Laef Stori

Haremgud Long Lav Mo Fasin Kea Blong Jeova

FAY KING I TALEM STORI YA

Papa mama blong mi, tufala i kaengud, be olsem plante narafala man, tufala i no intres nating long ol skul. Plante taem mama i talem se: “I mas gat wan God i stap, sipos no, ?Hu nao i wokem ol flaoa, mo hu nao i wokem ol tri?” Be, tingting blong hem long saed blong God i finis long ples ya.

PAPA blong mi i ded long 1939, taem mi gat 11 yia nomo. Mi laef wetem mama long Stockport, saot long Manchester, Inglan. Longtaem finis mi wantem save moa long saed blong Man we i Wokem mi, mo mi gat bigfala respek long Baebol, nating se mi no gat save long hem. Taswe, mi mekem disisen blong go long Anglikan Jos blong luk wanem we mi save lanem long jos ya.

Ol sevis blong jos oli no givhan long mi, be taem pasta i ridim ol tok blong Jisas long ol Gospel, tingting i kasem mi se Baebol i tru. Taem mi tingtingbak, i rili narakaen we mi wan mi neva ridim Baebol. Biaen tu, taem wan fren blong famle i givim wan “Niutesteman” long mi, mi neva tekem taem blong ridim Baebol ya.

Long 1950, taem faet long Koria i stat, tingting blong mi i wok. ?Bambae ol narafala kantri oli joen long faet ya, olsem we oli mekem long Wol Wo Tu? ?Sipos i olsem, bambae mi save obei long oda blong Jisas blong lavem ol enemi blong mi? ?Mo tu, taem ol soldia oli kam blong spolem kantri blong mi, mi save stap kwaet mo no mekem wan samting blong blokem olgeta? ?Sipos mi no joen long faet ya, hemia i min se mi stap ronwe long wok blong mi? Tingting blong mi i fasfas long saed blong bisnes ya. Nating se i olsem, mi  sua se ansa long ol kwestin i stap long Baebol, be mi nomo mi no save olsem wanem no weples blong faenem ansa ya.

Lukaotem Trutok Long Ostrelia

Long 1954, mi mo mama, mitufala i mekem disisen blong muf i go long Ostrelia, kantri ya we sista blong mi, Jean, i stap long hem. Sam yia biaen, Jean i talem long mi se hem i askem ol Witnes blong Jeova blong oli kam luk mi. Jean i save se mi mi intres long Baebol mo mi stap go long jos, ale hem i wantem faenemaot tingting blong mi long saed blong ol Witnes. Hem i talem se: “Mi no sua sipos fasin blong olgeta blong eksplenem [Baebol] i stret no olsem wanem, be olgeta ya oli save eksplenem [Baebol], mo hemia i bitim wanem we ol narafala jos oli mekem.”

Bill mo Linda Schneider, hemia nem blong brata mo sista we tufala i kam luk mi, tufala i naes tumas. Tufala i gat klosap 70 yia mo tufala i Witnes blong Jeova blong plante yia finis. Tufala i bin wok long radio stesen blong ol Witnes blong Jeova long Adelaide, mo long Wol Wo Tu, taem gavman blong Ostrelia i putum tabu long wok blong prij, tufala i joen long wok blong prij fultaem. Be, nating se Bill mo Linda i givhan bigwan long mi, mi gohed blong lukluk i go long ol narafala jos.

Wan fren long ples blong wok i tekem mi mi go long wan miting blong wan prija, we nem blong hem Billy Graham. Afta long miting ya, sam long mifala i miting wetem wan bigman blong jos blong askem kwestin long hem. Mi mi askem wan kwestin, we longtaem finis i mekem tingting blong mi i trabol, se: “?Olsem wanem wan Kristin i save lavem ol enemi blong hem, be long taem blong faet hem i go kilim olgeta oli ded?” !Wantaem nomo, fulwan grup i stat singaot bigfala​—i klia se tingting blong olgeta evriwan i stap trabol from kwestin ya tu! Afta we sam taem i pas, bigman blong jos i talem long mifala se: “Mi no save ansa long kwestin ya. Mi wan mi stap traem yet blong faenem ansa blong hem.”

