Man i No Naf Blong Save Paoa Blong Jeova
Man i No Naf Blong Save Paoa Blong Jeova
“Hae God, hem i hae we i hae, mo i stret blong ol man oli stap leftemap nem blong hem i go antap. Hem i hae we i hae, man i no naf blong save paoa blong hem.”—OL SAM 145:3.
1, 2. ?Deved i wanem kaen man, mo hem i gat wanem tingting long saed blong hem wan taem i skelem hem wetem God?
PLANTE man oli save long man ya we i wokem Sam 145. Taem hem i yangfala, hem i fesem wan bigfala man we i karem plante tul blong faet, mo hem i kilim man ya i ded. Taem hem i kam king, hem i lidim ol soldia blong hem blong winim plante faet agensem ol enemi blong hem. Nem blong man ya we i seken king blong Isrel, hemia Deved. Afta we Deved i ded, plante man oli gohed blong tokbaot ol wok blong hem, mekem se tede plante milian man oli save long hem.
2 Nating se Deved i mekem plante bigfala wok, hem i no kam flas from. Long wan singsing blong hem we i tokbaot Jeova, hem i se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.” (Ol Sam 8:3, 4) Deved i no leftemap hem wan, hem i talem se Jeova nao i sevem hem long han blong ol enemi blong hem. Hem i se: “Hae God. Yu yu stap blokemgud mi, yu stap sevem mi. Fasin blong yu we yu stap givhan long mi, hem i stap leftemap nem blong mi.” (2 Samuel 22:1, 2, 36) Jeova i soem se tingting blong hem i stap daon taem hem i fogivim ol man we oli mekem sin, mo Deved i talem tangkiu from kaen fasin ya blong God we i bigwan tumas.
‘Bambae Mi Talemaot Hae Nem Blong God We i King’
3. (a) ?Deved i tingbaot hu olsem prapa king blong Isrel? (b) ?Wanem i soem se Deved i wantem tumas blong presem Jeova?
3 Deved i king we God i putumap long Isrel, be Deved i tingbaot Jeova nao olsem prapa King blong Isrel. Deved i talem long Jeova se: “Yu yu king we yu hae we yu hae olgeta, mo yu rul long olgeta ples.” (1 Kronikel 29:11) !Deved i tinghae long God olsem Rula blong hem! Hem i singsing se: “Hae God. Yu yu God blong mi, mo yu yu King blong mi. Oltaem bambae mi stap talemaot hae nem blong yu, bambae mi stap talem tangkiu long yu, gogo i no save finis. Evri dei, bambae mi stap talem tangkiu long yu, bambae mi stap presem yu oltaem, gogo i no save finis.” (Ol Sam 145:1, 2) Deved i wantem presem Jeova God evri dei, gogo i no save finis.
4. ?Sam 145 i ansa long wanem giaman toktok?
4 Setan i giaman se God i no wan gudfala rula, mo se hem i stap tingbaot hem wan nomo, i stap blokem ol man blong oli no fri. Be Sam 145 i givim wan strong mo klia ansa long giaman tok ya. (Jenesis 3:1-5) Mo Sam ya i ansa long wan narafala giaman tok blong Setan tu, se ol man we oli obei long God oli mekem olsem from we oli wantem kasem blesing nomo, i no from we oli lavem God. (Job 1:9-11; 2:4, 5) Ol trufala Kristin tede oli mekem olsem Deved, oli stap ansa long ol giaman tok blong Setan. Oli tinghae long hop ya blong laef olwe aninit long rul blong Kingdom blong God, from we hemia bambae i givim janis long olgeta blong presem Jeova oltaem, gogo i no save finis, olsem oli wantem mekem. Plante milian man oli stap presem Jeova finis. Oli bilif long ransom sakrefaes blong Jisas, oli givim laef blong olgeta i go long Jeova mo tekem baptaes, mo oli obei long hem mo mekem wok blong hem from we oli lavem hem.—Rom 5:8; 1 Jon 5:3.
5, 6. ?Wanem ol janis we yumi gat blong presem Jeova mo talem tangkiu long hem?
5 Tingbaot ol janis we yumi gat blong presem Jeova mo blong leftemap nem blong hem. Yumi save prea long hem taem wan samting we yumi ridim long Tok blong hem, Baebol, i tajem hat blong yumi. Yumi save talem tangkiu long hem mo presem hem taem yumi haremgud long hat blong yumi from fasin we hem i mekem long ol man blong hem, mo taem yumi glad tumas long wan nambawan samting we hem i wokem. Mo tu, yumi talemaot haenem blong Jeova God taem yumi tokbaot ol stamba tingting blong hem wetem ol Kristin brata sista blong yumi long ol miting mo long sam narafala ples bakegen. Yes, olgeta “gudgudfala wok” we yumi mekem blong leftemap Kingdom blong God, oli presem Jeova.—Matiu 5:16.
