Wan Kwestin

?Wanem samting i mekem se Juda i slip wetem wan woman we hem i ting se i woman blong rod, olsem Jenesis 38:15, 16 i talem?

Juda i bin slip wetem wan woman we hem i ting se i woman blong rod, be woman ya i no wan woman blong rod. Jenesis japta 38 i talem wanem we i hapen.

Fasbon pikinini boe blong Juda i mared long Tamara, be bifo we tufala i save gat pikinini, Jeova i kilim boe ya i ded from we “fasin blong boe ya i nogud, i no stret nating long fes blong Hae God.” (Jenesis 38:7) Hemia i min se brata blong man ya we i ded bambae i mas givim pikinini long wido ya, blong pikinini ya bambae i holem nem blong man ya we i ded. Be, Onan we i sekenbon blong Juda, i no wantem nating blong mekem olsem. Taswe, God i kilim hem tu i ded. Ale Juda i sanem wido ya, Tamara, i gobak long haos blong papa blong hem, gogo lasbon boe blong Juda, hemia Sela, i kam bigwan blong i mared long Tamara. Be taem ol yia oli pas, Juda i no singaot Tamara blong i kam mared long Sela. Mekem se taem waef blong Juda i ded, Tamara i faenem wan rod blong gat wan pikinini long man Isrel ya we hem i papa blong man blong hem. Hem i mekem olsem taem hem i jenis olsem wan woman blong rod mo hem i sidaon long saed blong wan rod we hem i save se Juda i stap pas long hem.

From we Juda i no luksave se woman ya hem i Tamara, Juda i slip wetem hem. Tamara i waes blong askem sam samting long Juda blong i givim olsem saen blong promes blong hem, from we ol samting ya oli olsem pruf blong soem se Juda nao i mekem we Tamara i gat bel. Taem fulap man oli save long bisnes ya, Juda i no putum fol long Tamara be hem i gat tingtingdaon mo hem i se: “!Poen blong woman ya i stret ya! Mi nao mi mekem i no stret. I stret blong mi mi tekem hem i kam, i mared long lasbon blong mi, be mi no mekem.” Mo “hem i no moa slip wetem woman ya bakegen samtaem.”​—Jenesis 38:26.

Juda i no mekem i stret taem hem i no holem promes blong hem blong mekem Tamara i mared long boe blong hem Sela. Mo tu hem i slip wetem wan woman we hem i ting se i woman blong rod. Samting ya i agens long plan blong God, we i talem se man i save slip nomo wetem woman we hem i mared long hem. (Jenesis 2:24) Be blong talem stret, Juda i no rili slip wetem wan woman blong rod. Hem i tekem ples blong Sela nomo blong folem kastom ya blong bifo, mo taswe hem i kam papa long wan pikinini we i stret folem loa.

Mo long saed blong Tamara, wanem we hem i mekem i no soem se hem i wan woman we i stap slip olbaot. Ol man oli no ting se tufala twin ya blong hem oli pikinini blong rod. Taem Boas blong Betlehem i tekem woman Moab ya Rut, hem tu i folem kastom ya blong bifo. Ol olfala long Betlehem oli talem ol gudfala tok long saed blong pikinini blong Tamara, hemia Peres, taem oli talem long Boas se: “Bambae oli mekem famle blong yu i olsem famle blong Peres, we papa blong hem Juda ya bifo, mo mama blong hem [Tamara].” (Rut 4:12) Mo tu Peres i stap long lis blong ol olfala bubu blong Jisas Kraes.​—Matiu 1:1-3; Luk 3:23-33.