‘Masta, Plis Yu Tijim Mifala Blong Mifala i Prea’

“Wan man blong hem i talem long hem se, ‘Masta. Plis yu tijim mifala, blong mifala i prea.’ ”​—LUK 11:1.

1. ?From wanem wan long ol disaepol blong Jisas i askem hem blong i tijim olgeta blong prea?

 WAN taem, hemia long yia 32 K.T., * wan disaepol blong Jisas i stap luk hem taem hem i stap prea. Disaepol ya i no harem samting we Jisas i stap talem long Papa blong hem, from we ating Jisas i talem prea ya long tingting blong hem nomo. Nating se i olsem, taem Jisas i finis, disaepol ya i talem long hem se: “Masta. Plis yu tijim mifala, blong mifala i prea.” (Luk 11:1) ?Wanem i pulum hem blong askem samting ya? Prea i wan samting we ol man Jiu oli mekem oltaem long laef blong olgeta mo long wosip blong olgeta. Long Hibru haf blong Baebol, yumi save ridim plante defdefren prea long buk blong Ol Sam mo long ol narafala buk bakegen. Taswe, disaepol ya i no askem Jisas blong tijim hem long wan samting we hem i no gat save nating long hem, olsem we hem i neva mekem prea bifo. Nogat. Ating hem i harem finis ol prea we ol lida blong skul blong ol man Jiu oli stap mekem oltaem long ol spesel seremoni blong olgeta. Be naoia hem i luk fasin blong Jisas blong prea. Ating hem i harem save se fasin blong Jisas i defren olgeta long ol longfala prea we ol rabae oli mekem blong soem se oli man blong jos.​—Matiu 6:​5-8.

2. (a) ?Wanem i soem se Lodsprea i no wan prea we Jisas i talem blong yumi ripitim baehat? (b) ?From wanem yumi intres blong save fasin blong prea we i stret?

² Samwe long 18 manis bifo, taem Jisas i stap mekem Bigfala Toktok blong hem antap long Hil, hem i givim eksampol blong wan prea we ol disaepol blong hem oli save folem. (Matiu 6:​9-13) Maet disaepol ya i no bin stap long taem ya. Taswe Jisas i kaengud blong talem bakegen ol bigfala poen blong prea ya long hem. I gud blong makem we taem Jisas i mekem samting ya, hem i no talem bakegen ol wanwan wod blong prea ya olsem we hem i bin talem fastaem. Hemia i soem klia se prea ya i wan eksampol nomo, i no wan prea we man i mas ripitim baehat. (Luk 11:​1-4) Olsem disaepol ya, yumi tu yumi wantem save olsem wanem blong prea long fasin we bambae i mekem yumi kam klosap moa long Jeova. Taswe bambae yumi lukluk ol wanwan haf blong prea ya we i wan eksampol, olsem i stap long buk blong aposol Matiu. Prea ya i gat seven haf blong hem. Tri haf oli long saed blong stamba tingting blong God. Fo narafala haf oli blong askem samting we yumi nidim long bodi mo long saed blong spirit. Long stadi ya bambae yumi tokbaot trifala samting we Jisas i tokbaot fastaem long prea ya.

Wan Papa We i Gat Lav

3, 4. ?Yumi minim wanem taem yumi singaot Jeova se ‘Papa blong yumi’?

³ Long stat blong prea ya, Jisas i soem se ol prea blong yumi oli mas soemaot we yumi frengud wetem Jeova be long semtaem yumi gat respek long hem. Ol disaepol oli hivap raon long Jisas taem hem i stap sidaon antap long hil, nao Jisas i toktok long olgeta fastaem, i talem se oli mas singaot Jeova olsem se “Papa blong mifala we yu stap long heven.” (Matiu 6:​9, Nyutesteman wetem Ol Sam long Bislama) Wan man we i gat save long ol lanwis, i talem  se yumi no save sipos Jisas i toktok long ples ya long lanwis Hibru no long lanwis Arameik, be wan samting i sua se long tufala lanwis ya tok we hem i yusum blong talem “Papa” i sem mak nomo long fasin blong wan pikinini blong toktok long papa blong hem wetem lav. Taem yumi singaot Jeova se “Papa blong yumi,” i soem se yumi frengud wetem hem, yumi trastem gud hem.

