Yu Yu Mas Rere From Dei Blong Jeova
Yu Yu Mas Rere From Dei Blong Jeova
“Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.”—MATIU 24:44.
1. ?From wanem yumi mas tingting plante long dei blong Jeova?
DEI blong Jeova bambae i wan taem blong faet mo kros, wan taem blong wari mo trabol, tudak mo fasin blong spolem ol samting. Bigfala dei ya blong Jeova we “bambae ol man oli fraet gud long hem” i sua blong kamtru long rabis wol ya, olsem we Bigfala Wota i bin ron blong draonem ol rabis man long taem blong Noa. I no gat wan man long wol we i save ronwe long bigfala dei ya. Be, ‘olgeta man we oli singaot Jeova long nem blong hem, hem bambae i sevem olgeta.’ (Joel 2:30-32; Amos 5:18-20) God bambae i spolem ol enemi blong hem mo sevem ol man blong hem. Profet Sefanaea i givim strong woning ya se: “Bigfala Dei ya blong Hae God i kam klosap finis. I no longtaem, bambae i kamtru.” (Sefanaea 1:14) ?Be, jajmen ya we i kamaot long God, bambae i kamtru wetaem?
2, 3. ?From wanem i impoten tumas we yumi rere naoia from dei blong Jeova?
2 Jisas i talem se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matiu 24:36) From we yumi no save stret taem blong dei ya, i impoten tumas we yumi mekem samting we vas blong yia 2004 i talem: “Yufala i mas lukaot gud . . . Oltaem yufala i mas rere.”—Matiu 24:42, 44.
3 Jisas i soem se Jeova bambae i tekem aksin kwiktaem blong sevem samfala mo spolem ol narafala, i se: “Bambae tu man i stap wok long garen, be bambae mi tekemaot wan, wan i stap. Bambae tu woman i stap wanples blong wokem kakae, be bambae mi tekemaot wan, wan i stap.” (Matiu 24:40, 41) ?Taem dei ya i kamtru, olsem wanem long yumi wanwan? ?Bambae yumi rere? ?No bambae yumi sek nogud taem trabol ya i faerap? Samting ya i dipen long wanem we yumi mekem naoia. Blong rere from dei blong Jeova, yumi mas lukaot gud blong blokem wan fasin we plante man tede oli gat. Mo tu, i gat wan nogud fasin long saed blong spirit we yumi mas lukaot gud blong no foldaon long hem. Mo i gat sam fasin blong laef we yumi mas stap longwe long olgeta.
Blokem Fasin Blong No Kea
4. ?Wanem fasin blong ol man long taem blong Noa?
4 Tingbaot taem blong Noa. Baebol i talem se: “From we Noa i stap bilif strong long God, taswe hem i obei long tok blong God long taem ya we God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip blong sevem olgeta famle blong hem.” (Hibrus 11:7) Bigfala sip ya i wan samting we ol man oli save luk, mo i pulum ae blong ol man from we i narakaen lelebet. Antap long hemia, Noa i “wan prija we i stap talemaot stret fasin.” (2 Pita 2:5) Be, taem Noa i stap bildim sip ya mo i stap prij, tugeta wok ya i no pulum ol man blong oli jenisim laef blong olgeta. ?From wanem? From we, ‘oli stap kakae, mo oli stap dring, mo oli stap mekem mared.’ Ol man ya we Noa i prij long olgeta oli bisi tumas long ol samting blong laef mo ol pleplei, taswe “olgeta ya oli no save wan samting, kamkam we wota i ron bigfala, i tekemaot olgeta.” —Matiu 24:38, 39, Nyutesteman wetem Ol Sam long Bislama.
5. ?Wanem tingting blong ol man Sodom long taem blong Lot?
5 Sem mak long taem blong Lot. Baebol i talem se: “Ol man oli stap kakae, mo oli stap dring, mo oli stap pem ol samting, mo oli stap salem ol samting, mo oli stap wokem garen, mo oli stap wokem haos. Be long dei ya we Lot i aot long Sodom, faea mo salfa i kamaot long skae, i foldaon long ol man ya, i bonem olgeta evriwan i lus.” (Luk 17:28, 29) Afta we ol enjel oli givim woning long Lot se bambae God i spolem taon ya, Lot i talemaot woning ya long tufala man we tufala i blokem finis tufala gel blong hem. Be, tufala i ting se “hem i stap mekem trik nomo long tufala.”—Jenesis 19:14.
