‘God i No Save Stap Long Ol Haos Prea We Yumi Man Yumi Wokem’

APOSOL Pol i luksave ol haos prea blong Atena, from we hem i luk plante long olgeta long ol taon we hem i visitim taem hem i mekem misinari trep blong hem. Buk ya The Encyclopædia Britannica i talem se, plante man oli bilif se Atena i wan woman god blong wo mo fasin waes, be tu, oli bilif we hem i “wokem ol naes samting long wud mo ston mo hem i save gud blong blokem ol faet.”

Plante man oli save gud haos prea ya Patenon we oli wokem blong Atena long Atens, hemia taon ya we i karem nem blong woman god ya. Oli talem se hem i wan long ol bigfala haos prea long taem bifo. Insaed long haos prea ya i gat wan aedol we i pija blong woman god ya, we hae blong hem i kasem 12 mita mo oli wokem long gol mo tut blong elefen. Haos prea ya we oli wokem long ston ya mabel i bin stap long Atens 500 yia finis, bifo we Pol i kasem taon ya.

Patenon i stap long wan ples we i no longwe long ples ya we Pol i prij long hem long ol man Atens. Mo long taem ya nao hem i talem se, God i no save stap long ol haos prea, we man nomo i wokem. (Ol Wok 17:​23, 24) Maet ol sas samting long haos prea ya blong Atena mo ol bigbigfala aedol blong hem i mekem se ol man we oli lesin long Pol oli laekem Atena moa i bitim we oli intres long God ya we oli no save luk mo we oli no save hem. Be, olsem Pol i talemaot, oli no mas gat tingting ya se, Man ya we i Wokem ol man “i olsem ol samting ya we ol man oli wokem long gol no silva no ston. !Hem i no wan samting we man i save wokem long gudhan blong hem!”​—Ol Wok 17:29.

Ol god mo ol woman god olsem Atena​—we ol man oli tinghae long olgeta nomo from we oli gat ol naesfala haos prea mo ol aedol—​oli no save stap foreva. Aedol ya blong Atena we i bin stap long Patenon, i lus finis long ol yia fo handred K.T. Mo nating se hem i bin gat plante haos prea, be ol smol pis blong ol haos prea ya nomo i stap yet. I no gat man tede we i luk i go long Atena blong kasem waes mo advaes.

I defren olgeta long Jeova, ‘God ya, we i no gat man i luk hem samtaem,’ hem i wan ‘God we i stap oltaem nomo, gogo i no save finis.’ (Rom 16:26; 1 Jon 4:12) Ol pikinini blong Kora oli raetem se: “God ya . . . hem i God blong yumi. Hem bambae i God blong yumi oltaem, mo bambae hem i lidim yumi, gogo i no save finis.” (Ol Sam 48:14) Bambae yumi glad moa blong Jeova i lidim yumi, sipos yumi stadi long Tok blong God, Baebol, mo folem ol advaes blong hem long laef blong yumi.