⁴ Mo tu, taem yumi talem “Papa blong mifala,” yumi soem se yumi stap insaed long wan bigfala famle blong ol man mo woman we oli luksave Jeova olsem Man we i Givim Laef. (Aesea 64:8; Ol Wok 17:​24, 28) Ol Kristin we tabu spirit i makemaot olgeta, “oli pikinini blong God” mo from samting ya oli save singaot i go long hem se: “Papa blong mifala.” (Rom 8:​14, 15) Naoia plante milian narafala man tu oli joen wetem ol Kristin ya. Olgeta ya oli givim laef blong olgeta i go long Jeova mo oli soemaot samting ya taem oli tekem baptaes long wota. Olgeta “narafala sipsip” ya tu oli save kam klosap long Jeova long nem blong Jisas mo oli save singaot Hem se “Papa blong mifala.” (Jon 10:16; 14:6) Yumi save prea long Papa blong yumi long heven evri dei blong presem hem, blong talem tangkiu long hem from olgeta gudgudfala samting we hem i mekem long yumi, mo blong putum ol trabol blong yumi long hem, from we yumi sua se hem i stap tingbaot yumi.​—Filipae 4:​6, 7; 1 Pita 5:​6, 7.

Lavem Nem Blong Jeova

5. ?Wanem fashaf blong Lodsprea ya, mo from wanem i stret blong prea from samting ya fastaem?

⁵ Fashaf blong prea ya i soem wantaem, wanem samting nao we i moa impoten. Hem i se: “Nem blong yu i tabu.” (Matiu 6:9) Tru ya, samting we yumi mas tinghevi moa long hem hemia se nem blong Jeova i mas tabu, from we yumi lavem hem mo yumi no laekem nating blong luk olgeta doti we man i bin sakem long nem ya blong hem. Taem Setan i agensem God mo i pulum tufala faswan man mo woman blong tufala i no obei long Jeova God, hem i spolem nem blong Jeova from we hem i talem se fasin blong Jeova blong rul i no stret. (Jenesis 3:​1-6) Mo antap long samting ya, blong plante handred yia, i gat ol man we oli talem se oli wok blong God be oli sakem doti long nem blong Jeova from ol nogud fasin mo giaman tijing blong olgeta.

6. ?Sipos yumi stap prea se nem blong Jeova i tabu bambae yumi no save mekem wanem?

⁶ Taem yumi prea se nem blong Jeova i tabu, yumi soem se yumi stap sapotem hu long bisnes ya long saed blong rul blong heven mo wol. Yes, yumi soem se yumi stanap long saed blong Jeova we hem nomo i gat raet blong rulum heven mo wol. Jeova i wantem we olgeta spirit man long heven mo olgeta man long wol ya, evriwan oli mas wantem mo oli mas glad blong stap aninit long stretfala rul blong hem. Hem i wantem se olgeta ya oli mekem olsem from we oli lavem hem mo oli laekem olgeta samting ya we oli joen wetem nem ya. (1 Kronikel 29:10-13; Ol Sam 8:1; 148:13) Lav we yumi gat long nem blong Jeova bambae i halpem yumi blong no mekem wan samting we i save mekem sem long tabu nem ya blong hem. (Esikel 36:​20, 21; Rom 2:21-24) I save gat pis long heven mo wol sipos Jeova i kliarem evri toktok agensem nem blong hem mo sipos lav i pusum ol man blong wantem stap aninit long rul blong hem. Taem yumi prea se “nem blong yu i tabu” i olsem we yumi sua fulwan se stamba tingting ya blong Jeova bambae i kamtru mo i leftemap hem.​—Esikel 38:23.

 Kingdom Ya We Yumi Stap Prea From

7, 8. (a) ?Wanem Kingdom ya we Jisas i tijim yumi blong prea from? (b) ?Buk blong Daniel mo Revelesen oli tijim yumi wanem long saed blong Kingdom ya?

⁷ Seken samting blong askem long Lodsprea ya hemia se: “Letem kingdom blong yu i kam.” (Matiu 6:​10, NW ) Samting ya i laenap wetem faswan haf blong prea ya. Tul we Jeova bambae i yusum blong karemaot doti long tabu nem blong hem, hemia Kingdom blong Mesaea. Kingdom ya hem i wan gavman we i stap long heven, mo Pikinini blong hem, Jisas Kraes nao i King we hem i putumap. (Ol Sam 2:​1-9) Profet tok blong Daniel i tokbaot Kingdom blong Mesaea olsem “wan ston” we i kamaot antap long wan “bigfala hil.” (Daniel 2:​34, 35, 44, 45) Bigfala hil ya i minim hae rul blong Jeova, taswe ston ya, no Kingdom ya, hem i wan niufala rod we Jeova i yusum blong soemaot hae rul blong hem. Long profet tok ya, ston ya i “gru i go antap we i kam wan bigfala hil we i kavremap olgeta ples long wol.” Hemia i soemaot se taem Kingdom blong Mesaea i rulum wol ya bambae i olsem we God i rul.

