Oltaem Jeova i Stap Lavem Yumi
Oltaem Jeova i Stap Lavem Yumi
“Hae God, . . . oltaem hem i stap lavem yumi.”—OL SAM 145:8.
1. ?Lav blong God i bigwan olsem wanem?
“GOD [hem] i lav.” (1 Jon 4:8, NW ) Tok ya we i mekem yumi haremgud tumas, i soem se Jeova i lavem ol man we hem i rul long olgeta. !Ol man we oli no obei long hem, olgeta tu oli kasem blesing from lav blong hem, taem oli haremgud long san mo ren we hem i givim! (Matiu 5:44, 45) God i lavem olgeta man, taswe ol enemi blong hem tu oli save tanem tingting blong olgeta from sin, kam long hem, mo kasem laef. (Jon 3:16) Be, ol rabis man we oli no wantem jenisim fasin blong olgeta, Jeova bambae i spolem olgeta i no longtaem, nao ol man we oli lavem hem bambae oli save laef olwe long niufala wol we stret fasin nomo i stap long hem.—Ol Sam 37:9-11, 29; 2 Pita 3:13.
2. ?Wanem spesel lav ya we Jeova i soem long olgeta we oli givim laef blong olgeta i go long hem?
2 Jeova i soem lav we i spesel long ol man we oli wosipim hem long trufala fasin, mo hem i soem lav ya oltaem. I gat wan Hibru tok we i eksplenem gud lav ya, mining blong Hibru tok ya hemia “lav we i kaengud,” no “lav we i stap tru oltaem.” Deved we i king blong Isrel bifo, hem i tinghae tumas long lav blong God we i kaengud. From ol samting we i hapen long laef blong hem wan mo from we hem i tingting dip long fasin we God i mekem long ol narafala, hem i save singsing wetem strong bilif se: “Hae God, . . . oltaem hem i stap lavem yumi [no, “hem i gat lav we i stap tru oltaem,” NW ].”—Ol Sam 145:8.
?Hu Olgeta We Oli Stap Tru Long God?
3, 4. (a) ?Folem tok blong Sam 145, hu olgeta we oli stap tru long Jeova? (b) ?Olsem wanem ol man we oli stap tru long God oli “talem tangkiu” long hem?
3 Hana we i mama blong profet Samuel, i tokbaot Jeova God, i se: “Hem i stap lukaot gud long olgeta we tingting blong olgeta i stap strong long hem [“olgeta we oli stap tru long hem,” NW ].” (1 Samuel 2:9) ?Hu “olgeta we oli stap tru long hem”? King Deved i ansa long kwestin ya. Hem i presem Jeova from ol nambawan fasin blong hem, nao hem i se: “Olgeta man blong yu bambae oli talem tangkiu long yu.” (Ol Sam 145:10) Nambawan rod blong talem tangkiu long God i blong tokbaot ol gudfala fasin blong hem.
4 Ol man we oli stap tru long Jeova, hemia olgeta we oli yusum maot blong olgeta blong tokbaot ol gudfala fasin blong Jeova. ?Taem oli joen wetem ol narafala man no oli go long ol Kristin miting, wanem bigfala samting we oli tokbaot? !Kingdom blong Jeova! Olgeta we oli stap tru long God oli gat semfala filing olsem Deved we i singsing se: “Yu [Jeova] yu King, mo bambae oli stap tokbaot ol gudgudfala samting we yu yu mekem long paoa blong yu, mo bambae oli stap talemaot bigfala paoa we yu yu gat.”—Ol Sam 145:11.
5. ?Olsem wanem yumi save se Jeova i stap lesin long ol man blong hem taem oli toktokgud long saed blong hem?
5 ?Olsem wanem? ?Jeova i stap lesin long ol man blong hem taem oli presem hem? Yes, hem i lesin long ol samting we oli talem. Profet tok blong Malakae long saed blong trufala wosip long taem blong yumi, i talem se: “ ‘Ol man we oli ona gud long Hae God, mo oli tinghevi long hem, oli stap toktok gud wetem olgeta bakegen. Nao Hae God i stap lesin long olgeta, mo i harem ol samting we oli stap talem.’ Nao long fes blong hem, ol man blong hem oli raetemdaon long wan buk, ol nem blong olgeta ya we oli ona gud long hem, mo oli tinghevi long hem.” (Malakae 3:16) Jeova i glad tumas taem ol man blong hem oli toktokgud long saed blong hem, mo hem i no save fogetem olgeta.
