?God i Rili Kea Long Yumi?

?YU YU harem se filing blong yu i kam hevi from ol problem insaed long famle, long helt, wok, no from sam narafala bigfala wok we yu mas mekem? Plante man oli stap harem olsem. Mo ating klosap evri man tede i harem nogud from ol fasin we i no stret, fasin blong brekem loa, mo raf fasin we i stap hapen raon long olgeta. Yes, i stret olsem Baebol i talem se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud, olsem we woman i harem nogud, blong bambae pikinini blong hem i bon.” (Rom 8:22) Taswe plante man oli askem ol kwestin ya se, ‘?God i rili kea long yumi? ?Olsem wanem? ?Bambae hem i givhan long yumi?’

Waes King ya Solomon i prea long God i se: “Yu nomo yu save tingting blong olgeta man evriwan.” Solomon i trastem God se hem i save olgeta man wanwan mo i kea long olgeta. Hem i askem long God se “plis yu harem prea blong mifala” mo i askem se God i ansa long wanwan prea blong ol man we oli wosipim hem mo we oli talemaot long God se oli “harem nogud long tingting blong olgeta.”​—2 Kronikel 6:​29, 30.

Tede tu, Jeova God i rili kea long yumi mo i talem long yumi se yumi mas singaot hem tru long prea. (Ol Sam 50:15) Hem i promes blong lesin long ol prea we i kamaot long hat mo we i laenap wetem wanem we hem i wantem. (Ol Sam 55:​16, 22; Luk 11:​5-13; 2 Korin 4:7) Tru ya, Jeova i ‘harem prea blong olgeta man blong hem.’ Taswe, sipos yumi trastem God, prea long hem blong i halpem yumi, mo stap klosap long hem, ale bambae yumi luk olsem wanem hem i kea gud long yumi mo i protektem yumi. (Ol Proveb 3:​5, 6) Jemes we i raetem wan long ol buk long Baebol i mekem yumi sua se: “Yufala i mas stap klosap long God, nao hem bambae i kam stap klosap long yufala.”​—Jemes 4:8.