6. ?Wanem fasin we yumi mas blokem?
6 Jisas i talem se, taem blong Noa mo Lot i sem mak long ‘taem ya we hem, Pikinini blong Man, bambae i kamtru.’ (Matiu 24:39; Luk 17:30) I tru, plante man tede tu oli no kea. Yumi mas lukaot gud blong no letem fasin ya i gat paoa long yumi. I no rong blong kakaegud mo dring smol. I no rong blong mared tu, from we God nao i stanemap plan ya. ?Be, olsem wanem sipos ol samting ya oli kam moa impoten long laef blong yumi i bitim ol samting long saed blong spirit? ?Sipos i olsem, yu ting se yumi rili rere from bigfala dei blong Jeova we bambae ol man oli fraetgud long hem?
7. ?Wanem impoten kwestin we yumi mas tingbaot bifo we yumi mekem eni samting we yumi wantem mekem, mo from wanem?
7 Aposol Pol i talem se: “Naoia, yumi no gat plante taem i stap.” Hem i go moa i se: “Ale, man we i mared, i gud hem i stap olsem we hem i no mared.” (1 Korin 7:29-31) Yes, smoltaem nomo i stap blong yumi finisim wok we God i givim long yumi blong talemaot Kingdom. (Matiu 24:14) Taswe, Pol i stap talem long ol man mo woman we oli mared, se oli no mas mekem mared blong olgeta i kam bigfala samting long laef blong olgeta, nao oli daonem ol wok blong Kingdom olsem we i no impoten tumas. I klia se, Pol i no wantem we yumi folem fasin blong ol man we oli no kea. Fasin blong yumi i mas defren olgeta. Jisas i talem se yumi mas lukaot kingdom mo ‘stret fasin blong God fastaem.’ (Matiu 6:33) Bifo we yumi tekem wan disisen no bifo we yumi mekem eni samting we yumi wantem mekem, i impoten tumas we yumi tingbaot kwestin ya: ‘?Samting ya bambae i givhan long mi blong putum ol wok blong Kingdom long fasples long laef blong mi, no bambae i blokem mi?’
8. ?Yumi mas mekem wanem sipos ol samting long evri dei laef blong yumi oli kam bigfala samting finis long laef blong yumi?
8 ?Be, olsem wanem sipos yumi luk se ol samting long evridei laef blong yumi oli stap blokem yumi finis, blong yumi no mekem ol samting long saed blong spirit? Maet fasin blong laef blong yumi i klosap sem mak long fasin blong laef blong ol man raonabaot long yumi we oli no gat stret save blong Baebol mo oli no stap talemaot Kingdom. Sipos i olsem, yumi mas prea long saed ya. Jeova i save givhan long yumi blong stretem tingting mo laef blong yumi. (Rom 15:5; Filipae 3:15) Hem i save halpem yumi blong putum ol wok blong Kingdom long fasples long laef blong yumi, mo blong folem stret fasin, mo blong mekem ol wok we hem i askem long yumi blong mekem.—Rom 12:2; 2 Korin 13:7.
Blokem Fasin Blong Wantem Slip Long Saed Blong Spirit
9. ?Folem ol tok blong Revelesen 16:14-16, from wanem i impoten blong blokem fasin blong wantem slip long saed blong spirit?
9 Profet tok long saed blong “faet long bigfala Dei blong God ya we i gat olgeta paoa” long Amagedon, i givim woning se samfala bambae oli no stap wekapgud. Masta Jisas Kraes i talem se: “Yufala i lesin. Bambae mi mi kamtru long yufala olsem we man blong stil i kam. Man we i stap lukaot gud, i no tekemaot klos blong hem blong i slip, bambae hem i save harem gud. Bambae hem i no wokbaot neked, we ol man oli luk we hem i sem.” (Revelesen 16:14-16) Klos ya i minim ol samting olsem wok blong talemaot Kingdom mo ol Kristin fasin, we oli makemaot yumi se yumi ol Kristin Witnes blong Jeova. Sipos yumi kam olsem we yumi no moa wok be yumi wantem slip, i olsem we yumi tekemaot klos blong yumi, from we yumi lego ol samting we oli makemaot yumi olsem wan Kristin. Hemia i wan samting blong sem, mo i denja tu. Yumi no mas kam olsem we yumi wantem slip mo yumi les long saed blong spirit. ?Olsem wanem yumi save blokem fasin ya?
