Jeova i Givim Samting We Yumi Nidim Evri Dei

“I nogud yufala i stap tingting tumas from ol samting blong laef blong yufala . . . [Papa blong yufala] i save we yufala i mas gat ol samting ya.”​—LUK 12:​29, 30.

1. ?Olsem wanem Jeova i kea long ol anamol we hem i mekem?

 ?SAMTAEM yu yu wajem wan pijin we i stap stikstikim graon long ples we yu luk olsem se i no gat samting nating? Ating yu bin tingbaot se hem i stap faenem wanem kaen kakae long graon ya. Taem Jisas i givim Bigfala Toktok blong hem antap long Hil, hem i soem se yumi save lanem wan samting taem yumi tingbaot olsem wanem Jeova i stap kea long ol pijin. Hem i se: “Yufala i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i gud moa i winim ol pijin.” (Matiu 6:26) Yes, Jeova i givim kakae long evri anamol blong hem long sam rod we yumi no gat save long hem.​—Ol Sam 104:​14, 21; 147:9.

2, 3. ?Taem Jisas i tijim yumi blong prea from kakae we i naf blong wan dei, yumi lanem wanem samting long saed blong spirit?

² ?Ale sipos i olsem, from wanem Jisas i tijim yumi long Lodsprea blong askem se: “Plis yu givim kakae long mifala, i naf blong tede”? (Matiu 6:11) Long smol tok ya nomo, yumi save lanem sam dip save long saed blong spirit. Fastaem, tok ya i mekem yumi tingbaot se Jeova hem i Man ya we i save givim samting we yumi nidim. (Ol Sam 145:​15, 16) Ol man oli save wokem garen, be God nomo i save mekem olgeta samting oli gru, long saed blong bodi mo long saed blong spirit tu. (1 Korin 3:7) Samting we yumi kakae mo we yumi dring, hem i wan presen we God i givim. (Ol Wok 14:17) Taem yumi askem hem blong givim samting we yumi nidim evri dei, yumi soem se yumi gat tangkiu from ol samting we yumi kasem. Be, samting ya i no min se yumi no nid blong wok, sipos i no gat samting we i blokem yumi blong wok.​—Efesas 4:28; 2 Tesalonaeka 3:10.

³ Seken samting, taem yumi askem ‘kakae we i naf blong tede,’ samting ya i soem se yumi no wari bitim mak long saed blong fiuja. Jisas i gohed se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya. Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala. I nogud yufala i stap tingting tumas from ol samting blong tumora. Ol bisnes blong tumora i blong tumora.” (Matiu 6:​31-34) Prea blong askem ‘kakae we i naf blong tede’ i soem long yumi se i gud blong gat wan laef we i no fasfas wetem plante samting tumas, be yumi mas ‘bilif [mo] harem gud long wanem samting we yumi gat.’​—1 Timoti 6:​6-8.

Kakae Blong Spirit Evri Dei

4. ?Wanem samting we i hapen long laef blong Jisas mo ol man Isrel we i soem se i impoten tumas blong tingbaot ol kakae long saed blong spirit?

⁴ Prea ya we i blong askem kakae blong wan dei i mekem yumi tingbaot tu se yumi nidim kakae long saed blong spirit evri dei. Taem Jisas i no kakae blong plante dei mo i hanggri gud, Setan i traem pulum hem blong tanem ston i kam bred, be Jisas i no foldaon long trap ya. Jisas i stanap strong i se: “Baebol i talem se, ‘Man i no save laef long kakae nomo. Evri tok we God i talem, hemia nao samting blong mekem man i laef.’ ” (Matiu 4:4) Long ples ya Jisas i yusum ol tok blong Moses we hem i bin talem long ol man Isrel se: “[Jeova] i mekem we yumi gat hadtaem blong kasem kakae, mo hem i givim kakae ya mana long yumi blong yumi kakae. Be kakae ya,  yumi ya wetem ol bubu blong yumi bifo, neva yumi luk. Hem i mekem olsem blong tijim yumi we kakae nomo i no save mekem man i laef. Evri tok we hem i talem, hemia nao i save mekem man i laef.” (Dutronome 8:3) Taem Jeova i stap mekem merikel blong givim mana long ol man Isrel, hem i mekem se oli gat kakae evri dei, be tu, hem i stap tijim olgeta long sam samting long saed blong spirit. Wan tijing we oli kasem, hemia se oli mas “pikimap kakae blong [olgeta] we i naf blong wan dei nomo.” Sipos oli pikimap moa i bitim we i naf blong wan dei, haf ya we i stap bambae i sting mo i gat fulap maget long hem. (Eksodas 16:​4, 20) Be, long namba sikis dei, we nekis dei blong hem i Sabat dei, oli mas pikimap mana we i naf blong tu dei, be mana ya i no sting. (Eksodas 16:​5, 23, 24) Taswe, mana ya i makem gud long tingting blong olgeta se oli mas obei, mo se laef blong olgeta i no dipen long kakae nomo be i dipen long ‘evri tok we Jeova i talem.’