⁸ Kraes bambae i rul long Kingdom ya wetem 144,000 narafala king tu. Olgeta ya oli blong wol ya, we God i “pemaot” olgeta blong oli go rul wetem Kraes olsem ol king mo pris. (Revelesen 5:​9, 10; 14:​1-4; 20:6) Daniel i tokbaot olgeta ya se oli “ol man blong God ya we i hae,” we bambae oli joen tugeta wetem Kraes, olsem Hed blong olgeta, blong tekem “paoa blong olgeta king, wetem ol gudgudfala samting blong ol kingdom blong olgeta, . . . paoa [no Kingdom] ya blong olgeta bambae i no save finis samtaem, mo bambae olgeta king long wol ya oli stap wok blong olgeta, mo oli stap obei long olgeta.” (Daniel 7:​13, 14, 18, 27) Hemia nao gavman ya long heven we Kraes i tijim ol man blong hem blong oli prea from.

?From Wanem Yumi Mas Prea Yet Se Kingdom i Kam?

9. ?From wanem i stret we yumi prea blong Kingdom blong God i kam?

⁹ Long Lodsprea ya Jisas i tijim yumi blong prea se Kingdom blong God i kam. Ol profet tok blong Baebol oli soemaot se Kingdom blong Mesaea i stanap finis long heven long 1914. * ?Hemia i min se yumi no moa nid blong prea se Kingdom ya i “kam”? Si, i stret yet blong prea olsem. Long profet tok blong Daniel, Kingdom blong Mesaea, we ston ya i pija blong hem, hem i stap kam blong i bangem leg blong bigfala aedol ya we i minim ol politik gavman blong man. Taem ston ya i bangem aedol ya, bambae aedol ya i brobrok long ol smosmol pis, gogo i kam das nomo. Profet tok blong Daniel i talem se: “Bambae i no gat wan king i save winim [Kingdom ya]. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”​—Daniel 2:44.

10. ?From wanem yumi wantem tumas we Kingdom blong God i kam?

¹⁰ Yumi wantem tumas blong luk Kingdom blong God i kam agensem rabis wol ya blong Setan, from we samting ya bambae i karemaot doti long tabu nem blong Jeova mo bambae i karemaot olgeta man we oli stap agensem hae rul blong hem. Yumi prea wetem olgeta hat blong yumi se: “Letem kingdom blong yu i kam,” mo yumi joen wetem aposol Jon blong talem se, “Jisas, Masta, plis yu kam.” (Revelesen 22:20) Yes, Jisas i mas kam blong karemaot doti we man i sakem long nem blong Jeova mo mekem hae rul blong Jeova i win fulwan. Nao bambae ol tok ya blong man we i raetem Sam oli kamtru se: “Plis yu mekem olgeta oli save we yu nomo yu Hae God [“Jeova,” NW ], yu nao yu hae King blong olgeta ples long wol.”​—Ol Sam 83:18.

 “Mekem Ol Samting We Yu Yu Wantem Oli Kamaot”

11, 12. (a) ?Yumi stap askem wanem, taem yumi prea se God i mekem ol samting we hem i wantem oli “kamaot long wol, olsem we oli kamaot finis long heven”? (b) ?Wanem narafala mining i stap long prea ya se Jeova i mekem ol samting we hem i wantem oli kamtru?

¹¹ Nekis samting we Jisas i tijim ol disaepol blong hem blong prea from, hemia: “Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Skae wetem olgeta samting long hem, oli stap from we Jeova nao i wantem olsem. Ol strongfala spirit man long heven oli singaot se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” (Revelesen 4:11) Jeova i gat wan stamba tingting blong “olgeta samting long heven mo long wol.” (Efesas 1:​8-10) Taem yumi prea se God i mekem ol samting we hem i wantem oli kamtru, yumi stap askem hem blong mekem stamba tingting blong hem i kamtru. Antap long hemia, yumi soemaot se yumi wantem tumas we Jeova i mekem samting we hem i wantem i kamtru long heven mo wol.

