Olgeta Man Oli Mas Leftemap Nem Blong Jeova

“Yumi leftemap nem blong [Hae God] from ol gudgudfala samting blong hem mo from paoa blong hem. !Nem blong hem i hae we i hae! !Yumi presem hem!”​—OL SAM 96:​7, 8.

1, 2. ?Wanem samting i stap presem Jeova, mo hu olgeta we oli mas presem God tu?

 DEVED, pikinini blong Jese, i gruap klosap long taon ya Betlehem. Taem hem i yangfala, hem i stap lukaot long ol sipsip blong papa blong hem. Evri naet, hem i stap hem wan long tudak, i stap lukaot long ol sipsip ya farawe long ol narafala man. !Ating plante taem, taem ples i kwaet we i kwaet, hem i stap lukluk i go antap long bigbigfala skae we i fulap long ol sta! Ating pija blong naesfala skae ya i stap long tingting blong hem taem tabu spirit blong God i pulum hem blong raetem mo singim ol naesfala tok ya long Sam namba 19 se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem. Be tok blong olgeta i stap goaot long olgeta ples long wol, toktok blong olgeta i stap go long evri kona blong hem.”​—Ol Sam 19:​1, 4.

² Bigfala skae ya we Jeova i wokem i no save tok mo hem i no gat voes, be evri dei mo evri naet, hem i stap leftemap God. Ol samting ya we Jeova i wokem oli neva spel blong leftemap nem blong hem. I olsem we oli givim witnes long ol man “long olgeta ples long wol” mo oli mekem ol man ya oli tingbaot se oli smol tumas. Be i no ol samting raonabaot long yumi nomo we i mas leftemap nem blong God. I gud sipos olgeta man we oli bilif long God, olgeta tu oli yusum voes blong olgeta blong presem God. Wan man blong raetem Sam, we yumi no save nem blong hem, i toktok i go long ol man blong God i se: “Yumi leftemap nem blong hem from ol gudgudfala samting blong hem mo from paoa blong hem. !Nem blong hem i hae we i hae! !Yumi presem hem!” (Ol Sam 96:​7, 8) Ol man we oli ol fren blong Jeova oli glad nomo blong folem tok ya. ?Be oli mekem olsem wanem blong leftemap nem blong God?

3. ?From wanem ol man oli leftemap nem blong God?

³ I no naf blong toktok nomo. Ol man Isrel long taem blong Aesea oli presem God wetem maot blong olgeta, be long hat blong olgeta oli no laekem God nating. Taswe Jeova i talem long Aesea se: “Ol man ya oli stap talem se oli stap mekem wosip long mi, be ol tok ya blong olgeta i blong nating nomo, tingting blong olgeta i stap longwe tumas long mi.” (Aesea 29:13) Olgeta tok we ol man ya oli stap talemaot blong presem God, oli blong nating nomo. Man we i rili wantem presem Jeova hem i mas lavem Jeova wetem olgeta hat blong hem, mo hem i mas luksave fulwan se nem blong Jeova i antap olgeta. Jeova nomo i Man ya we i Wokem olgeta samting. Hem i God we i gat Olgeta Paoa. Hem i Man ya nomo we fasin blong hem i Stret Olgeta. Hem i nambawan eksampol blong lav. Hem nao i wokem rod blong sevem  yumi. Mo hem nomo i gat raet fulwan blong rul olsem king mo blong olgeta man long heven mo long wol oli stap aninit long paoa blong hem. (Revelesen 4:11; 19:1) Sipos yumi rili bilif se Jeova i olsem, ale bambae yumi leftemap nem blong hem wetem fulhat blong yumi.

4. ?Wanem advaes we Jisas i givim blong halpem yumi blong leftemap nem blong God, mo olsem wanem blong folem advaes ya?

⁴ Jisas Kraes i talem long yumi olsem wanem yumi save presem God. Hem i se: “Taem yufala i karem plante frut long laef blong yufala, samting ya i save leftemap nem blong Papa blong mi, mo long fasin ya yufala i kam man blong mi.” (Jon 15:8) ?Olsem wanem yumi save karem plante frut? Faswan rod hemia taem yumi yusum olgeta paoa blong yumi blong talemaot “gud nius” blong kingdom. Long rod ya, yumi joen wetem olgeta narafala samting ya we God i wokem, blong talemaot ‘ol fasin ya blong hem we yumi no save luk stret long ae blong yumi.’ (Matiu 24:14; Rom 1:20) Mo tu, taem yumi mekem olsem, yumi tekpat long wok blong pulum plante niu disaepol oli kam blong presem Jeova God. Namba tu rod, hemia taem yumi wokem ol frut blong tabu spirit mo yumi traehad blong gat ol fasin olsem Jeova God. (Galesia 5:​22, 23; Efesas 5:1; Kolosi 3:10) Sipos yumi mekem olsem, ol fasin blong yumi evri dei oli stap leftemap nem blong God.

