‘Toktok Blong Olgeta i Go Long Evri Kona Blong Wol’

“Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.”​—MATIU 28:19.

1, 2. (a) ?Wanem oda we Jisas i givim long ol disaepol blong hem? (b) ?From wanem ol Kristin long faswan handred yia oli naf blong mekem bigfala wok?

 SMOLTAEM bifo we Jisas i gobak long heven, hem i givim oda ya long ol disaepol blong hem. Hem i talem long olgeta se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.” (Matiu 28:19) !Hemia wan wok we i bigfala tumas!

² !Tingbaot samting ya! Long lafet blong Pentekos long yia 33 K.T., samwe long 120 disaepol oli kasem tabu spirit, mo oli stat folem oda ya blong talemaot long ol man se Jisas nao hem i Mesaea ya we ol man oli stap wet long hem blong i sevem olgeta. (Ol Wok 2:​1-36) ?Olsem wanem smol grup ya i save go kasem “olgeta ples long wol”? Ol man nomo wetem prapa paoa blong olgeta, bambae oli no naf blong mekem olsem. Be, “God i save mekem olgeta samting.” (Matiu 19:26) Tabu spirit blong Jeova i givhan long ol faswan Kristin ya, mo tu, oli tingbaot wok ya olsem wan samting we i impoten tumas. (Sekaraea 4:6; 2 Timoti 4:2) Taswe i no 30 yia yet, be aposol Pol i save talem se oli talemaot gud nius finis long “olgeta man long wol.”​—Kolosi 1:23.

3. ?Wanem samting i haedem “gudfala sid” ya we i trufala Kristin skul?

³ Long bighaf blong faswan handred yia, trufala wosip i gru gogo i kasem plante ples. Be Jisas i talemaot se i gat taem i stap kam we bambae Setan i planem ol sid blong “rabis gras,” nao bambae oli gru mo oli haedem “gudfala sid” ya we hem i trufala Kristin skul. Ale, trufala Kristin skul ya bambae i stap haed blong plante handred yia gogo kasem taem blong tekemaot ol gudfala kakae long garen. Profet tok ya i kamtru afta we ol aposol oli ded.​—Matiu 13:​24-39.

Wok i Stap Gru Hareap Tede

4, 5. ?Stat long 1919, wanem wok we ol tabu Kristin oli statem, mo from wanem wok ya i no isi?

⁴ Long 1919, taem i kam blong seraotem gudfala Kristin sid ya long rabis gras. Ol Kristin we tabu spirit i makemaot olgeta oli save se olgeta tu oli mas folem oda ya we Jisas i bin givim. Oli bilif fulwan se oli stap laef long taem blong ol ‘las dei,’ mo oli tingbaot profet tok ya blong Jisas we i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (2 Timoti 3:1; Matiu 24:​14, NW ) Tru ya oli luksave se i gat plante wok blong mekem.

⁵ Be, ol tabu Kristin oli luksave tu se wok ya bambae i no isi, olsem we i no isi long ol disaepol long yia 33 K.T. Namba blong olgeta i smol nomo, mo oli stap long sam kantri nomo. ?Olsem wanem oli save talemaot gud nius ya long “olgeta ples long wol”? Tingbaot se long taem we Sisa i rul, i gat samting olsem 300 milian man nomo long wol. Be, afta long fas wol wo, i gat klosap 2 bilian man long wol. Mo long ol yia kam kasem taem blong yumi namba ya i stap gru yet.

6. ?Wok blong talemaot gud nius i kam bigwan olsem wanem long ol yia raonabaot long 1935?

 ⁶ Nating se i olsem, ol tabu man blong Jeova oli folem fasin blong ol Kristin long faswan handred yia. Oli statem wok ya mo oli putum tras blong olgeta long Jeova. Mo tabu spirit blong Jeova i givhan long olgeta. Raonabaot long yia 1935, i gat samwe long 56,000 man blong talemaot gud nius we oli stap talemaot trutok blong Baebol long 115 kantri. Tru, oli mekem bigfala wok finis, be i gat plante moa wok yet i stap.

7. (a) ?Wanem samting we ol tabu Kristin oli luksave? (b) ?From we ol “narafala sipsip” oli givhan long ol tabu Kristin, wok blong prij i gru olsem wanem?

