Laef Stori

‘?Bambae Mi Save Givim Wanem Presen Long Jeova?’

MARIA KERASINIS I TALEM STORI YA

Taem mi gat 18 yia blong mi, papa mama blong mi i sem bigwan long mi, famle blong mi i no moa wantem luk mi, mo ful vilej i stap laf long mi. Oli traem plante defren samting blong brekem fasin blong mi blong stap tru long God: oli plis long mi, oli givim hadtaem long mi blong traem jenisim tingting blong mi, mo oli sakem sam strong tok blong mekem mi mi fraet​—be nogat, mi mi stap tru long God. Mi save se sipos mi stap holemtaet ol trutok blong Baebol, bambae God i blesem mi. Taem mi luklukbak long bitim 50 yia we mi bin wok blong Jeova, mi gat semfala tingting olsem man ya we i raetem Sam taem hem i se: “Hae God i stap mekem i gud tumas long mi. ?Bambae mi save givim wanem presen long hem?”​—Ol Sam 116:12.

MI MI bon long 1930, long Aggelokastro, wan vilej we i stap 20 kilometa longwe long wof blong Kengkria, long is saed blong Korin. Taon ya Korin nao hem i ples we oli stanemap faswan kongregesen blong ol trufala Kristin long faswan handred yia.​—Ol Wok 18:18; Rom 16:1.

Famle blong mi i gat wan kwaet laef. Papa hem i jif blong vilej, mo ol man oli respektem hem. Mi mi namba tri long faef pikinini. Papa mama blong mifala oli tijim mifala long Grik Otodoks Jos. Mi stap go long Lames evri Sande. Mi mekem ol saen long fored blong ol tabu pija, mi laetem ol kandel long ol smol haos wosip long vilej, mo mi mekem olgeta spesel seremoni blong jos. Plante taem, mi gat tingting blong kam wan sista blong Otodoks Jos. Be biaen, mi nao mi faswan memba blong famle we i mekem papa mama blong mi, tufala i harem nogud tumas.

Mi Glad Tumas Blong Save Trutok Blong Baebol

Taem mi gat raonabaot 18 yia blong mi, mi harem wan nius long saed blong Katina, hem i wan  sista blong man we i maredem sista blong mi, mo hem i laef long wan vilej klosap long mifala. Nius we mi harem se hem i stap ridim ol buk blong ol Witnes blong Jeova, mo hem i no moa go long jos. Mi mi wari taem mi harem nius ya, taswe mi mekem disisen blong halpem Katina blong hem i kambak long rod ya we, long tingting blong mi, hemia nao stret rod blong tekem. Ale taem Katina i kam visitim mifala, mi go wokbaot wetem hem, mo mi plan blong tekem hem i go long haos blong pris. Taem pris i statem storian, hem i sakem plante strong tok blong daonem ol Witnes blong Jeova, i kolem olgeta se oli ol man blong lego bilif blong jos we oli bin lidim Katina i go krangke. Storian i gohed blong tri naet. Taem pris i tok agens long ol tijing blong ol Witnes, Katina i yusum Baebol blong givim ansa long olgeta kwestin blong hem. Long en blong storian, pris i talem long Katina se hem i wan naesfala gel we i gat hed, taswe i moagud sipos hem i haremgud long laef blong hem naoia, mo hem i wet se hem i kam olfala blong bambae hem i soem intres long God.

Mi no talem wan samting long papa mama blong mi long saed blong storian ya, be long nekis Sande, mi no go long jos. Long medel dei, pris i kam stret long stoa blong mifala. Mi giaman se mi no go long jos from we mi mas stap long stoa blong givhan long Papa.

Pris i askem mi se: “?Hemia trufala risen, no ating gel ya i tanem tingting blong yu?”

Mi talem stret long hem se: “Ol bilif blong ol man ya oli moa gud i bitim ol bilif blong yumi.”

Pris i lukluk papa blong mi mo i talem long hem se: “Masta Economos, i moa gud yu sakemaot Katina long haos blong yu, bambae hem i spolem famle blong yu.”

Famle Blong Mi i Agensem Mi

Samting ya i hapen long en blong ol yia 1940, taem faet i stap gohed insaed long Gris. Papa i fraet se ami blong ol rebel i kam karemaot mi, taswe hem i mekem plan blong mi aot long vilej mo mi go stap wetem sista blong mi long vilej blong Katina. Long tufala manis we mi spenem long ples ya, mi kasem plante save we oli kamaot long Baebol. Mi harem nogud taem mi luk we plante tijing blong Otodoks Jos oli no stanap long Baebol. Mi luksave se God i no wantem we yumi yusum ol tabu pija blong wosipim hem, mo se plante kastom blong jos​—olsem fasin blong wosipim kros—​oli no kamaot long Kristin skul, mo yumi mas wosipim God “long spirit mo trutok” sipos yumi wantem se hem i glad long yumi. (Jon 4:23, NW; Eksodas 20:4, 5) !Antap long samting ya, mi lanem se Baebol i givim hop ya long ol man se bambae oli save laef long wol blong olwe! Ol sas trutok ya, hemia ol faswan blesing we Jeova i givim long mi.