Long taem ya, mi gohed blong stadi Baebol wetem Bill mo Linda, mo long Septemba 1958, mi tekem baptaes. Tingting blong mi i strong blong folem gudfala eksampol blong tufala tija blong mi, ale long yia we i kam biaen, long manis Ogis, mi joen long wok blong prij fultaem, olsem wan paenia. Eit manis biaen oli singaot mi blong kam wan spesel paenia. !Mi glad tumas taem mi lanem se sista blong mi, Jean, i gohed long stadi blong hem mo hem tu i tekem baptaes!

Doa i Open Blong Mi Mekem Wan Gudfala Wok

Mi stap wok wetem wan kongregesen long Sydney mo mi mekem plante Baebol stadi. Wan dei mi mitim wan lida blong Anglikan Jos we i ritae finis mo mi askem long hem wanem bilif blong jos long saed blong en blong wol. Hem i talem long mi se blong 50 yia finis hem i stap tijim ol bilif blong jos. Nating se i olsem, ansa blong hem i mekem mi mi sapraes tumas, hem i se: “Mi mas tekem taem blong stadi long kwestin ya, from we mi no savegud Baebol olsem ol Witnes blong Jeova.”

I no longtaem biaen, oli askem sam volontia blong go prij long Pakistan. Mi fulumap pepa blong go, be mi no bin save se oli no save sanem ol yangfala woman. Wok ya i blong yang man no man mo woman we tufala i mared. Nating se i olsem, i klia se oli sanem pepa we mi fulumap i go long hedkwota long Brooklyn, from we i no longtaem biaen mi kasem wan leta we i askem sipos mi glad blong go prij long Bombay (naoia Mumbai), long India. Hemia long yia 1962. Mi go long Bombay mo mi stap long ples ya 18 manis. Biaen mi muf i go long wan taon we nem blong hem Allahabad.

Kwiktaem nomo mi stat blong lanem lanwis Hindi. Lanwis ya, we i blong India, i no had tumas  blong lanem, from we klosap oltaem, fasin blong talem ol wod i folem fasin blong raetem olgeta. !Be plante taem mi harem nogud, from we man blong haos i no wantem se mi traem toktok lanwis blong hem, mo i askem mi blong toktok Inglis! Be long niufala kantri ya mi fesem plante niufala samting we i pulum intres blong mi, mo mi glad tumas blong joen wetem ol narafala Witnes blong Ostrelia.

Taem mi yangfala yet, mi tingbaot mared, be afta we mi tekem baptaes mi bisi tumas long wok blong Jeova mo mi no moa tingbaot. Be, naoia mi stat blong harem se mi nidim wan fren long laef blong mi. From we mi no wantem lego wok blong prij long kantri ya, mi prea long Jeova long saed blong mared mo biaen mi gohed nomo long wok blong mi.

Wan Blesing We Mi No Tingbaot

Long taem ya, Edwin Skinner i lukaot long wok blong branj ofis long India. Long 1946, hem i bin go long namba eit klas blong Wajtaoa Baebol Skul blong Gilead, tugeta wetem sam narafala gudfala brata olsem Harold King mo Stanley Jones. Sosaeti i sanem Harold mo Stanley i go prij long Jaena. * Long 1958, gavman blong Jaena i putum tufala long kalabus from wok blong prij we tufala i mekem long Shanghai. Taem Harold i kamaot long kalabus long 1963, Edwin i raet long hem. Harold i spel fastaem long Yunaeted Stet mo Inglan mo afta we hem i gobak long Hong Kong hem i ansa long leta blong Edwin. Hem i talem se hem i wantem mared. Taem hem i kalabus, hem i prea long Jeova from samting ya, mo naoia hem i askem Edwin sipos hem i save long wan sista we i stret blong hem.

