‘Luk Long Jeova Blong i Mekem Yu Yu Glad’

“Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.”​—OL SAM 37:4.

1, 2. ?Hu i Stamba blong trufala glad, mo olsem wanem King Deved i pulum yumi blong tingbaot trutok ya?

 “OLGETA we oli stap lukaot God from we oli no gat paoa blong hem long laef blong olgeta, oli save harem gud, . . . olgeta we oli gat sore long man, oli save harem gud, . . . olgeta we oli man blong mekem pis oli save harem gud.” I gat sikis narafala samting bakegen we Jisas i talem se i save mekem man i harem gud, no i glad. Hem i talem ol samting ya blong statem storian blong hem antap long hil, olsem we Matiu i raetem long Gospel blong hem. (Matiu 5:3-11) Ol tok ya blong Jisas oli mekem yumi luksave se i gat rod blong faenem glad.

² Long wan long ol Sam ya we Deved i raetem taem hem i king blong Isrel bifo, hem i pulum tingting blong yumi i go long Jeova olsem Stamba blong trufala glad. Deved i talem se: “Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.” (Ol Sam 37:4) ?Olsem wanem man i “glad” taem hem i save Jeova mo ol nambawan fasin blong hem? ?Olsem wanem save we yumi gat long ol wok we Jeova i mekem finis, mo we bambae i mekem yet, oli save mekem se bambae yu kasem “ol samting we yu yu wantem tumas”? Bambae yumi faenem ansa long ol kwestin ya taem yumi stadi long vas 1 kasem 11, long Sam namba 37.

“Yu No Jalus”

3, 4. ?Wanem advaes ya we Deved i givim long Ol Sam 37:1, mo from wanem i gud yumi traem folem advaes ya tede?

³ Yumi laef long wan taem we ‘laef long wol i kam strong tumas,’ mo rabis fasin i plante we i plante tumas. Yumi luk we ol tok ya blong aposol Pol oli tru se: “Ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.” (2 Timoti 3:1, 13) !I luk olsem se ol rabis man oli stap win mo oli gat plante samting, ale maet yumi harem nogud from! Laef blong olgeta i save pulum ae blong yumi, ale maet yumi no moa lukluk i go stret long ol samting long saed blong spirit. Ol faswan tok blong Sam namba 37 oli givim woning long yumi se yumi mas lukaot long denja ya, i se: “Bambae yu no jalus long ol man we oli stap mekem samting nogud. Nating we ol man nogud oli stap win, be bambae yu no harem nogud from.”

⁴ Evri dei ol nius long wol oli fulumap hed blong yumi wetem ol nogud fasin we oli stap hapen. I gat ol bisnes man we oli yusum kruked fasin blong winim mane, be i no gat man i faenemaot olgeta. Ol man blong stil mo kilim man oli spolem ol man we oli no naf blong blokem olgeta. I gat plante man we oli kilim man i ded be polis i no save faenem olgeta no ol kot oli no givim panis long olgeta. Yes, ol nogud samting olsem, we ol man oli mekem be oli no kasem panis from, oli save mekem yumi kam kros, mo tingting blong yumi i trabol, i no moa stap long pis.  Ating samtaem tu, yumi stap jalus long ol rabis man ya we i luk olsem se oli win gud long laef blong olgeta. ?Be olsem wanem? ?Sipos yumi stap harem nogud, samting ya bambae i stretem ol rong ya? ?Sipos yumi jalus long ol gudgudfala samting we i luk olsem se ol rabis man oli stap harem gud long hem, yu ting se samting ya bambae i jenisim panis we i mas kasem olgeta? !Nogat, hemia i no save jenisim wan samting! Tru ya, yumi no nid blong “jalus” long olgeta. ?From wanem?

5. ?From wanem ol man nogud oli sem mak nomo long ol smosmol tri?