Long semtaem, sista blong mi wetem hasban blong hem, tufala i luk we mi no moa mekem saen blong kros taem mi kakae, mo mi no moa prea long fored blong ol tabu pija. Wan naet, tufala i kilim mi. Long nekis dei, mi mekem disisen blong lego haos blong tufala mo mi go laef wetem anti blong mi. Hasban blong sista blong mi i talemaot samting ya long papa blong mi. Smoltaem biaen Papa i kam luk mi mo hem i krae, hem i traem jenisim tingting blong mi. Hasban blong sista blong mi i nildaon long fored blong mi, i wantem se mi fogivim hem, mo mi fogivim hem. Afta, oli talem long mi se mi mas gobak long jos, be mi stanap strong long disisen blong mi.

Taem mi gobak long vilej blong Papa, oli gohed blong traem mi. Mi no save storian wetem Katina, mi no gat wan buk blong ridim, mo mi no gat Baebol tu. Mi glad we mi glad taem wan kasen sista blong mi i traem halpem mi. Taem hem i go long Korin, hem i faenem wan Witnes, mo hem i kambak wetem buk ya “Let God Be True” mo wan kopi blong Kristin Grik Haf blong Baebol, we mi stat ridim long fasin haed.

Laef i Jenis Wantaem

Blong tri yia, oli gohed blong mekem bigfala trabol long mi. Mi no save luk no toktok wetem wan Witnes, mo mi no save kasem wan buk. Long taem ya, mi no save yet se sam bigfala jenis bambae oli kamaot long laef blong mi.

Papa i talem long mi se mi mas go long ples blong angkel blong mi long Tesalonaeka. Bifo we mi go long Tesalonaeka, mi go long wan stoa we oli somap klos long Korin, blong oli mekem wan kot blong mi. !Mi sapraes tumas taem mi luk se Katina i wok long stoa ya! Mitufala i glad tumas blong joen tugeta bakegen, from we mi no bin luk hem blong longtaem. Taem mitufala i aot long  stoa, mitufala i mitim wan naesfala yang man we i aot long wok, i stap gobak hom long wan baskel. Nem blong hem Charalambos. Afta we mi mo Charalambos, mitufala i savegud mitufala, mitufala i mekem disisen blong mared. Hemia raonabaot long taem ya tu, long Jenuware 9, 1952, we mi givim laef blong mi long Jeova mo mi tekem baptaes.

Charalambos i tekem baptaes bifo long mi. Hem tu i bin fesem fasin agens long famle blong hem. Charalambos i wok strong long wok blong prij. Hem i wok olsem man blong givhan long kongregesen mo hem i gat plante Baebol stadi. Smoltaem biaen, ol brata blong hem oli akseptem trutok, mo tede bighaf blong famle blong olgeta oli wok blong Jeova tu.

Papa blong mi i rili laekem Charalambos, taswe hem i agri se mitufala i mared, be i no bin isi blong pulum Mama blong akseptem mared ya. Nating se i olsem, mi maredem Charalambos long Maj 29, 1952. Faswan long ol brata blong mi wetem wan kasen brata blong mi, tufala nomo i kam long mared blong mi. !Long taem ya, mi no save yet se Charalambos i rili wan nambawan blesing long mi​—wan presen blong Jeova! From we mi mared long hem, mi yusum ful laef blong mi long wok blong Jeova.

Givim Paoa Long Ol Brata Blong Yumi

Long 1953, mi mo Charalambos mitufala i muv i go long Atens. Charalambos i wantem mekem moa long wok blong Jeova, taswe hem i lego bisnes blong famle blong hem mo i wok haftaem. Long aftenun, mitufala i go prij mo mekem plante Baebol stadi tugeta.