⁷ Biaen, save long saed blong “bigfala kampani” ya we Revelesen 7:9 (NW ) i tokbaot, i kam klia moa. Ale ol tabu Kristin we oli stap wokhad, oli luksave se wok blong prij bambae i mas go moa, be tu, oli luksave se bambae i gat plante moa man blong givhan long olgeta long wok ya. Bigfala kampani ya blong “ol narafala sipsip” oli blong laef olwe long wol ya. Taem i kam nao blong hivimap ol man ya we “oli kamaot long olgeta nesen, mo long olgeta laen, mo long olgeta kantri, mo long olgeta lanwis.” (Jon 10:16) Olgeta ya oli stap mekem ‘wosip long God long dei mo long naet.’ (Revelesen 7:15) Hemia i min se bambae oli givhan long wok blong prij mo blong tijim ol man. (Aesea 61:5) From samting ya, ol tabu Kristin oli glad tumas blong luk we namba blong ol man blong prij i kam bigwan gogo i kasem bitim milian man. Long yia 2003, yumi kasem wan niufala namba blong 6,429,351 man we oli joen long wok blong prij​—bighaf blong olgeta ya oli blong bigfala kampani. * Ol tabu Kristin oli tangkiu bigwan long help we olgeta ya oli givim. Mo ol narafala sipsip oli tangkiu long janis ya we oli gat blong wok wetem ol tabu brata blong olgeta.​—Matiu 25:​34-40.

8. ?Ol Witnes blong Jeova oli mekem wanem taem bigfala trabol i kam agensem olgeta long seken wol wo?

⁸ Taem ol man oli stat luksave hu nao grup ya we i olsem gudfala sid, Setan i kam kros tumas mo i kam faet agensem grup ya. (Revelesen 12:17) ?Hem i mekem wanem taem hem i luk we wan bigfala kampani blong man tu i stat kam antap? !Hem i mekem i nogud tumas long olgeta! Yumi sua fulwan se hem nao i biaenem ol man long fulwol blong oli agensem trufala wosip long taem blong seken wol wo. Ol Kristin long taem ya oli fesem bigfala hadtaem. Plante gudfala brata mo sista blong yumi oli safa long sam traem we oli nogud olgeta, sam long olgeta oli ded from we oli no wantem lego bilif blong olgeta. Nating se i olsem, oli mekem olsem tok ya blong man we i raetem Sam i se: “Mi mi trastem Hae God nao mi no moa fraet. Mi mi presem hem from ol promes blong hem. I no gat man i save mekem wan samting long mi.” (Ol Sam 56:4; Matiu 10:28) Tabu spirit blong Jeova i givim paoa long ol tabu Kristin mo ol narafala sipsip, nao olgeta ya oli stanap strong tugeta. (2 Korin 4:7) From samting ya, “tok blong God i stap goaot moa long ol man.” (Ol Wok 6:7) Taem wo i stat long 1939, i gat 72,475 Kristin we oli putum ripot blong wok blong prij. Be long 1945, taem wo i finis, ripot i soemaot se i gat 156,299 Witnes we oli stap talemaot gud nius. Namba ya i bigwan, nating se i no evri Witnes long taem ya we oli bin naf blong putum ripot blong olgeta. !Samting ya i rili spolem ol rabis plan blong Setan!

9. ?Taem Wol Wo Tu i stap gohed, wanem tufala skul we oli stat tokbaot blong mekem?

⁹ Nating se tingting blong plante man i fasfas from ol trabol blong seken wol wo, ol man blong Jeova oli no ting se maet wok blong prij bambae i stop. Nogat. Long 1943, taem wo i stap gohed yet, ol brata oli stat tokbaot tu niufala skul we bambae oli mekem. Wan long tufala skul ya, hemia we tede yumi kolem Tiokratik Skul. Hemia wan skul we oli wantem holem long evri kongregesen blong trenem ol Witnes wanwan long wok blong prij mo pulum man i kam disaepol. Narafala skul ya hemia Wajtaoa Baebol Skul blong Gilead, we hem i trenem  ol misinari blong oli go mekem wok blong prij long ol narafala kantri. Tru ya, ol samting ya oli mekem we, taem wo i finis, ol trufala Kristin oli rere blong mekem wok i kam antap bigwan.

