“Oltaem Yufala i Mas Talem Tangkiu Long God”

“Yufala i mas letem pis ya we Kraes i stap givim long yufala i holem tingting blong yufala. . . . Mo oltaem yufala i mas talem tangkiu long God.”​—KOLOSI 3:15.

1. ?Wanem i mekem se Kristin kongregesen i defren olgeta long wol ya we Setan i masta blong hem?

 LONG olgeta 94,600 kongregesen blong ol Witnes blong Jeova raon long wol, i gat plante man we oli stap talem tangkiu long God. Evri miting i stat mo i finis wetem wan prea, we long prea ya yumi talem tangkiu long Jeova from plante samting. Ol yangfala, ol olfala, ol niuwan mo olgeta we oli stap longtaem long trutok, oli joen wanples blong wosip mo oli glad blong stap tugeta. Plante taem yumi harem we oli talem “tangkiu” long narafala we i mekem i gud long olgeta, mo ol narafala ya we oli glad nomo blong mekem i gud long olgeta, oli ansa se “i oraet nomo.” (Ol Sam 133:1) !Hemia i defren olgeta long fasin blong plante man tede we ‘oli no save God, mo oli no save obei long gud nius,’ ale oli stap tingbaot olgeta nomo! (2 Tesalonaeka 1:8) Yumi stap long wan wol we ol man blong hem oli no gat tangkiu. !Yumi no sapraes long samting ya taem yumi tingbaot se Devel Setan nao hem i rabis god blong wol ya! Hem nao i stamba blong fasin ya we man i tingbaot hem wan nomo, hem nao we flas fasin mo stronghed fasin blong hem i stap bos long tingting mo fasin blong plante man tede.​—Jon 8:44; 2 Korin 4:4; 1 Jon 5:19.

2. ?Wanem woning we yumi mas lesin long hem, mo wanem kwestin we bambae yumi tokbaot?

² From we yumi stap long wol blong Setan, yumi mas lukaotgud we ol fasin blong wol ya oli no jenisim fasin blong yumi. Long faswan handred yia, aposol Pol i mekem ol Kristin long Efesas oli tingbaot se: “Bifo, yufala i stap holem ol fasin nogud blong wol ya, yufala i stap obei long Setan, we hem i jif blong ol devel, we oli stap olbaot long wol. Hem nomo i devel ya  we i stap mekem wok blong hem long ol man ya we oli no save obei long God. Mo bifo, mifala man Isrel tu i bin mekem ol samting we tingting blong mifala i wantem. Mifala i bin folem tingting nomo blong mifala, blong mekem ol samting we mifala i stap harem gud long hem. From samting ya, mifala i olsem ol narafala man nomo, bambae God i mas jajem mifala tu, se mifala i panis. Fasin blong yumi evriwan i sem mak nomo.” (Efesas 2:2, 3) Tok ya i stret tu long laef blong plante long yumi tede. ?Taswe, olsem wanem yumi save holem tingting ya se yumi tangkiu long God? ?Jeova i stap givhan long yumi olsem wanem? ?Wanem sam gudfala rod blong soemaot se yumi rili gat tangkiu?

Sam Risen Blong Tangkiu Long God

3. ?Yumi tangkiu long Jeova from wanem samting?

³ Tangkiu blong yumi i mas go long Jeova God from we olgeta samting we yumi kasem, we oli plante we i plante, oli kamaot long hem nomo. Hem i Wokem yumi mo i Givim Laef long yumi. (Jemes 1:17) Evri dei, yumi tangkiu long Jeova from we yumi gat laef. (Ol Sam 36:9) Raonabaot long yumi, yumi luk plante samting we Jeova i wokem, olsem san, mun, mo ol sta. Graon i fulap long olkaen minerol * we oli holem laef blong olgeta tri, anamol mo man. Win we yumi pulum, i fulap long ol gudfala gas we oli impoten tumas blong sapotem olgeta laef samting. Mo olgeta laef samting oli stap wok folem wan spesel rod we i mekem se laef long wol ya i no lus be i kam niuwan oltaem. Olgeta samting ya oli olsem pruf se yumi gat bigfala kaon long Papa blong yumi long heven we i laekem yumi tumas. King Deved i singsing olsem se: “Hae God, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu. Yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.”​—Ol Sam 40:5.

4. ?From wanem yumi mas tangkiu long Jeova taem yumi harem gud long kampani we yumi gat long ol kongregesen blong yumi?