6. ?Wanem wok i givhan long yumi blong luksave ol man we oli stap tru long God?
6 Narafala samting we i makemaot ol man we oli stap tru long Jeova, hemia se oli no fraet blong tokbaot Hem, oli tekem evri janis blong toktok long ol man we oli no mekem wosip long trufala God yet. Yes, ol man we oli stap tru long God oli mekem ‘olgeta man oli save ol bigbigfala wok blong God, mo ol gudgudfala samting blong haenem blong hem.’ (Ol Sam 145:12) ?Yu tu yu lukaot evri janis blong toktok long ol narafala man long saed blong haenem blong Jeova we i King? I no longtaem, ol gavman blong man bambae oli finis, be rul blong God bambae i stap gogo i no save finis. (1 Timoti 1:17) I impoten tumas we ol man oli lanem hareap se Jeova bambae i stap king olwe, mo we oli tekem disisen long saed blong hem. Deved i singsing se: “Yu nomo yu King mo bambae yu yu stap rul oltaem, gogo i no save finis. Oltaem Hae God i stap holem ol promes blong hem, mo evri samting we hem i stap mekem oli gud tumas.”—Ol Sam 145:13.
7, 8. ?Wanem i hapen long yia 1914, mo wanem samting i pruvum se God i stap rul naoia tru long Kingdom blong Pikinini blong hem?
7 Afta long yia 1914, i gat moa risen blong talemaot se Jeova i king. Long 1914, God i putumap Kingdom blong Mesaea long heven, we Jisas Kraes, Pikinini blong Deved, i King blong hem. Long rod ya, Jeova i mekem promes blong hem i kamtru, se kingdom blong Deved bambae i stanap strong oltaem gogo i no save finis.—2 Samuel 7:12, 13; Luk 1:32, 33.
8 Samting we i pruvum se Jeova i stap rul naoia tru long Kingdom blong Pikinini blong hem Jisas Kraes, hemia ol saen we oli soemaot se Jisas i kambak finis. Wan bigfala saen, hemia wok we Jisas i talem se ol man blong God bambae oli mekem. Hem i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:3-14, NW ) Ol man we oli stap tru long God oli stap wok strong blong mekem profet tok ya i kamtru. Taswe, naoia bitim sikis milian man, woman, mo pikinini, oli stap joen long bigfala wok ya we i spesel long taem blong yumi. I no longtaem, ol man we oli agensem Kingdom blong Jeova bambae oli kasem en blong olgeta.—Revelesen 11:15, 18.
Rul Blong God i Mekem i Gud Long Yumi
9, 10. ?Olsem wanem Jeova i defren long ol lida blong wol ya?
9 Sipos yu yu wan Kristin we yu givim laef blong yu i go long God finis, fasin fren we yu yu gat wetem Masta mo King blong yumi Jeova i save mekem i gud long yu. (Ol Sam 71:5; 116:12) Wan samting se, yu save kam klosap long God mo harem se hem i glad long yu, from we yu fraet blong mekem samting we hem i no laekem mo yu traehad oltaem blong mekem i stret. (Ol Wok 10:34, 35; Jemes 4:8) Ol lida blong wol ya oli no gat fasin ya olsem God. Klosap oltaem oli kampani wetem ol man we oli impoten mo ol narafala hae man olsem ol lida blong ami, ol rij bisnesman, no ol bigman blong spot mo televisin. Wan niuspepa blong Afrika, Sowetan, i talemaot tok blong wan haeman blong gavman long saed blong sam ples long kantri blong hem we oli pua tumas, i se: “Mi kasem save from wanem plante long yumi oli no wantem go long ol ples ya. Hemia from we yumi no wantem tingbaot se i gat ol puaman i stap we oli trabolgud. Sipos yumi tingbaot olgeta, ating bambae yumi sem blong ron long flas [trak] blong yumi, tingting blong yumi bambae i stikim yumi.”
10 I tru se, sam lida blong wol oli wari long laef blong ol man we oli stap aninit long rul blong olgeta. Be, nating se oli traehad blong givhan long ol man ya, oli no rili save olgeta, mo oli no frengud wetem olgeta. Taswe, maet yu askem kwestin ya se: ?I gat wan lida we i tingbaot olgeta man we oli stap aninit long rul blong hem mo i givhan hareap long evriwan we oli trabol? Yes i gat. Deved i raetem se: “[Jeova] i stap givhan long olgeta we oli stap long trabol, mo i stap leftemap olgeta we oli foldaon.”—Ol Sam 145:14.