Gavman i putum tabu long wok blong prij blong mifala, taswe mifala i mas faenem wan rod blong gohed long wok ya wetem waes fasin. Eksampol, mifala i mekem disisen blong putum wan kopi blong Wajtaoa long windo blong stoa ya we hasban blong mi i wok haftaem long hem. Stoa ya i stap salem niuspepa long medel blong Atens. Wan polis ofisa i talem long mifala se i tabu blong salem magasin ya. Nating se i olsem, hem i askem wan kopi blong magasin ya, mo i go askem long sekiuriti ofis sipos mifala i gat raet blong yusum hem no nogat. Taem oli talem long hem se magasin ya i oraet nomo, polis ofisa i kambak blong talem nius ya long mifala. Taem ol narafala brata we oli gat wan stoa blong salem niuspepa oli harem nius ya, olgeta tu oli stat putum ol kopi blong Wajtaoa long ol windo blong stoa blong olgeta. Wan man we i kasem wan Wajtaoa long stoa blong mifala, i kam wan Witnes, mo tede hem i wan elda.

Mitufala i glad blong luk we smol brata blong mi tu i lanem trutok. Hem i kam long Atens blong stadi long haeskul blong wok olsem wan sela long ol bigfala sip we oli mekem bisnes, mo mifala i tekem hem i kam wetem mifala long wan asembli. Mifala i holem ol asembli long fasin haed long bus. Hem i laekem ol samting we hem i harem long asembli, be smoltaem biaen, hem i stat wokbaot long sip. Wan long ol trip blong hem i tekem hem i go long wan wof long Ajentina. Long ples ya, wan misinari i stap kam long ol sip blong prij, mo brata blong mi i askem ol magasin long hem. Mifala i glad we i glad taem mifala i kasem leta blong hem we i talem se: “Mi faenem trutok. Plis, sanem ol magasin long mi oltaem.” Tede, hem wetem famle blong hem oli stap mekem wok blong Jeova.

Long 1958, oli invaetem hasban blong mi blong wok olsem seket elda. Be long taem ya gavman i putum tabu long wok blong mifala mo i no isi blong prij, taswe plante taem, ol seket elda oli wok olgeta wan nomo, oli no visitim ol kongregesen wetem waef blong olgeta. Long Oktoba 1959, mitufala  i askem ol brata long branj ofis sipos mi mi save folem hasban blong mi, taem hem i go visitim ol kongregesen olsem seket elda. Oli talem yes. Mitufala i mas visitim mo leftemap tingting blong ol brata long ol kongregesen long medel mo long not blong Gris.

Ol trip blong mitufala oli no isi. I no gat plante rod we oli putum kolta long olgeta. Mitufala i no gat trak, taswe plante taem mitufala i tekem bas no mitufala i sidaon biaen long trak wetem ol faol mo ol narafala samting bakegen. Mitufala i werem ol but we oli wokem long plastik, blong mitufala i save wokbaot long sofmad. Long evri vilej i gat ol grup blong man we oli kasem trening olsem soldia, taswe mitufala i kam insaed long vilej long naet blong oli no askem kwestin long mitufala.

Ol brata oli glad tumas we mitufala i visitim olgeta. Plante blong olgeta oli wokhad olsem fama, be nating se wok ya i no isi, oli traehad blong kam long olgeta miting we mifala i holem let long naet long defdefren haos. Ol brata oli welkamem gud mitufala mo oli givim ol beswan samting we oli gat long mitufala, nating se oli no gat plante samting. Samtaem mitufala i slip wetem ful famle long wan rum nomo. Ol brata oli gat bilif, oli stanap strong oltaem, mo oli wokhad, mo samting ya tu i olsem wan sas blesing long mitufala.

Mekem Moa Long Wok Blong Jeova

Long Februari 1961, taem mitufala i stap long branj ofis long Atens, oli askem long mitufala sipos mitufala i wantem wok long Betel. Mitufala i givim semfala ansa olsem Aesea we i talem se: “!Mi ya mi save go! !Yu sanem mi!” (Aesea 6:8) Tu manis biaen, mitufala i kasem wan leta we i talem se mitufala i mas go long Betel. Taswe, long Mei 27, 1961, mitufala i stat wok long Betel.

Mitufala i laekem niufala wok blong mitufala, mo kwiktaem nomo mitufala i haremgud long Betel. Hasban blong mi i wok long Sevis Dipatmen mo long Sabskripsen Dipatmen, mo biaen hem i wok long Branj Komiti blong smol taem. Mi mekem plante defren wok long Betel. Long taem ya i gat 18 brata sista long famle long Betel, be blong klosap faef yia, i bin gat raonabaot 40 man from we oli mekem wan skul blong ol elda long Betel. Long moning, mi wasem plet, mi givhan long brata we i rerem kakae, mi mekem 12 bed, mo mi putum ol plet long tebol blong mifala i kakae long medel dei. Long aftenun, mi aenem ol klos, mi klinim ol toelet mo ol rum blong slip. Wan dei long wik mi wok long ples blong wasem klos tu. I gat plante wok, be mi glad blong givhan.