6 Sam long ol gudgudfala wok ya we ol man blong Jeova oli mekem i no longtaem, hemia wok blong bildim ol haos wosip long ol pua kantri. Wok ya i save gohed from mane we ol Kristin brata blong ol narafala kantri oli givim. Sam Kristin oli glad blong lego kantri blong olgeta mo go wok fri long narafala kantri blong bildim ol Haos Kingdom ya. Long olgeta gudgudfala wok ya blong presem Jeova, hemia we i impoten moa, hemia wok blong talemaot gud nius blong Kingdom blong hem. (Matiu 24:14) Sam narafala vas long Sam 145 oli soem se Deved i gat bigfala tangkiu from rul blong God, mo hem i talemaot haenem blong Jeova we i king. (Ol Sam 145:11, 12) ?Yu yu talem tangkiu long God olsem Deved from we hem i rul long yumi wetem lav? ?Yu yu stap joen oltaem long wok blong talemaot Kingdom blong hem long ol narafala man?
Ol Samting We Oli Soemaot Paoa Blong God
7. Talem wan bigfala samting we i mas pulum yumi blong presem Jeova.
7 Ol Sam 145:3 i talem wan bigfala samting we i mas pulum yumi blong presem Jeova. Deved i singsing se: “Hae God, hem i hae we i hae, mo i stret blong ol man oli stap leftemap nem blong hem i go antap. Hem i hae we i hae, man i no naf blong save paoa blong hem.” Paoa blong Jeova i bigwan tumas, i no gat mak blong hem. Man i no naf blong faenemaot, save, mo makem paoa blong hem. Bambae yumi haremgud blong tingbaot sam samting we oli soemaot bigfala paoa ya blong Jeova.
8. ?Yunivas i soemaot wanem long saed blong Jeova mo paoa blong hem?
8 Traem tingtingbak long wan naet we yu bin stap long bus, nao yu bin lukluk i go antap long skae. ?Ating yu sapraes long bigfala namba blong ol sta we yu luk? ?Taem yu stap lukluk samting ya, yu bin harem se yu wantem presem Jeova from bigfala paoa blong hem blong wokem ol sta ya? Wanem we yu bin luk, i wan smosmol haf blong wan galaksi * nomo, hemia galaksi we wol blong yumi i stap long hem. Maet i gat bitim wan handred bilian galaksi evriwan, be yumi save luk tri nomo wetem prapa ae blong yumi. Tru ya, olgeta sta mo galaksi ya we oli plante tumas blong kaontem, oli mekemap wan bigbigfala yunivas * we i soemaot gud paoa blong Jeova we man i no naf blong save.—Aesea 40:26.
9, 10. (a) ?Wanem ol samting long saed blong Jisas Kraes we oli soemaot bigfala paoa blong Jeova? (b) ?Laef bakegen blong Jisas i mas mekem wanem long bilif blong yumi?
9 Tingbaot sam narafala samting we oli soem paoa blong Jeova—sam samting long saed blong Jisas Kraes. God i soem bigfala paoa blong hem taem hem i wokem Pikinini blong hem mo i yusum hem blong plante bilian yia long heven, olsem “nambawan man blong wok” blong hem. (Ol Proveb 8:22-31, NW ) Jeova i soem bigfala lav blong hem taem hem i letem Pikinini blong hem, wan nomo we hem i gat, blong i ded blong pemaot ol man. (Matiu 20:28; Jon 3:16; 1 Jon 2:1, 2) Mo samting we ol man oli no naf nating blong kasem save long hem, hemia nambawan spirit bodi mo laef long heven we Jeova i givim long Jisas, taem i mekem hem i laef bakegen long ded.—1 Pita 3:18.
10 Taem Jeova i mekem Jisas i laef bakegen, hem i mekem plante moa samting blong sapraes we oli soemaot bigbigfala paoa blong hem. Hem i mekem Jisas i tingbaot bakegen taem ya we hem i stap yet long heven, mo God i wokem heven mo wol. (Kolosi 1:15, 16) Hem i luk we God i wokem ol enjel, yunivas, wol ya, mo olgeta laef samting long wol. Antap long ol save ya long saed blong histri blong heven mo wol, Jeova i mekem hem i tingbaot bakegen ol samting we i bin hapen long hem afta we hem i bon olsem wan stret man long wol. Yes, taem Jeova i mekem Jisas i laef bakegen, hem i soem se hem i hae we i hae mo se man i no naf blong save paoa blong hem. Mo tu, laef bakegen blong Jisas i olsem wan promes se ol narafala dedman bambae oli laef bakegen. Hem i mas mekem bilif blong yumi i strong tu se God hem i naf blong tingbaot bakegen olgeta milian man ya we oli ded finis.—Jon 5:28, 29; Ol Wok 17:31.