“Long Olgeta Ples Long Wol”

5. Talem olsem wanem Pol i poenemaot se i wok blong ol Kristin blong leftemap nem blong God taem oli serem bilif blong olgeta wetem ol narafala.

⁵ Long leta we Pol i raetem i go long ol Kristin long Rom, hem i poenemaot se wok blong ol Kristin hemia blong presem God taem oli serem bilif blong olgeta wetem ol narafala man. Wan stamba tingting long buk blong Rom hemia se ol man we oli gat bilif long Jisas Kraes olgeta ya nomo bambae oli sef. Long japta 10 blong leta ya, Pol i soem se ol prapa man Isrel long taem blong hem oli stap traehad yet blong kam stret man tru long Loa blong Moses. Be “Kraes i finisimgud olgeta wok blong Loa” ya finis. Taswe Pol i talem se: “Sipos yu talemaot we Jisas . . . i Masta blong yu, mo yu bilif long hat blong yu we God i mekem hem i laef bakegen, God bambae i sevem yu.” Stat long taem ya, “tok ya i kavremap olgeta man, i nating we sam oli laen blong Isrel, mo sam oli no laen blong Isrel, from we God ya, hem i Hae God, i Masta blong olgeta man evriwan, mo hem i stap mekem i gud tumas long olgeta we oli stap singaot long hem. Hemia i olsem tok blong Baebol we Hae God i talem se, ‘Olgeta man we oli singaot long mi long nem blong mi, mi bambae mi sevem olgeta.’ ”​—Rom 10:​4, 9-13.

6. ?Pol i yusum ol tok blong Ol Sam 19:4 blong soem wanem?

⁶ Afta long hemia, Pol i askem ol kwestin ya: “?Sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” (Rom 10:14) Nao, Pol i tokbaot ol man Isrel taem hem i talem se: “I no olgeta man we oli stap bilif [no “obei,” olsem NW i talem] long gud nius ya.” ?From wanem ol man Isrel oli no obei? Hemia from we oli sot long bilif, be i no from we oli no bin gat janis blong harem tok ya. Nogat. Pol i soemaot samting ya taem hem i yusum ol tok blong Ol Sam 19:​4, we i tokbaot ol samting we God i wokem, mo hem i laenemap wetem Kristin wok blong prij. Hem i se: “I olsem tok blong Baebol we i talem se, ‘Tok blong olgeta i goaot finis long olgeta ples long wol. Toktok blong olgeta i go long evri kona blong hem.’ ” (Rom 10:​16, 18) Yes, ol samting we God i wokem we oli no save toktok oli stap leftemap nem blong Jeova. Long sem fasin, ol Kristin long faswan handred yia oli talemaot gud nius blong sevem ol man long evri ples, mo long rod ya oli stap presem God long “olgeta ples long wol.” Taem Pol i raetem leta i go long ol Kristin long Kolosi, hem i talemaot olsem wanem gud nius ya i go kasem plante ples. Hem i talem se gud nius ya oli talemaot finis “long olgeta man long wol.”​—Kolosi 1:23.

Ol Witnes We Oli Wok Strong

7. ?Folem ol tok blong Jisas, wanem wok we ol Kristin oli mas mekem?

⁷ Ating Pol i raetem leta i go long ol Kristin long  Kolosi samwe long 27 yia afta we Jisas Kraes i ded. ?Olsem wanem wok blong prij i save go kasem Kolosi hareap nomo olsem? Hem i hapen olsem from we ol Kristin long faswan handred yia oli man blong wok strong, mo Jeova i blesem strong tingting blong olgeta. Jisas i bin talemaot finis se ol man blong hem bambae oli man blong wok strong blong prij, taem hem i se: “Gud nius ya i mas go long olgeta man long wol fastaem.” (Mak 13:10) Jisas i ademap wan oda, antap long profet tok ya. Oda ya i stap long laswan vas blong Gospel blong Matiu: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:​19, 20) Smoltaem afta we Jisas i gobak long heven, ol man blong hem oli stat folem ol tok ya blong hem.

