Ol Tang Wota We Oli No Holem Wota

LONG taem blong Baebol, ol tang wota oli ol bigbigfala hol we ol man nomo oli digim long graon mo oli yusum blong holem wota i stap. I gat sam taem long Promes Lan, we ol man oli yusum ol tang ya nomo blong holem wota insaed long olgeta.

Taem profet Jeremaea i raetem tok blong God, hem i tokbaot ol tang wota olsem wan pijatok blong wan narafala samting, hem i se: “I gat tu sin we yufala i foldaon long hem. Faswan, yufala i gowe long mi, we mi mi olsem springwota, we i save givim laef, mo sekenwan, yufala i biaen long ol narafala god, we fasin ya i olsem tang we yufala i wokem be i brok, i no save holem wota.”​—Jeremaea 2:13.

Taem ol man Isrel oli lego God blong olgeta, hemia Jeova​—we hem i olsem “springwota, we i save givim laef”—​oli lukluk i go long ol ami blong ol hiten nesen we oli no strong, mo oli stat mekem wosip long ol giaman god we oli no gat paoa. Ol man Isrel oli ting se bambae oli save stap sef long ol ples ya, be olsem pijatok ya we Jeremaea i yusum, ol nesen ya mo ol god ya oli olsem tang we i no save holem wota. Yes bambae ol man Isrel oli no save stap sef mo kasem help long olgeta samting ya.​—Dutronome 28:20.

?Yumi save lanem samting long eksampol ya blong bifo? Olsem long taem blong Jeremaea, God ya we i stap oltaem, hemia Jeova, hem i stap yet olsem wan man ya nomo we i Stamba blong wota blong laef. (Ol Sam 36:9; Revelesen 4:11) Ol man long wol oli save kasem laef we i no save finis, long Jeova hem wan nomo, tru long Pikinini blong hem Jisas Kraes. (Jon 4:14; 17:3) Be, plante long ol man tede oli olsem ol man we oli laef long taem blong Jeremaea. Oli jus blong sakemaot tok blong God we i stap long Baebol mo tu oli spolem tok ya. Ale, oli putum tras blong olgeta long ol man blong politik se olgeta nao bambae oli fiksimap ol problem, mo oli putum tras long ol krangke toktok blong ol man we oli giaman nomo. Oli trastem ol save mo toktok we oli no givim ona long God nating. (1 Korin 3:18-20; Kolosi 2:8) ?Bambae yu yu trastem hu? ?Bambae yu trastem Jeova “springwota, we i save givim laef,” no bambae yu putum tras long ‘tang we i brok, we i no save holem wota’?

[Tok blong pija long pej 32]

Oli faenem smol aedol ya we hem i pija blong wan mama god long wan gref long Isrel

[Credit Line]

Photograph taken by courtesy of the British Museum