Ol Promes We Yu Save Trastem

WAN profet blong God, nem blong hem Maeka, i save we plante taem ol man oli no save trastem ol promes blong narafala. Long taem blong hem, ol man oli no save trastem narafala, i nating sipos oli ol gudgudfala fren blong olgeta, from we oli no save holem ol promes blong olgeta oltaem. Taswe Maeka i givim woning ya se: “Olgeta we oli stap raonabaot long yufala, be bambae yufala i no bilif long tok blong olgeta, mo ol fren blong yufala, bambae yufala i no trastem olgeta. Yufala i mas lukaot gud long ol tok we yufala i stap talem. Nating we yufala i stap toktok wetem woman blong yufala nomo, be yufala i mas lukaot gud.”​—Maeka 7:5.

?Olsem wanem? ?Maeka i letem samting ya i daonem tingting blong hem gogo hem i no moa save trastem eni promes? !Nogat! Hem i talem se hem i trastem fulwan ol promes blong God blong hem, Jeova, i se: “Be mi, Hae God [Jeova] i God blong mi, mo oltaem bambae mi putum tingting blong mi i stap strong long hem nomo, from we mi save se hem bambae i harem mi. Bambae mi stap wet long hem, from we hem nao bambae i kam sevem mi.”​—Maeka 7:7.

 ?Wanem samting i pulum Maeka blong trastem God olsemia? Maeka i save we oltaem, Jeova i holem ol promes blong hem. Evri samting we God i bin promes long ol bubu blong Maeka oli kamtru evriwan. (Maeka 7:20) From we Jeova i holemstrong olgeta promes blong hem long taem blong bifo, nao Maeka i sua fulwan we bambae Hem i holem ol promes blong Hem long fiuja tu.

“I No Gat Wan Promes . . . We i No Kamtru”

Eksampol, Maeka i save we Jeova i bin mekem ol man Isrel oli fri long Ijip. (Maeka 7:15) Josua i stap taem ol man Isrel oli aot long Ijip, mo hem i leftemap tingting blong ol narafala man Isrel se oli mas trastem ol promes blong God. ?From wanem? Josua i talem long olgeta se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”​—Josua 23:14.

Ol man Isrel oli savegud we Jeova i bin mekem ol bigbigfala wok from olgeta. Hem i bin promes long Ebraham, bubu blong olgeta, se bambae ol smol bubu blong hem oli kam plante olsem ol sta, mo bambae oli tekem kantri blong Kenan i blong olgeta. Jeova i mekem promes ya i kamtru. Mo tu, Jeova i talem long Ebraham se bambae ol smol bubu blong hem oli safa blong 400 yia, be bambae “ol smol bubu blong ol smol bubu blong olgeta” oli gobak long Kenan. Evri samting i hapen stret olsem Jeova i bin promes.​—Jenesis 15:​5-16; Eksodas 3:​6-8.

Long taem blong Josef, we i pikinini boe blong Jekob, ol man Ijip oli welkamem gud ol man Isrel. Be biaen, ol man Ijip oli mekem ol man Isrel oli wok olsem slef mo oli mekem i strong tumas long olgeta. Nating se i olsem, promes blong Jeova i kamtru mo 400 yia afta we ol man Isrel oli kam long Ijip, Jeova i mekem ol smol bubu blong Ebraham oli fri long Ijip. *

Ol nekis 40 yia we oli kam biaen, Jeova i givim sam moa pruf long ol man Isrel se Hem i holem ol promes blong Hem oltaem. Taem ol man Amalek oli faet agensem ol man Isrel we i no gat risen nating blong oli mekem olsem, Jeova i faet from ol man Isrel, mo Hem i protektem olgeta. Taem ol man Isrel oli wokbaot long draeples blong 40 yia, Jeova i givim evri samting we oli nidim long saed blong bodi, mo biaen, Hem i givim Promes Lan long olgeta. Taem Josua i tingtingbak mo i luk ol samting we Jeova i bin mekem long ol smol bubu blong Ebraham, hem i talem se: “Hem i holem olgeta promes ya we i mekem long ol bubu blong olgeta bifo, se bambae i mekem i gud long olgeta. I no gat wan long olgeta i foldaon, olgeta evriwan i kamtru.”​—Josua 21:45.

Lanem Blong Trastem Ol Promes Blong God

?Olsem wanem yu save lanem blong trastem ol promes blong God, olsem Maeka mo Josua oli mekem? Traem tingbaot; ?Olsem wanem yu yu lanem blong trastem ol man? Ating fastaem yu traem blong savegud olgeta. Eksampol, bambae yu luksave se yu save trastem olgeta sipos yu luk se oli traem holem ol promes we oli mekem. Taem yu savegud moa ol man ya, nao yu lanem blong trastem olgeta moa. Yu save mekem sem mak sipos yu wantem lanem blong trastem ol promes blong God.

Blong mekem samting ya, yu save tingting dip long ol samting we Jeova i bin wokem, mo long ol loa we Hem i putum blong mekem ol samting ya oli wokgud. Ol sayentis oli trastem ol loa ya, olsem  hemia we i mekem se wan sel * insaed long bodi blong man i seseraot gogo i kam ol bilian bilian sel we oli mekemap bodi blong hem. Yes, Man ya we i Wokem ol Loa we oli lidim olgeta samting long saed blong bodi mo olgeta paoa long ful yunivas, hem i wan man we yu save trastem. Yu save trastem ol promes blong hem, long sem fasin we yu trastem ol loa we i lidim ol samting we hem i wokem.​—Ol Sam 139:​14-16; Aesea 40:26; Hibrus 3:4.