⁵ Man blong raetem Sam ya i talem se: “Bambae oli lus olsem gras we i drae, bambae oli ded olsem ol smosmol tri we oli ded long draetaem.” (Ol Sam 37:2, Nyutesteman wetem Ol Sam long Bislama) Ol smosmol tri maet oli luk naes mo grin gud, be taem ples i drae, oli ded hareap nomo. Sem samting bambae i hapen long man nogud. I luk olsem se oli gat evri samting, be tingbaot se ol sas samting blong olgeta oli blong smoltaem nomo. Taem oli ded, olgeta samting ya we oli hivimap i no save halpem olgeta. Yes, ol man we oli traem ronwe long stret fasin, bambae oli mas kasem panis yet we i stret long olgeta. Pol i raetem se: “Ol man we oli stap mekem sin, pei blong olgeta, bambae oli ded from.” (Rom 6:23) Ol man nogud mo olgeta man we oli no mekem stret fasin bambae oli mas kasem “pei” blong olgeta yet. !Tru, laef blong ol man ya i blong nating nomo!​—Ol Sam 37:35, 36; 49:16, 17.

6. ?Ol Sam 37:1, 2 i tijim yumi long wanem?

⁶ ?Taswe, i stret blong harem nogud from ol sas samting we ol man nogud oli gat mo we i no longtaem bambae oli lus? Nogat. Lesen we yumi lanem long tufala faswan vas ya blong Sam namba 37, hemia se: Taem i luk olsem se oli win gud, yu no mas letem samting ya i pulum yu yu gowe long rod we yu jusum blong mekem wok blong Jeova. I moagud yu putum tingting blong yu i stap long ol blesing long saed blong spirit mo ol mak we yu save kasem long saed ya.​—Ol Proveb 23:17.

‘Trastem Jeova Mo Mekem Ol Fasin We i Gud’

7. ?From wanem yumi mas trastem Jeova?

⁷ Man blong raetem Sam ya, i pulum yumi blong mekem wan samting, i se: “Yu mas trastem [Jeova], mo yu mas mekem ol fasin we i gud.” (Ol Sam 37:3a) Taem yumi wari, no maet bilif blong yumi i seksek smol, tras blong yumi i mas stap strong long Jeova. Hem nao i save mekem yumi stap sef fulwan long saed blong spirit. Moses i raetem se: ‘Hae God i hae we i hae, mo hem i gat olgeta paoa. Mo man we i stap aninit long han blong hem, bambae hem i save lukaot gud long hem mo blokemgud hem.’ (Ol Sam 91:1) Taem tingting blong yumi i trabol from we nogud fasin i stap kam antap raonabaot long yumi, yumi nidim moa blong letem Jeova i halpem yumi. Tingbaot sipos yumi wokbaot nao yumi tanem leg blong yumi, ating bambae yumi glad sipos wan fren i kam givhan long yumi blong wokbaot. Long sem fasin, taem yumi stap traehad blong wokbaot folem fasin blong bilif, yumi nidim we Jeova i halpem yumi.​—Aesea 50:10.

8. ?Olsem wanem Kristin wok blong prij i save halpem yumi blong no harem nogud tumas from ol man nogud we oli gat plante samting?

⁸ I gat wan meresin blong winim tingting we i trabol from ol man nogud we oli gat plante samting long laef. Meresin ya, hemia blong stap bisi long wok blong lukaot ol man we fasin blong olgeta i olsem sipsip, mo halpem olgeta blong kasem stret save long stamba tingting blong Jeova. Taem rabis fasin i stap kam antap moa, yumi mas stap bisi fulwan long wok blong halpem ol man. Aposol Pol i talem se: “Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.” Beswan rod blong mekem ‘i gud’ long ol man, hemia blong serem nambawan gud nius blong Kingdom blong God wetem olgeta. Taem yumi prij long ol man, yumi stap ‘mekem sakrefaes we i leftemap nem blong God.’​—Hibrus 13:15, 16; Galesia 6:10.

9. ?Taem Deved i talem se yumi save “stap long graon ya,” hem i wantem minim wanem?

