“Rere Oltaem Blong Mekem Ol Gudfala Wok”

“YU MAS talemgud long ol man blong yu blong oli ona long ol haeman mo gavman blong olgeta. Oli mas obei long olgeta, mo oli mas rere oltaem blong mekem ol gudfala wok.” (Taetas 3:1) ?Wanem ya ol gudfala wok we Pol i tokbaot taem hem i raet long ol Kristin brata blong hem? Wan man we i stadi Baebol, nem blong hem E. F. Scott i poenemaot wan long ol gudfala wok ya mo hem i se: “Ol Kristin oli no obei nomo long ol haeman, be oli mas rere tu blong mekem ol gudfala wok. . . . Mo long taem we i stret, ol Kristin oli faswan blong soemaot se oli tingbaot ol narafala long komuniti blong olgeta. Taem i gat ol faea, bigfala sik, mo ol narafala trabol bakegen, evri man we i gat gudfala fasin bambae i rere blong givhan long ol man raonabaot long hem.”

Ol Kristin oli joen long sam wok we i blong givhan long komuniti, sipos ol wok ya i no agensem ol loa blong God. (Ol Wok 5:29) Wan eksampol, branj ofis blong ol Witnes blong Jeova long Japan, we i stap long Ebina, i folem toktok blong faea dipatmen long ples ya we i talem se oli mas holem wan miting evri yia blong tokbaot wanem blong mekem sipos i gat wan faea. Long ol taem ya, olgeta memba blong Betel oli kam wanples blong lesin mo kasem ol advaes long ol bigman blong faea dipatmen long ples ya.

Mo tu, bitim ten yia finis, branj ofis long Japan i wok tugeta wetem ol man blong gavman long wan eksibisen we oli stanemap long saed ya blong blokem faea. Long eksibisen ya, ol kampani mo ol bisnes long taon ya oli soem olting blong olgeta we oli yusum, mo oli soem olsem wanem oli rere blong stopem wan faea. Plante taem branj ofis i kasem praes long ol gudfala wok we oli mekem mo long gudfala fasin we oli soem blong wok tugeta. Long yia 2001, oli kasem fas praes long eksibisen ya. Oli rere blong mekem gudfala wok we i save sevem laef sipos i gat wan faea.

Wan Gudfala Wok

Be i gat wan narafala impoten wok we ol Witnes blong Jeova oli intres moa blong mekem. Hemia wan gudfala wok we i save sevem laef blong ol man. Oli visitim ol man raonabaot long olgeta oltaem blong serem gud nius blong Kingdom blong God. (Matiu 24:14) Ol Witnes oli leftemap tingting blong ol man blong oli lanem mo wokem ol rul blong Baebol long laef blong olgeta. Samting ya i mekem se oli gat wan gudfala laef naoia mo oli gat hop blong kasem laef we i no save finis long wol ya we bambae pis mo fasin blong harem sef oli plante.

Maet sam man oli no tinghae long wok ya we ol Witnes blong Jeova oli mekem, oli tingbaot ol Witnes ya olsem man blong hambag nomo. Be, wan jaj we nem blong hem Jean Crepeau, long Hae Kot blong Kanada, i gat defren tingting long saed ya. Ol Witnes blong Jeova long Blainville, long taon ya Quebec, oli no agri long wan loa we i talem se oli mas gat wan laesens blong prij long ol haos wanwan. Long disisen we kot i givim, Jaj Crepeau i talem se: “Taem ol Witnes blong Jeova oli visitim ol man long haos oli mekem wan Kristin wok blong givhan long komuniti mo . . . ol buk we ol Witnes blong Jeova oli stap givim long man we i intres, oli impoten. Ol buk ya oli stap tokbaot ol samting long saed blong skul, Baebol, ol drag, fasin drong, edukesen blong ol yangfala, problem  insaed long mared mo divos.” Taswe disisen blong Kot se: “Sipos man i talem se ol Witnes blong Jeova oli olsem ol bisnes man we oli salem samting, toktok ya i nogud, i daonem olgeta. I spolem olgeta, mo i spolem gudnem blong olgeta.”

Ol Witnes blong Jeova oli givhan bigwan long komuniti we oli stap long hem, taem oli halpem ol man blong winim ol problem we oli kasem evridei long laef mo givim wan hop blong olgeta long saed blong fiuja. Baebol i mekem we oli naf blong mekem gud wok ya. “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”​—2 Timoti 3:16, 17.

?Yu yu wantem blong save olsem wanem ol Witnes blong Jeova oli kam man we oli “rere oltaem blong mekem ol gudfala wok”? Mifala i askem yu blong yu letem olgeta oli halpem yu blong lanem moa long saed blong Baebol. Nao yu tu yu save joen long impoten wok ya we i stap givhan long komuniti blong yu mo long ful wol.

[Tok blong pija long pej 30]

Ol Witnes blong Jeova oli glad blong wok tugeta wetem gavman

[Tok blong pija long pej 31]

Ol man oli luksave ol Witnes from fasin we oli gat blong halpem ol man raonabaot long olgeta