Yu Save Winim Ol Filing Blong No Sua Long Sam Samting

MAET yu yu harem ol tok ya plante taem se, “!Yu save sua se!” “!Yu mas trastem se!” “!Mi promes se!” Be long laef blong yumi evridei, i gat plante samting we yumi no sua long hem. Yumi no save wanem bambae i hapen long laef, taswe plante taem yumi tingting se maet i no gat wan samting we yumi save sua fulwan long hem. Yes, tingting we i hafhaf no tingting we i no sua fulwan, oli samting we yumi lan finis long hem.

I tru, fulap man oli wantem blong harem sef mo kasem glad insaed long famle. Oli wok strong blong kasem ol samting we oli ting se bambae i mekem oli glad mo oli sef​—olsem mane mo ol samting long saed blong bodi. Be, man i save lusum evri samting we hem i gat long taem we graon i seksek, no long wan hariken, no long wan aksiden, no from ol man blong brekem loa. Wan strong sik, divos, no man i lusum wok i save jenisim bigwan laef blong wan man. I tru se, maet wan long ol samting ya i no kasem yu stret. Be, taem yumi tingbaot se, wan long ol nogud samting ya i save hapen long yumi enitaem, hemia i save mekem yumi wari mo harem nogud long filing. Be i no hemia nomo.

Fasin blong no sua long wan samting i joen wetem tingting we i hafhaf. Wan diksonari i eksplenem tok ya “tingting we i hafhaf” olsem “wan tingting no bilif we yumi no sua long hem mo we plante taem i save blokem yumi blong mekem disisen.” Mo tu, olsem buk ya, Managing Your Mind i talem, “taem man i no sua long wan impoten samting, samting ya i save mekem man i wari moa.” Sipos man i no hareap blong winim tingting ya we i hafhaf, hem i save wari, i save harem nogud, mo i save kros. Yes, taem man i wari long wanem we maet i hapen no i no hapen, samting ya i save spolem tingting mo helt blong hem.

From samting ya, plante man oli bitim mak long saed blong wan narafala fasin. Oli olsem yangfala ya long Brasil we hem i se: “?From wanem mi tingbaot samting we bambae i hapen long fiuja? Moagud mi tingbaot samting blong naoia nomo, tumora bambae mi tingbaot samting blong tumora.” Tingting ya se, “i gud yumi gohed, yumi kakae, yumi dring” i wan tingting we i save lidim man blong harem nogud, wari, mo biaen hem i save ded tu. (1 Korin 15:32) I moa gud blong putum tras long Man ya we i Wokem yumi, Jeova God, we Baebol i talem se, “hem i no save tanem baksaed long yumi blong livim yumi long tudak.” (Jemes 1:17) Sipos yumi lukluk i go dip long Tok blong God, Baebol, bambae yumi faenem ol gudfala advaes we oli save lidim yumi mo soem long yumi olsem wanem yumi save dil wetem ol samting long laef we yumi no sua long olgeta. Mo tu, hem i save givhan long yumi blong kasem save from wanem i gat plante samting we ol man oli no sua long hem.

?From Wanem Yumi Gat Filing Ya Blong No Sua Long Sam Samting?

Baebol i talemaot trutok long saed blong laef mo i givhan long yumi blong wokem stret tingting long taem we sam samting i jenis mo taem yumi no sua  long sam samting. Yumi harem gud tumas taem famle blong yumi i stap gud, yumi gat gudnem long komuniti, gudfala helt, mo yumi naf blong lukaot long laef blong yumi wan we i no nidim narafala blong kea long yumi. Be Baebol i soemaot se, yumi no mas ting se ol samting ya oli no save jenis, mo yumi no mas tingting tu se, bambae yumi gat wan laef we i gud oltaem. Waes King ya Solomon i talem se: “I no ol nambawan man blong resis nomo we oli stap win long resis, mo i no ol strong man blong faet nomo we oli stap win long faet. I no ol waes man nomo we oli stap kasem gudfala laef, mo i no ol man ya nomo we oli gat hed we oli stap kam rijman. Mo i no ol gudfala man blong wok nomo we oli stap kasem hae nem.” ?From wanem? From we “olgeta man evriwan oli stap kasem gudlak mo badlak.” Taswe, Solomon i givim woning tu se: “Olsem we pijin i fas insaed long wan trap we i sek nomo long hem, no we fis i fas insaed long wan net, yumi tu, bambae trabol i kasem yumi wantaem nomo, we yumi no tingbaot, nao yumi go lus.”​—Prija 9:​11, 12.