⁴ I no gat wan paradaes yet long wol ya, be ol man blong Jeova oli stap harem gud finis long wan paradaes long saed blong spirit. Long ol Haos Kingdom blong yumi mo long ol asembli, yumi haremsave se ol frut blong tabu spirit oli stap wok long laef blong ol Kristin brata sista blong yumi. Taem ol Witnes oli prij long ol man we oli gat smol save long God no maet oli no save God nating, sam long olgeta oli tokbaot samting we Pol i raetem long leta blong hem i go long ol Kristin long Galesia. Fastaem, oli eksplenem long man se wanem ya ol “rabis samting we tingting” nomo i wantem, nao oli askem long man sipos hem i luk ol rabis samting ya raonabaot long hem. (Galesia 5:19-23) Plante man oli agri se ol rabis samting ya oli  kam antap plante long wol. Ale, taem ol man ya oli luk wanem ol frut we tabu spirit i save wokem long laef blong ol man mo taem oli kam long Haos Kingdom blong luk olsem wanem ol frut ya oli wok long laef blong yumi, plante taem oli luksave hareap nomo mo oli talem se: “Tru, God i stap long medel blong yufala long ples ya.” (1 Korin 14:25) Be ol frut blong tabu spirit oli no stap long Haos Kingdom blong yumi nomo. Nomata weples yumi go long wol, taem yumi mitim eniwan long olgeta sikis milian Witnes blong Jeova, bambae yumi faenem sem kaen glad ya. Yes, kampani blong olgeta ya i leftemap tingting, mo from samting ya, yumi tangkiu long Jeova. Jeova nao i givim tabu spirit ya we i stamba blong gudfala kampani ya.​—Sefanaea 3:9; Efesas 3:20, 21.

5, 6. ?Olsem wanem yumi save soem tangkiu from beswan presen ya we God i givim, hemia ransom?

⁵ Beswan presen we Jeova i givim long yumi, hemia Pikinini blong hem, Jisas, we i givim laef blong hem blong pemaot yumi. Aposol Jon i raetem se: “From we God i lavem yumi olsem, yumi tu i mas lavlavem yumi.” (1 Jon 4:11) Yes, yumi soem se yumi gat tangkiu from ransom ya taem yumi soem lav mo talem tangkiu long Jeova, mo tu, taem ol fasin we yumi mekem oli soem lav long narafala man.​—Matiu 22:37-39.

⁶ Yumi save lanem moa olsem wanem blong soem tangkiu sipos yumi tingbaot sam samting we Jeova i mekem long ol man Isrel bifo. Jeova i givim Loa long Moses, blong hem i givim long nesen blong Isrel. Long Loa ya, Jeova i tijim ol man blong hem long plante samting. From ‘Loa ya we i givim olgeta samting blong save, wetem olgeta trutok,’ yumi save lanem plante samting we bambae i halpem yumi blong folem advaes ya blong Pol se: “Yufala i mas talem tangkiu long God.”​—Rom 2:20, Nyutesteman wetem Ol Sam long Bislama; Kolosi 3:15.

Tri Lesen We Yumi Lanem Long Loa Blong Moses

7. ?Olsem wanem plan blong givim taet i openem rod long ol man Isrel blong soem tangkiu long Jeova?

⁷ Long Loa we God i givim long Moses, i gat tri rod we ol man Isrel oli save folem blong soem tangkiu from ol gudgudfala samting we Jeova i mekem long olgeta. Faswan rod, hemia taet. Long olgeta ten samting we ol man Isrel oli kasem long garen blong olgeta, oli mas givim wan i go long Jeova, tugeta wetem “evri namba ten anamol” blong olgeta. Namba ten blong ol samting ya ‘i tabu, i blong Jeova.’ (Levitikas 27:30-32) Taem ol man Isrel oli obei, Jeova i blesem olgeta bigwan. Jeova i talem se: “Yufala i mas tekem olgeta taet blong yufala i kam long haos blong mi, blong bambae i save gat plante kakae long hem. Sipos yufala i mekem olsem, bambae yufala i luk paoa blong mi, we bambae mi openem skae, mi letem olgeta gudgudfala samting i kam long yufala we i plante we i plante.”​—Malakae 3:10.

8. ?Wanem i mekem we fasin blong givim presen i defren long ol taet?