 ⁹ Deved i gohed se: ‘Yu save stap long graon ya mo harem gud from we yu yu sef,’ no from we yu yu holemstrong long fasin we i stret. (Ol Sam 37:3b) “Graon ya” we Deved i stap tokbaot, hemia kantri we Jeova i bin givim long Isrel, long Promes Lan. Taem Solomon i rul, boda blong kantri ya i stat long Dan long not, i go kasem Bereseba long saot. Hemia nao hom blong ol man Isrel. (1 King 4:25) Tede, nomata weples yumi stap long wol ya, yumi tingbaot taem ya we bambae fulwol i kam wan paradaes, hemia niufala wol ya we stret fasin nomo bambae i stap long hem. Be bifo long taem ya, yumi stap finis long wan sefples long saed blong spirit.​—Aesea 65:13, 14.

10. ?Wanem frut we yumi kasem taem yumi holemstrong long fasin we i stret?

¹⁰ ?Wanem frut i kamaot taem yumi holemstrong long fasin we i stret? Wan proveb long Baebol i mekem yumi tingbaot se: “Wan man we fasin blong hem i stret bambae hem i kasem plante blesing.” (Ol Proveb 28:20, NW ) Taem yumi strong blong talemaot gud nius, nomata wanem ples yumi laef long hem mo nomata wanem kaen man we yumi mitim, Jeova bambae i blesem yumi. Tingbaot eksampol blong Frank mo waef blong hem, Rose. Samwe long 40 yia bifo, tufala i go wok olsem paenia long wan taon long not blong Skotlan. Bifo long taem ya, smol man oli bin soem intres long trutok long ples ya, be biaen oli lego. Samting ya i no blokem Frank mo Rose. Tufala i stat prij mo pulum ol man oli kam disaepol. Tede, i gat wan bigfala kongregesen long taon ya. From we tufala i no lego wok ya, Jeova i rili blesem tufala bigwan. Be, Frank i gat tingting daon, hem i se: “Blesing we i bigwan moa, hemia se mitufala i stap yet long trutok mo Jeova i save yusum mitufala yet long ples we i gat nid.” Tru ya, taem yumi holemstrong long fasin we i stret, yumi kasem mo harem gud long plante blesing.

‘Luk Long Jeova Blong i Mekem Yu Yu Glad’

11, 12. (a) ?Olsem wanem yumi save ‘luk long Jeova blong i mekem yumi glad’? (b) ?Wanem mak we yu save traem kasem taem yu stadi yu wan, mo wanem frut we maet yu kasem from?

¹¹ Yumi wantem fren moa wetem Jeova mo gohed blong trastem hem. Blong mekem olsem, yumi mas ‘luk long Jeova blong i mekem yumi glad.’ (Ol Sam 37:4a) ?Olsem wanem blong mekem olsem? I nogud yumi tingting tumas long ol samting long laef blong yumi wan, nating se maet laef blong yumi i had. I moagud yumi putum tingting blong yumi i stap long Jeova. Wan rod blong mekem samting ya, i blong tektaem blong ridim Tok blong hem. (Ol Sam 1:1, 2) ?Yu yu glad taem yu ridim Baebol? Yu save glad sipos yu rid wetem tingting ya se yu wantem save Jeova moa. Afta we yu ridim wan haf blong Baebol, i gud yu stop smoltaem mo askem long yu wan se: ‘?Ol vas ya oli tijim mi se Jeova i olsem wanem?’ Maet i gud sipos yu holem wan notbuk no wan pepa i stap wetem yu taem yu ridim Baebol. Evri taem we yu stop blong tingbaot mining blong ol tok we yu jes ridim, raetemdaon sam tok we oli mekem yu yu tingbaot wan long ol nambawan fasin blong God. Long wan narafala Sam, Deved i singsing se: “Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.” (Ol Sam 19:14) Traehad ya we yumi mekem blong putum tingting blong yumi i stap long Tok blong God, i ‘stret gud long fes blong God,’ i mekem hem i glad, mo i save mekem yumi glad tu.