Long India, i no fasin blong man blong jusum waef blong hem. Klosap oltaem famle nao i mekem samting ya. Taswe, plante taem ol man oli askem Edwin blong faenem wan waef no hasban blong olgeta, be hem i mekem disisen blong no mekem samting ya. Taswe hem i givim leta blong Harold i go long Ruth McKay, we hasban blong hem, Homer, i wan elda we i goraon long ol kongregesen. Samtaem biaen, Ruth i raet long mi mo i talem se wan misinari, we i stap long trutok plante yia finis, i stap lukaot wan waef. Ruth i askem sipos mi mi wantem raet long hem. Hem i no talem long mi se hu ya brata ya mo brata ya i wanem kaen man.

I no gat man we i save se mi bin prea long Jeova from we mi wantem mared. Jeova nomo i gat save long samting ya. Faswan tingting we i kasem mi se mi no wantem raet long brata ya. Be, moa we mi tingbaot, moa we mi save se, taem Jeova i ansa long prea blong yumi, plante taem ansa ya i no folem tingting blong yumi. Ale mi raet i go long Ruth mo mi talem long hem se brata ya i save raet bakegen, be hemia i no min se bambae mi mared wetem hem. Namba tu leta blong Harold King, hem i sanem i kam long mi.

 Afta we Harold i kamaot long kalabus long Jaena, stori blong hem mo ol foto blong hem oli bin kamaot long plante niuspepa mo buk. Long taem ya, ol man long olgeta ples long wol oli save long hem. Be samting we mi mi intres long hem, hemia fasin blong Harold blong holemstrong long ol tiokratik wok. Mitufala i stap raetem leta long mitufala gogo kasem faef manis i pas mo biaen mi mi muf i go long Hong Kong. Long Oktoba 5, 1965, mitufala i mared.

Mitufala i wantem mared mo tu mitufala i wantem gohed blong mekem wok blong Jeova fultaem. Mo, taem mitufala i stap kam olfala, mitufala i faenem se mitufala i nidim tumas wan fren. Lav we mi mi gat long Harold i kam strong moa, mo taem mi luk fasin we hem i mekem long ol man, we hem i kaengud mo i kea long olgeta, mo fasin blong hem blong stretem ol problem we mitufala i fesem long wok blong mitufala, mi mi gat dip respek long hem. Blong 27 yia mitufala i gat wan hapi mared mo mitufala i kasem plante blesing blong Jeova.

Ol man Jaena oli wokhad, mo mi laekem olgeta tumas. Ol man Hong Kong oli toktok lanwis Kanton. Hemia wan lanwis blong Jaena we i gat plante moa saon long hem i winim lanwis ya Mandarin, mo from samting ya lanwis ya i had blong lanem. Fastaem, Harold mo mi, mitufala i laef long misinari hom we i stap long branj ofis blong ol Witnes blong Jeova. Biaen, mitufala i mekem wok blong Jeova long ol defren ples long Hong Kong. Yes, mitufala i hapi tumas, be long  1976 mi kasem bigfala problem long saed blong helt blong mi.

Fesem Problem Long Helt Blong Mi

Sik blong woman i stap long mi blong plante manis, mo namba blong ol sel blong blad blong mi i godaon bigwan. Mi nidim we dokta i katem mi, be ol dokta blong hospital oli wantem katem mi nomo sipos oli save givim blad long mi. Long tingting blong ol dokta ya, sipos oli no yusum blad, maet bambae mi ded. Wan dei, taem ol dokta oli stap tokbaot sik blong mi, ol nes oli traehad blong pulum mi blong tekem blad. Oli talem se mi no gat raet blong spolem laef blong mi. Long sem dei ya, ol dokta oli plan blong katem 12 man, 10 long olgeta ya hemia ol woman we dokta bambae i kilim i ded pikinini long bel blong olgeta. Mi mi makem we ol dokta mo ol nes oli no tok agensem ol woman ya we oli wantem se dokta i spolem laef blong pikinini we i stap long bel blong olgeta.