Mo tu Jisas Kraes i tokbaot wan taem we olgeta man long wol ya bambae oli wari bitim mak mo oli gat filing blong no sua long ol samting. Ol tok blong hem oli makem klia tingting blong ol man taem hem i se: “Bambae i gat saen long san, mo long mun, mo long ol sta. Mo long wol ya, ol man blong plante kantri bambae oli harem nogud, oli fraet long bigfala noes blong solwota we i brok long rif, mo long ol wef blong hem. Bambae ol man oli save ded from fraet, mo from we oli stap harem nogud long ol samting we bambae oli save kam kasem wol ya, from we ol samting blong skae we oli strong we i strong, God bambae i muvum olgeta.” Be nating se olsem, Jisas i leftemap tingting blong ol man tede we oli gat gudfala hat, i se: “Taem yufala i luk we ol samting ya oli kamaot, bambae yufala i save se niufala wol ya we God i king long hem, bambae i no longtaem hem i kamtru.” (Luk 21:​25, 26, 31) Long sem fasin, taem yumi gat bilif long God, yumi no fraet long fiuja, be yumi lukluk i go long wan fiuja we i nambawan.

‘Gat Strong Tingting Long Hop Ya’

Nating se yumi no sua gud long evri samting we yumi harem, luk, no ridim, yumi gat gud risen blong trastem Man ya we i Wokem yumi. Hem i God ya we i Antap Olgeta, be tu, hem i wan Papa we i laekem mo i kea long ol pikinini blong hem long wol ya. God i talem tok ya long saed blong Baebol se: “Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”​—Aesea 55:11.

Jisas Kraes i tijim trutok blong God, mo plante we oli lesin long hem oli akseptem trutok ya fulwan mo oli sua fulwan long hem. Eksampol, wan grup blong ol man Sameria we oli gat gudfala hat oli talem long woman ya we i bin lesin long Jisas, se: “Fastaem mifala i bilif long hem from tok ya we yu yu talem. Be naoia mifala i bilif from we mifala nomo i harem tok blong hem, mo mifala i save we hem i prapa man blong sevem ol man long wol.” (Jon 4:42) Sem mak tede, nating we yumi laef long wan taem we yumi no harem se i sef, tingting blong yumi no mas hafhaf long wanem we yumi bilif long hem.

Long saed blong Kristin bilif, plante man oli gat tingting ya se, i gud blong bilif nomo, bitim we yumi traem kasem save long bilif ya. Be, Luk we i raetem wan buk long Baebol i no agri long tingting ya. Hem i stadi dip mo i givim save we i stret, mekem se olgeta samting ya we hem i raetem, be ol narafala oli ‘savegud we ol samting ya oli tru tumas.’ (Luk 1:4) Plante famle mo fren blong yumi we oli no bilif maet oli wari se bilif blong yumi bambae i mekem yumi harem nogud mo i mekem tingting blong yumi i foldaon, taswe i impoten we yumi naf blong givim ansa blong sapotem bilif blong yumi. (1 Pita 3:15) Taem yumi gat stret save long ol risen from wanem yumi bilif olsem, ale yumi save halpem ol narafala blong trastem God. Baebol i tokbaot Jeova se: “Hem i Bigfala Ston ya, ol wok blong hem oli stret gud olgeta, from we olgeta fasin blong hem oli stret. God ya i holem olgeta promes blong hem, i no save mekem i no stret. Hem i stret we i stret.”​—Dutronome 32:​4, NW.

