Blong Holem Klin Fasin, Lukaotgud Long Hat Blong Yu

“Yu mas lukaot gud [“long hat blong yu,” NW ] blong mekem se ol samting we yu stap tingbaot oltaem, oli stret, from we laef blong yu i stap soemaot tingting blong yu.”​—OL PROVEB 4:23.

1-3. (a) ?Plante man oli mekem wanem we i soem se oli no tinghae long klin fasin? Talem wan pijatok. (b) ?From wanem i impoten blong tokbaot ol samting we oli soem se klin fasin i sas?

 WAN pija i hang long wol blong haos blong wan man. Be man ya i ting se pija ya i no naes, i olsem wan pija blong bifo, mo i no stret long haos blong hem. Hem i no wantem pija ya. Ale, hem i salem i go long sekenhan, nao oli putum praes blong hem se 2,900 vatu. !Be, afta we sam yia i pas, oli faenemaot se pija ya i sas we i sas, praes blong hem i klosap 100 milian vatu! Yes, wan bigfala man blong dro i bin mekem pija ya, mo i no gat wan narafala pija olsem. !Traem tingbaot filing blong man ya we i salem pija ya blong smol praes nomo!

² Samting olsem i stap hapen long klin fasin, hemia ol gudfala fasin blong laef we oli mekem man i klin long fes blong God. Plante man tede oli no tinghae long klin fasin. Samfala oli ting se hem i fasin blong bifo, we i no stret long laef blong yumi tede. Ale, oli lego no salem klin fasin blong wan smol praes nomo. Samfala oli lego klin fasin blong haremgud blong smoltaem long rabis fasin blong seks. Sam narafala oli lego klin fasin from we oli wantem se ol fren blong olgeta oli tinghae long olgeta, no blong mekem boefren no gelfren blong olgeta i glad.​—Ol Proveb 13:20.

³ Biaen, oli faenemaot se klin fasin we oli lego long hem i wan sas samting, be i let finis. Plante long olgeta oli karem rabis frut from fasin we oli mekem. Baebol i talem finis se, man we i mekem rabis fasin long saed blong seks, biaen hem i save harem olsem we i stap kakae ‘frut we i konkon.’ (Ol Proveb 5:​3, 4, NW ) ?Long wol ya we i fulap long rabis fasin blong seks, olsem wanem yu save tinghae long klin fasin mo holemtaet fasin ya? Bambae yumi tokbaot tri samting we yumi save mekem.

Lukaotgud Long Hat Blong Yu

4. ?Hat i pija blong wanem samting, mo from wanem yumi mas lukaotgud long hem?

⁴ Blong holem klin fasin, bigfala samting we yumi mas mekem i blong lukaotgud long hat blong yumi. Baebol i talem se: “Yu mas lukaot gud [“long hat blong yu,” NW ] blong mekem se ol samting we yu stap tingbaot oltaem, oli stret, from we laef blong yu i stap soemaot tingting blong yu.” (Ol Proveb 4:23) ?Long vas ya, “hat” i minim wanem? Hemia i no prapa hat blong yu, be hem i wan pijatok. Hemia ol trufala filing mo tingting blong yu we ol narafala man oli no save lukluk, mo we oli stap biaen long ol aksin blong yu. Baebol i talem se: “Yufala i mas lavem [Jeova] long olgeta tingting [“olgeta hat,” NW ] blong yufala, mo long olgeta laef blong yufala, mo long olgeta paoa blong yufala.” (Dutronome 6:5) Jisas i talem se loa ya i moa impoten i bitim ol narafala loa. (Mak 12:​29, 30) I klia se hat blong yumi i sas we i sas. Taswe, yumi mas lukaotgud long hem.

5. ?Olsem wanem hat i wan gudfala samting be i denja tu?

⁵ Be Baebol i talem tu se “oltaem nomo, tingting [“hat,” NW ] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jeremaea 17:9) ?Olsem wanem hat i save giaman long yumi bakegen​—mo mekem se yumi kasem trabol? Tingbaot wan trak. Trak i wan gudfala samting mo i save sevem laef blong man we i mas go long hospital hareap.  Be sipos man we i draevem trak ya i no stiarem gud, semfala trak ya i save kam wan samting blong kilim man i ded. Sem mak long hat blong yu. Sipos yu no lukaotgud long hem, ol prapa tingting mo filing blong yu bambae oli bos long yu, mo bambae oli lidim yu blong kasem bigfala trabol. Tok blong God i talem se: “Man we oltaem i stap folem tingting [“hat,” NW ] blong hem nomo, hem i krangke we i bitim mak. I moa gud yu stap folem tok blong ol waes man, we oli stap tijim yu long hem.” (Ol Proveb 28:26) Bifo we yu go long wan trip, ating yu luklukgud long map blong traem savegud rod we bambae yu folem. Long sem fasin, yu save luklukgud long Tok blong God mo letem hem i lidim yu. Olsem nao, bambae yu save mekem waes fasin mo bambae yu no kasem trabol.​—Ol Sam 119:105.

