?Hu Ya Ol Memba Blong Famle Blong Jisas?

LONG plante kantri long wol long manis Disemba, yu save luk fulap pija blong Jisas taem hem i wan bebi yet, wetem mama blong hem, Meri, we i lukaotgud long hem, mo wetem Josef, papa blong hem long wol ya. Ol pija ya oli pulum intres blong plante man, wetem ol man we oli no Kristin tu. Plante man oli tingbaot Jisas long taem ya, taswe i gud we yumi ansa long wan kwestin. ?Baebol i talem wanem long saed blong famle blong Jisas long wol ya?

Stori blong famle blong Jisas i save pulum intres blong yumi. Wan vejin, we nem blong hem Meri, i bonem Jisas, mekem se Jisas i bon olsem wan man long wol ya. Baebol i talem se God i yusum tabu spirit blong hem blong tekem laef blong Jisas long heven mo putum long bel blong Meri. (Luk 1:​30-35) Bifo we Meri i save nius ya se bambae God i mekem wan merikel long hem blong i karem Jisas, Meri i promes finis blong mared wetem wan man we nem blong hem Josef. Taswe, Josef bambae i mas kam papa blong Jisas long wol ya.

Afta we Jisas i bon, Josef mo Meri tufala i gat sam narafala pikinini, hemia ol haf brata mo sista blong Jisas. Yumi sua we Jisas i gat sam haf brata sista, from we biaen, ol man Nasaret oli tokbaot Jisas se: “Man ya, yumi savegud hem. Hem i pikinini blong man ya blong wokem haos, mo mama blong hem, Meri. Ol brata blong hem, Jemes, mo Josef, mo Saemon, mo Judas. Mo ol sista blong hem tu oli stap wetem yumi.” (Matiu 1:25; 13:​55, 56; Mak 6:3) From ol samting ya, yumi save talem we long stret famle blong Jisas, i gat papa mama blong hem, fofala brata, mo tu sista, no maet moa long tu sista.

Nating se i olsem, tede sam man oli no bilif we ol brata sista blong Jisas oli pikinini blong Josef mo Meri. ?From wanem? Buk ya New Catholic Encyclopedia i talem se: “I stat bifo olgeta, Jos i bin talem se Meri i stap wan vejin oltaem. Taswe, i klia we Meri i neva gat eni narafala pikinini.” Semfala buk i talem se tufala tok ya “brata” mo “sista” i minim “sam man we oli joengud tugeta from we oli serem semfala samting olsem bilif, no wan narafala samting bakegen” no i minim sam narafala famle, maet sam kasen brata sista.

?Samting ya i tru? Sam Katolik we oli stadi long tijing blong jos, mo oli no agri wetem sam long ol tijing ya, oli sapotem tingting ya se Jisas i bin gat sam haf brata sista. John P. Meier, we bifo hem i presiden blong Catholic Bible Association of America, i raetem se: “Long N[iufala] T[estamen], taem oli yusum tok ya adelphos [we i minim “brata” long lanwis Grik] blong tokbaot fasin fren we i gat bitwin tu man insaed long wan famle, no long saed blong loa, tok ya i minim stret brata, no haf brata. Tok ya i no gat wan narafala mining.” * Yes, Baebol i talem klia we Jisas i bin gat sam brata mo sam sista, we oli stret pikinini blong Josef mo Meri.

Ol Gospel oli tokbaot sam narafala memba blong famle blong Jisas bakegen, be naoia bambae yumi tokbaot stret famle blong Jisas blong luk ol samting we yumi save lanem from olgeta.

[Futnot]