11. ?Wanem sam traem we oli kasem ol man we oli stap tru long God, mo wanem help we oli save kasem?
11 Ol man we oli stap tru long Jeova God oli kasem plante traem mo trabol. Hemia from we oli sinman, mo from we wol ya we oli laef long hem i stap long paoa blong rabis man ya Setan. (1 Jon 5:19; Ol Sam 34:19) Sam Kristin oli kasem trabol taem ol man oli ronem mo kilim olgeta. Samfala oli harem nogud from wan sik we i stap long olgeta longtaem, no from we oli lusum wan we oli lavem hem tumas. Sam man we oli stap tru long Jeova oli mekem wan sin nao tingting blong olgeta i “foldaon” from. Be, nomata wanem traem i kasem olgeta, Jeova i stap rere oltaem blong leftemap tingting blong olgeta wanwan, mo givim paoa long olgeta long saed blong spirit. King ya Jisas Kraes, hem tu i gat semfala lav ya long ol man we oli stap aninit long rul blong hem, mo hem i tingbaot olgeta we oli stap tru long hem.—Ol Sam 72:12-14.
Gudfala Kakae Long Stret Taem Blong Hem
12, 13. ?Olsem wanem Jeova i stap lukaot long ‘olgeta samting we hem i mekem’?
12 From bigfala lav blong Jeova we i kaengud, hem i givim ol samting we ol man blong hem oli nidim. Wan samting we oli nidim, hemia gudfala kakae we oli haremgud long hem mo i mekem bodi blong olgeta i strong. King Deved i raetem se: “Hae God. Olgeta samting we yu yu mekem, oli stap lukluk long yu, mo taem olgeta oli hanggri, yu yu stap givim kakae long olgeta. Yu stap givim plante kakae long olgeta, mo yu stap mekem olgeta evriwan oli harem gud.” (Ol Sam 145:15, 16) Long taem blong bigfala trabol tu, Jeova i save mekem rod blong ol man we oli stap tru long hem blong oli kasem ‘kakae we i naf blong wan dei.’—Luk 11:3; 12:29, 30.
13 Deved i talem se ‘olgeta samting we God i mekem’ oli stap kasem kakae. Hemia i minim ol anamol tu. I gud tumas we wol ya mo solwota i fulap long olkaen tri, gras mo flaoa. Sipos no, bambae i no gat oksijen * long win mo bambae i no gat kakae blong ol anamol blong graon mo solwota. (Ol Sam 104:14) Jeova nao i stap givim ol samting ya we oli nidim.
14, 15. ?Olsem wanem ol man blong Jeova tede oli stap kasem kakae long saed blong spirit?
14 Ol anamol oli no nidim ol samting long saed blong spirit, be ol man oli nidim samting ya. (Matiu 5:3) !Long nambawan fasin, Jeova i stap givim ol samting we ol man blong hem oli nidim! Bifo we Jisas i ded, hem i mekem promes ya se ‘slef we i stret mo waes’ bambae i givim ‘kakae long stret taem blong hem’ long ol man we oli folem Jisas. (Matiu 24:45, NW ) Slef ya, hemia haf blong ol 144,000 tabu man we oli stap yet long wol ya. Mo i tru tumas se Jeova i stap yusum olgeta blong givim fulap kakae long saed blong spirit.
15 Blong soem samting ya, tingbaot Baebol ya New World Translation of the Holy Scriptures. Naoia, klosap olgeta man blong Jeova oli gat Baebol ya long prapa lanwis blong olgeta, we oli bin tanem long fasin we i klia mo i stret. Mo tu, i gat plante milian buk we oli stap prentem long bitim 300 lanwis, blong givhan long ol man blong oli stadi Baebol. Olgeta kakae ya long saed blong spirit, hem i wan blesing long ol man long olgeta ples blong wol we oli mekem wosip long trufala God. ?I stret we yumi presem hu from? Jeova God. From lav blong hem we i kaengud, hem i mekem se grup ya we i olsem slef i save givim kakae ya long ol man ‘taem oli hanggri.’ Ol man we oli stap long paradaes long saed blong spirit tede, “olgeta evriwan oli harem gud” long kakae ya. !Mo ol man blong Jeova oli glad tumas blong tingbaot prapa paradaes we i no longtaem bambae oli save luk long wol ya!—Luk 23:42, 43.