6, 7. (a) ?Tabu fasin i olsem wanem, mo from wanem ol man blong Jeova oli mas tinghae long fasin ya? (b) ?Olsem wanem yumi save se ol sinman oli naf blong folem tabu fasin blong Jeova?

⁶ Taem yumi bon, hat blong yumi i no klin. Yumi mas tijim hat blong yumi blong laekem klin fasin. Wan rod blong mekem olsem, i blong tingting dip long klin fasin mo olsem wanem hem i gud tumas. Klin fasin i klosap long tabu fasin we i min se man i no doti nating, hem i stap longwe long sin. Tabu fasin i wan gudfala fasin, mo hem i haf blong prapa fasin blong Jeova God. Plante handred vas blong Baebol oli tokbaot tabu fasin blong Jeova. Yes, Baebol i talem se ‘Hae God i tabu.’ (Eksodas 28:36) ?Be, olsem wanem tabu fasin ya we i gud tumas i joen wetem yumi ol sinman?

⁷ Long Baebol, Jeova i talem se: “Yufala i mas tabu, . . . olsem we mi mi tabu.” (1 Pita 1:16) Yes, yumi save folem tabu fasin blong Jeova. Yumi save kam klin long ae blong hem, mo yumi save holem klin fasin ya. Taswe, taem yumi stap longwe long ol nogud fasin we oli save mekem yumi doti long ae blong God, yumi soem se yumi stap traehad blong kasem wan nambawan blesing​—!hemia blong soemaot wan gudfala fasin blong Hae God! (Efesas 5:1) Yumi no mas ting se yumi no naf blong mekem samting ya. Jeova i wan Masta we i waes mo i no mekem i strong tumas long yumi. Hem i no save talem long yumi blong mekem samting we yumi no naf blong mekem. (Ol Sam 103:​13, 14; Jemes 3:17) Be blong stap klin long saed blong spirit mo long ol fasin blong yumi, i tru se yumi mas traehad. Nating se i olsem, aposol Pol i talem se Kraes i wantem we yumi mas ‘stret mo klin.’ (2 Korin 11:3) ?Yu ting se i stret we yumi mas holem klin fasin from we yumi gat wan kaon blong pembak long Kraes mo Papa blong hem? Tufala i soem bigfala lav long yumi, we neva bambae yumi naf blong pembak tufala from. (Jon 3:16; 15:13) Ale, i stret nomo we yumi gat wan klin laef, hemia i olsem wan janis blong soem tangkiu long tufala. Sipos yumi tingting olsemia, bambae yumi tinghae long klin fasin, mo bambae yumi lukaotgud long hat blong yumi.

8. (a) ?Olsem wanem yumi save fidim hat blong yumi? (b) ?Ol storian blong yumi oli soemaot wanem?

⁸ Blong lukaotgud long hat blong yumi, yumi mas tekem gudfala kakae. Yumi mas fidim tingting mo hat blong yumi oltaem long ol gudfala kakae long saed blong spirit, mo putum tingting blong yumi i stap oltaem long gud nius blong Kingdom blong God. (Kolosi 3:2) Ol storian blong yumi oli mas soemaot samting ya. ?Yu yu stap tokbaot wanem samting long ol narafala? Sipos oltaem yumi tokbaot ol fasin blong wol mo ol rabis fasin, yumi stap soemaot se hat blong yumi i fulap long ol samting ya. (Luk 6:45) I moagud we yumi stap tokbaot ol samting long saed blong spirit we oli leftemap tingting blong ol narafala. (Efesas 5:3) Blong lukaotgud long hat blong yumi, yumi mas blokem sam samting we oli save lidim yumi blong kasem bigfala trabol. Bambae yumi tokbaot tu samting we yumi mas blokem.

 No Mekem Fasin Nogud Wetem Woman

9-11. (a) ?From wanem i isi nomo blong foldaon long rabis fasin blong seks sipos yumi no lesin long advaes blong 1 Korin 6:18? Talem wan pijatok. (b) ?Sipos yumi stap longwe long fasin nogud wetem woman, yumi no save mekem wanem? (c) ?Gudfala man ya Job i givim wanem eksampol long yumi?