Mitufala i stap bisi oltaem long wok blong mitufala long Betel, mo long wok blong prij tu. Plante taem mitufala i mekem seven Baebol stadi. Long wiken, mi mi go wetem Charalambos taem hem i go givim tok long ol defren kongregesen. Mitufala i stap tugeta oltaem.

Mitufala i stadi Baebol wetem wan man mo waef blong hem, we tufala i holemstrong long Grik Otodoks Jos mo tufala i frengud wetem wan pasta we i lidim wan grup we oli stap lukaotem ol man we oli lego bilif blong jos. Long haos blong tufala, i gat wan rum we i fulap long tabu pija, insens i stap bon oltaem long rum ya, mo ful dei oli stap plei ol tabu miusik we oli kolem Byzantine. Blong sam taem, mitufala i visitim tufala long Tasde blong stadi long Baebol, mo fren blong olgeta we hem i pasta, i kam luk tufala long Fraede. Wan dei, tufala i askem long mitufala blong kam long haos blong tufala from we tufala i gat wan sapraes blong soem long mitufala. Faswan samting we tufala i soem long mitufala, hemia rum ya. Tufala i bin sakemaot olgeta tabu pija, mo mekem rum ya i niuwan. Tufala i gohedgud long saed blong spirit mo tufala i tekem baptaes. Long olgeta man we mitufala i bin stadi Baebol wetem olgeta, i gat  raonabaot 50 we oli givim laef blong olgeta i go long Jeova mo oli tekem baptaes.

Mitufala i gat janis blong joen wetem sam tabu brata, mo mi harem se hemia wan spesel blesing we mi kasem. Taem ol brata blong Hed Kampani, olsem Brata Knorr, Brata Franz, mo Brata Henschel, oli kam visitim mifala, oli leftemap tingting blong mifala bigwan. Mi wok long Betel blong 40 yia finis, mo mi harem yet se wok ya i wan bigfala janis mo wan blesing long mi.

Mi Fesem Sik Mo Ded Blong Hasban Blong Mi

Long 1982 hasban blong mi i stat kasem sik ya we oli kolem Alzheimer. Long 1990, helt blong hem i kam nogud tumas mo oltaem i mas gat wan man i stap lukaot long hem. Long ol laswan eit yia we hem i laef, mitufala i no save aot long Betel. Plante gudfala brata long famle blong Betel, wetem sam elda tu, oli givhan long mitufala. Nating se oli givhan plante, be mi mas spenem plante aoa long dei mo long naet, blong lukaot long hasban blong mi. Samtaem i no bin isi nating, mo plante taem mi no save slip long naet.

Long Julae 1998, hasban blong mi, we mi laekem tumas, i ded. Mi harem nogud from we hem i no moa stap wetem mi, be nating se i olsem, mi glad from we mi save se hem i no lus blong olwe, mo bambae Jeova i tingbaot hem taem i mekem plante milian man oli laef bakegen.​—Jon 5:28, 29.

Mi Tangkiu From Ol Blesing Blong Jeova

Nating se mi lusum hasban blong mi, mi no stap mi wan nomo. Mi gat bigfala janis blong wok long Betel yet, mo mi haremgud from lav mo kaengud fasin we famle blong Betel i soem long mi. Long famle blong mi long saed blong spirit, i gat ol brata sista raonabaot long Gris tu. Nating se mi gat 70 yia, mi naf yet blong wok ful dei long kijin mo long ples blong kakae.

Long 1999, drim blong mi i kamtru taem mi visitim hedkwota blong ol Witnes blong Jeova long New York. Mi no save eksplenem ol filing we mi harem long taem ya. Visit ya i leftemap tingting blong mi mo bambae mi neva fogetem visit ya.

Taem mi luklukbak, mi ting se mi rili yusumgud laef blong mi. Beswan samting we yumi save mekem, hemia blong wok fultaem blong Jeova. Mi save talem se mi neva mestem wan samting. Wetem lav, Jeova i lukaotgud long mi mo long hasban blong mi, long saed blong spirit mo long saed blong bodi. Yes, long laef blong mi, mi kasem save from wanem man we i raetem Sam i bin askem kwestin ya: “Hae God i stap mekem i gud tumas long mi. ?Bambae mi save givim wanem presen long hem?”​—Ol Sam 116:12.

[Tok blong pija long pej 26]

Mi wetem Charalambos mitufala i stap tugeta oltaem nomo

[Tok blong pija long pej 27]

Hasban blong mi long ofis blong hem long branj ofis

[Tok blong pija long pej 28]

Mi harem se wok long Betel hem i wan bigfala blesing