Wan Kwestin

?Toktok we Jisas i tijim long Lodsprea, i min se God bambae i mekem ol samting we hem i wantem oli kamaot long heven nating se ol rabis enjel oli stap yet long heven?

Long Matiu 6:10 (NW ) Jisas i talem se: “Mekem ol samting we yu yu wantem oli kamaot long wol, olsem we oli kamaot finis long heven.” Ol tok ya i save gat tu mining. Faswan mining hemia, se prea ya i askem long God blong i mekem wanem we hem i wantem i kamaot long wol ya, olsem we i stap kamaot finis long heven. Mo namba tu mining, se prea ya i blong askem long God blong i mekem wanem hem i wantem i kamtru fulwan long heven mo long wol tu. * Wanem we Jisas i minim long ol tok ya, ‘letem kingdom blong yu i kam’ i soemaot se namba tu mining long vas ya i laenap moa wetem Baebol. Mo i soemaot taem we Jisas i laef long wol ya mo longfala taem afta. ?Olsem wanem yumi save samting ya?

Buk blong Revelesen i soemaot klia tu samting we i hapen taem Kingdom blong God i stanap long heven. Faswan samting i hapen long heven, mo namba tu samting i hapen long wol ya. Revelesen 12:​7-9, 12 i se: “Nao i gat bigfala faet i stat long heven. Mikael wetem ol enjel blong hem oli stap faet agens long bigfala algita ya. Nao bigfala algita ya wetem ol enjel blong hem oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’, we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol. Nao from samting ya, yu heven, mo yufala evriwan we i stap long heven, yufala i mas harem gud. Be sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”

Olgeta long heven oli ronemaot Setan mo ol dimon blong hem long 1914, mekem se i no moa gat ol stronghed enjel long heven. Samting ya i mekem se ol narafala enjel we oli stap tru long Jeova, we oli mekemap bighaf blong ol spirit man we Jeova i wokem, oli glad tumas. (Job 1:​6-12; 2:​1-7; Revelesen 12:10) Taswe wanem we Jisas i askem long Lodsprea ya, i kamtru long saed blong heven. Olgeta we oli stap long heven, oli stap tru long Jeova mo oli rere fulwan blong stap aninit long hae rul blong hem.

Taem ol rabis enjel oli stap yet long heven, God i no moa tingbaot olgeta olsem se oli haf blong famle blong hem mo hem i blokem olgeta long sam samting finis. Eksampol, Jud 6 (NW ) i bin soem finis se long faswan handred yia K.T., God “i fasem olgeta long rop we i blong olwe, aninit long tudak we i tudak olgeta [long saed blong spirit], oli stap wet long jajmen blong bigfala dei.” Mo tu, 2 Pita 2:4 (NW ) i talem se: “God i no letem olgeta oli go fri nomo we oli no kasem panis, no gat. Hem i sakem olgeta oli go long Tataros [olsem wan ples we i daon olgeta], hem i putum olgeta oli stap long ol hol we oli tudak olgeta, oli stap wet long jajmen blong olgeta.” *

Nating se God i sakemaot ol rabis enjel ya oli no moa pat blong famle blong hem long heven, ol rabis  spirit ya oli gat bigfala paoa antap long ol man long wol ya. Tok blong God, Baebol, i talem se Setan “i stap rulum wol ya,” mo i singaot ol dimon se ‘oli jif blong ol fasin blong tudak long wol ya.’ (Jon 12:31; Efesas 6:​11, 12; 1 Jon 5:19) From we Devel Setan i gat bigfala paoa antap long wol ya, taswe hem i wantem givim long Jisas “olgeta kantri long wol ya wetem ol gudgudfala samting we oli gat.” Be, fastaem Jisas i mas bodaon mo wosip long hem. (Matiu 4:​8, 9) Taswe, i sua se taem Kingdom blong God i ‘kam’ bambae i gat plante bigbigfala jenis i kamaot long wol ya.

Taem Kingdom blong God i ‘kam’ long wol ya, fasin blong laef bambae i kam niuwan olgeta. Kingdom ya bambae i flatemgud gavman we ol man oli stanemap mo hem wan nomo bambae i rul long wol. Mo long semtaem ol man aninit long Kingdom ya we oli fraetgud long God, bambae oli kam ‘wan niufala wol.’ (2 Pita 3:13; Daniel 2:44) Mo tu, Kingdom ya bambae i karemaot sin long ol man we oli obei mo sloslo bambae i mekem ful wol ya i kam wan paradaes. Long rod ya nomo, olgeta samting we oli bin stap taem Setan i rulum wol ya, bambae oli lus evriwan.​—Rom 8:​20, 21; Revelesen 19:​17-21.

Long en blong Wan Taosen Yia, taem Kingdom blong Mesaea i mekem finis wanem we God i wantem, “Pikinini blong God, hem nomo bambae i putum hem i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.” (1 Korin 15:28) Afta long laswan traem, Setan mo ol dimon blong hem, wetem olgeta man we oli rebel agensem God, bambae oli lus blong olwe long “seken ded ya.” (Revelesen 20:​7-15) Biaen, olgeta spirit man long heven mo olgeta man long wol ya, bambae oli laef blong olwe mo bambae oli glad blong stap aninit long hae rul blong Jeova. Mo long taem ya nao, ol tok blong prea ya blong Jisas bambae oli kamtru fulwan.​—1 Jon 4:8.

[Ol Futnot]