¹² ?Olsem wanem yumi save kasem glad taem yumi stadi mo tingting dip? I gud yumi putum mak ya se bambae yumi traem kasem moa save long saed blong Jeova mo ol fasin blong hem go kasem mak we yumi wan i naf blong kasem. Ol buk olsem Man We i Hae Moa Long Olgeta Man mo Draw Close to Jehovah * oli givim plante save long yumi we yumi save tingbaot, mo gat bigfala tangkiu moa long Jeova. Deved i talem long ol stret man se, Jeova bambae ‘i givim ol samting we oli wantem tumas.’ (Ol Sam  37:4b) Aposol Jon i sua long samting ya tu. Taswe, hem i raetem tok ya se: “Taem yumi kam long fes blong God long prea, yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi. Mo sipos yumi save se oltaem hem i stap harem prea blong yumi, oraet, yumi save se evri samting we yumi askem long hem, oli blong yumi finis.”​—1 Jon 5:14, 15.

13. ?Long ol yia we oli jes pas, wok blong talemaot Kingdom i stap gohed olsem wanem long plante kantri?

¹³ Ol man we oli holemstrong long God, oli wantem tumas blong luk taem ya we hae rul blong Jeova i win fulwan. (Ol Proveb 27:11) Ating yu yu glad tumas, taem yu harem nius se ol brata blong yumi oli stap karem plante frut long wok blong prij, long sam kantri we fastaem gavman i bos strong long laef blong ol man, no lida blong kantri i strong. Yumi stap wet blong luk sipos i gat sam narafala kantri yet we bambae oli givim fasin fri blong wosip long yumi, bifo we en blong wol ya i kam. Plante long ol man blong Jeova we oli laef long ol kantri we ol Kristin oli fri blong mekem wok blong olgeta, oli prij long ol studen, ol refuji, mo plante narafala man we oli aot long kantri blong olgeta oli kam stap long ol kantri ya blong smoltaem. Olgeta ya oli haremgud long fasin fri blong wosip we i stap long ol ples ya. Yumi wantem tumas se taem ol man ya oli gohom, oli mas gohed blong letem laet blong trutok i saenaot, nating sipos i luk olsem se kantri blong olgeta i stap long tudak we i tudak olgeta.​—Matiu 5:14-16.

‘Givim Laef Blong Yu Long Jeova’

14. ?Wanem pruf i stap blong soemaot se yumi save dipen long Jeova?

¹⁴ !I gud tumas blong save se i gat rod blong sakemaot ol wari mo ol samting we maet oli olsem hevi samting we yumi stap karem! ?Be rod ya i olsem wanem? Deved i talem se: “Yu mas givim laef blong yu long Hae God, yu mas trastem hem,” mo hem i ademap bakegen se, “nao bambae hem i halpem yu.” (Ol Sam 37:5) I gat plante brata mo sista insaed long ol kongregesen blong yumi we oli soemaot se taem yumi trastem Jeova, bambae hem i save halpem yumi. (Ol Sam 55:22) Tingbaot olgeta we oli wok fultaem blong Jeova, maet oli paenia, seket elda, misinari, no oli wok long Betel. Olgeta ya oli olsem pruf se Jeova i stap lukaotgud long ol man we oli trastem hem. I gud yu toktok wetem sam long olgeta ya, mo askem olgeta olsem wanem Jeova i bin halpem olgeta. Ating bambae yu harem plante stori we oli soemaot se nating se laef i had olsem wanem, be neva Jeova i save lego yumi. Oltaem nomo bambae hem i givim ol samting we yumi nidim.​—Ol Sam 37:25; Matiu 6:25-34.

15. ?Olsem wanem stret fasin blong ol man blong God i saenaot?

