?Yumi Lanem Wanem Long Famle Blong Jisas Long Wol Ya?

?YU YU save wanem long saed blong stret famle blong Jisas, hemia ol man we Jisas i laef wetem olgeta bifo we hem i tekem baptaes, long ol 30 faswan yia we hem i spenem long wol? ?Ol Gospel oli talem wanem long saed blong olgeta? ?Bambae yumi lanem wanem samting sipos yumi gat save long saed blong famle blong Jisas? Ol ansa long ol kwestin ya oli save givhan long yu.

?Olsem wanem long Jisas? ?Hem i bon long wan famle we i rij? Josef, papa blong Jisas long wol ya, hem i wok olsem wan kapenta. I min se hem i mas wokhad, mo plante taem hem i mas katem ol tri blong kasem ol timba. Taem papa mama blong Jisas tufala i go long Jerusalem, samwe 40 dei afta we hem i bon, oli mekem wan sakrefaes, folem samting we Loa i talem. ?Olsem wanem? ?Oli givim wan man sipsip wetem wan nawimba no wan pijin, olsem Loa i talem? No. Tufala i no gat naf mane blong mekem ol kaen sakrefaes ya. Nating se i olsem, Loa i tingbaot ol puaman mo i givim sam rul blong olgeta tu oli save mekem wan sakrefaes. Taswe, folem samting we Loa i talem, Josef mo Meri tufala i givim “tu sotleg, no tu smol nawimba.” Tufala i jusum ol anamol we oli no sas blong mekem wan sakrefaes. Samting ya i soem we famle blong Jisas i no wan rij famle.​—Luk 2:​22-24; Levitikas 12:​6, 8.

Taswe yu luk we Jisas Kraes, Man ya we bambae i mas Rul antap long ful wol, hem i bon long wan  famle we i no gat plante samting, mo we i mas wokhad blong kasem samting we oli nidim blong laef. Jisas i gruap blong kam wan kapenta, olsem papa blong hem long wol ya. (Matiu 13:55; Mak 6:3) Nating se Jisas hem “i rij” olsem wan spirit man we i gat paoa long heven, be Baebol i talem se “hem i kam pua” from yumi. Hem i tekem wan posisen we i daon moa olsem wan man, mo i gruap long wan famle we i no gat haenem. (2 Korin 8:9; Filipae 2:​5-9, NW; Hibrus 2:9) Jisas i no bon long wan rij famle, mo from samting ya plante man oli save se bambae hem i harem save tingting mo filing blong olgeta. From we hem i no gat wan hae posisen no bigfala mane, ale ol man oli no sem blong kam long Jisas. Oli save tinghae long hem from ol tijing blong hem, from ol gudfala fasin blong hem, mo from ol nambawan wok we hem i mekem. (Matiu 7:​28, 29; 9:​19-33; 11:​28, 29) Yes, Jeova i soem waes blong hem taem Hem i mekem Jisas i bon long wan famle we i no gat haenem.

Nao bambae yumi tokbaot ol memba blong famle blong Jisas, mo yumi luk ol samting we yumi save lanem from olgeta.

Josef​—Wan Stret Man

Taem Josef i harem se woman ya we hem i mas maredem, i gat bel, we “tufala i no mared yet,” hem i harem nogud tumas. From we long wan saed, hem i lavem Meri, be long narafala saed, i luk olsem we Meri i bin slip wetem wan narafala man. Yes, i luk olsem we Meri i spolem ol raet we Josef i mas kasem taem hem i mared wetem hem. Long taem ya, taem oli blokem wan gel blong hem i maredem wan man, oli luk hem olsem we hem i waef blong man ya finis. Josef i tingting dip long samting ya, mo hem i tekem disisen blong divos long Meri long fasin haed, blong bambae ol man oli no stonem Meri from we hem i bin slip wetem wan narafala man.​—Matiu 1:18; Dutronome 22:​23, 24.

Biaen Josef i gat wan drim mo i luk wan enjel we i talem long hem se: “Yu no fraet blong tekem Meri, blong i woman blong yu, from we Tabu Spirit nomo i mekem we hem i gat bel. Bambae hem i bonem wan boe, mo yu mas putum nem blong hem se Jisas, we i min se Sevia, from we hem bambae i sevem ol man blong hem, i tekemaot ol sin blong olgeta.” Josef i folem advaes ya we i kamaot long God, mo hem i tekem Meri blong i kam waef blong hem.​—Matiu 1:​20-24.