16, 17. (a) ?Wanem eksampol we i soem se ol man blong Jeova oli stap kasem kakae long saed blong spirit long stret taem blong hem? (b) ?Sam 145 i talem wanem blong soemaot filing blong ol man we oli stap tru long God long saed blong tok we Setan i sakem long God?
16 Tingbaot wan nambawan eksampol blong kakae long saed blong spirit we yumi kasem long stret taem blong hem. Long yia 1939, Wol Wol Tu i stat long Yurop. Long semfala yia ya, Wajtaoa blong Novemba 1 i tokbaot “No Joen Long Faet.” Ol klia save ya i mekem ol Witnes blong Jeova long olgeta ples blong wol oli luksave se oli no mas joen nating long faet blong ol kantri ya. From samting ya, ol gavman oli kros long ol Witnes long ol sikis yia blong faet ya. Be, nating se oli putum tabu long ol Witnes mo mekem bigfala trabol long olgeta, ol Witnes ya we oli stap tru long God oli gohed nomo blong talemaot gud nius blong Kingdom. Long ol yia 1939 kasem 1946, Jeova i blesem wok blong olgeta, nao namba blong olgeta i kam antap 157 pesen. Mo tu, nambawan fasin blong olgeta blong holemstrong long God long ol yia blong faet ya, i wan samting we i stap halpem plante man yet blong luksave trufala skul.—Aesea 2:2-4.
17 Jeova i stap givim kakae long saed blong spirit long stret taem blong hem, be i no hemia nomo. Ol kakae ya i mekem ol man blong hem oli haremgud tu. Tingbaot taem ya we ol kantri oli stap faet long Wol Wo Tu. Ol man blong Jeova oli kasem advaes se oli no mas tingting tumas long prapa laef blong olgeta from we i gat wan samting we i moa impoten. Jeova i halpem olgeta blong kasem save se olgeta samting long heven mo wol oli mas givhan blong mekem se rul blong hem i win. !Ol wanwan Witnes we oli stap tru long Jeova oli givhan smol blong mekem rul ya i win mo blong pruvum se Setan i wan man blong giaman! !Hemia i gud tumas! (Ol Proveb 27:11) Setan i sakem giaman tok ya se Jeova i nogud mo rul blong hem i no stret. Be ol man we oli stap tru long Jeova oli gohed blong talemaot samting we i defren olgeta, oli se: “Fasin blong Hae God i stret gud, mo olgeta samting we hem i mekem i stap soemaot samting ya.”—Ol Sam 145:17.
18. ?I no longtaem i pas, yumi kasem wanem kakae long saed blong spirit we i kam long stret taem mo i mekem yumi haremgud?
18 Wan narafala kakae long saed blong spirit we ol man blong God oli haremgud long hem, hemia buk ya Draw Close to Jehovah we oli kasem long yia 2002/2003 long Distrik Asembli ya “Ol Man Blong Talemaot Kingdom We Oli Wok Strong.” Buk ya, ‘slef we i stret mo waes’ i mekemrere mo ol Witnes blong Jeova oli prentem, mo hem i stap tokbaot ol nambawan fasin blong Jeova God, wetem ol fasin we Sam 145 i tokbaot tu. Gudfala buk ya bambae i givhan bigwan long ol man we oli stap tru long God blong oli kam klosap moa long hem.
Stret Taem Blong Kam Klosap Moa Long Jeova
19. ?I no longtaem, wanem bigfala samting bambae i hapen, mo olsem wanem yumi save stanap strong long taem ya?
19 Klosap nao, bambae i gat wan bigfala samting i hapen blong mekem rul blong Jeova i win. Esikel i tokbaot wok we Setan bambae i mekem olsem ‘Gog long kantri ya Magog.’ Bambae hem i girap agensem ol man blong Jeova long olgeta ples blong wol. Bambae Setan i mekem evri samting we hem i naf blong mekem, blong traem pulum mo fosem ol man blong God blong lego hem. Long taem ya, ol man blong mekem wosip long Jeova bambae oli mas singaot long hem bitim ol narafala taem bifo, ating bambae oli krae i go long hem tu. ?Olsem wanem? ?Fasin blong olgeta blong onagud long God mo lavem hem, bambae i blong nating nomo? Nogat. japta 38Sam 145 i talem se: “Oltaem hem i stap klosap long olgeta we oli stap krae i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta. Oltaem hem i stap lukaot gud long olgeta, we oli lavem hem, be bambae hem i spolem olgeta we oli stap mekem ol fasin nogud.”—Ol Sam 145:18-20.
20. ?Olsem wanem tok blong Ol Sam 145:18-20 bambae oli kamtru i no longtaem?