Biaen, Harold i raetem wan leta blong talem se sipos mi ded, i no fol blong hospital ya, mo naoia ol dokta oli agri blong katem mi. Oli tekem mi mi go long rum blong katem man mo oli rerem mi blong mi slip. Be, long las menet nomo, dokta blong mekem man i slip i no wantem gohed, mo oli putumaot mi long hospital ya.

Mitufala i go luk wan narafala dokta bakegen, wan dokta we i stadi long ol sik blong woman, mo we i no wok long hospital ya. Taem hem i luksave we mi sik bigwan, hem i glad blong katem mi long wan praes we i no sas tumas​—wan samting nomo, mitufala i no mas talemaot praes we hem i askem. Hem i katem mi mo i no gat problem i kamaot from​—mo hem i no yusum blad nating. I klia nomo se Jeova i soem lav mo i stap kea long mi mo Harold long taem ya.

Long 1992, Harold i kasem wan sik we ol dokta oli no save winim. Mitufala i muf i go long branj ofis mo olgeta long branj oli lukaot gud long mitufala wetem lav. Gudfala hasban blong mi i ded mo i finisim wok blong hem long wol ya long 1993 taem hem i gat 81 yia.

Gobak Long Inglan

Mi glad blong stap olsem wan memba blong Betel blong Hong Kong, be from we ples ya i hot tumas, mi stat faenem se i had long mi blong laef long ples ya. Mi sapraes tumas blong kasem wan leta long hedkwota long Brooklyn. From we helt blong mi i stap kam nogud, oli askem sipos mi wantem muf i go long wan branj ofis we oli naf blong lukaot ol sikman. Ale, long yia ya 2000, mi muf i gobak long Inglan mo mi kam wan memba blong Betel famle long London. !Hemia wan nambawan presen we Jeova i givim wetem lav! Oli mekem gudfala welkam long mi, mo mi harem gud tumas from ol defren wok we mi mi mekem. Wan long ol wok ya i blong givhan blong lukaot long laebri blong Betel famle we i gat 2,000 buk long hem.

Mo tu, mi joen long kongregesen blong ol man Jaena long London. Be plante samting i defren. Tede, long London i gat smol man nomo we oli kamaot stret long Hong Kong, bighaf blong olgeta oli kamaot stret long menlan blong Jaena. Oli toktok Mandarin, wan defren lanwis bakegen we mi mas yusum long wok blong prij. Long Inglan, i gat plante gudfala Baebol stadi wetem ol man Jaena we oli studen long yunivesiti. Ol man ya oli wokhad mo oli harem gud tumas blong lanem trutok blong Baebol. Mifala i glad tumas blong givhan long olgeta.

Long niufala hom blong mi, we i kwaet, mi tingting plante long hapi laef blong mi mo mi gohed blong sapraes long lav blong Jeova. Yumi luk fasin ya blong Jeova long olgeta samting we i joen wetem stamba tingting blong hem. Mo i klia se Jeova i stap kea long olgeta man blong hem wanwan. Mi mi gat plante risen blong tangkiu long Jeova from gudfala fasin kea mo lav we hem i soemaot long mi.​—1 Pita 5:​6, 7.

[Futnot]

[Tok blong pija long pej 24]

Taem mi paenia long India

[Tok blong pija long pej 25]

Harold King long 1963 mo taem hem i mekem wok blong Jeova long Jaena long ol yia 1950

[Tok blong pija long pej 26]

Dei blong mared blong mitufala long Hong Kong, Oktoba 5, 1965

[Tok blong pija long pej 26]

Mitufala wetem samfala we oli wok long Betel blong Hong Kong, i gat brata mo sista Liang long medel, brata mo sista Gannaway long raetsaed