5. ?Olsem wanem Jeova i givim kakae long saed blong spirit we yumi nidim evri dei?

⁵ Jeova i givim kakae long saed blong spirit tru long Pikinini blong hem. Yumi mas tekem ol kakae ya evri dei. Jisas i putumap “slef ya we i stret mo waes,” we i stap ‘givim kakae long stret taem’ long olgeta man blong bilif we oli stap long haos blong God. (Matiu 24:​45, NW ) Grup ya we i olsem slef i givim plante kakae long saed blong spirit taem hem i wokem ol buk we oli givhan long yumi blong stadi Baebol. Be tu, hem i leftemap tingting blong yumi blong ridim Baebol evri dei. (Josua 1:8; Ol Sam 1:​1-3) Yumi save mekem olsem Jisas mo kasem samting we yumi nidim long saed blong spirit taem yumi traehad evri dei blong lanem samting we Jeova i wantem, mo mekem ol samting ya i wok long laef blong yumi.​—Jon 4:34.

Kasem Fogif From Ol Sin

6. ?Wanem ol kaon ya we yumi askem God blong i fogivim yumi from, mo Jeova bambae i tekemaot ol kaon ya sipos yumi mekem wanem?

⁶ Nekis samting we Jisas i talem long Lodsprea hemia: “Fogivim mifala from ol kaon blong mifala, olsem we mifala i fogivim olgeta ya tu we oli gat kaon long mifala.” (Matiu 6:​12, NW ) Long ples ya, Jisas i no stap tokbaot ol kaon blong mane. Hem i stap tokbaot fogif from sin blong yumi. Long buk blong Luk, prea ya i rid olsem: “Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala.” (Luk 11:4) Taswe, taem yumi mekem sin, i olsem we yumi gat wan kaon long Jeova. Be God blong yumi we i gat lav hem i rere blong “tekemaot,” no fogivim, sin blong yumi sipos yumi rili sore from sin ya, mo yumi “tanem tingting” mo askem hem blong i fogivim yumi tru long bilif we yumi gat long ransom sakrefaes blong Kraes.​—Ol Wok 3:19; 10:43; 1 Timoti 2:​5, 6.

7. ?From wanem yumi mas prea evri dei blong God i fogivim ol sin blong yumi?

⁷ Taem yumi sin, hemia i min se yumi no obei long wan rul blong Jeova long saed blong stret fasin. From we yumi bon wetem sin, yumi evriwan i save mestem long sam toktok, fasin mo tingting blong yumi, no maet taem yumi no mekem samting we yumi mas mekem. (Prija 7:20; Rom 3:23; Jemes 3:2; 4:17) Taswe, nating sipos yumi save no yumi no luksave se yumi bin sin, yumi mas askem Jeova evri dei blong fogivim ol sin blong yumi.​—Ol Sam 19:12; 40:12.

8. ?Prea ya we yumi mekem blong kasem fogif long sin, i mas pusum yumi blong mekem wanem, mo wanem gudfala frut i save kamaot from?

⁸ Taem yumi prea blong God i fogivim yumi, yumi mas luklukgud long fasin blong yumi wan, yumi mas tanem tingting from sin we yumi mekem, mo yumi mas talemaot sin ya. Olgeta samting ya oli mas stanap long bilif se blad blong Kraes i save pemaot yumi long sin. (1 Jon 1:​7-9) Blong pruvum se yumi rili wantem fogif ya we yumi prea from, yumi mas ‘mekem ol fasin ya we i save soemaot we yumi tanem tingting blong yumi finis.’ (Ol Wok 26:20) Ale yumi save bilif fulwan se bambae Jeova i rere blong fogivim ol sin blong yumi. (Ol Sam 86:5; 103:​8-14) Risal we bambae i kamaot hemia pis long tingting. Pis we God i givim “i bigfala moa, i bitim save blong yumi.” Ale pis ya bambae i “lukaot gud” long yumi, no bambae i “lukaotgud long hat mo tingting” blong yumi, olsem New World Translation i talem. (Filipae 4:7) Be long Lodsprea ya Jisas i tijim yumi samting moa yet, we yumi mas mekem sipos yumi wantem we God i fogivim ol sin blong yumi.

