?Yu Save Trastem Ol Promes Blong Hu?

“OL PROMES blong hem oli gat paoa, olsem we hem i bin gat paoa; be ol wok blong hem oli nating, olsem we hem, tede, hem i nating.”​—King Henry the Eighth, wan tok we William Shakespeare i raetem.

Long tok ya, Shakespeare i tokbaot ol bigfala promes blong wan kadinol blong Inglan we nem blong hem Thomas Wolsey. Kadinol ya i gat bigfala paoa long saed blong politik long Inglan long ol yia 1500. Sam man oli talem se, tede, ol tok blong Shakespeare oli tru nomo long saed blong plante promes we oli harem. Bakegen mo bakegen, ol man oli mekem ol promes, be oli no holem promes ya fulwan. Taswe, i no hadwok blong kasem save from wanem ol man oli no wantem bilif long eni promes.

Plante Moa Man Oli Harem Nogud

Eksampol, taem i gat faet long ol Balkans long ol yia 1990, Sekiuriti Kaonsel blong Yunaeted Nesen i tokbaot wan taon long Bosnia, nem blong hem Srebrenica, i talem se “ples ya i sef.” Plante taosen Muslim we oli refuji * long ples ya oli bilivim tok ya. Be, nomata long promes ya we oli mekem se ples ya i sef, tok ya i no kam tru nating. (Ol Sam 146:3) Long Julae 1995, ol man we oli gat masket oli sakemaot ami blong UN, mo oli tekem taon ya. Bitim 6,000 Muslim oli lus, mo samting olsem 1,200 Muslim we oli no soldia oli ded.

Long ful laef blong hem, man i stap harem ol promes we ol narafala oli mekem be oli no holem. Ol man oli luk “plante tumas giaman advataesmen we oli trikim man,” mo oli harem se ol advataesmen ya oli lidim olgeta i gorong. Oli harem nogud from we “plante taosen man blong politik oli no holem ol promes we oli bin mekem taem oli pulum ol man blong vot from olgeta.” (The New Encyclopædia Britannica, Buk 15, pej 37) Ol lida blong jos we ol man oli trastem olgeta, oli mekem fasin we i rabis olgeta long ol man blong olgeta. Ol man we oli wok olsem tija no dokta, yumi ting se olgeta ya oli soem fasin sore mo oli kea long narafala. Be sam man we oli mekem ol wok ya, olgeta tu oli bin trikim ol man we oli trastem olgeta, oli mekem i nogud long olgeta, mo samtaem oli kilim i ded ol man we oli mas kea long olgeta. !Yumi no sapraes we Baebol i givim woning ya long yumi se yumi no mas bilif long evri tok!​—Ol Proveb 14:15.

 Ol Promes We Oli Kamtru

Nomata ol samting ya, plante man oli holem ol promes blong olgeta, nating se samtaem i no isi long olgeta blong holem ol promes we oli bin mekem. (Ol Sam 15:4) Taem oli mekem wan promes, long tingting blong olgeta promes ya i wan strong tok we oli mas holem. Sam narafala man oli rili traehad blong holem ol promes we oli mekem. Oli rere mo oli wantem holem promes ya, be, sore tumas, oli no naf blong mekem olsem. Yes, samtaem sam samting we man i no tingbaot i save blokem ol traehad blong hem blong wantem holem promes blong hem.​—Prija 9:11.

Nomata wanem risen, plante man oli faenem i had blong trastem ol promes blong eni man. Taswe, kwestin i stap se: ?I gat sam promes we yumi save trastem? Yes i gat. Yumi save trastem ol promes blong Baebol. Plis, ridim haf we i kam biaen, we i tokbaot ol promes ya blong Baebol. Maet biaen bambae yu gat semfala tingting olsem plante milian man se yumi rili save trastem ol promes blong God.

[Futnot]

[Foto Credit Line blong pija long pej 3]

AP Photo/Amel Emric