8, 9. ?Buk blong Ol Wok i talem se ol Kristin oli mekem wanem blong folem oda blong Jisas?

⁸ Afta we tabu spirit i kamdaon long ol man blong Jisas long lafet blong Pentekos long yia 33 K.T., * fas samting we oli mekem hemia se oli go prij. Oli go long olgeta man we oli hivap long Jerusalem, oli talemaot “ol bigbigfala wok ya we God i mekem.” Wok blong prij we oli mekem i kasem hat blong plante man, mo “samwe long tri taosen man” oli tekem baptaes. Ol disaepol oli gohed blong wok strong, oli leftemap nem blong God long fes blong ol man, mo gudfala frut i kamaot from.​—Ol Wok 2:4, 11, 41, 46, 47.

⁹ I no longtaem, ol lida blong skul oli harem nius blong wok we ol Kristin oli bisi long hem. Oli no glad taem oli luk we Pita mo Jon tufala i no seksek nating long fored blong olgeta. Nao oli tok strong long tufala aposol ya se tufala i mas stop blong prij. Tufala aposol ya i ansa se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” Ale ol lida ya oli tok strong long tufala mo biaen oli letem tufala i gofri. Taem Pita mo Jon tufala i fri, tufala i go miting wetem ol brata nao olgeta evriwan oli prea long Jeova. Tingting blong olgeta i strong, oli askem long Jeova se: “Plis yu givhan long mifala, blong bambae mifala i talemaot ol tok blong yu, we tingting blong mifala i strong.”​—Ol Wok 4:​13, 20, 29.

10. ?Wanem fasin agens i stat kam antap, mo ol trufala Kristin oli mekem wanem taem samting ya i kamaot?

¹⁰ Prea ya i laenap fulwan wetem tingting blong Jeova, mo hem i soemaot samting ya biaen. Ol man oli holem ol aposol mo oli putum olgeta long kalabus. Be wan enjel i mekem olgeta oli fri bakegen. Enjel ya i talem long olgeta se: “Yufala i go long haos blong God, yufala i talemaot ol tok blong niufala laef ya, long ol man.” (Ol Wok 5:​18-20) From we ol aposol oli obei, Jeova i gohed blong blesem olgeta. Ale, “evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Ol Wok 5:42) I klia se strong fasin agens i no  naf nating blong stopem ol man blong Jisas, oli gohed nomo blong leftemap nem blong God long fes blong olgeta man.

11. ?Wanem fasin we ol faswan Kristin oli gat long saed blong wok blong prij?

¹¹ I no longtaem biaen, oli holem Steven mo oli stonem hem i ded. Ded blong hem i givim paoa long ol man blong oli girap strong moa agensem ol Kristin long Jerusalem. Ale olgeta disaepol oli mas ronwe, oli go stap long narafala ples. Ol aposol nomo oli stap long Jerusalem. ?Trabol taem ya i mekem tingting blong olgeta i foldaon? Nogat. Yumi ridim se: “Olgeta ya we oli bilif long Jisas . . . oli goaot long evri ples, oli stap talemaot gud nius blong Jisas.” (Ol Wok 8:​1, 4) Ol disaepol oli no kam slak nating, tingting blong olgeta i stap strong blong presem God. Long Ol Wok japta 9, yumi ridim stori blong wan Farisi we nem blong hem Sol, hem i blong Tasas. Taem hem i stap wokbaot i go long Damaskas blong holem ol disaepol blong Jisas we oli stap long ples ya, hem i luk wan vison blong Jisas we i mekem hem i blaen. Ale, long Damaskas, Ananaeas i mekem wan merikel blong Sol i save lukluk bakegen. ?Wanem faswan samting we Sol​—we biaen i kam aposol Pol​—i mekem? Stori long Baebol i talem se: “Wantaem nomo, hem i stat go insaed long ol haos blong prea blong ol laen blong Isrel, i stap talemaot se Jisas ya, hem i Pikinini blong God.”​—Ol Wok 9:20.

Evriwan Oli Joen Long Wok Blong Prij

12, 13. (a) ?Ol man we oli tokbaot histri, oli talem wanem long saed blong faswan Kristin kongregesen? (b) ?Olsem wanem buk blong Ol Wok mo ol tok blong Pol i agri wetem toktok blong ol man ya we oli tokbaot histri?