 Tingbaot las tok ya: ‘Hem i no save mekem i no stret mo hem i stret we i stret.’ ?I gat sam pruf we i mekem yumi sua long tok ya? Aposol Pita i sua fulwan long trutok ya. Hem i talem long wan haeman blong Rom mo famle blong hem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:​34, 35) Pita i talem ol tok ya from we hem i luk olsem wanem God i mekem we wan famle blong Hiten man, we bifo ol man oli talem se oli no klin, be naoia God i tekem olgeta oli kam man blong hem. Olsem Pita, yumi tu yumi save sua fulwan long fasin ya blong God blong mekem i sem mak nomo long olgeta man mo blong mekem i stret, taem yumi luk wetem prapa ae blong yumi “wan bigfala hip” blong ol man​—bitim sikis milian man—​long bitim 230 kantri long wol, we oli lego olfala laef blong olgeta we i nogud mo naoia oli wokbaot long rod blong stret fasin.​—Revelesen 7:9; Aesea 2:​2-4.

Olsem ol tru Kristin, yumi no wantem blong bitim mak, be i gud blong gat tingting daon mo mekem i stret nomo. Be long semtaem, yumi sua gud long bilif blong yumi mo yumi suagud long wanem we bambae i hapen long fiuja. Aposol Pol i talem tok ya long ol Kristin long faswan handred yia i se: “Mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem.” (Hibrus 6:11) Tru ya, gud nius blong Baebol i mekem we yumi ‘putum tingting blong yumi i stap strong long [hop ya].’ Hop ya i stanap strong long Tok blong God, taswe Pol i talem tu se, yumi “no save harem nogud” from.​—Rom 5:5.

Mo tu yumi sua fulwan se, taem yumi tijim ol narafala long gud nius blong Baebol, samting ya i save mekem olgeta oli harem se oli sef mo oli sua gud blong gat wan laef we i stret wetem God, mo i save mekem oli harem gud tu long saed blong filing mo bodi. Yumi save joen wetem Pol blong talem se: “Taem mitrifala i tekem gud nius i kam long yufala, mifala i no toktok nating nomo. Mifala i toktok, mo mifala i stap mekem ol merikel long paoa blong tabu spirit, mo mifala i bilif strong se gud nius ya i tru.’​—1 Tesalonaeka 1:5.

Ol Blesing Naoia Long Wan Sefples Long Saed Blong Spirit

From we yumi no save ting se bambae yumi gat wan laef we i sef gud olgeta tede, taswe i gat sam samting we yumi save mekem blong halpem yumi blong harem gud long laef naoia. Wan eksampol, taem yumi joen oltaem long ol miting blong kongregesen, samting ya bambae i mekem yumi stanap strong, from we ol miting oli tijim yumi long ol rul mo fasin we oli stret mo we i waes blong folem long laef. Pol i raetem se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem.” (1 Timoti 6:17) Plante man we oli putum tras blong olgeta long Jeova mo i no long ol samting blong bodi we bambae oli lus, oli naf blong blokem ol wari mo oli no harem nogud long fulap samting we bifo oli bin harem nogud from.​—Matiu 6:​19-21.

Mo tu insaed long kongregesen, yumi gat ol brata mo sista we oli save halpem mo sapotem yumi long plante rod. Taem aposol Pol mo ol fren blong hem oli stap mekem minista wok blong olgeta, i gat wan taem we oli kasem sam trabol we oli harem se “i bigfala tumas” nao oli “no moa tingbaot se bambae [oli] laef.” ?Pol i kasem sapot long weples mo hu i givhan long hem? Yes i tru, Pol i putum tras blong hem i stap oltaem long God. Be antap long hemia, ol Kristin brata blong hem oli leftemap tingting blong hem mo mekem hem i harem gud. Samting ya tu i givim paoa long hem blong gohed. (2 Korin 1:​8, 9; 7:​5-7) Tede, taem i gat disasta no narafala trabol long laef, plante taem ol Kristin brata oli faswan blong givhan long yumi mo long ol narafala man long saed blong bodi mo spirit.