Ol Bigbigfala Wok Blong God
11. ?Wanem bigbigfala wok we Jeova i statem long lafet blong Pentekos long yia 33 K.T.?
11 Afta we Jisas i laef bakegen, Jeova i mekem plante narafala bigfala wok. (Ol Sam 40:5) Long lafet blong Pentekos long yia 33 K.T., * Jeova i stanemap wan niufala nesen, “Isrel blong God,” hemia ol disaepol blong Kraes we tabu spirit i makemaot olgeta. (Galesia 6:16, NW ) Niufala nesen ya long saed blong spirit i gru gogo i kasem olgeta ples we ol man oli save long olgeta long taem bifo. Afta we ol aposol blong Jisas oli ded, samfala oli lego trufala Kristin skul, mo oli stat tijim ol giaman tijing we biaen oli kam ol giaman skul blong Krisendom. * Be nating, Jeova i gohed nomo blong mekem ol bigbigfala wok blong hem, we oli mekem stamba tingting blong hem i kamtru.
12. ?From we Baebol i stap long olgeta bigfala lanwis blong wol, samting ya i soemaot wanem?
12 Wan long ol bigfala wok ya, hemia Baebol we Jeova i mekem i stapgud kam kasem tede, mo we oli tanem i go long olgeta bigfala lanwis blong wol. Plante man we oli bin mekem wok ya blong tanem Baebol, oli kasem hadtaem mo ol man blong Setan oli wantem kilim olgeta i ded. !Tru ya, i klia se Jeova God we paoa blong hem i bigwan tumas blong man i save, hem nao i wantem se oli tanem Baebol i go long bitim 2,000 lanwis! Sipos no, wok ya i no save gohed gogo i finis.
13. ?Long ol yia biaen long 1914, wanem ol tingting blong Jeova long saed blong Kingdom we oli kamtru blong soemaot bigfala paoa blong hem?
13 Jeova i soemaot bigfala paoa blong hem taem i mekem ol tingting blong hem long saed blong Kingdom oli kamtru. Long yia 1914, hem i putumap Pikinini blong hem, Jisas Kraes, i kam King long heven. Smoltaem biaen, Jisas i girap agensem Setan mo ol rabis enjel blong hem, i sakem olgeta oli aot long heven oli kamdaon long wol. Naoia oli stap wet long ples ya gogo kasem stret taem blong oli go long bigfala hol. (Revelesen 12:9-12; 20:1-3) Long ol yia biaen long 1914, ol man oli mekem plante bigfala trabol long ol man blong Kraes we tabu spirit i makemaot olgeta. Be, Jeova i mekem olgeta oli stanap strong, tru long olgeta yia ya we Kraes i stap rul olsem King long heven.—Matiu 24:3; Revelesen 12:17.
14. ?Wanem nambawan wok we Jeova i mekem long yia 1919, mo wanem i kamaot from?
14 Long yia 1919, Jeova i mekem wan narafala nambawan wok we i soemaot paoa blong hem. Ol man blong Jisas we tabu spirit i makemaot olgeta oli bin kam slak long saed blong spirit, nao Jeova i mekem olgeta oli wok strong bakegen. (Revelesen 11:3-11) Long ol yia kam kasem naoia, ol tabu man ya oli wok strong blong talemaot gud nius blong Kingdom we i stanap finis long heven. Mo tabu spirit i makemaot sam moa man blong oli joen long olgeta, mekem se grup ya i kasem fulnamba blong hem, 144,000. (Revelesen 14:1-3) Jeova i mekem ol tabu man ya blong Kraes oli kam olsem fandesen blong “niufala wol,” hemia kampani blong ol stret man we bambae oli laef long wol ya long fiuja. (Revelesen 21:1) ?Be wanem bambae i hapen long “niufala wol” ya afta we ol tabu man ya oli aot blong go long heven?
15. ?Ol tabu Kristin oli lidim wanem wok, mo wanem i kamaot from?