¹² Taem yumi prea olsem, yumi soemaot tu se yumi wantem mekem laef blong yumi i kam olsem we Jeova i wantem. Jisas i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Olsem Jisas, ol Kristin we oli givim laef blong olgeta i go long God oli glad blong mekem ol samting we God i wantem. Lav we yumi gat long Jeova mo long Pikinini blong hem i pusum yumi blong ‘no moa letem ol rabis samting we tingting blong yumi nomo i wantem, oli bos long yumi’ be yumi ‘letem ol samting we God i wantem, oli bos long yumi.’ (1 Pita 4:​1, 2; 2 Korin 5:​14, 15) Yumi traehad blong stap longwe long ol samting we yumi save se Jeova i no wantem yumi blong mekem. (1 Tesalonaeka 4:​3-5) Taem yumi pemaot taem blong ridim Baebol mo stadi, yumi ‘traem save olgeta samting we Masta blong yumi i wantem blong yumi mekem,’ we i min se yumi no lego long wok ya blong “talemaot gud nius ya [blong kingdom].”​—Efesas 5:​15-17; Matiu 24:14.

Ol Samting We Jeova i Wantem Long Heven

13. ?Olsem wanem ol samting we God i wantem oli stap kamtru finis longtaem bifo we Setan i rebel agensem God?

¹³ Longtaem bifo we wan spirit pikinini blong God i mekem stronghed mo i kam Setan, ol samting long heven oli stap gohed olsem we Jeova i wantem. Buk blong Proveb i tokbaot fasbon Pikinini blong God se hem i stret pija blong waes blong God. Buk ya i soem se blong plante bilian yia finis, Pikinini ya blong God, wan nomo we hem i gat, i stap “harem gud blong stap wetem hem,” hem i glad blong mekem ol samting we Papa blong hem i wantem. Ale, hem i kam “olsem man we i mekem ol plan we [God] i stap folem” blong wokem “olgeta samting long heven mo long wol, olgeta samting we yumi save luk mo olgeta samting we yumi no save luk.” (Ol Proveb 8:​22-31; Kolosi 1:​15-17) Jeova i yusum Jisas olsem Tok blong hem, yes, hem i Man blong Karem ol Tok blong Jeova.​—Jon 1:​1-3.

14. ?Yumi save lanem wanem long Ol Sam namba 103 long saed blong ol enjel mo fasin blong olgeta blong mekem samting we Jeova i wantem long heven?

¹⁴ Man blong raetem Sam i soem se Jeova i antap long evri samting we hem i wokem, mo Sam i soem tu se ol enjel oli lesin long ol advaes mo tok we hem i talem. Yumi ridim se: “Hae God, hem i King. Hem i stap long ples blong hem long heven, mo i stap rul long olgeta samting. Yufala ol enjel, yufala i strong, mo yufala i gat paoa. Oltaem yufala i stap obei long ol tok blong Hae God, mo yufala i stap lesin long ol samting we hem i talem. !Yufala i mas presem hem! Yufala olgeta long heven, yufala i man blong wok blong Hae God. Yufala i gat paoa, mo yufala i stap mekem ol samting we hem i wantem. !Yufala i mas presem hem! Yufala olgeta samting we Hae God i mekem yufala, yufala i stap long evri ples we hem i stap rul long hem. !Yufala i mas presem hem!”​—Ol Sam 103:​19-22.

15. ?Olsem wanem Jisas we i kam King i mekem samting we God i wantem i kamaot long heven?

¹⁵ Afta we Setan i rebel agensem God, hem i fri yet blong go long heven, olsem buk blong Job i soem. (Job 1:​6-12; 2:​1-7) Be, buk blong Revelesen i tokbaot wan taem we olgeta long heven oli sakemaot Setan mo ol rabis enjel blong hem. Hemia i hapen smoltaem nomo afta we Jisas Kraes i kam King  long 1914. Stat long yia ya, i no moa gat ples blong ol stronghed enjel ya long heven. Oli kalabus raonabaot long wol ya nomo. (Revelesen 12:​7-12) Naoia i no moa gat man long heven we i stap tok agensem hae rul blong Jeova. Olgeta spirit man long heven oli stap presem “Smol Sipsip” ya Jisas Kraes, mo oli stap aninit long Jeova oli stap presem hem. (Revelesen 4:​9-11) Tru ya, ol samting we Jeova i wantem oli rili kamtru finis long heven.