⁸ Namba tu rod we Jeova i stanemap, antap long hemia blong givim taet, hem i wan rod we i letem ol man Isrel oli jusum hamas samting we oli wantem givim olsem presen. Jeova i givim rul ya long Moses blong i talem long ol man Isrel, se: “Sipos yufala i gotru longwe, nao yufala i stap mekem garen, be taem yufala i stap tekemaot ol fas kakae blong hem, oltaem yufala i mas putum haf i tabu, i blong mi.” Sam long ol ‘fas bred we oli mekem long ol fas kakae ya,’ oli mas “givim haf” i go long Jeova olsem wan presen. Hemia wan rul we olgeta wetem ol pikinini blong olgeta mo olgeta we oli kamaot biaen long olgeta oli mas folem gogo i no save finis. Makem se long ples ya, Jeova i no  givim wan stret namba blong ol samting ya we oli mas givim. (Namba 15:18-21) Be taem ol man Isrel oli givim ol presen ya blong talem tangkiu, Jeova i talem se bambae hem i no save mestem blong blesem olgeta. Semfala plan ya i stap long tempol we Esikel i luk long vison blong hem. Yumi ridim se: “Taem ol fas kakae blong garen oli raep, olgeta nao [ol pris] oli mas kasem ol beswan blong olgeta, mo evri samting we ol man oli givim long mi i blong olgeta. Mo oltaem, sipos man i mekem bred, hem i mas givim ol faswan tu long olgeta, nao bambae mi blesem hom blong man ya.”​—Esikel 44:30.

9. ?Taem Jeova i stanemap fasin blong livim ol haf kakae we oli folfoldaon long garen, hem i tijim ol man Isrel long wanem samting?

⁹ Namba tri rod we Jeova i stanemap, hemia fasin blong no pikimap evri kakae we i folfoldaon long garen. God i givim rul ya: “Sipos yufala i go blong tekemaot kakae long garen blong yufala, bambae yufala i no mas tekemaot ol kakae long saed blong hem, mo yufala i no mas gobak blong karem ol haf blong hem we yufala i mestem i stap. Mo yufala i no mas gobak long ol plantesen blong grep blong yufala blong karem ol frut we yufala i mestem, no blong pikimap ol frut ya we i folfoldaon i stap. Yufala i mas livim ol samting ya i stap blong ol puaman mo ol narafala man we oli stap wetem yufala. Mi mi Hae God, mi God blong yufala.” (Levitikas 19:9, 10) Hemia tu, God i no talem stret hamas kakae oli mas livim i stap. Wanwan man Isrel nomo oli mas jusum se bambae oli livim hamas kakae i stap long garen blong ol puaman oli tekem. Waes King Solomon i tokbaot fasin ya i se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17) Yes, long rod ya, Jeova i tijim ol man Isrel blong gat sore mo blong tingbaot olgeta we oli no gat samting.

10. ?Wanem frut i kamaot taem ol man Isrel oli no soem tangkiu long God?

¹⁰ Jeova i blesem ol man Isrel taem oli obei long loa blong givim taet, givim presen, mo livim sam kakae i stap blong ol puaman. Be taem ol man Isrel oli no moa soem tangkiu, Jeova i no moa glad long olgeta. Samting ya i karem trabol i kam long olgeta, mo biaen oli go kalabus. (2 Kronikel 36:17-21) ?Ale, wanem lesen we yumi lanem long saed ya?

Samting We Yumi Mekem Blong Talem Tangkiu

11. ?Wanem nao stamba rod blong soem tangkiu blong yumi long Jeova?

¹¹ Stamba rod we yumi tede tu i save folem blong presem Jeova mo talem tangkiu long hem, hemia blong givim “presen.” I tru se yumi ol Kristin, yumi no moa stap aninit long Loa we God i givim long Moses, yumi no nid blong givim sakrefaes blong anamol no kakae. (Kolosi 2:14) Be aposol Pol i talem long ol Kristin we oli man Hibru se: “Oltaem yumi mas joen long Jisas, mo yumi mas leftemap nem blong God. Fasin ya i olsem we oltaem yumi stap mekem sakrefaes blong givim long hem. Evritaem, taem yumi talemaot nem blong Jisas long fes blong ol man, i olsem we yumi givim presen i go long God.” (Hibrus 13:15) Taem yumi yusum save mo paoa blong yumi mo mane mo olting blong yumi, i olsem we yumi mekem sakrefaes i go long Jeova blong presem hem. Long wok blong prij no long ‘fes blong olgeta man blong God’ long Kristin kongregesen, yumi save talem tangkiu long Papa blong yumi long heven, hemia Jeova God. (Ol Sam 26:12) ?Fasin we ol man Isrel oli folem blong talem tangkiu long Jeova i save givhan long yumi blong mekem olsem wanem?