¹² Plante man oli luksave se evriwan we oli pat blong faswan Kristin kongregesen oli joen long wok ya blong prij. Wan man we nem blong hem Philip Schaff i tokbaot ol Kristin long taem bifo, mo hem i raetem se: “Evri kongregesen [blong ol faswan Kristin ya] i olsem wan komuniti blong ol misinari, mo olgeta Kristin evriwan oli wok olsem misinari.” (History of the Christian Church) Man ya W. S. Williams i talem se: “Samting we bighaf blong ol man oli luksave hemia se evri Kristin long faswan Jos, antap moa olgeta ya we oli kasem ol spesel paoa [we tabu spirit i givim], oli stap prijimaot gospel.” (The Glorious Ministry of the Laity) Masta Williams i makem strong toktok ya blong hem i se: “Jisas Kraes i neva talem se wok ya blong prij i blong wan spesel grup blong man long jos we oli gat hae posisen.” Man ya Celsus, we i agensem Kristin skul, hem tu i raetem se: “Ol man blong wokem ol samting long hea blong sipsip, ol man blong wokem sus, ol man blong wokem kaliko long skin blong buluk, mo olgeta man, nating se oli no save rid mo raet mo oli pua olsem wanem, be oli wok strong blong prijimaot gospel.”

¹³ Toktok blong ol man ya i tru nomo taem yumi skelem wetem ol stori we oli stap long buk blong Ol Wok. Long lafet blong Pentekos long yia 33 K.T., tabu spirit i kamdaon, nao olgeta disaepol, ol man mo ol woman, oli stat talemaot ol bigbigfala wok blong God. Afta we Steven i ded, plante Kristin oli mas ronwe long ples blong olgeta from trabol we i stat kasem olgeta. Be oli gohed blong talemaot gud nius taswe wok ya i go kasem plante moa ples. Samwe long 28 yia biaen, Pol i raetem leta i go long evri Hibru Kristin, i no jes long wan spesel grup blong ol lida blong jos nomo, taem hem i se: “Oltaem yumi mas joen long Jisas, mo yumi mas leftemap nem blong God. Fasin ya i olsem we oltaem yumi stap mekem sakrefaes blong givim long hem. Evritaem, taem yumi talemaot nem blong Jisas long fes blong ol man, i olsem we yumi givim presen i go long God.” (Hibrus 13:15) Pol hem wan i talemaot tingting we hem i gat long saed blong wok blong prij i se: “Mi mi stap talemaot gud nius blong Kraes, be mi no gat raet blong tok flas from samting ya. Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.” (1 Korin 9:16) I klia se, olgeta Kristin blong faswan handred yia oli gat sem tingting olsem Pol.

14. ?Olsem wanem bilif mo wok blong prij tufala i joen?

¹⁴ Yes, wan trufala Kristin i mas joen long wok blong prij from we wok ya i joen wetem bilif. Pol i talem se: “Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” (Rom 10:10) ?Yu ting se i gat wan smol grup blong man nomo insaed long kongregesen​—olsem ol lida blong skul—​we oli bilif, mo from samting ya olgeta nomo oli stap prij? !Nogat! Olgeta trufala Kristin oli gat bilif long Masta Jisas Kraes, mo bilif ya i laef taswe oli wantem talemaot bilif ya long ol narafala man. Sipos ol Kristin ya oli no mekem samting ya, bilif blong olgeta i ded. (Jemes 2:26) Olgeta Kristin blong faswan handred yia we oli fasgud  long God, oli prij blong soemaot bilif blong olgeta. From samting ya, i olsem we ol man long taem blong olgeta oli harem wan bigfala voes i kamaot blong presem nem blong Jeova.

15, 16. Givim sam eksampol blong soem se wok blong prij i gohed nating se i gat trabol.

¹⁵ Long faswan handred yia, Jeova i blesem ol man blong hem taem hem i mekem we namba blong olgeta i gru, nating se maet i gat sam trabol i kamaot insaed long kongregesen no wetem ol man afsaed. Eksampol, Ol Wok japta 6 i tokbaot wan smol trabol we i kamaot bitwin ol Kristin we oli toktok lanwis Hibru mo ol Kristin we oli toktok lanwis Grik. Ol aposol oli stretem trabol ya. Samting we i kamaot biaen, hemia: “Oltaem, tok blong God i stap goaot moa long ol man. Mo grup blong ol man we oli bilif long Jisas i stap kam bigwan moa long Jerusalem. Mo plante pris tu oli bilif long Jisas.”​—Ol Wok 6:7.

