Wan Tingting We i Klin Gud Nomo

CHARLES, we i wok long wan yunivesiti long Kenya, i lusum mobael fon blong hem taem hem i kambak long haos afta long wok. Long Kenya ol samting olsem mobael fon i sas.

Charles i talem se: “Mi no tingbaot se wan man bambae i givimbak mobael fon blong mi.” Be sam dei biaen, olgeta long branj ofis blong ol Witnes blong Jeova long Kenya oli ring i kam long hem. !Hem i sek taem oli talem long hem blong i go pikimap mobael fon blong hem! Hem i faenemaot se wan Witnes blong Jeova we i bin sidaon long sem trak olsem hem, i faenem mobael fon ya. Witnes ya i karem mobael fon ya i go long branj ofis blong oli faenem se hem i blong hu. Ale ol brata we oli wok olsem volontia long branj ofis ya oli faenem nem blong Charles taem oli luk namba blong hem we i stap long mobael fon ya.

Charles i raetem wan leta i go long branj ofis i se: “Mi mi tinghae long hadwok we yufala i mekem blong faenem mi, mo mi talem tangkiu long memba blong ogenaesesen blong yufala we i faenem mobael fon blong mi mo i givim i kambak long mi. Tede i no isi nating blong faenem ol man we oli folem ol stretfasin, be yumi glad we i gat sam man yet we oli soemaot se oli ol trufala Witnes blong Jeova God.”

Ol man oli save ol Witnes blong Jeova from gud fasin we oli stap soem. Ol Witnes oli folem aposol Pol, we hem i se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo.” (Hibrus 13:18; 1 Korin 11:1) Oli save se gudfala fasin olsem i givim ona long Jeova God, olsem we Jisas i talem se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.”​—Matiu 5:16.