⁹ Jeova i pulum aposol Pol blong raetemdaon sam advaes we i bin givhan long plante man blong lukaotgud long hat blong olgeta mo blong holem klin fasin. Pol i talem se: “Bambae yufala i no moa mekem [“mas ronwe long,” NW ] fasin nogud wetem woman.” * (1 Korin 6:18) Pol i talem long ol Kristin blong stap longwe long fasin nogud wetem woman, olsem we oli ronwe long wan samting we i denja mo i save kilim olgeta i ded. Sipos yumi no lesin long advaes ya, bambae i isi nomo blong yumi foldaon long ol nogud fasin blong seks, nao God bambae i no moa glad long yumi.

¹⁰ Tingbaot pijatok ya: Wan mama i mekem smol boe blong hem i swim, nao i putum ol naesfala klos long hem blong oli go samples. Smol boe ya i askem long mama blong hem sipos hem i save go afsaed mo pleplei smol bifo we oli aot. Ale, mama i letem hem, be i putum tabu long wan samting. Hem i talem long smol boe blong hem se: “Yu no mas go klosap long wota mo sofmad we i stap long yad. Sipos yu spolem klos blong yu, bambae mi wipim yu.” Smoltaem i pas, nao mama i lukluk i go afsaed. Hem i sek we smol boe blong hem i stap klosap we i klosap long sofmad ya. Bambae i isi nomo blong hem i glis i go long wota ya. I tru, smol boe ya i no spolem klos blong hem yet. Nating se i olsem, hem i no lesin long woning blong mama blong hem se i no mas go klosap long wota ya. Ale smol boe ya bambae i mas kasem trabol from. (Ol Proveb 22:15) Plante yangfala mo plante olfala tu we oli sud save, oli mekem semfala mastik ya. ?Olsem wanem samting ya i save hapen?

¹¹ Long taem blong yumi, plante man oli gohed nomo blong “folem ol rabis tingting blong olgeta we i blong sem nomo.” From samting ya, wan niufala bisnes i stanap, hemia bisnes blong salem ol save we i leftemap ol rabis fasin blong seks. (Rom 1:​26, 27) Bisnes ya i stap kam antap moa tru long ol buk, kaset video mo Intenet. Ol man we oli jusum blong lukluk ol rabis pija ya oli no stap longwe long fasin nogud wetem woman. Oli stap go klosap tumas olsem smol boe we i go klosap tumas long sofmad ya, mo oli stap sakemaot woning blong Baebol. Oli no stap lukaotgud long hat blong olgeta. Long defren fasin, oli stap posenem hat blong olgeta taem oli lukluk ol rabis pija ya we oli save stap long tingting blong olgeta blong plante yia. (Ol Proveb 6:27) I gud yumi lanem wan samting from gudfala man ya Job. Hem i mekem wan kontrak wetem ae blong hem, hemia i minim wan strong promes se hem i no save lukluk samting we i save pulum hem blong mekem rabis fasin. (Job 31:1) !Hemia nao wan gudfala eksampol blong folem!

12. ?Olsem wanem blong ‘no mekem fasin nogud’ taem Kristin boe mo gel tufala i stap fren?

¹² Taem boe mo gel i stap fren tugeta blong mared,  i impoten tumas we tufala i ‘no mekem fasin nogud.’ Taem ya blong fren tugeta i mas wan taem blong glad, we i fulap long ol gudfala plan blong fiuja mo hop blong wan gudfala laef tugeta. Be sam yangfala oli spolem gudfala taem ya from we oli go klosap tumas long rabis fasin blong seks. Taem oli mekem olsemia, oli spolem nambawan fandesen blong gudfala mared​—hemia fasin fren we i stanap long trufala lav, bos long tingting, mo fasin blong obei long Jeova God. Wan Kristin woman i tokbaot olsem wanem tingting blong hem i bin stikim hem mo i no glad long dei blong mared blong hem, from we hem wetem man blong hem tufala i bin mekem rabis fasin taem tufala i stap fren tugeta. Hem i talem wetem sore se: “Plante taem mi askem Jeova blong fogivim mi. Samting ya i hapen seven yia finis, be tingting blong mi i stap jajem mi yet.” Olgeta we oli mekem sin olsem, oli mas go luk ol Kristin elda hareap blong askem help blong olgeta. (Jemes 5:​14, 15) Be, i gat plante Kristin yangfala we oli stap fren tugeta long waes fasin, mo oli stap longwe long denja. (Ol Proveb 22:3) Oli putum wan mak we oli no mas bitim blong soem lav mo filing blong olgeta. Taem oli stap tufala nomo, oli askem long wan narawan blong joen wetem olgeta, oli lukaotgud blong no stap tufala nomo long ol ples we i no gat narafala man i stap long hem.