Ol Samting We Jeova i Wantem Long Wol

16. ?Olsem wanem Lodsprea i soemaot klia se tijing blong Krisendom i rong long saed blong laef blong ol man long fiuja?

¹⁶ Ol skul blong Krisendom * oli no tijim se God i gat plan i stap long saed blong wol ya, oli tijim se olgeta gudfala man bambae oli go long heven. Be Jisas i tijim yumi blong prea se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Wol ya i fulap long raf fasin, ol man oli mekem i no stret long narafala man, mo i gat sik mo ded. ?Yu ting se laef long wol ya i laenap wetem wanem we Jeova i wantem? !Nogat! Taswe yumi mas prea strong se God bambae i mekem wil blong hem i kamtru long wol ya. Hemia i laenap wetem promes we aposol Pita i tokbaot se: “God i promes finis blong putum niufala skae [Kingdom blong Mesaea we Kraes i king long hem] mo niufala wol [ol man we fasin blong olgeta i stret], we stret fasin nomo bambae i stap long hem. Mo yumi stap wet long ol samting ya blong oli kamtru.”​—2 Pita 3:13.

17. ?Wanem stamba tingting blong Jeova long saed blong wol ya?

¹⁷ Taem Jeova i wokem wol ya hem i gat wan stamba tingting. Hem i pulum profet Aesea blong raetem se: “Hae God i mekem skae wetem olgeta samting we i stap long hem. Hem nao i God. Hem i wokem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem. Mo hem i talem se, ‘Mi nao mi Hae God. I no gat narafala god i stap.’ ” (Aesea 45:18) God i putum faswan man mo woman long wan garen we i paradaes, mo i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol.” (Jenesis 1:​27, 28; 2:15) I klia nomo se stamba tingting blong God hemia se wol ya i fulap wetem ol stret man we oli glad blong stap aninit long rul blong Jeova mo we oli laef olwe long Paradaes ya we Kraes i bin promes se bambae i kamtru.​—Ol Sam 37:​11, 29; Luk 23:43.

18, 19. (a) ?Wanem i mas hapen bifo we God i save mekem samting we hem i wantem i kamtru long wol ya? (b) ?Wanem narafala haf blong Lodsprea we bambae yumi tokbaot long nekis stadi?

¹⁸ Samting we Jeova i wantem i no save kamtru long wol sipos wol ya i fulap yet wetem ol man mo ol woman we oli no wantem save long hae rul blong hem. God bambae i yusum Kraes blong i lidim bigfala ami blong ol strongfala enjel long heven, blong oli “spolem ol man ya we oli stap spolem wol.” Wol ya blong Setan bambae i lus fulwan, hemia i minim se bambae i no moa gat giaman skul, politik we i fulap long kruked fasin, ol bisnes man we oli griri mo oli stap giaman, mo ol ami blong wol ya. (Revelesen 11:18; 18:21; 19:​1, 2, 11-18) Samting ya bambae i mekem we hae rul blong Jeova i win fulwan mo i karemaot doti we man i sakem long nem blong Jeova. Hemia nao olgeta samting we yumi stap prea from, taem yumi talem se: “Papa blong mifala long heven, nem blong yu i tabu. Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.”​—Matiu 6:​9, 10, NW.

¹⁹ Be, long Lodsprea ya Jisas i soem se taem yumi prea yumi save askem samting we yumi wanwan i nidim tu. Long nekis stadi bambae yumi tokbaot ol samting ya.

[Ol Futnot]

Tingtingbak

• ?From wanem i stret blong singaot Jeova se “Papa blong mifala”?

• ?From wanem i impoten tumas we yumi prea fastaem blong nem blong Jeova i tabu?

• ?From wanem yumi prea blong Kingdom blong God i kam?

• ?Yumi minim wanem taem yumi prea blong God i mekem ol samting we hem i wantem oli kamaot long wol, olsem we oli kamaot finis long heven?

[Kwestin]

[Tok blong pija long pej 9]

Ol prea blong Jisas oli defren olgeta long ol prea blong ol Farisi

[Tok blong pija long pej 10]

Ol Kristin oli prea se Kingdom blong God i kam, se nem blong hem i tabu, mo se wil blong hem i kamtru