Josef i wan stret man mo hem i stap tru long God. Taem hem i tekem disisen ya, hem i tekpat long plan blong God blong mekem profet tok blong Aesea i kam tru, se: “Wan yang gel we naoia i gat bel, bambae i bonem wan pikinini boe blong hem, mo bambae i putum nem blong hem, se Emanuel.” (Aesea 7:14) Yumi sua we Josef i strong long saed blong spirit, mo hem i luksave we hem i gat wan bigfala janis blong kam papa blong Mesaea long wol ya, nating se fasbon pikinini boe ya blong Meri i no boe blong hem stret.

Josef i bos long hem wan blong i no slip wetem Meri gogo hem i bonem pikinini ya blong hem. (Matiu 1:25) Tufala i jes mared, taswe i no isi blong stap tugeta we tufala i no save slip tugeta. Be i luk olsem se tufala i no wantem we biaen, wan man i save agiu se hu ya nao Papa blong bebi ya. !Tufala i givim wan nambawan eksampol long fasin blong bos long tingting mo filing! Josef i putum ol samting long saed blong spirit i stap long faswan ples, bifo long ol samting we hem i wantem long saed blong bodi.

Fo taem, ol enjel oli givim advaes long Josef long saed blong fasin blong lukaot long pikinini boe blong hem long wol ya. Tri taem, oli talem long hem weples hem i mas tekem boe ya i go long hem. I impoten tumas we Josef i kwik blong obei long oda blong ol enjel ya blong bambae smol boe ya i laef i stap. Evri taem, Josef i tekem aksin kwiktaem nomo. Hem i tekem pikinini ya i go long Ijip mo biaen i kambak long Isrel. From samting ya, yangfala Jisas i no ded taem Herod i kilim i ded olgeta pikinini boe. Mo tu, fasin obei blong Josef i mekem plante profet tok i kam tru long saed blong Mesaea.​—Matiu 2:​13-23.

Josef i tijim wan wok long Jisas, blong hem i save lukaot long ol nid blong hem wan. Taswe, ol man oli save se Jisas hem i “pikinini blong man ya blong wokem haos,” mo tu oli singaot hem  se “man blong wokem haos.” (Matiu 13:55; Mak 6:3) Aposol Pol i tokbaot Jisas se “olgeta samting blong traem yumi oli traem hem finis.” Wan long ol traem ya, hemia fasin blong wokhad blong sapotem famle blong hem.​—Hibrus 4:15.

Long laswan stori we i tokbaot Josef long Grik Haf blong Baebol, yumi luk we Josef i fasgud long God. Josef i tekem famle blong hem i go long Jerusalem blong selebretem Pasova. Ol man nomo oli mas go, be Josef i folem kastom ya blong tekem ful famle blong hem i go long Jerusalem “evri yia.” Hem i rili traehad, from we oli mas wokbaot samwe 100 kilometa stat long Nasaret i go kasem Jerusalem. Long stori we i stap long Baebol, Jisas i aot long grup ya we oli stap wokbaot. Hem i stap long tempol, i stap lesin long ol tija blong Loa mo hem i askem kwestin long olgeta. Nating se Jisas i gat 12 yia blong hem nomo, be hem i waes mo i savegud Tok blong God. From stori ya, yumi luk we papa mama blong Jisas oli tijimgud hem, oli mekem hem i kam wan yangfala boe we i laekem ol samting long saed blong spirit. (Luk 2:​41-50) I luk olsem se Josef i ded smoltaem afta long Pasova ya, from we biaen Baebol i no moa tokbaot hem.

Yes, Josef i wan stret man we i lukaot gud long famle blong hem, long saed blong spirit mo long saed blong bodi tu. ?Olsem wanem long yu? ?Yu yu folem eksampol blong Josef mo yu putum ol samting long saed blong spirit fasples, taem yu luksave wanem samting Jeova i wantem we yumi mekem tede? (1 Timoti 2:​4, 5) ?Yu yu rere blong obei long ol samting we God i talem long Tok blong hem, olsem Josef i bin mekem? ?Yu yu stap tijimgud ol pikinini blong yu mekem se oli naf blong tokbaot ol samting long saed blong spirit wetem ol narafala?