¹⁶ Biaen, wan trabol long saed blong politik i kamaot we i mekem se King Herod Agripa blong Judia, i kros long ol man long Taea mo Saedon. Ale ol man long tufala taon ya oli tok swit long King Herod blong oli save gat pis wetem hem. Nao hem i kam blong givim toktok blong hem long olgeta. Olgeta man we oli hivap blong lesin long hem oli stat singaot se: “Hemia i no man ya we i stap toktok long yumi. Hemia wan god ya.” Taem oli tok olsem, wantaem nomo enjel blong Jeova i kilim Herod Agripa i ded, “from we hem i no save leftemap nem blong God.” (Ol Wok 12:​20-23) !Ating ol man long taem ya, we oli putum tras blong olgeta long ol lida blong wol, oli sek bigwan long samting ya! (Ol Sam 146:​3, 4) Be, ol Kristin oli gohed blong leftemap nem blong Jeova. From samting ya, nating se i gat trabol insaed long politik, be “tok blong God i stap goraon moa, mo i gat plante man moa oli stap bilif long hem.”​—Ol Wok 12:24.

Bifo Mo Tede

17. ?Long faswan handred yia, olgeta man we oli kam joen long grup blong ol Kristin oli stap joen tu long wanem wok?

¹⁷ Yes, kongregesen blong ol Kristin long faswan handred yia i wok strong, hem i no slak blong presem Jeova God. Olgeta Kristin we oli stap tru long God oli joen long wok blong talemaot gud nius. Sam long ol Kristin ya oli faenem ol man we oli laekem gud nius ya, ale, olsem Jisas i talem, oli tijim ol man ya blong obei long olgeta tok ya blong hem. (Matiu 28:​19, 20) Frut blong samting ya se kongregesen i gru, mo plante moa man oli joen blong presem Jeova olsem we King Deved i bin mekem bifo. Olgeta evriwan oli talemaot ol tok ya we i kamaot long paoa blong tabu spirit se: “God, yu yu Masta blong mi. Bambae mi stap presem yu long olgeta tingting blong mi, bambae mi stap leftemap hae nem blong yu oltaem, gogo i no save finis. Oltaem yu yu lavem mi tumas. Fasin ya blong yu i gud we i gud.”​—Ol Sam 86:​12, 13.

18. (a) ?Wanem samting i mekem se Kristin kongregesen blong faswan handred yia i defren long Krisendom tede? (b) ?Bambae yumi tokbaot wanem long nekis stadi?

¹⁸ Taem yumi tingbaot samting ya, yumi intres long toktok blong man ya Allison A. Trites, we hem i wan tija long saed blong histri blong ol jos. Hem i skelem ol Kristin skul blong tede wetem faswan Kristin skul blong bifo, mo hem i se: “Long ol jos tede, namba blong ol memba i gru taem ol famle oli gru (maet wan man i memba blong wan jos nao taem hem i mared mo i gat pikinini, olgeta tu oli memba blong jos ya) no taem sam memba blong jos long wan ples oli muf i go long narafala ples (maet wan man i memba blong wan jos long ples blong hem, be taem hem i muf i go long narafala ples hem i go joenem jos long ples we hem i muf i go long hem). Be taem yumi ridim Ol Wok, yumi luk se [kongregesen blong ol Kristin bifo] i gru from we oli pulum ol man afsaed oli kam insaed long jos, from we long taem ya jos i jes statem wok blong hem.” ?Tok ya i minim wanem? ?Hem i min se naoia trufala Kristin skul i no moa stap gru olsem we Jisas i talem fastaem? No, i no minim olsem. Ol trufala Kristin tede oli wok strong yet blong presem God long fes blong ol man, sem mak olsem we ol faswan Kristin oli bin mekem. Bambae yumi luk samting ya long nekis stadi.

[Futnot]

?Yu Yu Save Eksplenem?

• ?Yumi save presem God olsem wanem?

• ?Pol i yusum ol tok blong Ol Sam 19:4 blong soem wanem?

• ?Olsem wanem bilif i joen wetem wok blong prij?

• ?Wanem wan samting we yumi save makem long saed blong faswan Kristin kongregesen?

[Kwestin]

[Tok blong pija long pej 8, 9]

Evri dei mo evri naet, skae i stap leftemap Jeova

[Credit Line]

Courtesy of Anglo-Australian Observatory, photograph by David Malin

[Tok blong pija long pej 10]

Wok blong prij mo prea, tufala i wok wanples