10. ?Olsem wanem ol man blong Jeova oli soemaot se tingting blong olgeta i strong blong wok long yia ya 2003?

¹⁰ !Wok we tufala skul ya i mekem i gud tumas! Trening long Tiokratik Skul i givhan long evriwan​—ol yangfala, ol olfala, ol papa mama, ol pikinini, mo olgeta tu we oli handikap​—blong oli joen mo oli gohed blong joen long wok ya we Jisas i givim. (Ol Sam 148:​12, 13; Joel 2:​28, 29) Long yia 2003, klosap evri manis i gat samwe long 825,185 brata mo sista blong yumi oli soemaot se oli tingbaot wok ya olsem samting we i impoten tumas, taem oli joen long wok blong paenia, maet blong sam manis nomo no blong longtaem. Long semfala yia ya, ol Witnes blong Jeova oli spenem 1,234,796,477 aoa blong serem gud nius blong Kingdom wetem ol narafala. !Yes, Jeova i glad tumas blong luk strong tingting blong ol man blong hem!

Wok Blong Prij Long Narafala Kantri

11, 12. ?Wanem eksampol i soemaot gudfala frut we i kamaot long wok blong ol misinari?

¹¹ Olgeta we oli joen long skul blong Gilead, we i stat longtaem finis, mo Ministeriol Trening Skul, we i stat i no longtaem, oli stap mekem nambawan wok. Wan eksampol blong samting ya, hemia long Brasil. Taem ol faswan misinari oli kasem kantri ya long 1945, i no gat 400 pablisa yet. Ol faswan misinari ya, mo olgeta we oli kam biaen, oli wokhad wetem ol brata long Brasil, mo Jeova i blesem wok blong olgeta bigwan. !Olgeta ya we oli bin luk stat blong wok long Brasil ating oli glad tumas taem oli luk se long 2003, oli kasem wan niufala namba blong 607,362 pablisa long kantri ya!

¹² Tingbaot Japan. Bifo long seken wol wo, i gat samting olsem wan handred man nomo we oli stap talemaot Kingdom long kantri ya. Long taem blong faet, namba blong ol pablisa i godaon from we ol man oli mekem bigfala trabol long ol Witnes. Mo taem faet i finis, i gat smol Witnes nomo we oli no ded mo oli stap yet long trutok. (Ol Proveb 14:32) Smol grup ya we i no lego God, i glad bigwan long 1949 taem ol 13 faswan misinari blong Gilead oli kam. Ol misinari tu oli glad tumas blong joen wetem ol brata blong Japan we oli hapi blong wok mo oli soem kaen fasin long ol misinari. !Bitim 50 yia biaen, hemia long 2003, i gat bigfala namba blong 217,508 pablisa we oli putum ripot long Japan! Yes, Jeova i rili blesem ol man blong hem long kantri ya. Sem samting ya i stap hapen long plante narafala kantri tu. Ol brata mo sista we oli gat janis blong go wok long narafala kantri, oli givhan bigwan long wok blong talemaot gud nius, mekem se long 2003, gud nius ya i goaot long 235 kantri, aelan, mo teritori raon long wol. Yes, bigfala kampani ya i stap kamaot long “olgeta nesen.”

‘Oli Kamaot . . . Long Olgeta Laen, Kantri, Mo Lanwis’

13, 14. ?Olsem wanem Jeova i soem se i impoten tumas blong talemaot gud nius long “olgeta lanwis”?

¹³ Faswan merikel we i kamaot afta we tabu spirit i makemaot ol disaepol long lafet blong Pentekos long yia 33 K.T., hemia se oli save toktok long lanwis blong ol man we oli hivap long taem ya. Ating bighaf blong ol man ya oli save long lanwis Grik, from we long taem ya hem i wan lanwis we ol man long plante kantri oli stap yusum. Mo tu, from we oli “man blong prea” ating oli save long lanwis Hibru we oli stap yusum long ol sevis long tempol blong olgeta. Be oli sapraes tumas taem oli harem we ol disaepol ya oli talemaot gud nius long olgeta, long lanwis blong ples blong olgeta stret.​—Ol Wok 2:​5, 7-12.