12. ?Fasin blong givim taet i tijim yumi wanem long saed blong ol Kristin wok blong yumi?

¹² Olsem yumi luk finis, fasin blong givim taet i no wan samting we ol man Isrel oli save jus sipos oli wantem givim no oli no wantem. Olgeta man Isrel, wanwan, oli mas givim taet. Yumi ol Kristin, yumi gat wan wok tu, hemia blong prij mo blong go long ol Kristin miting. Wok ya i no samting we yumi save jus sipos yumi wantem mekem no nogat. Taem Jisas i talemaot profet tok long saed blong ol las dei, hem i makem klia poen ya se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW; 28:19, 20) Tabu spirit i pulum aposol Pol blong raet long saed blong ol Kristin miting se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW ], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hibrus 10:24, 25) Yumi soem tangkiu blong yumi long Jeova taem yumi glad blong tekem wok ya we hem i givim blong prij mo tijim ol man, mo taem yumi joen wetem ol brata blong yumi long evri miting blong kongregesen. Yumi mas tingbaot ol samting ya olsem wan blesing we Jeova i givim long yumi.

13. ?Wanem lesen we yumi lanem long fasin blong givim presen mo livim kakae we i folfoldaon long garen?

 ¹³ Yumi save lanem samting long tu narafala rod ya we ol man Isrel oli folem blong soem tangkiu long Jeova​—ol samting we oli givim olsem presen mo ol kakae we oli livim i stap long garen. Fasin blong givim taet i makemaot stret namba blong samting we man i mas givim. Be i no gat stret namba blong hamas samting we oli mas givim olsem presen mo hamas kakae we oli mas livim i stap long garen. Namba tu mo namba tri rod ya i givim janis long ol man blong Jeova blong soemaot tangkiu we i stap long hat blong olgeta. Hemia i sem mak long yumi. Maet yumi luksave se wok blong prij mo ol Kristin miting oli ol impoten samting we evri man blong Jeova i mas mekem. ?Be yumi mekem ol wok ya wetem fulhat blong yumi mo yumi rili wantem mekem ol wok ya? ?Yumi luksave se ol wok ya oli olsem wan janis blong soemaot tangkiu from olgeta samting we Jeova i mekem long yumi? ?Yumi joen fulwan long wok ya, go kasem mak we yumi naf blong mekem? ?Yumi luk ol wok ya olsem wan wok we yumi mas flatem kwiktaem nao yumi save go mekem nara samting? Hemia sam gudfala kwestin we yumi wanwan i mas tingbaot. Aposol Pol i talem se: “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.”​—Galesia 6:4.

14. ?Jeova i wantem se yumi mekem wok blong hem olsem wanem?

¹⁴ Jeova God i save laef blong yumi wanwan. Hem i save wanem samting we yumi no naf blong mekem. Mo hem i tinghae tumas long ol sakrefaes we ol man blong hem oli givim wetem gladhat, i nomata we ol sakrefaes ya oli bigwan no oli smol. Hem i no gat tingting ya se yumi evriwan i mas givim sem namba blong ol samting, hem i save se yumi no naf blong mekem olsem. Taem aposol Pol i tokbaot fasin blong givim presen, hem i talem long ol Kristin blong Korin se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.” (2 Korin 8:12) Toktok ya blong hem i stret tu long wok we yumi mekem blong God. Samting we i mekem se Jeova i glad long ol wok blong yumi i no wan namba, be hem i fasin blong yumi blong mekem wok ya​—wan tingting we i glad mo wan hat we i fulwan.​—Ol Sam 100:1-5; Kolosi 3:23.

Wokem Tingting Blong Paenia Mo Holem Tingting Ya

15, 16. (a) ?Olsem wanem wok blong paenia i joen wetem tangkiu we yumi gat long Jeova? (b) ?Olsem wanem olgeta we oli no naf blong paenia oli save soem tingting olsem ol paenia?

¹⁵ Wan narafala rod blong soem tangkiu long Jeova,  hemia taem yumi joen long wok blong paenia. Hemia wan nambawan wok we i karem plante blesing. Plante man blong Jeova oli mekem sam bigbigfala jenis long laef blong olgeta blong oli save spenem moa taem long wok blong Jeova. Lav we oli gat long Jeova mo tangkiu we oli gat from kaengud fasin blong hem, i pusum olgeta blong mekem disisen olsem. Sam long olgeta ya oli save mekem wok blong fultaem paenia, we i min se oli spenem samwe long 70 aoa evri manis blong talemaot gud nius mo tijim trutok long ol man. Sam narafala we maet oli no naf blong mekem wok ya, oli joen wanwan taem long wok blong haftaem paenia mo oli spenem 50 aoa long wan manis long wok blong prij.

