“!Tok Blong God i Rili Gat Paoa!”

“TOK blong God i wan samting we i laef, mo i stap wok.” (Hibrus 4:12) Long 2003 Calendar of Jehovah’s Witnesses i tokbaot laef blong sikis man mo woman long ol defren ples long wol. Laef blong olgeta i olsem pruf se Tok blong God i rili gat paoa. Aninit long wan smol stamba tok se “Bifo Mo Afta,” kalenda ya i soem olsem wanem wok we ol Witnes blong Jeova oli mekem blong tijim man, i halpem ol man ya blong kam gud moa long fasin blong olgeta, mo blong lego ol fasin blong laef we oli rabis olgeta. Mo i soem tu olsem wanem tijing ya i mekem famle blong ol man mo woman ya i joengud, mo i givhan long ol man ya blong kam ol fren blong God.

Samfala oli raetem leta i kam long mifala blong talem tangkiu from kalenda ya blong 2003. Hemia toktok blong sam long ol leta ya:

“Kalenda ya i soem long olgeta trufala Kristin se i gat plante man mo woman olsem olgeta, we oli bin faet strong blong holem trutok ya we oli bilif long hem. Ol pija long kalenda ya bambae oli pulum olgeta blong tingbaot ol bigfala jenis we samfala oli bin mekem long laef blong olgeta.”​—Steven, Yunaeted Stet.

“Mi wantem raetem smol toktok ya blong talem long yufala se kalenda ya blong 2003 i rili tajem hat blong mi. I no gat wan kalenda yet we i kasem filing blong mi olsem hemia. Bambae mi putum ol laef stori ya wetem ol narafala buk we mi karem olgeta oli go long wok blong prij. Ale, bambae mi soem ol trufala stori ya long ol man, blong pruvum se Baebol i save gat bigfala paoa long laef blong yumi.”​—Marc, Beljiom.

“Kalenda ya i tajem hat blong mi. Ol filing blong mi oli kam antap bigwan, taem mi ridim mo mi luk olsem wanem Jeova i jenisim laef blong ol man ya. From samting ya, mi wantem gohed moa blong jenisim laef blong mi tu. Naoia, tingting blong mi i strong moa bitim bifo se mi rili pat blong wan famle blong ol brata we oli stap long evri ples long wol.”​—Mary, Yunaeted Stet.

“Taem Jisas i luk ol man we oli hanggri long saed blong spirit, hem i sore long olgeta. Tangkiu we yufala i folem fasin blong Jisas taem yufala i putum ol trufala stori ya long kalenda blong 2003. I neva gat wan kalenda we i bin mekem mi mi krae olsem hemia.”​—Cassandra, Yunaeted Stet.

“Taem mi mi gat 11 yia nomo, mi stat smok. Biaen, mi yusum drag. Plante taem mi tingting blong kilim mi wan i ded. Taem mi kasem save long Jeova, mi lego ol nogud fasin ya. Kalenda ya i impoten tumas long mi. Eksampol blong ol brata mo sista blong mi we oli stap long evri ples long wol, i mekem mi mi strong. Naoia mi save se mi no stap faet mi wan nomo, mo samting we i moa impoten hemia se mi mas lavem Jeova mo mekem wok blong hem wetem fulhat blong mi.”​—Margaret, Polan.

“!Tru ya, Tok blong God i rili gat paoa! Taem mi kasem kalenda blong 2003, mi no save holembak wota blong ae blong mi. Ol stori ya wetem ol pija we oli stap, oli mekem bilif blong mi i strong we i strong.”​—Darlene, Yunaeted Stet.

“Fasin blong laef blong ol man ya bifo, klosap i sem mak long laef blong mi bifo. Jeova i givim paoa long mi blong mi lego sam fasin we fastaem i luk olsem se i no gat rod blong winim. Tangkiu tumas blong raetem ol laef stori olsem.”​—William, Yunaeted Stet.