Meri​—Wan Woman Blong Wok Blong God We i No Tingbaot Hem Wan Nomo

Meri, mama blong Jisas, hem i wan nambawan woman blong wok blong God. Taem enjel ya Gabriel i talem long hem se bambae hem i bonem wan pikinini, Meri i sapraes blong harem nius ya. Hem i wan yangfala woman, we i “no save man yet.” Taem hem i lanem we bambae tabu spirit i mekem se hem i gat bel, hem i akseptem mesej ya wetem tingting daon, mo hem i talem se: “Mi mi gel blong wok nomo blong Hae God. Mi wantem blong i kamtru long mi olsem we yu yu talem.” (Luk 1:​30-38) Hem i tinghae long bigfala blesing ya we God i givim long hem, mo hem i rere blong fesem eni traem we i save kamaot from disisen blong hem.

Mo i tru se samting ya i jenisim ful laef blong hem. Taem Meri i go long Jerusalem blong kam klin folem loa, wan olfala man we i gat respek, nem blong hem Simeon, i talem long Meri se: “Ol samting ya bambae i kasem tingting blong yu olsem wan naef blong faet we i stikim yu.” (Luk 2:​25-35) I luk olsem se Simeon i stap tokbaot ol filing blong Meri taem bambae hem i luk we plante man  oli sakemaot Jisas, mo oli nilim hem long wan pos blong i ded.

Taem Jisas i gruap, Meri i rimemba ol samting we i stap hapen long laef blong hem, “hem i stap tingbaot olgeta oltaem nomo.” (Luk 2:​19, 51) Sem mak olsem Josef, Meri i wan strong woman long saed blong spirit, mo hem i tinghae long ol samting we i stap hapen mo long ol tok we oli mekem ol profet tok i kamtru. Ating ol tok blong enjel Gabriel oli stap gud long tingting blong hem se: “Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:​32, 33) Yes, Meri i tinghae long wok we God i givim long hem olsem mama blong Mesaea long wol ya.

Bakegen, yumi luk we Meri i wan strong woman long saed blong spirit, taem yumi luk fasin blong hem taem hem i mitim Elisabet, wan famle blong hem we God i mekem wan merikel long hem tu blong hem i gat bel. Taem Meri i luk Elisabet, hem i presem Jeova mo hem i talem lav we hem i gat long Tok blong God. Hem i tokbaot prea blong Hana we yumi faenem long 1 Samuel japta 2, mo hem i ademap sam tingting we oli kamaot long sam narafala buk blong Hibru haf blong Baebol. Meri i savegud Baebol, mo samting ya i soem we hem i naf blong kam wan mama we i fasgud mo i fraetgud long God. Hem i wokgud wetem Josef blong tijim boe blong hem long saed blong spirit.​—Jenesis 30:13; 1 Samuel 2:​1-10; Malakae 3:12; Luk 1:​46-55.

Meri i gat wan strong bilif se boe blong hem i Mesaea, mo bilif ya i stap yet afta we Jisas i ded. Smoltaem afta we Jisas i laef bakegen, Meri i stap wetem ol disaepol ya we oli bilif mo we oli joen tugeta blong prea wetem ol aposol. (Ol Wok 1:​13, 14) Hem i holem strong bilif blong hem, nating se hem i safa bigwan taem hem i luk boe blong hem we hem i laekem tumas i ded long pos.

?Laef blong Meri i save tijim yu long wanem samting? ?Yu yu glad long bigfala ona ya blong mekem wok blong God, nating se yu mas lego sam samting? ?Yu yu luk blesing ya olsem wan impoten wok tede? ?Yu yu stap tingbaot ol profet tok we Jisas i bin talem, mo yu skelem ol tok ya wetem ol samting we i stap hapen tede? ?Yu yu “stap tingbaot olgeta oltaem nomo”? (Matiu, japta 24 mo 25; Mak, japta 13; Luk, japta 21) ?Yu yu folem eksampol blong Meri mo yu savegud Tok blong God, yu stap yusum hem oltaem taem yu toktok? ?Bambae yu holemtaet bilif we yu gat long Jisas, nating se samtaem, sam samting oli kam traem tingting mo filing blong yu from we yu yu stap folem hem?