13. ?From wanem wan Kristin boe i no mas fren wetem wan gel we i no stap mekem wosip long Jeova?

¹³ Sipos wan Kristin boe i fren wetem gel we i no stap mekem wosip long Jeova, hem bambae i save fesem ol strong traem. Tingbaot: ?Olsem wanem yu save joenem laef blong yu wetem laef blong wan boe no gel we i no lavem Jeova God? I impoten tumas we ol Kristin oli kam olsem wan bodi wetem olgeta nomo we oli lavem Jeova mo we oli obei long ol rul blong hem long saed blong klin fasin. Tok blong God i talem se: “Bambae yufala i no go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples. Fasin ya i no save wok. Stret fasin mo rabis fasin, tufala i no save joen nating, mo delaet mo tudak, tufala i no save stap wanples.”​—2 Korin 6:14.

14, 15. (a) ?Wanem rong tingting we samfala oli gat long saed blong mining blong “fasin nogud wetem woman”? (b) ?“Fasin nogud wetem woman” i minim wanem, mo olsem wanem blong ‘no mekem fasin nogud wetem woman’?

¹⁴ Yumi nidim save tu. Blong no mekem fasin nogud wetem woman, yumi mas savegud ol samting we i joen wetem fasin ya. Sam man tede oli gat rong tingting long saed blong mining blong tok ya “fasin nogud wetem woman.” Oli ting se i oraet nomo blong mekem ol narafala doti fasin blong kasem samting we filing blong olgeta i nidim long saed blong seks, nomo se oli no mas slip wetem woman. Sam grup long saed blong helt we oli wantem daonem namba blong ol yangfala we oli gat bel, olgeta tu oli talem long ol yangfala se i oraet blong mekem ol krangke fasin blong seks we oli no save givim bel long olgeta. Ol advaes ya i nogud. Holem klin fasin i no minim nomo se gel i mas lukaot blong no gat bel afsaed long mared. Fasin nogud wetem woman i gat plante narafala mining tu.

¹⁵ Grik tok ya por·neiʹa we long Bislama oli tanem i kam “fasin nogud wetem woman,” i gat mining blong hem. Hem i minim olkaen fasin blong seks afsaed long mared, i min se man mo woman i yusum ol haf blong bodi long saed blong seks long fasin we i no stret. Tok ya por·neiʹa i save minim ol doti fasin blong seks, olsem taem ol man mo woman oli yusum maot no as blong olgeta blong mekem seks, no maet wan i pleplei wetem seks blong narawan. Hemia ol rabis fasin we oli stap gohed long haos blong ol woman blong rod. Maet man we i mekem ol doti fasin ya i no ting se hem i stap “mekem  nogud wetem woman,” be hem i stap giaman long hem wan bakegen. Hem i foldaon finis long trap blong Setan. (2 Timoti 2:26) Mo tu, klin fasin i no minim nomo se yumi no mekem por·neiʹa. Blong ‘no mekem fasin nogud wetem woman,’ yumi mas stap longwe long eni doti fasin no fasin blong ronem woman we i save pulum yumi blong mekem bigfala sin ya por·neiʹa. (Efesas 4:19) Long rod ya nao, yumi save holem klin fasin oltaem.

No Pleplei Wetem Filing Blong Woman

16. ?I stret nomo we hu i soemaot lav mo filing, mo wanem stori blong Baebol i tokbaot samting ya?

¹⁶ Blong holem klin fasin, yumi mas lukaotgud long wan narafala fasin we i save lidim yumi blong kasem trabol: hemia blong pleplei wetem filing blong woman. Samfala oli talem se hemia i no wan samting, hem i jes wan pleplei blong haremgud mo i no save spolem woman. I tru se i gat stret taem mo stret ples blong man mo woman i pleplei tugeta blong soem ol filing blong lav. Wan taem, Aesak mo Rebeka i “stap pleplei,” nao ol man oli luksave long fasin we tufala i stap mekem se tufala i no brata sista nomo. (Jenesis 26:​7-9) Hemia i oraet from we tufala i mared finis. I stret nomo we tufala i soem lav mo filing blong tufala. Be samting ya i no sem mak long fasin blong pleplei wetem filing blong woman.

17. ?Pleplei wetem filing blong woman i minim wanem, mo olsem wanem blong stretem nogud fasin ya?