¹⁴ Tede tu yumi stap yusum plante defren lanwis long wok blong prij. Profet tok ya we i tokbaot bigfala kampani i talem se olgeta ya bambae oli kamaot long evri nesen be i no hemia nomo. Oli kamaot long “olgeta laen, mo long olgeta kantri, mo long olgeta lanwis.” Long wan narafala profet tok  we Jeova i talem long Sekaraea, semfala tingting ya i kamaot se: “Ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’ ” (Sekaraea 8:23) I tru se tede i no moa gat wan merikel blong mekem we ol Witnes blong Jeova oli save toktok ol naranarafala lanwis. Be oli luksave se trutok i gat moa paoa taem oli tijim hem long lanwis blong ol manples.

15, 16. ?Ol misinari mo sam narafala brata oli mekem wanem blong prij long lanwis blong ol man long kantri we oli go long hem?

¹⁵ I tru se tede i gat sam lanwis we ol man oli yusum long plante ples, olsem Inglis, Franis, mo lanwis blong Spen. Be olgeta we oli lego ples blong olgeta blong go prij long narafala kantri, oli lanem lanwis blong ol manples from we oli wantem mekem i isi moa long olgeta we “oli stret blong kasem laef blong olwe,” blong oli harem gud nius. (Ol Wok 13:​48, NW ) Be samtaem, i no isi blong lanem ol lanwis ya. Taem ol brata long nesen blong Tuvalu long Saot Pasifik oli nidim ol buk long lanwis blong olgeta, wan misinari i agri blong traem mekem samting ya blong givhan long olgeta. Be i no gat diksonari blong lanwis ya, ale, brata ya i stat mekem wan lis blong evri tok long lanwis Tuvalu. Taem i pas, nao wan niufala buk i kamaot long lanwis Tuvalu, hemia buk ya Yu Save Laef Foreva Long Paradaes Long Wol. * Long wan narafala kantri we nem blong hem Curaçao, taem ol misinari oli kam fastaem, i no gat buk mo diksonari tu long lanwis blong ples ya, hemia Papiamento. Mo tu, ol man long ples ya oli stap agiu se weswan rod nao hem i stret blong raetem lanwis ya. Nating se i olsem, tu yia afta we ol faswan misinari oli kasem kantri ya, oli wokem wan niufala traket we i tokbaot Baebol long lanwis ya. Tede, lanwis ya Papiamento hem i wan long ol 133 lanwis ya we Wajtaoa i stap kamaot long hem tu taem evri manis, semtaem wetem Inglis.

¹⁶ Taem ol faswan misinari oli kam long Namibia, i no gat wan manples yet we i Witnes blong Jeova mo we i naf blong givhan long ol misinari blong tanem ol tok i go long lanwis blong ples ya. Mo tu, i gat sam tok we yumi yusum oltaem long ol buk blong yumi, be i no gat ol tok ya long wan long ol lanwis blong ples ya we oli kolem Nama​—eksampol, i no gat tok blong talem “stretgud olgeta.” Wan misinari i talem se: “Blong mekem translesen, mi askem sam tija blong skul we oli stap stadi Baebol wetem mifala, blong oli givhan long mi. From we save blong olgeta long trutok i smol yet, mi mas sidaon wetem olgeta blong meksua se samting we oli raetem i stret.” Nating se i olsem, oli bin naf blong wokem traket ya Life in a New World, long sam long fo lanwis blong Namibia. Tede, Wajtaoa i stap kamaot evri manis long lanwis Kwanyama mo Ndonga.

17, 18. ?Wanem sam samting we ol brata oli bin naf blong mekem blong givhan long ol man long Meksiko mo long sam narafala kantri tu?

¹⁷ Long Meksiko, lanwis we ol man oli yusum moa hemia lanwis blong Spen. Be bifo we ol man Spen oli kam, ol manples oli gat ol prapa lanwis blong olgeta, mo samfala oli stap yusum yet ol lanwis  ya. Taswe, naoia i gat sam buk blong ol Witnes blong Jeova long seven long ol lanwis blong Meksiko mo long Saen Lanwis tu blong Meksiko. Ol Witnes blong Jeova oli ol fas man blong raetem buk long lanwis blong ol Indian blong Amerika, taem oli wokem Kingdom Wok long lanwis Maya. Tede, long olgeta 572,530 man blong talemaot Kingdom long Meksiko, i gat plante taosen Maya, Aztec, mo man blong ol narafala laen tu.