Wan narafala rod blong dil wetem ol samting long laef we yumi no sua long olgeta, hemia prea. Yumi save prea long Papa blong yumi long heven, taem yumi kasem trabol we yumi no ting se bambae i kasem  yumi. “Hae God. Yu yu sefples blong olgeta ya we ol man oli stap spolem olgeta. Yu yu ples blong haed blong olgeta long taem blong trabol.” (Ol Sam 9:9) Ol papa mo mama long wol ya maet oli no protektem gud ol pikinini blong olgeta. Be, God i glad blong givhan long yumi blong winim ol wari mo ol filing blong yumi taem yumi no sua long sam samting. Taem yumi putum ol wari blong yumi long Jeova tru long prea, yumi save sua se hem i save “mekem ol bigbigfala wok long laef blong yumi we i bitim mak olgeta, mo i antap moa long olgeta samting we yumi stap askem long hem, mo we yumi stap tingbaot.”​—Efesas 3:20.

?Yu yu stap prea oltaem long God? ?Yu yu sua fulwan se God i ansa long ol prea blong yu? Wan yangfala gel long Brasil i talem se: “Mama blong mi i talem se mi mas prea long God oltaem, be mi stap askem long mi wan se, ‘?Olsem wanem mi save toktok long wan man we mi no save hem?’ Ol Proveb 18:10 i halpem mi blong kasem save se yumi nidim God blong givhan long yumi mo yumi mas toktok wetem hem long prea.” Vas ya i talem se: “Hae God i olsem wan strong wajhaos, we ol stret man oli stap go haed long hem.” Tru ya, yumi no save wokem tras mo bilif long Jeova, sipos yumi no lan blong toktok long hem oltaem. Blong kasem ol blesing blong wan sefples long saed blong spirit, yumi mas wokem fasin blong prea we i kamaot long hat. Jisas i talem se: “Oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.”​—Luk 21:36.

Kingdom blong God i wan long ol samting we yumi save sua blong putum hop blong yumi long hem. Tingbaot ol tok long Daniel 2:44 (NW ): “Long taem blong ol king ya, God blong heven bambae i stanemap wan kingdom we neva i save brokdaon. Mo bambae kingdom ya i no save go long han blong narafala nesen. Bambae hem i smasem mo i finisim olgeta kingdom ya, mo hem nomo bambae i stanap olwe.” Yumi save sua long samting ya from we hem i wan hop we bambae i kamtru. Ol promes we ol man oli mekem i no save win, be yumi save trastem tok blong Jeova oltaem. God i olsem wan strong sefples we yumi save sua se bambae i blokemgud yumi. Yumi save harem olsem Deved we i se: “Hae God i God blong mi. Hem i wan gudfala ples blong haed blong mi, mo hem i stap lukaot gud long mi. Hem i stap blokemgud mi, mo i wan strong sefples blong mi. Hem i olsem sil we i stap blokem mi, hem i sevem mi, i holem mi mi stap gud. Oltaem hem i stap sevem mi, oltaem i stap blokemgud mi, blong ol man oli no kam kilim mi.”​—2 Samuel 22:3.

Buk ya Managing Your Mind we yumi tokbaot fastaem, i gohed blong talem se: “Taem wan man i tingbaot oltaem ol nogud samting we maet i save hapen, ol nogud samting ya bambae oli olsem trufala samting long tingting blong hem, nao samting ya i mekem i moa had long hem blong lukaot wan rod blong winim ol tingting ya.” Taswe, i nogud blong letem ol wari mo tingting blong wol ya we i hafhaf, i kam wan baden long yumi. Be, i moagud blong tingbaot ol promes we God i givim, bitim ol samting long wol ya we klosap bambae oli lus. Taem yumi holemtaet bilif blong yumi long ol promes blong Jeova, yumi save sua fulwan se: “Olgeta we oli bilif long hem, bambae oli no save sem.”​—Rom 10:​11.

[Tok blong makem poen long pej 29]

Tok blong God i promes se ol man bambae oli save kasem blesing long fiuja

[Tok blong makem poen long pej 30]

“Olgeta we oli bilif long hem, bambae oli no save sem”

[Tok blong pija long pej 31]

Gud nius blong Kingdom i mekem ol man oli harem sef