15 Long 1935, Wajtaoa blong Ogis 1 mo Ogis 15 i tokbaot “bigfala kampani” (NW ) blong Revelesen japta 7. Ale, ol tabu Kristin oli wok strong blong faenem ol man ya blong olgeta kantri, laen, lanwis, mo kala, mo blong pulum olgeta oli kam joen wetem olgeta. “Bigfala kampani” ya bambae oli laef tru long taem blong ‘bigfala trabol tumas’ we i klosap nao, mo bambae oli gat janis blong kam ol memba blong “niufala wol” we bambae oli laef olwe long Paradaes. (Revelesen 7:9-14) Bigfala wok blong prij mo mekem disaepol we ol tabu Kristin oli lidim, i mekem se naoia i gat bitim sikis milian man we oli putum tingting blong olgeta i stap strong long hop ya blong laef olwe long paradaes long wol. Namba ya i stap kam antap nating se Setan mo rabis wol ya i agensem wok blong ol Kristin ya bigwan. ?I stret we yumi presem hu from? (1 Jon 5:19) Jeova nomo i save mekem wan wok olsem, tru long tabu spirit blong hem.—Aesea 60:22; Sekaraea 4:6.
Glori Mo Haenem Blong Jeova
16. ?From wanem ol man oli no save luk ‘glori blong Jeova’ wetem prapa ae blong olgeta?
16 Bambae yumi no save fogetem “ol gudgudfala wok” mo “ol bigbigfala wok” blong Jeova. Deved i raetem se: “Hae God. Oltaem ol man bambae oli stap tokbaot ol wok blong yu long fes blong ol pikinini we bambae oli bon biaen long olgeta. Oltaem bambae oli stap talemaot ol bigbigfala wok blong yu. Yu yu King, mo oltaem bambae oli stap tokbaot paoa [“glori,” NW ] blong yu mo hae nem blong yu, mo oltaem bambae mi stap tingting gud long ol gudgudfala wok blong yu. Ol man bambae oli stap tokbaot ol bigbigfala wok ya blong yu, mo mi bambae mi stap talemaot we yu yu hae we yu hae.” (Ol Sam 145:4-6) ?Olsem wanem Deved i save long glori blong Jeova? Hem i no save luk God from we “God, hem i spirit.”—Jon 1:18; 4:24.
17, 18. ?Olsem wanem Deved i luksave moa ‘glori mo haenem blong Jeova’?
17 Nating se Deved i no save luk God, hem i save mekem sam samting blong ona moa long haenem blong Jeova. Ating hem i ridim ol stori long Baebol long saed blong ol nambawan wok we Jeova i mekem finis. Wan long olgeta, hemia bigfala wota we i kavremap wol blong spolem ol rabis man. Mo tu, ating Deved i harem stori blong wok blong God taem hem i tekemaot ol man Isrel long wok slef long Ijip, mo olsem wanem samting ya i mekem ol giaman god blong Ijip oli sem bigwan. Ol stori olsem oli soemaot haenem mo paoa blong Jeova.
18 Deved i luksave moa haenem blong God taem hem i tingting dip long ol stori blong Baebol we hem i ridim. Maet hem i bin tingting dip long taem ya we Jeova i givim Loa long ol man Isrel. Tanda i faerap, laetning i laet, skae i kam dak, mo pupu i krae bigwan. Hil ya Sinae i seksek mo smok i kamaot long hem. Long stamba blong hil ya, ol man Isrel oli harem voes blong wan enjel i kamaot long faea mo klaod, i talemaot ol “Tenkomanmen” we Jeova i givim. (Dutronome 4:32-36; 5:22-24; 10:4; Eksodas 19:16-20; Ol Wok 7:38, 53) !Hemia ol saen we oli soemaot haenem blong Jeova! Ol man we oli lavem Tok blong God mo oli tingting dip long ol stori olsem, oli mas sapraes long ‘glori mo haenem blong Jeova.’ Tede, yumi gat fulwan Baebol, wetem plante nambawan vison blong glori blong Jeova, we oli makemgud long yumi se hem i hae we i hae.—Esikel 1:26-28; Daniel 7:9, 10; Revelesen, japta 4.
19. ?Wanem i save givhan long yumi blong ona moa long haenem blong Jeova?
19 Ating wan narafala samting we Deved i mekem blong ona moa long haenem blong God, se hem i stadi long ol loa we God i givim long ol man Isrel. (Dutronome 17:18-20; Ol Sam 19:7-11) Taem nesen blong Isrel i obei long ol loa ya blong Jeova, oli defren long ol narafala man mo oli winim respek blong ol narafala. (Dutronome 4:6-8) Sipos yumi ridim Baebol evri dei, stadi long hem, mo tingting dip long hem, bambae samting ya i givhan long yumi olsem i bin givhan long Deved. Yes, bambae yumi tu yumi ona moa long haenem blong Jeova.