10. ?From wanem Baebol riding evri dei i save givhan long yumi blong stap wekapgud long saed blong spirit?
10 Bakegen mo bakegen, Baebol i talem se yumi mas stap wekap we hed blong yumi i kliagud. Plante taem ol Gospel oli talem ol tok olsem: “Yufala i mas lukaot gud” (Matiu 24:42; 25:13; Mak 13:35, 37); “oltaem yufala i mas rere” (Matiu 24:44); “yufala i mas lukaot gud, mo oltaem yufala i mas rere” (Mak 13:33); “oltaem yufala i mas rere” (Luk 12:40). Aposol Pol i tokbaot dei blong Jeova se bambae i kamtru long taem we ol man oli no tingbaot. Biaen, hem i talem long ol Kristin brata sista blong hem se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud.” (1 Tesalonaeka 5:6) Long las buk blong Baebol, Jisas Kraes we i stap long heven finis, i makemgud se ‘bambae hem i kamtru i no longtaem,’ mo se ol man bambae oli sek long hem from we oli no rere. (Revelesen 3:11; 22:7, 12, 20) Plante Hibru profet tu oli tokbaot bigfala dei we Jeova bambae i jajem olgeta man long hem, mo oli givim woning from. (Aesea 2:12, 17; Jeremaea 30:7; Joel 2:11; Sefanaea 3:8) Taswe, sipos yumi ridim Baebol evri dei, mo tingting dip long samting we yumi ridim, samting ya bambae i givhan bigwan long yumi blong stap wekapgud long saed blong spirit.
11. ?Blong stap wekap long saed blong spirit, from wanem i impoten we yumi wanwan i stadi Baebol oltaem?
11 !Yes, dip stadi we yumi wanwan i mekem long Baebol mo long ol buk we ‘slef we i stret mo waes’ i givim, i save halpem yumi bigwan blong stap wekap long saed blong spirit! (Matiu 24:45-47, NW ) Be blong kasem ol gudfala samting from stadi ya, yumi mas folem wan program blong stadi oltaem. (Hibrus 5:14–6:3) Nating se i no isi blong faenem taem long laef blong yumi, be yumi nidim blong tekem strong kakae long saed blong spirit oltaem. (Efesas 5:15, 16) I no naf we yumi ridim Baebol mo ol buk we oli tokbaot Baebol taem yumi wantem nomo. Blong mekem se ‘bilif blong yumi i kam strong moa’ mo yumi stap wekapgud, yumi wanwan i mas folem wan program blong stadi oltaem.—Taetas 1:13.
12. ?Olsem wanem ol Kristin miting mo asembli oli givhan long yumi blong no slip long saed blong spirit?
12 Ol Kristin miting mo asembli oli givhan long yumi tu, blong yumi no slip long saed blong spirit. ?Oli givhan olsem wanem? Oli tijim yumi. Ol miting mo asembli ya oli mekem yumi tingbaot bakegen mo bakegen se dei blong Jeova i klosap tumas. Mo tu, ol Kristin miting evri wik oli givim janis long yumi blong kam strong moa “blong lavem ol man, mo blong mekem ol gudfala fasin.” Taem yumi stap givgivhan long yumi blong kam strong moa, samting ya i save ronemaot slip mo halpem yumi blong stap wekap. Taswe, Baebol i givim oda long yumi se oltaem yumi mas joen wanples, taem yumi “save se Dei ya we Masta blong yumi bambae i jajem olgeta man long hem, hem i kam klosap finis.”—Hibrus 10:24, 25.
13. ?Olsem wanem Kristin wok blong prij i save givhan long yumi blong stap wekap long saed blong spirit?
13 Taem yumi joen long Kristin wok blong prij wetem fulhat blong yumi, samting ya tu i save givhan long yumi blong stap wekap. Beswan samting blong mekem yumi tingbaot ol saen blong taem ya mo mining blong olgeta, i blong tokbaot olgeta long wok blong prij. Mo taem yumi mekem Baebol stadi long wan man mo yumi luk we hem i gohedgud mo i stat folem ol samting we hem i lanem, samting ya tu i mekem yumi kam strong moa blong wok. Aposol Pita i talem se: “Yufala i mas mekem tingting blong yufala i rere blong yufala i mekem wok. Tingting blong yufala i mas klia gud.” (1 Pita 1:13) Wan gudfala advaes we i givhan long yumi blong no slip long saed blong spirit, hemia: “Oltaem yufala i mas wok strong long ol wok ya blong Masta blong yumi.”—1 Korin 15:58.
