?From Wanem Ol Man Oli Go Long Jos?

“NAMBA blong ol man Koria we oli Presbiterian i klosap fo taem antap long namba blong ol man Amerika we oli Presbiterian.” Tok ya, we i kamaot long niuspepa ya Newsweek, i mekem plante man oli sapraes tumas. Hemia from we plante man oli tingbaot Koria olsem wan kantri we tufala skul ya Konfusius mo Budis i bigwan. Tede, ol man we oli visitim kantri ya oli save faenem plante “Kristin” jos, mo plante taem ol jos ya oli gat ol red laet long olgeta we oli olsem saen blong kros. Long Sande, yu save luk ol grup blong tu no tri man oli wokbaot tugeta long rod wetem Baebol long han blong olgeta, oli stap go long jos. Long wan stadi we ol man oli mekem long 1998, oli faenem se klosap 30 pesen blong ol man Koria oli go long Skul Katolik no Protestan. Namba ya i bitim namba blong ol man we oli talem se oli Budis.

Long taem blong yumi, i no long plante kantri we yu save luk bigfala namba blong man olsemia we oli stap go long jos oltaem. Be, samting ya i stap hapen long Koria, mo tu long sam narafala kantri blong Esia, Afrika mo Latin Amerika. ?From wanem i gat plante man yet we oli talem se oli bilif long God, nating se bighaf blong ol man long wol oli lusum intres finis long saed blong skul? ?From wanem ol man ya oli go long jos?

Wan stadi we oli mekem i soem se bitim haf blong ol man Koria we oli go long jos oltaem, oli go blong faenem pis long tingting; 30 pesen i wantem kasem laef foreva afta we oli ded; mo 1 long evri 10 man ya oli wantem gat gud helt, kam rij, mo win long ol samting we oli mekem.

Long Jaena, sloslo ol man oli stap sakemaot tingting blong Komunis mo oli stap tingting moa blong mekem bisnes blong winim mane. Be oli no glad yet, taswe plante long olgeta oli stat go long jos blong lukaot samting long saed blong spirit we oli harem se oli nidim. Evri yia, oli wokem mo seremaot plante milian Baebol long Jaena, mo i luk olsem se ol man oli stap ridim Baebol long sem fasin we oli bin ridim smol red buk blong wan bigman blong Jaena we nem blong hem Mao Tse-tung.

Long Brasil, sam man Katolik, antap moa olgeta we oli yangfala yet, oli no glad long promes ya se bambae oli save harem gud long laef long fiuja nomo. Olgeta ya oli wantem harem gud long laef naoia. Niuspepa ya Tudo i talem se: “Long ol yia 1970, samting we i pulum hat mo tingting blong ol  man [blong oli go long jos], hemia tijing ya se jos i mas givhan long ol man we oli trabol, be samting we i pusum ol man tede [blong oli go long jos] hemia tingting ya se ol man oli wantem kasem plante samting.” Long wan stadi long Briten, oli askem ol man we oli go long jos oltaem, se wanem samting long saed blong jos blong olgeta we oli laekem tumas. Bighaf blong olgeta oli talem se oli laekem blong kampani wetem ol narafala long jos.

Olgeta samting ya oli soemaot se plante man oli bilif yet long God, be bighaf blong olgeta oli intres moa long ol samting we olgeta wan oli save kasem naoia, bitim we oli intres long laef long fiuja​—mo i bitim we oli intres long God tu. ?Yu ting se wanem samting i mas pusum yumi blong bilif long God? ?Baebol i talem wanem long saed ya? Yu save faenem ansa long tufala kwestin ya long haf we i kam biaen.