20 !Tingbaot olsem wanem bambae yumi glad, taem yumi haremsave se Jeova i stap klosap long yumi, mo yumi haremsave paoa blong hem blong sevem yumi taem hem i spolem ol rabis man! Be yumi no mas fogetem se, long taem ya, we i stap kam klosap nao, Jeova bambae i lesin long olgeta nomo we “oli wantem tru blong hem i givhan long olgeta.” Hem i no save lesin long olgeta we oli gat tu tingting. Baebol i soem klia se ol rabis man we oli singaot long nem blong God long las menet nomo, God i no save sevem olgeta.—Ol Proveb 1:28, 29; Maeka 3:4; Luk 13:24, 25.
21. ?Olsem wanem ol man blong Jeova oli soem se oli haremgud tumas blong yusum nem blong hem?
21 Naoia i moa impoten i bitim olgeta taem bifo, blong ol man we oli onagud long Jeova oli singaot long hem we “oli wantem tru blong hem i givhan long olgeta.” Ol man blong Jeova oli haremgud tumas blong yusum nem blong hem long ol prea blong olgeta mo long ol ansa we oli givim long ol miting. Oli yusum nem blong God taem oli storian tugeta. Mo oli no fraet blong talemaot nem blong Jeova taem oli prij long ol man.—Rom 10:10, 13-15.
22. ?From wanem yumi mas gohed oltaem blong blokem ol tingting mo fasin blong wol?
22 Blong harem se yumi stap klosap long Jeova God oltaem, yumi mas gohed blong blokem ol samting we oli save spolem yumi long saed blong spirit, olsem fasin blong ronem ol sas samting, ol pleplei we oli no stret, fasin blong no wantem fogivim narafala, mo fasin blong no kea long olgeta we oli nidim sam samting. (1 Jon 2:15-17; 3:15-17) Sipos yumi no stretem ol fasin ya, yumi save kam olsem we yumi stap mekem wan bigfala sin nao Jeova bambae i no moa glad long yumi. (1 Jon 2:1, 2; 3:6) I moa waes blong tingbaot se i gat wan rod nomo blong gohed blong kasem lav blong Jeova we i kaengud mo i stap tru oltaem, hemia sipos yumi holem strong long hem.—2 Samuel 22:26.
23. ?Wanem gudfala fiuja i stap blong ol man we oli stap tru long God?
23 Ale, yumi mas putum olgeta tingting blong yumi oli stap long nambawan fiuja we Jeova bambae i givim long ol man we oli stap tru long hem. Sipos yumi mekem olsemia, yumi save stap wetem olgeta ya we “evri dei” bambae oli leftemap, blesem, mo presem Jeova, “gogo i no save finis.” (Ol Sam 145:1, 2) Taswe, yumi ‘mas stap long laef ya we oltaem yumi save se God i stap lavem yumi, mo bambae i gat sore long yumi, i givim laef long yumi we i no save finis.’ (Jud 20, 21) Taem yumi gohed blong haremgud long ol nambawan fasin blong Papa blong yumi long heven, wetem bigfala lav we hem i stap soem long olgeta we oli lavem hem, i gud yumi gat tingting olsem Deved i talemaot long lastok blong Sam 145 se: “Oltaem bambae mi mi presem Hae God. Nem blong hem i tabu, mo i gud olgeta samting we hem i mekem oli stap presem hem oltaem, gogo i no save finis.”
[Futnot]
^ Wan gas we olgeta laef samting oli nidim blong laef.
?Bambae Yu Yu Ansa Olsem Wanem?
•?Olsem wanem Sam 145 i givhan long yumi blong luksave ol man we oli stap tru long God?
•?Olsem wanem Jeova i stap ‘mekem olgeta samting oli haremgud’?
•?From wanem yumi mas kam klosap moa long Jeova?
[Kwestin]
[Tok blong pija long pej 16]
Ol man we oli stap tru long God oli haremgud tumas blong tokbaot ol bigbigfala wok blong hem
[Tok blong pija long pej 17]
Ol man blong Jeova oli gat strong tingting blong halpem ol narafala man blong kasem save long glori blong God we i king
[Tok blong pija long pej 18]
Jeova i givim kakae long ‘olgeta samting we hem i mekem’
[Credit Line]
Animals: Parque de la Naturaleza de Cabárceno
[Tok blong pija long pej 19]
Jeova i givim paoa mo i lidim ol gudfala man blong hem we oli askem help blong hem long prea