Stap Longwe Long Ol Nogud Fasin Blong Laef
14. ?Long Luk 21:34-36, Jisas i givim woning agens long wanem fasin blong laef?
14 Long bigfala profet tok blong Jisas long saed blong saen we i soem se hem i kam king finis, i gat wan narafala woning bakegen: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap, from we dei ya bambae i kasem olgeta man long wol. Be oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.” (Luk 21:34-36) Jisas i tru tumas taem hem i tokbaot ol fasin blong laef we ol man oli stap folem: oli kakae bitim mak, oli drong, mo oli folem ol fasin we i pulum bigfala trabol i kam long olgeta.
15. ?From wanem yumi no mas kakae mo dring bitim mak?
15 Man we i kakae mo dring bitim mak i no stap folem ol rul blong Baebol, taswe yumi mas stap longwe long fasin ya. Baebol i talem se: “I nogud yu go joen wetem ol man we oli stap dring tumas mo oli stap kakae we i bitim mak.” (Ol Proveb 23:20) Be, kakae mo dring i save kam wan denja bifo we man i bitim mak long tufala. Sipos yumi go klosap long mak ya, hemia nomo i naf blong mekem yumi harem se yumi les mo yumi wantem slip long saed blong spirit. Wan proveb long Baebol i talem se: “Nating we man blong les i wantem plante samting, be hem i no save kasem.” (Ol Proveb 13:4) Ating wan man i wantem mekem wok blong God, be maet hem i no save mekem from we hem i no stap blokem ol samting we oli save mekem hem i les.
16. ?Olsem wanem blong blokem ol wari blong famle laef blong oli no kam hevi tumas long yumi?
16 ?Wanem ol wari blong laef we Jisas i givim woning long saed blong olgeta? Hemia ol wari long prapa laef blong yumi wanwan, olsem wok blong givim ol samting we famle blong yumi i nidim, mo ol narafala samting olsem. !I no waes blong letem ol wari ya oli mekem tingting blong yumi i hevi tumas! Jisas i talem se: “?Yufala i ting se taem man i stap tingting tumas from laef blong hem we i sotfala nomo, bambae i save mekem laef blong hem i kam longfala moa long fasin ya? !Nogat!” Nao hem i givim advaes ya se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya.” Sipos yumi putum Kingdom i stap long fasples long laef blong yumi mo yumi trastem Jeova se bambae hem i givim ol samting we yumi nidim, bambae yumi no save wari tumas mo bambae yumi stap wekapgud.—Matiu 6:25-34.
17. ?Olsem wanem man we i ronem plante sas samting i pulum wari i kam long hem wan?
17 Sipos yumi stat ronem ol sas samting, hemia tu i save pulum wari i kam long yumi. Samfala oli mekem tumas kaon nao laef blong olgeta i fasfas from. Sam narafala, oli folem wan plan blong kam rij kwik, no oli westem mane blong olgeta long wan bisnes we i no stanap strong mo biaen i brokdaon. Sam narafala bakegen, oli wokhad blong kasem hae edukesen blong oli save gat wan gudfala wok we i givim plante mane, nao samting ya i kam olsem wan trap we i kasem olgeta. I tru, yumi nidim naf edukesen blong yumi save mekem wan wok. Be samfala oli westem tumas taem long hae edukesen, nao oli kam slak long saed blong spirit. !I nogud blong stap slak naoia! !Dei blong Jeova i klosap tumas! Baebol i givim woning se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.”—1 Timoti 6:9.
18. ?Blong mekem se ol sas samting oli no pulum yumi, yumi mas kam naf blong mekem wanem?
