Man We i Haremgud Long Saed Blong Spirit Hem i Haremgud Long Saed Blong Bodi

ATING yu mas spenem plante taem blong lukaot long helt blong yu long saed blong bodi. Evri dei, yu spenem seven no eit aoa blong slip, sam aoa blong kuk mo blong kakae, mo eit no maet moa aoa long wok blong yu blong kasem mane blong pem rent mo kakae. Sipos yu sik, ating yu spenem taem mo mane tu blong luk wan dokta no tekem sam lif meresin. Yu klinim haos blong yu, yu swim, mo maet yu mekem spot oltaem, blong gat wan gudfala helt.

Nating se yu lukaotgud long ol nid blong yu long saed blong bodi blong gat wan gudfala helt, be samting ya i no naf. I gat wan narafala samting we i impoten moa, blong mekem yu yu haremgud oltaem. Ol risej we ol dokta oli mekem oli soem we helt blong yu long saed blong spirit i afektem helt blong yu long saed blong bodi.

Tufala i Joengud

Profesa Hedley G. Peach, long Yunivesiti blong Melbourne, Ostrelia, i talem se “bighaf blong ol risej we oli tokbaot samting ya oli soem se ol man we oli helti gud long saed blong spirit oli helti moa long saed blong bodi.” The Medical Journal of Australia i talem se: “Ol man we oli intres long ol samting long saed blong spirit . . . oli no gat tumas hae blad presa, mo oli no gat tumas kolestrol . . . mo tu oli no kasem kansa long gat.”

Long Yunaeted Stet, long yia 2002, Yunivesiti blong California, long taon blong Berkeley, i askem sam kwestin long 6,545 man blong mekem wan ripot. Ale, ripot blong olgeta i talem sem samting nomo se “ol man we oli stap go long jos wan taem  long wan wik, oli laef longtaem moa i bitim ol man we oli go sam samtaem nomo, no oli neva go long jos.” Man ya Doug Oman, we hem i lidim ripot ya mo i givim tok long Skul blong Pablik Helt long Yunivesiti blong California, long taon ya Berkeley, i talem se: “Mifala i luk we defren i stap yet, [olgeta we oli go long jos oltaem oli laef longtaem moa] nating se [tufala grup ya] oli no defren tumas long saed blong ol fren we oli gat mo olsem wanem oli lukaot long helt blong olgeta, sipos oli smok tabak no oli mekem spot.”

The Medical Journal of Australia i poenemaot sam narafala gudfala frut we ol man oli kasem long laef blong olgeta taem oli intres long ol samting long saed blong spirit. Hem i talem se: “Ol stadi we oli mekem long Ostrelia oli soem se ol man we oli laekem ol samting long saed blong spirit oli harem gud moa long mared blong olgeta, oli no gat plante problem olsem fasin drong mo fasin blong tekem drag, oli no tingbaot tumas blong kilim olgeta wan, oli no wari bitim mak mo tingting blong olgeta i no foldaon bigwan, mo oli no tingbaot olgeta wan nomo.” Antap long samting ya, niuspepa ya we oli kolem BMJ (we bifo oli putum fulnem blong hem se The British Medical Journal ) i talem se: “Taem wan fren no wan famle i ded, ol man ya we oli bilif strong long tijing blong skul blong olgeta bambae oli haremgud kwiktaem moa i bitim ol man we oli no gat bilif.”

I gat plante defren tingting long saed blong mining blong fasin ya blong laekem ol samting long saed blong spirit. Nomata ol defren tingting ya, i klia se fasin ya i gat paoa long helt blong yu long saed blong bodi mo tingting tu. Samting ya i laenap wetem tok blong Jisas we hem i bin talem samwe 2,000 yia bifo se: “Olgeta we oli luksave se oli nidim ol samting long saed blong spirit, oli save glad.” (Matiu 5:​3, NW ) Sipos i tru se blong gat gud helt mo blong glad, yu mas laekem ol samting long saed blong spirit, i gud blong askem ol kwestin ya long yu wan se: ‘?Mi save trastem hu blong lidimgud mi long saed blong spirit? ?Mo sipos mi laekem ol samting long saed blong spirit, mi mas mekem wanem?’