!Ol Fasin Blong God Oli Hae We Oli Hae!
20, 21. (a) ?Ol Sam 145:7-9 i presem Jeova from wanem fasin blong hem? (b) ?Ol fasin ya blong God oli mekem wanem long ol man we oli lavem hem?
20 Olsem yumi luk finis, vas 1 kasem 6 blong Sam 145 oli soem plante samting we oli mas pulum yumi blong presem Jeova from bigfala paoa blong hem. Vas 7 kasem 9 oli tokbaot ol nambawan fasin blong God we oli soemaot se hem i hae we i hae. Deved i singsing se: “Bambae oli stap tokbaot olgeta gudgudfala fasin blong yu, mo bambae oli stap singsing blong talemaot we yu yu kaen tumas. Hae God, hem i God we i lavem yumi, mo i gat sore long yumi. Hem i no save kros kwik, oltaem hem i stap lavem yumi. Hem i mekem olgeta samting we i gat laef, mo oltaem hem i gat sore long olgeta. Oltaem hem i stap mekem i gud tumas long yumi evriwan.”
21 Faswan samting we Deved i tokbaot long ol vas ya, hemia gudfala fasin mo stret fasin blong Jeova we hem i kaen tumas—hemia ol samting we Setan i agensem Jeova from. ?Ol fasin ya oli mekem wanem long ol man we oli lavem God mo we oli wantem stap aninit long rul blong hem? Tru ya, gudfala fasin blong Jeova mo stret fasin blong hem blong rul long ol man, i mekem ol man we oli wosip long hem oli glad tumas, ale oli no save stop blong presem hem from. Mo tu, Jeova i soemaot gudfala fasin ya blong hem long “yumi evriwan.” Yumi hop se fasin ya bambae i pulum plante moa man yet, blong oli tanem tingting blong olgeta mo mekem wosip long trufala God ya bifo we i let tumas.—Ol Wok 14:15-17.
22. ?Jeova i mekem olsem wanem long ol man blong hem?
22 Mo tu, Deved i tinghae long ol fasin we God hem wan i bin talemaot taem hem i “kam pas long fes blong Moses, mo i talemaot bakegen long hem se, ‘Mi mi Hae God, . . . Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap lavem man mo oltaem mi stap holemstrong promes blong mi.’ ” (Eksodas 34:6) Taswe Deved i save talem se: “Hae God, hem i God we i lavem yumi, mo i gat sore long yumi. Hem i no save kros kwik, oltaem hem i stap lavem yumi.” Nating se Jeova i hae we i hae, be hem i soem respek long ol man blong hem, taem hem i kaen long olgeta. Hem i gat sore long man, taswe hem i glad blong yusum ransom sakrefaes blong Jisas blong fogivim sin blong ol man we oli tanem tingting blong olgeta. Jeova i no save kros kwik, hem i givim janis long ol man blong hem blong oli winim slak fasin we i save blokem olgeta blong oli no go insaed long niufala wol we stret fasin i stap long hem.—2 Pita 3:9, 13, 14.
23. ?Wanem nambawan fasin blong Jeova we bambae yumi tokbaot long nekis stadi?
23 Deved i presem God from bigfala lav blong hem. Yes, ol narafala vas long Sam 145 oli soem olsem wanem Jeova i stap soemaot lav ya, mo wanem we ol man blong hem oli mekem taem oli kasem lav ya. Bambae yumi tokbaot samting ya long nekis stadi.
[Ol Futnot]
^ Wan bigfala grup blong ol sta.
^ Olgeta sta mo planet long skae.
^ K.T. i minim Kristin Taem.
^ Ol skul we oli giaman se oli Kristin.
?Bambae Yu Yu Ansa Olsem Wanem?
•?Wanem janis we yumi gat blong presem Jeova “evri dei”?
•?Wanem sam samting we oli soem se man i no naf blong save paoa blong Jeova?
•?Yumi save mekem wanem blong luksave moa glori mo haenem blong Jeova?
[Kwestin]
[Tok blong pija long pej 10]
Ol galaksi long yunivas oli soemaot bigfala paoa blong Jeova
[Credit Line]
Courtesy of Anglo-Australian Observatory, photograph by David Malin
[Tok blong pija long pej 12]
?Wanem ol samting long saed blong Jisas Kraes we oli soem bigfala paoa blong Jeova?
[Tok blong pija long pej 13]
Taem ol man Isrel oli kasem Loa long Hil ya Sinae, oli luk bigfala glori mo haenem blong Jeova