witnes blong Jeova blong oli kam mekem Baebol stadi long olgeta.

20. ?Olsem wanem laef blong wan woman Gana i soem se Tok blong God i gat paoa?

²⁰ Samting we i kamaot long laef blong wan woman Gana, nem blong hem Paulina, i soem tu se Tok blong God i gat paoa. Wan Witnes we i stap talemaot Kingdom fultaem i mekem Baebol stadi long Paulina, long buk ya Save Blong Lidim Yu Long Laef We i No Save Finis. * Paulina i luksave se laef blong hem i mas jenis, from we man blong hem i gat tu waef, mo Paulina nao i wan long tufala ya. Be man blong Paulina mo ol famle blong hem oli agensem hem bitim mak. Bubu man blong Paulina we i jaj long hae kot mo elda blong jos, i traem pulum Paulina blong lego niufala bilif blong hem. Man ya i yusum Matiu 19:4-6, be i eksplenem ol vas ya long fasin we i no stret. From we hem i wan jaj, hem i tok strong blong traem fosem Paulina blong lesin long hem. Be Paulina i luksave hareap se man ya i stap mekem i sem mak olsem Setan, we hem i twistim ol tok blong Baebol blong traem pulum Jisas Kraes. (Matiu 4:5-7) Paulina i tingbaot ol klia tok blong Jisas long saed blong mared, se fastaem God i wokem tu man, wan we i man mo wan we i woman, nao tufala i kam olsem wan bodi nomo. God i no wokem wan man mo tu woman, nao trifala i kam olsem wan bodi, nogat. Ale, hem i holemstrong long disisen blong hem, mo afta we sam taem i pas, oli givim wan kastom divos long hem. Smoltaem biaen, Paulina i kam wan hapi woman blong talemaot Kingdom mo i tekem baptaes.

Gohed Blong Tijim Tok Blong God Long Fasin We i Stretgud

21, 22. (a) ?Yumi mas gat strong tingting blong mekem wanem long wok blong talemaot Kingdom? (b) ?Bambae yumi tokbaot wanem long nekis stadi?

²¹ Tok blong God, Baebol, i wan tul we i gat bigfala paoa. Yumi save yusum tul ya blong halpem ol narafala blong jenisim laef blong olgeta mo kam klosap long Jeova. (Jemes 4:8) Ol gudfala wokman oli yusum ol tul blong mekem gudfala wok. Long sem fasin, yumi mas gat strong tingting blong yusum Baebol long fasin we i stretgud, long wok blong talemaot Kingdom we God i putum long han blong yumi.

²² ?Olsem wanem blong yusumgud Baebol long wok blong mekem disaepol? Wan rod, yu mas kam wan tija we yu save pulum man blong bilif long Tok blong God. Plis ridim nekis stadi, we i tokbaot sam rod blong tijim ol narafala mo blong givhan long olgeta blong oli bilif blong tok blong Kingdom.

[Futnot]

?Yu Yu Tingbaot?

• ?Wanem ol tul we ol man blong talemaot Kingdom oli save yusum?

• ?Long wanem rod Pol i givim gudfala eksampol long ol man blong talemaot Kingdom?

• ?Olsem wanem blong tijim ol man long Tok blong God long fasin we i stretgud?

• ?Tok blong Jeova, Baebol, i wan tul we paoa blong hem i bigwan olsem wanem?

[Kwestin]

[Tok blong pija long pej 10]

Sam tul we ol Kristin oli yusum long wok blong talemaot Kingdom