18 Blong mekem se ol sas samting oli no pulum yumi, yumi mas kam naf blong skelemgud wanem i stret mo wanem i no stret, nao yumi save tekem ol gudfala disisen. Yumi kam naf blong mekem olsem, taem yumi tekem ‘strong kakae we i blong ol bigman,’ mo taem yumi ‘traehad longtaem blong jusumaot wanem fasin i gud mo wanem fasin i nogud.’ (Hibrus 5:13, 14) Mo sipos yumi lukaot gud blong putum ol samting we i impoten mo “i stret gud” long fasples long laef blong yumi, hemia tu bambae i givhan long yumi blong tekem ol stret disisen.—Filipae 1:10.
19. ?Sipos yumi luk se yumi gat smoltaem nomo blong mekem ol wok long saed blong spirit, yumi mas mekem wanem?
19 Taem yumi ronem ol sas samting, yumi no moa gat taem blong mekem ol wok long saed blong spirit. ?Yumi mas mekem wanem blong skelem laef blong yumi mo blong no foldaon long trap ya blong ronem ol sas samting? Yumi mas prea mo tingbaot olsem wanem yumi save mekem laef blong yumi i kam klia moa, i no fasfas. Solomon we i king blong Isrel bifo, i talem se: “Man blong wok we i stap wok strong oltaem, maet hem i kakae we i fulap gud no i no fulap gud, be long naet, hem i save slip gud. Be rijman hem i no save slip gud, oltaem i stap wekap nomo, from we i stap tingting tumas long ol samting we hem i gat.” (Prija 5:12) ?Yu yu stap westem taem mo paoa blong yu blong lukaot gud long ol samting we yu yu gat finis? Taem yumi gat plante samting, yumi nidim taem blong lukaot long ol samting ya. Mo tu, yumi mas pem moa insurens, mo yumi mas tektaem blong mekem olting blong yumi oli stap sef nao stilman i no save kam tekem olgeta. Maet i moagud we yumi sakemaot sam samting we yumi no nidim, nao laef blong yumi bambae i kam isi moa.
Yu Mas Sua Se Yu Yu Rere
20, 21. (a) ?Aposol Pita i mekem yumi sua long wanem samting long saed blong dei blong Jeova? (b) ?Wanem ol fasin mo wok we yumi mas mekem blong yumi save rere from dei blong Jeova?
20 Long taem blong Noa, en blong wol i kamtru, mo long taem blong yumi tu, en blong wol bambae i kamtru bakegen. Aposol Pita i mekem yumi sua long samting ya, i se: “Dei blong Masta blong yumi bambae i kam olsem we man blong stil i kam, we i kam long taem we man i no save. Mo long Dei ya, bambae i gat bigfala noes, nao skae bambae i lus. Bigfala faea we i hot we i hot bambae i bonem ol sta gogo oli ronaot, mo wol tu, wetem evri samting blong hem bambae i lus.” Skae i olsem pija blong ol rabis gavman, mo wol i olsem pija blong ol man we oli no obei long God. Kros blong God bambae i kakae ol gavman ya mo ol man ya olsem faea. Pita i soem olsem wanem yumi save rere from dei ya, i se: “From we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.”—2 Pita 3:10-12.
21 ?Wanem sam tabu fasin mo wok we God i wantem? Yumi mas go long olgeta Kristin miting, mo yumi mas joen oltaem long wok blong talemaot gud nius. Yumi mas mekem ol fasin mo wok ya wetem bigfala ona long hat blong yumi, taem yumi stap wet wetem longfala tingting blong luk bigfala dei blong Jeova. Yumi mas ‘traehad blong mekem we long fes blong God, laef blong yumi i klin gud, mo we i no gat wan samting i rong long laef blong yumi. Nao long fasin ya, yumi gat pis wetem God.’—2 Pita 3:14.
?Yu Yu Tingbaot?
• ?From wanem yumi mas rere oltaem from dei blong Jeova?
• ?Sipos ol samting long evridei laef blong yumi oli kam bigfala samting we yumi stap tingbaot, yumi mas mekem wanem?
• ?Wanem i save givhan long yumi blong no slip long saed blong spirit?
• ?Wanem sam nogud fasin blong laef we yumi mas stap longwe long olgeta, mo olsem wanem yumi save mekem olsem?
[Kwestin]
[Tok blong pija long pej 21]
Ol man long taem blong Noa oli no wantem save long bigfala jajmen we i stap kam—?olsem wanem long yu?
[Tok blong pija long pej 23]
?Yu yu save sakemaot sam samting long laef blong yu blong kasem moa taem blong mekem ol wok long saed blong spirit?