¹⁵ Taem yumi bilif se Jeova i gat paoa blong givhan long yumi mo yumi trastem hem fulwan, ale bambae yumi harem save ol tok ya blong man blong raetem  Sam: “Bambae hem i mekem ol stret fasin blong yu i klia olsem delaet, mo i mekem ol trutok we yu yu stap talem i saen olsem san long medel dei.” (Ol Sam 37:6) From we yumi Witnes blong Jeova, plante taem ol man oli jajem yumi rong. Be Jeova i stap openem ae blong ol man we hat blong olgeta i stret. Hem i halpem olgeta blong luksave se wok blong prij we yumi mekem i stanap long lav we yumi gat long Jeova mo long ol man. Mo tu, ol man ya bambae oli luk se ol fasin blong yumi oli stret, nating sipos plante narafala man oli stap talem se yumi narakaen. Taem ol man oli agensem yumi no oli kilim yumi, Jeova i givim paoa long yumi blong yumi stanap strong. From samting ya, stret fasin blong ol man blong God i saenaot klia nomo, olsem san long medel dei.​—1 Pita 2:12.

‘Mekem Tingting i Longfala . . . Wet Long Jeova’

16, 17. ?Ol Sam 37:7 i talem se naoia i taem blong wanem samting, mo from wanem?

¹⁶ Nekis tok blong man blong raetem Sam, hemia se: “Yu mas mekem tingting blong yu i longfala, mo yu mas wet long Hae God blong hem i givhan long yu. I nogud blong yu harem nogud taem ol narafala man oli stap win long ol rabis plan blong olgeta, nao oli stap kam rijman.” (Ol Sam 37:7) Long ples ya, Deved i wantem soemaot se i impoten blong gat longfala tingting mo wet se Jeova i tekem aksin. Nating se en blong wol ya i no kam yet, yumi no mas komplen from. Yumi gat janis blong luksave se fasin sore mo longfala tingting blong Jeova oli bigwan tumas, i bitim wanem we yumi bin tingbaot fastaem. I gud we naoia yumi soem se yumi tu yumi rere blong mekem tingting blong yumi i longfala mo wet, taem yumi stap bisi long wok blong talemaot gud nius bifo we en i kam. (Mak 13:10) Naoia yumi mas lukaot se yumi no hareap tumas blong mekem ol disisen we oli save karemaot glad blong yumi mo tekemaot yumi long sefples long saed blong spirit. Naoia i taem blong faet strong moa agensem ol fasin blong wol blong Setan we oli save spolem yumi. Mo naoia i taem blong holemtaet fasin klin mo no letem wan samting i spolem gudnem we yumi gat long fes blong Jeova. I gud yumi gohed blong ronemaot evri tingting we oli doti. I gud ol man oli lukaot long fasin blong olgeta taem oli kampani wetem ol woman, mo ol woman tu oli lukaot long fasin blong olgeta taem oli kampani wetem ol man. Mo tu, i gud we ol man oli holem stret fasin taem oli kampani wetem ol narafala man, mo taem ol woman oli kampani wetem ol narafala woman.​—Kolosi 3:5.

¹⁷ Deved i givim advaes ya se: “I nogud yu kros, i nogud yu faerap, i nogud yu wari. Ol samting ya i rod blong kasem trabol nomo. Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta.” (Ol Sam 37:8, 9) Yes, yumi save bilif fulwan se long taem we i stap kam​—we naoia i klosap tumas—​bambae Jeova i finisim rabis fasin long wol ya wetem olgeta man we oli stamba blong ol fasin ya.

“Bambae i No Longtaem”

18, 19. ?Ol Sam 37:10 i leftemap tingting blong yu olsem wanem?

¹⁸ “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta.” (Ol Sam 37:10) !Ol tok ya oli rili mekem yumi harem gud taem yumi stap kam klosap moa long en blong rabis wol ya mo en blong fasin blong stap independen long Jeova! Olkaen gavman we man i stanemap, oli no save rul gud. Naoia yumi kam klosap long taem we Jeova God bambae i rul bakegen, tru long Kingdom blong Hem long han blong Jisas Kraes. Kingdom ya bambae i tekova long olgeta samting long wol mo bambae i finisim ol man we oli agensem Kingdom blong God.​—Daniel 2:44.