¹⁸ Long ol yia we oli jes pas, plante milian man oli bin ronwe long kantri blong olgeta from ol faet no from trabol long saed blong ekonomi long ples blong olgeta. From samting ya, naoia long plante kantri, i gat ol bigbigfala komuniti blong man we oli blong narafala kantri mo oli toktok lanwis blong olgeta. Ol Witnes blong Jeova oli traehad blong givhan long ol man ya. Wan eksampol blong samting ya hemia long Itali. Ol brata long ples ya oli no mekem miting long lanwis Itali nomo. I gat ol kongregesen mo ol smosmol grup we oli mekem miting long 22 narafala lanwis tu. Blong halpem ol brata blong oli prij long ol man ya we oli toktok ol defdefren lanwis, sosaeti i ogenaesem ol kos blong lanem 16 defren lanwis, wetem Saen Lanwis blong Itali tu. Long plante narafala kantri, ol Witnes blong Jeova oli stap mekem semfala traehad olsem, blong kasem ol man we oli kam stap long kantri blong olgeta. Yes, from we Jeova i stap givhan long wok ya, i rili gat wan bigfala kampani blong man we oli stap kamaot long plante defdefren lanwis.

“Long Olgeta Ples Long Wol”

19, 20. ?Wanem tok blong Pol we i stap kamtru bigwan tede? Eksplenem se i kamtru olsem wanem.

¹⁹ Long faswan handred yia, aposol Pol i raetem se: “?I tru se ol laen blong Isrel oli no harem gud nius ya, no oli harem? Si, oli harem. I olsem tok blong Baebol we i talem se, ‘Tok blong olgeta i goaot finis long olgeta ples long wol. Toktok blong olgeta i go long evri kona blong hem.’ ” (Rom 10:18) !Sipos tok ya i kamtru long faswan handred yia, ating hem i kamtru moa tede! Plante milian man, we ating namba blong olgeta i bitim eni narafala taem long histri, oli stap talem se: “Oltaem mi bambae mi talem tangkiu long Hae God, bambae mi presem hem oltaem nomo.”​—Ol Sam 34:1.

²⁰ Antap long hemia, wok i stap spid moa. Namba blong ol man we oli stap talemaot Kingdom i gohed blong gru. Mo oli stap spenem plante moa taem long wok blong prij. Oli mekem plante milian visit mo plante taosen Baebol stadi. Mo i gat plante man yet we oli stap intres long gud nius ya. Las yia, yumi kasem wan niufala namba blong 16,097,622 man we oli kam long Memoriol blong tingbaot ded blong Jisas. Samting ya i soemaot se i gat plante wok yet blong mekem. I gud yumi gohed blong folem fasin blong ol brata blong yumi we oli holemstrong long God taem ol man oli bin mekem bigfala trabol long olgeta. Mo i gud yumi soemaot strong tingting blong wok olsem ol brata ya we stat long 1919 oli bin yusum taem mo paoa blong olgeta long wok blong Jeova. Yumi evriwan i mas gohed blong folem ol tok blong man ya blong raetem Sam we i se: “Olgeta samting we i gat laef​—oli mas presem Ja. !Yufala i presem Ja!”​—Ol Sam 150:6, NW.

[Ol Futnot]

?Yu Yu Save Eksplenem?

• ?Wanem wok we ol brata oli statem long 1919, mo from wanem wok ya i no isi?

• ?Long ol yia we oli pas, hu olgeta we oli hivap blong givhan long wok blong prij?

• ?Wanem gudfala frut we i kamaot from wok blong ol misinari mo olgeta we oli go prij long ol narafala kantri?

• ?Wanem pruf we yu yu save talem blong soem se Jeova i stap blesem wok blong ol man blong hem tede?

[Kwestin]

[Tok blong pija long pej 15]

Nating se tingting blong plante man i fasfas from ol trabol blong seken wol wo, ol Kristin oli no ting se maet wok blong prij bambae i stop

[Credit Line]

Explosion: U.S. Navy photo; others: U.S. Coast Guard photo

[Tok blong pija long pej 17]

Ol man blong bigfala kampani oli kamaot long olgeta laen mo lanwis