God i Fogivim Yumi Sipos Yumi Fogivim Narafala

9, 10. (a) ?Wanem tok we Jisas i ademap long Lodsprea, mo samting ya i makem wanem impoten samting? (b) ?Wanem pijatok we Jisas i talem blong soem se yumi mas fogivim narafala?

⁹ Yumi intres blong luk se i gat wan haf nomo  blong prea ya we Jisas i givim moa save long hem, hemia haf ya we i se “fogivim mifala from ol kaon blong mifala, olsem we mifala i fogivim olgeta ya tu we oli gat kaon long mifala.” Taem hem i finis blong talem Lodsprea ya, hem i ademap se: “Sipos yufala i stap fogivim ol man we oli stap mekem i nogud long yufala, Papa blong yufala long heven bambae i fogivim yufala tu. Be sipos yufala i no fogivim ol man we oli mekem i nogud long yufala, bambae Papa blong yufala i no save fogivim yufala from ol sin blong yufala.” (Matiu 6:​14, 15) Taswe, Jisas i soem klia se sipos yumi wantem we Jeova i fogivim yumi, yumi mas rere blong fogivim ol narafala tu.​—Mak 11:25.

¹⁰ Long wan narafala taem, Jisas i talem wan pijatok blong soem se i impoten blong fogivim narafala sipos yumi wantem we Jeova i fogivim yumi. Hem i storebaot wan king we i mekem i gud tumas long slef blong hem taem i kanselem bigfala kaon we slef ya i gat long hem. Be biaen, slef ya i no wantem kanselem wan smol kaon we wan narafala slef i gat long hem, ale king i panisim slef ya bakegen. Long en blong pijatok ya Jisas i talem se: “Sipos yufala evriwan i no fogivim ol brata blong yufala long olgeta tingting blong yufala, bambae Papa blong mi long heven i save mekem sem fasin ya tu long yufala.” (Matiu 18:​23-35) Lesen we yumi lanem long ples ya i klia nomo se: Sin blong yumi we Jeova i fogivim finis, i olsem wan bigfala kaon we yumi gat long hem, we i bigwan moa i bitim enikaen nogud samting we narafala i save mekem long yumi. Mo antap long hemia, Jeova i stap fogivim ol sin blong yumi evri dei. From samting ya, i mas isi long yumi blong fogivim mastik we maet narafala i mekem long yumi sam samtaem nomo.

11. ?Wanem advaes blong aposol Pol we yumi mas folem sipos yumi wantem we Jeova i fogivim yumi, mo wanem gudfala frut i save kamaot from?

¹¹ Aposol Pol i raetem se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efesas 4:32) Taem ol Kristin oli rere blong fofogivim olgeta, samting ya i leftemap pis bitwin long olgeta. Pol i talem bakegen se: “Yufala i tabu, yufala i man blong God. Hem i lavem yufala tumas, mo hem i jusumaot yufala finis, blong yufala i man blong hem. Nao from samting ya, yufala i mas putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. Yufala i mas givgivhan long yufala, mo taem wan  long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.” (Kolosi 3:​12-14) Olgeta samting ya nao oli stap insaed long prea we Jisas i tijim long yumi taem hem i se: “Fogivim mifala from ol kaon blong mifala, olsem we mifala i fogivim olgeta ya tu we oli gat kaon long mifala.”

Askem God Blong Protektem Yu Taem Yu Kasem Traem

12, 13. (a) ?Wanem mining we i no stret blong seken lastok blong Lodsprea? (b) ?Hu ya bigfala man blong traem man, mo yumi minim wanem taem yumi prea se God i no letem ol samting oli kam traem yumi tumas?