 Ol Brata Blong Jisas​—Oli Pruvum Se Wan Man i Save Jenisim Fasin Blong Hem

I luk olsem we ol brata blong Jisas oli bilif long hem nomo afta we hem i ded mo i laef bakegen. Ating from risen ya nao, oli no stap taem Jisas i ded long pos, mekem se Jisas i askem long aposol Jon blong i lukaot long mama blong hem taem hem i ded. Ol memba blong famle blong Jisas oli soem we oli no gat respek long hem. Wan dei, oli tokbaot Jisas oli se “hed blong hem i krangke ya.” (Mak 3:21) Long famle blong Jisas, i gat sam man we oli no bilif. Taswe, tede ol man we oli gat sam memba long famle blong olgeta we oli no bilif oli sua we Jisas i kasem save ol filing blong olgeta, taem famle i stap jikim olgeta from bilif blong olgeta.

Be, afta we Jisas i laef bakegen ol brata blong hem oli stat bilif long hem. Oli stap long grup we i joen long Jerusalem long Pentekos 33 K.T. * mo oli stap prea tugeta wetem ol aposol. (Ol Wok 1:14) I klia se, taem Jisas we i haf brata blong olgeta, i laef bakegen, samting ya i pusum olgeta blong jenisim tingting blong olgeta ale oli kam disaepol blong hem. Yumi neva mas lusum hop long saed blong ol famle blong yumi we oli no gat bilif yet.

Baebol i tokbaot Jemes, haf brata blong Jisas we Hem i kamtru long hem, olsem wan man we i bin mekem wan bigfala wok long Kristin kongregesen. Tabu spirit i pusum Jemes blong raetem wan leta long ol Kristin brata blong hem, mo long leta ya Jemes i leftemap tingting blong olgeta blong oli holem bilif blong olgeta. (Ol Wok 15:​6-29; 1 Korin 15:7; Galesia 1:​18, 19; 2:9; Jemes 1:1) Tabu spirit i pusum wan narafala haf brata blong Jisas, hemia Jud, blong i raetem wan leta tu. Long leta ya, Jud i leftemap tingting blong ol narafala man blong bilif blong oli faet strong from bilif blong olgeta. (Jud 1) I gud blong makem we long ol leta we Jemes mo Jud i raetem, tufala i no talem se tufala i haf brata blong Jisas blong pulum ol narafala Kristin blong lesin long tufala. !Tufala i givim wan nambawan eksampol long yumi long fasin blong soem tingting daon!

Taem yumi tingtingbak long ol samting ya we yumi tokbaot, ?Wanem ol samting we yumi bin lanem long famle blong Jisas? Yumi lanem fasin blong fasgud long God, we yumi save soem long defdefren rod olsem hemia: (1) Stap tru mo obei long ol loa blong God, mo rere blong fesem ol traem we oli save kamaot from. (2) Putum ol samting long saed blong spirit fastaem, nating se yumi mas lego sam samting. (3) Trenem ol pikinini blong yumi folem samting we Baebol i talem. (4) No lusum hop long saed blong ol famle blong yumi we oli no gat bilif yet. (5) No flas from fasin fren we yumi save gat wetem sam brata long Kristin kongregesen we maet oli gat wan posisen. Yes, taem yumi letem eksampol blong famle blong Jisas i tijim yumi, yumi kam klosap moa long Jisas, mo fasin tangkiu blong yumi i kam dip moa, from we Jeova i jusum wan famle we i no gat haenem blong oli lukaotgud long Jisas taem hem i wan pikinini.

[Futnot]

[Tok blong pija long pej 4]

Josef i tekem Meri olsem waef blong hem mo hem i tekpat long plan blong God blong mekem ol profet tok long saed blong Mesaea oli kamtru

[Tok blong pija long pej 6]

Josef mo Meri oli tijim ol pikinini blong tufala long ol samting long saed blong spirit, mo se i impoten blong wok

[Tok blong pija long pej 7]

Nating se ol brata blong Jisas oli gruap long wan famle we i strong long saed blong spirit, be oli bilif long Jisas nomo taem we hem i ded

[Tok blong pija long pej 8]

Jemes mo Jud, tufala haf brata blong Jisas, tufala i leftemap tingting blong ol narafala Kristin