Tru long profet Aesea, we i laef long taem blong Maeka, Jeova i tokbaot tu defren samting we oli soem se yumi save trastem tok blong hem. Jeova i tokbaot ol defren taem blong yia we weta i jenis, mo hem i tokbaot wota we i go antap long klaod mo i foldaon bakegen olsem ren. Evri yia, ren i foldaon. Ren i fulumap graon mo i mekem se ol man oli save planem sid mo karem kakae long garen. Long saed blong samting ya, Jeova i talem se: “Tok blong mi i olsem sno mo ren, we i aot long skae, i folfoldaon long graon blong wasem ol ples, blong mekem ol garen oli gru gud, nao i gat plante kakae i stap blong ol man oli kakae, mo blong oli planem garen bakegen. Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”​—Aesea 55:​10, 11.

Strong Promes Blong Paradaes

Sipos yu luklukgud long ol samting we God i wokem, bambae yu lanem blong trastem Man ya we i Wokem olgeta samting. Be yu mas mekem moa sipos yu wantem save long saed blong ol promes ya we oli olsem ‘tok blong hem we hem i sanem.’ Blong save long saed blong ol promes ya, mo blong mekem se bambae yu trastem olgeta, yu mas luklukgud wanem stamba tingting we Jeova i tokbaot, insaed long Baebol, long saed blong wol ya mo ol man.​—2 Timoti 3:​14-17.

Profet Maeka i trastem olgeta promes blong Jeova. Maeka i no gat plante haf blong Baebol long taem blong hem, be yu yu gat ful Baebol. Taem yu ridim Baebol mo yu tingting dip long hem, yu tu yu save mekem bilif blong yu i kam strong moa long ol promes blong God se bambae oli mas kamtru. Ol promes ya oli no blong ol smol bubu blong Ebraham nomo be oli blong evri man. Jeova i bin promes long Ebraham, wan man we i fraetgud long God se: “Mo from laen blong yu, olgeta nesen long wol bambae oli blesem olgeta nomo. Hemia from wan samting nomo, from we yu yu obei long voes blong mi.” (Jenesis 22:​18, NW ) Faswan haf blong “laen” ya blong Ebraham, hem i Mesaea, Jisas Kraes.​—Galesia 3:16.

Tru long Jisas Kraes, Jeova bambae i meksua we ol man we oli obei long hem oli kasem blesing. ?God i bin promes blong mekem wanem long taem blong yumi? Maeka 4:​1, 2 i givim ansa long profet tok ya se: “I gat taem i stap kam we hil ya we haos blong Hae God i stap long hem bambae i kam hae moa, i winim ol narafala hil. Mo ol man blong plante ples long wol bambae oli save wokbaot blong kam long hem. Olgeta ya bambae oli kam, oli talem se, ‘Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.’ ”

Olgeta we oli lanem ol rod blong Jeova “oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, . . . oli wokem olgeta oli kam huknaef blong katem gru blong ol grep blong olgeta.” (Maeka 4:​3, 4) Yes, Baebol i promes we taem Jisas Kraes i rul olsem King, Jeova bambae i spolem olgeta man we oli mekem i strong tumas long ol narafala.​—Aesea 11:​6-9; Daniel 2:44; Revelesen 11:18.

Ol man we oli safa mo oli ded from we faswan man, Adam, i bin rebel agensem God, bambae Jeova i mekem olgeta oli laef bakegen mo oli save laef blong olwe long wol. (Jon 5:​28, 29) Setan wetem ol rabis enjel blong hem, we oli stamba blong ol  rabis fasin, bambae oli no moa stap, mo tru long sakrefaes blong Jisas Kraes, ol rabis frut we oli kamaot from sin blong Adam bambae oli finis. (Matiu 20:28; Rom 3:​23, 24; 5:12; 6:23; Revelesen 20:​1-3) ?Wanem bambae i hapen long ol man we oli obei long God? Bambae Jeova i blesem olgeta. !Bambae ol man ya oli kam stretgud olgeta mo oli kasem laef we i no save finis long paradaes long wol!​—Ol Sam 37:​10, 11; Luk 23:43; Revelesen 21:​3-5.

!Ol promes ya oli nambawan! ?Yu yu save bilivim ol promes ya? Yes, yu save bilivim. Ol promes ya oli no kamaot long ol man we maet oli gat gudfala tingting be oli no gat naf paoa blong mekem ol promes blong olgeta i kamtru. Ol promes ya oli kamaot long God we i gat Olgeta Paoa, we Hem i no save giaman mo hem i no stap ‘tektaem tumas blong mekem promes blong hem i kamtru.’ (2 Pita 3:9; Hibrus 6:​13-18) Yu save trastem olgeta promes blong Baebol, from we “Jeova, . . . God blong trutok,” Hem i Stamba blong ol promes ya.​—Ol Sam 31:​5, NW.

[Ol Futnot]

[Tok blong makem poen pija long pej 4]

“Olgeta promes ya blong hem, hem i mekem oli kamtru evriwan, i no gat wan promes nating we i stap we i no kamtru.”​—JOSUA 23:14

[Tok blong pija long pej 4]

Jeova i holem ol promes we hem i mekem long ol man Isrel long Red Si mo long draeples

[Tok blong pija long pej 7]

Promes we Jeova i mekem long Ebraham i kamtru. Laen blong hem, Jisas Kraes, bambae i karem blesing long ol man