¹² Nekis samting we Jisas i askem long Lodsprea ya hemia se: “Yu no letem ol samting oli kam traem mifala tumas.” (Matiu 6:13) ?Long tok ya, Jisas i minim we yumi mas askem Jeova blong hem i no traem yumi? Nogat, from we tabu spirit i pulum disaepol Jemes blong raetem se: “Sipos ol samting i kam blong pulum tingting blong man, blong mekem hem i foldaon long sin, bambae hem i no mas talem se, ‘Ol samting ya i kamaot long God,’ from we i no gat samting nogud we i save pulum God blong mekem hem i gorong. Mo i no fasin blong God blong pulum man blong mekem hem i foldaon long sin.” (Jemes 1:13) Antap long hemia, man blong raetem Sam i raetem se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:3) Jeova i no stap spae long yumi blong luk wanem mastik we bambae yumi mekem, mo hem i neva save putum samting fored long yumi blong mekem yumi foldaon. ?Taswe, ol tok blong prea ya oli minim wanem?

¹³ Man we i stap traem mekem yumi foldaon wetem ol giaman trik, mo we i stap traem tu blong kakae yumi, hemia Devel Setan. (Efesas 6:11) Hem i bigfala man blong traem man. (1 Tesalonaeka 3:5) Taem yumi prea blong God i no letem ol samting oli kam traem yumi tumas, yumi stap askem Jeova blong i no letem yumi foldaon taem yumi fesem ol traem. Yumi stap askem hem blong no letem Setan “i winim yumi.” (2 Korin 2:11) Yumi prea olsem from we yumi wantem “stap aninit long han blong [Hae God],” yumi wantem we hem i lukaot gud long yumi long saed blong spirit. Jeova i rere blong givim help ya long olgeta man we oli tingbaot se Jeova i hae rula blong olgeta long evri samting we oli mekem.​—Ol Sam 91:​1-3.

14. ?Olsem wanem aposol Pol i soem se Jeova bambae i no lego yumi sipos yumi lukluk i go long Hem taem yumi kasem traem?

¹⁴ Yumi save sua se sipos yumi rili wantem samting ya, mo yumi talemaot samting ya long ol prea blong yumi mo yumi soemaot samting ya long ol fasin blong yumi, Jeova bambae i neva lego yumi. Aposol Pol i mekem yumi sua long wan samting se: “Ol samting ya we oli stap traem yumi, oli sem mak nomo long ol samting we oli stap traem ol narafala man. Be God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”​—1 Korin 10:13.

“Yu Blokem Setan i No Kam Spolem Mifala”

15. ?From wanem i moa impoten naoia blong prea se Jeova i blokem Setan blong i no spolem yumi?

¹⁵ Bighaf blong ol olfala hanraet blong Kristin Grik haf blong Baebol, oli soem se prea blong Jisas i finis olsem: “Yu blokem Setan i no kam spolem mifala.” * (Matiu 6:13) Long taem ya blong las dei yumi nidim moa we God i blokem yumi long Setan. Setan mo ol rabis enjel blong hem oli stap mekem faet agensem smol grup blong ol tabu man we oli stap yet long wol, we “oli stap obei long ol tok blong God, mo . . . oli stap holem ol tok we Jisas i talemaot se i tru.” Mo oli faet agensem “bigfala kampani” tu we i stap wok tugeta wetem ol tabu brata ya. (Revelesen 7:​9, NW; 12:​9, 17) Aposol Pita i givim advaes ya long ol Kristin se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae. Yufala i mas stanap strong long bilif blong yufala, blong blokem hem.” (1 Pita 5:​8, 9) Setan  i wantem tumas blong stopem wok blong prij, ale hem i yusum ol man blong hem long wol ya​—maet ol lida blong jos, ol bigfala man blong mekem bisnes, no ol man blong politik—​blong traem mekem yumi fraet. Be, sipos yumi stanap strong, bambae Jeova i no letem Setan i spolem yumi. Disaepol Jemes i raetem se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.”​—Jemes 4:7.

16. ?Wanem samting we Jeova i save yusum enitaem nomo blong halpem ol man blong hem taem oli fesem traem?

