Wan Kwestin

?Wanem tingting blong wan Kristin long saed blong ol ston blong makem dei we man i bon long hem?

Long kalja blong sam man, ol man oli makem ol manis wetem sam spesel ston, sipos yu bon long wanem manis, be i gat wan ston we i spesel long yu. Sipos wan Kristin i wantem werem wan ring we i gat wan sas ston long hem, hemia i prapa disisen blong hem wan. (Galesia 6:5) Blong mekem disisen ya, i gat sam impoten samting blong tingbaot.

Buk ya Encyclopaedia Britannica i talem se ston ya blong makem taem we man i bon, hem i “wan sas ston we i joen wetem dei we wan man i bon, mo oli ting se taem man ya i werem ston ya long bodi, ston ya bambae i karem gud helt no gudlak i kam.” Buk ya i talem tu se: “Ol man we oli lukluk ol sta blong save fiuja, oli talem se i gat sam sas ston we man i save yusum blong kasem paoa long ples blong ol spirit man.”

Long taem bifo, plante moa man bitim tede, oli gat bilif ya se sipos man i werem sas ston we i joen wetem dei we hem i bon long hem, sas ston ya i save karem gudlak long hem. ?Wan trufala Kristin i save bilif long samting ya? Nogat, from we hem i luksave se Jeova i agensem ol man we oli putum tras long ‘god we i bos long ol samting we i stap kamtru long laef blong man,’ no god blong gudlak.​—Aesea 65:11.

Long wan taem long histri blong man, we oli kolem Medel Ejes, * ol kleva oli jusum ol sas ston blong makem long ol manis long wan yia. Oli pulum ol man blong oli werem ol sas ston ya blong manis we oli bon long hem, from we oli se ston ya bambae i lukaot long man ya blong i no kasem trabol. Be Baebol i talem se i rong blong ol Kristin oli folem ol man we oli stap talemaot fiuja.​—Dutronome 18:9-12.

Mo tu, i no stret we ol Kristin oli makem wan ring se hem i spesel samting from we sas ston long hem i makem dei we oli bon long hem. Ol Witnes blong Jeova oli no mekem lafet blong betde. Hemia from we lafet ya i leftemap wan man nomo, mo i gat tu betde nomo we Baebol i tokbaot, hemia betde blong ol haeman we oli no stap wosip long God.​—Jenesis 40:20; Matiu 14:6-10.

Sam man oli ting se taem yu werem wan ring we i gat ol sas ston long hem, ston ya i save mekem yu yu gat ol gudfala fasin. Be ol trufala Kristin oli no bilif long samting ya, from we oli luksave se blong ‘putum niufala fasin,’ oli nidim tabu spirit blong God mo oli mas folem ol rul blong Baebol.​—Efesas 4:22-24.

Samting we i impoten moa se, wanem nao i stap pulum man blong werem no blong no werem wan ring we i gat sas ston long hem. Wan Kristin i save askem long hem wan se: ‘?Mi mi stap werem ring ya from risen ya nomo se mi laekem naesfala ston ya, nating we ston ya i blong makem dei we wan man i bon long hem? ?No tingting we ol man oli gat long sas ston ya se i karem gudlak mo badlak, i gat paoa long mi?’

Wan Kristin i mas lukluk gud se wanem samting i pulum hem. Baebol i talem se, “samting we yu mas lukaot moa long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stamba blong laef.” (Ol Proveb 4:23, NW ) Taem Kristin i wantem mekem prapa disisen blong hem long saed blong ol ston ya we oli makem dei we man i bon long hem, bambae hem i harem gud moa sipos hem i stap tingbaot wanem samting we i stap pulum hem mo olsem wanem samting we hem i mekem i gat paoa long hem mo long ol narafala tu.​—Rom 14:13.

[Futnot]