¹⁶ ?Be olsem wanem long ol man blong Jeova we oli no save joen long wok blong fultaem paenia no haftaem paenia? Oli save soem tangkiu blong olgeta taem oli wokem tingting olsem ol paenia mo oli holem tingting ya oltaem. ?Oli mekem samting ya olsem wanem? Oli save mekem olsem taem oli leftemap tingting blong ol narafala we oli save mekem wok blong paenia. No maet oli mekem olsem taem oli putum tingting blong paenia long hat blong ol pikinini blong olgeta. No oli save mekem olsem taem oli tekem evri janis we oli gat blong joen long wok blong prij kasem mak we oli naf blong mekem. Taem we yumi stap spenem long wok blong prij i dipen bigwan long hamas tangkiu we yumi gat from ol samting we Jeova i mekem finis long yumi, i stap mekem yet, mo we bambae i mekem.

Yusum “Ol Nambawan Samting” Blong Yumi Blong Talem Tangkiu

17, 18. (a) ?Olsem wanem yumi save yusum “ol nambawan samting” blong yumi blong soem tangkiu? (b) ?Wanem tingting blong Jisas long saed blong mane we wido woman i givim, mo from wanem hem i tingting olsem?

¹⁷ Ol Proveb 3:9 i talem se: “Yu mas tekem ol fas kakae blong garen blong yu, wetem ol nambawan samting long ol narafala kakae we yu kasem long hem, yu givim i go long Hae God, blong yu ona long hem.” Ol man blong Jeova oli no moa stap aninit long loa blong givim taet. Pol i talem samting defren taem hem i raet i go long kongregesen long Korin i se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Taem yumi givim presen mane blong sapotem wok blong talemaot Kingdom long fulwol, hemia tu i soemaot we yumi gat tangkiu. Taem hat blong yumi i fulap long tangkiu, yumi rere oltaem blong givim presen, mo maet yumi putum smol evri wik, olsem ol faswan Kristin oli bin mekem.​—1 Korin 16:1, 2.

¹⁸ Nomata hamas mane yumi givim, i no samting ya we i soemaot tangkiu we yumi gat long Jeova. Bigfala samting, hemia tingting we i pusum yumi blong givim. Jisas i stap lukluk samting ya taem hem i wajem ol man oli stap sakem presen blong olgeta i go long bokis blong ol presen mane long tempol. Taem hem i luk wan pua wido woman we i sakem “tu smol mane we i olsem twanti vatu nomo,” hem i talem se: “Tru mi talem long yufala. Kleksen we wido ya i sakem i moa long ol mane we olgeta narafala man ya oli sakem. Ol narafala man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long hem.”​—Luk 21:1-4.

19. ?From wanem i gud blong jekemap wei we yumi wanwan i stap soem tangkiu long Jeova?

¹⁹ Stadi ya i soemaot olsem wanem yumi save soem tangkiu. I gud sipos ol save ya i pusum yumi blong jekemap yumi wan bakegen blong luk olsem wanem yumi stap soem tangkiu long Jeova. ?I gat rod blong yumi givim moa sakrefaes blong presem Jeova, mo blong traehad moa blong givim mane blong sapotem wok we i gohed raon long wol? Sipos yumi mekem olsem go kasem mak we yumi naf blong mekem, yumi sua se Jeova, Papa blong yumi we i gat lav mo we i glad blong givim presen, bambae i harem gud tumas blong luk we yumi gat tangkiu long hem.

[Futnot]

?Yu Yu Tingbaot?

• ?Wanem ol risen oli stap blong yumi tangkiu long Jeova?

• ?Yumi lanem wanem from fasin blong givim taet, presen, mo livim haf kakae i stap long garen?

• ?Olsem wanem yumi save wokem tingting blong paenia?

• ?Olsem wanem yumi save yusum “ol nambawan samting” blong yumi blong talem tangkiu long Jeova?

[Kwestin]

[Tok blong pija long pej 15]

‘Evri samting we oli gud mo evri presen we oli nambawan, oli kamaot long heven nomo’

[Tok blong pija long pej 16]

?Wanem trifala lesen we Loa i tijim long yumi, we yumi save luk long pija ya?

[Tok blong pija long pej 18]

?Wanem ol sakrefaes we yumi save mekem?