¹⁶ Jeova i letem Setan i traem Pikinini blong hem. Be taem Jisas i agensem Devel Setan, mo i yusum Tok blong God olsem wan tul blong blokem hem, Jeova i sanem ol enjel blong givhan long Jisas. (Matiu 4:​1-11) Long sem fasin, Jeova i save yusum ol enjel blong hem blong halpem yumi sipos yumi prea wetem bilif mo mekem hem i olsem sefples blong yumi. (Ol Sam 34:7; 91:​9-11) Aposol Pita i raetem se: “Hae God i save sevem ol man we oli bilif long hem, i save tekemaot olgeta long ol samting we i stap traem olgeta. Be ol man we oli no stret, hem i save holem olgeta oli stap long kalabus, gogo bambae bigfala Dei ya blong jajem man i kamtru.”​—2 Pita 2:9.

I No Longtaem Nao Bambae Yumi Fri Olgeta

17. ?Taem Jisas i tijim yumi long Lodsprea, hem i soemaot wanem we i moa impoten?

¹⁷ Long Lodsprea, Jisas i soemaot long yumi wanem stret tingting yumi mas gat long ol samting. Faswan impoten samting hemia, yumi wantem we Jeova i karemaot doti we man i sakem long tabu nem blong hem we i hae tumas. From we Kingdom blong Mesaea nao hem i tul we bambae Jeova i yusum blong mekem samting ya, taswe yumi prea from Kingdom ya blong i kam spolem ol kingdom, no gavman, blong ol man we oli no stret. Mo yumi prea se God i mekem ol samting we hem i wantem oli kamaot fulwan long wol ya olsem we i kamaot finis long heven. Bambae yumi save kasem laef we i no save finis long wan paradaes long wol ya sipos Jeova i karemaot doti long nem blong hem mo sipos olgeta long heven mo long wol oli luksave se rul blong hem nomo i stret. Afta we yumi prea from olgeta impoten samting ya, ale yumi save prea from ol samting we yumi nidim evri dei, yumi save askem God blong i fogivim ol sin blong yumi mo blong hem i karemaot yumi long ol traem mo ol nogud samting we Devel Setan i mekem agensem yumi.

18, 19. ?Olsem wanem prea ya blong Jisas bambae i halpem yumi blong stap wekap mo blong mekem hop blong yumi i stap strong “gogo kasem en”?

¹⁸ Taem i stap kam klosap nao we bambae yumi fri olgeta long ol wok blong Devel Setan mo rabis wol blong hem. Setan i savegud se “smol taem nomo blong hem i stap yet” blong i soemaot “kros” blong hem long wol ya, antap moa long ol man we oli strong blong mekem wok blong Jeova. (Revelesen 12:​12, 17) Long ol saen we Jisas i talem se bambae oli soemaot se “rabis fasin blong wol ya i kasem en blong hem,” hem i talemaot sam bigbigfala samting we oli mas kamtru, sam long ol samting ya oli no kamtru yet. (Matiu 24:​3, 29-31, NW ) Taem yumi luk we ol samting ya oli stap kamtru, hop blong yumi bambae i kam strong moa. Jisas i talem se: “Taem ol samting ya oli stat kamtru, yufala i mas stanap stret, yufala i leftemap hed blong yufala, from we bambae i no longtaem, mi bambae mi kam blong sevem yufala, mi mekem yufala i fri.”​—Luk 21:​25-28.

¹⁹ Ol tok ya we Jisas i talem long ol disaepol blong hem olsem wan eksampol blong prea, oli wan gudfala advaes long yumi blong soemaot wanem samting we yumi save prea from, long taem naoia we en i klosap. I gud yumi sua fulwan se gogo kasem en, bambae Jeova i givim samting we yumi nidim evri dei, samting long saed blong spirit mo long saed blong bodi tu. Taem yumi prea oltaem, samting ya bambae i halpem yumi blong “gohed blong holem bilif ya blong yumi i stap strong, gogo kasem en.”​—Hibrus 3:14; 1 Pita 4:7.

[Futnot]

Tingtingbak

• ?Yumi minim wanem taem yumi prea from ‘kakae we i naf blong tede’?

• Eksplenem mining blong prea ya “fogivim mifala from ol kaon blong mifala, olsem we mifala i fogivim olgeta ya tu we oli gat kaon long mifala.”

• ?Yumi minim wanem taem yumi askem Jeova blong i no letem ol samting oli kam traem yumi tumas?

• ?From wanem yumi mas prea se God i ‘blokem Setan i no kam spolem yumi’?

[Kwestin]

[Tok blong pija long pej 15]

Yumi mas fogivim narafala sipos yumi wantem we God i fogivim yumi

[Foto Credit Line blong pija long pej 13]

Lydekker