¹⁹ Long niufala wol, taem Kingdom blong God i rul, bambae yu no moa save faenem wan “man nogud” i stap. Yes, long taem ya, eni man we i girap agensem Jeova bambae i lus wantaem. I no gat wan man i save laef i stap long niufala wol ya sipos hem i agensem hae rul blong God, no sipos hem i no wantem stap aninit long rul blong God. Olgeta man raonabaot long yu bambae oli gat sem tingting mo filing olsem yu we yu wantem mekem Jeova i glad. !Tingbaot! !Hemia i min se bambae yumi no moa nidim lok long ol doa, no fenis raon long haos! Bambae yumi harem se yumi sef. Bambae i no moa gat wan samting we i spolem tras we yumi gat long  narafala mo i no moa gat wan samting we i spolem glad blong yumi.​—Aesea 65:20; Maeka 4:4; 2 Pita 3:13.

20, 21. (a) ?Hu olgeta we Ol Sam 37:11 i talem se “tingting blong olgeta i stap daon,” mo oli faenem ‘pis’ long weples? (b) ?Wanem blesing we yumi save kasem sipos yumi folem fasin blong Jisas we i pija blong Deved?

²⁰ Ale, “ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:11a) ?Be hu ya ol man ya we “tingting blong olgeta i stap daon”? Tok ya we yumi tanem i kam ‘tingting we i stap daon’ i kamaot from wan narafala tok we rili mining blong hem se man “we i kasem kil, we narafala i bos antap long hem, no we narafala i daonem hem.” Yes, ol man we “tingting blong olgeta i stap daon” oli man we oli stap wet nomo long Jeova blong stretem ol rong we narafala i mekem long olgeta. “Nao bambae oli harem gud, from we oli stap gud, mo oli gat plante samting.” (Ol Sam 37:11b) Naoia finis yumi stap faenem pis insaed long trufala Kristin kongregesen we i olsem wan paradaes long saed blong spirit.

²¹ Nating se yumi stap fesem hadtaem yet, yumi givgivhan long yumi mo yumi leftemap tingting blong olgeta we oli harem nogud. From fasin ya, ol man blong Jeova oli faenem trufala glad. Ol brata we oli stap lukaot long ol sipsip blong God oli gat lav mo oli halpem yumi long saed blong spirit, mo samtaem long saed blong bodi tu. Oli halpem yumi blong stanap strong long hadtaem we yumi kasem from we yumi holemtaet stret fasin. (1 Tesalonaeka 2:7, 11; 1 Pita 5:2, 3) !Pis ya i wan sas samting! Mo tu, yumi gat hop blong kasem laef we i no save finis long Paradaes we bambae i kam. Taswe, i gud yumi folem fasin blong Jisas Kraes we Deved i olsem pija blong hem. Tingting blong Jisas i stap strong long Jeova, taswe hem i mekem wok blong hem gogo kasem en. (1 Pita 2:21) Sipos yumi mekem olsem, bambae yumi stap hapi, bambae yumi stap presem God blong yumi Jeova, we hem nao i stap mekem yumi glad.

[Futnot]

?Yu Yu Save Ansa?

• ?Wanem lesen we yu yu lanem long Ol Sam 37:1, 2?

• ?Olsem wanem yu save ‘luk long Jeova blong i mekem yu yu glad’?

• ?Wanem pruf i stap blong soemaot se yumi save trastem Jeova?

[Kwestin]

[Tok blong pija long pej 9]

Ol Kristin oli no ‘harem nogud from we ol man nogud oli stap win’

[Tok blong pija long pej 10]

‘Trastem Jeova mo mekem ol fasin we i gud’

[Tok blong pija long pej 11]

Blong luk long Jeova blong i mekem yu yu glad, traem lanem moa long saed blong hem

[Tok blong pija long pej 12]

“Ol man we tingting blong olgeta i stap daon, bambae oli tekem graon ya i blong olgeta”