¹⁷ ?Taem man i pleplei wetem filing blong woman, hem i mekem olsem wanem? Hem i pulum filing blong woman mo i givim tingting long hem se i laekem hem, be hem i no gat tingting nating blong mared wetem woman ya. From we yumi evriwan i defdefren, i gat plante rod blong pleplei wetem filing blong woman, mo sam long ol rod ya oli no klia, oli haed. (Ol Proveb 30:​18, 19) Taswe, yumi no save stanemap ol strong rul blong stretem trabol ya. Yumi nidim samting we i hae moa long ol rul​—hemia se yumi mas jekemgud fasin blong yumi wanwan mo traem luk se yumi rili olsem wanem, mo yumi mas traehad blong mekem ol advaes blong Baebol i wok long laef blong yumi.

18. ?Wanem i save pulum man blong pleplei wetem filing blong ol woman, be from wanem pleplei ya i nogud?

¹⁸ Man we i no giaman long hem wan bakegen, bambae i agri se hem i haremgud taem i luksave se wan woman i laekem hem. Yumi evriwan i sem mak. ?Be olsem wanem? ?I gud we man i pleplei wetem filing blong woman mo pulum hem blong laekem hem​—jes blong i save haremgud mo soem se hem i naf blong pulum ol woman? Sipos yu stap mekem olsemia, traem tingtinggud long soa we yu stap givim long ol woman. Tingbaot Ol Proveb 13:12 we i talem se: “Taem man [woman] i putum tingting blong hem i stap strong long wan samting, be samting ya i no kamtru, tingting blong hem i save foldaon.” Taem yu pleplei wetem filing blong woman, ating yu no rili save wanem i stap long tingting blong hem. Maet hem i ting se yu wantem fren wetem hem, mo se bambae yutufala i mared. Be taem samting ya i no kamtru, tingting blong hem i save foldaon olgeta. (Ol Proveb 18:14) Man we i stap pleplei wetem filing blong woman, i stap spolem woman ya nomo.

19. ?Olsem wanem Kristin man we i pleplei wetem filing blong ol woman i save spolem mared blong hem?

¹⁹ I impoten tumas blong no pleplei wetem filing blong ol woman we oli mared finis. I rong blong man i pulum filing blong woman we i mared finis, no man we i mared finis i pulum filing blong wan narafala woman. Sore tumas, sam Kristin man we oli mared finis oli gat rong tingting, oli ting se i oraet nomo blong gat filing long ol narafala woman. Maet wan man olsem i talem se wan woman i “fren” blong hem nomo, ale hem i talemaot ol wari blong hem long woman ya, mo maet i talemaot sam samting we hem i no bin serem wetem prapa waef blong hem tu. From samting ya, hem i stat laekem woman ya mo i stat blong dipen long hem blong haremgud long filing blong hem, gogo i spolem prapa mared blong hem. Ol Kristin we oli mared finis oli mas tingbaot woning we Jisas i givim se, tingting ya blong wantem slip wetem narafala woman, i stat long hat blong man fastaem. (Matiu 5:28) Taswe,  yumi mas lukaotgud long hat blong yumi mo no mekem wan samting we i save lidim yumi blong kasem bigfala trabol.

20. ?Yumi mas gat wanem tingting long saed blong klin fasin?

²⁰ Tru ya, i no isi blong holem klin fasin long wol ya we i fulap long rabis fasin. Be traem tingbaot se i had moa blong kam klin bakegen afta we yu spolem gudfala fasin blong yu, i bitim we yu holemtaet klin fasin fastaem. I tru, Jeova i “kwik blong fogivim yumi,” mo ol man we oli rili tanem tingting blong olgeta from sin oli save kam klin bakegen long ae blong hem. (Aesea 55:7) Be, Jeova i no save blokem rabis frut we i kamaot from nogud fasin long saed blong seks. Trabol we i kamaot from, i save stap plante yia, no maet ful laef blong yumi. (2 Samuel 12:​9-12) Plis, lukaotgud long hat blong yu mo holem klin fasin oltaem. !Tingbaot klin mo tabu fasin long fored blong Jeova God olsem wan sas samting​—we neva yu mas lego long hem!

[Futnot]

?Bambae Yu Yu Ansa Olsem Wanem?

• ?Klin fasin i olsem wanem, mo from wanem hem i impoten tumas?

• ?Yumi mas mekem wanem blong lukaotgud long hat blong yumi?

• ?Olsem wanem blong stap longwe long nogud fasin wetem woman?

• ?From wanem man i no mas pleplei wetem filing blong woman?

[Kwestin]

[Tok blong pija long pej 11]

Trak i save kam wan denja sipos man i no stiarem gud

[Tok blong pija long pej 12]

?Wanem i save hapen taem yumi no lesin long woning?

[Tok blong pija long pej 13]

Man mo woman we i fren tugeta long klin fasin, tufala i haremgud mo tufala i givim ona long God