?From Wanem Ol Witnes Blong Jeova Oli Kam Long Haos Blong Yu Oltaem?

LONG fulwol, ol man oli save gud ol Witnes blong Jeova from fasin blong olgeta blong gobak bakegen mo bakegen long haos blong ol man blong prij long olgeta. Sam man oli gat tingting se, ?From wanem ol Witnes oli oltaem visitim olgeta, nating se oli no intres tumas long toktok we ol Witnes ya oli stap talemaot? I gat tu leta i kam long Rasia we i givhan long yumi blong kasem save from wanem oli kambak bakegen mo bakegen.

Masha, i wan gel we i gat 19 yia blong hem mo hem i stap long taon ya Khabarovsk: “Blong talem stret, long ol yia we oli pas, mi no laekem nating ol Witnes blong Jeova.” Be afta we hem i ridim sam long ol magasin we ol Witnes oli wokem, tingting blong hem i jenis. Masha i gohed i se, “Mi intres tumas long ol samting we mi ridim long ol magasin mo oli mekem mi mi haremgud, be wan samting we i impoten moa se, wanem we mi ridim i mekem mi mi gat defren tingting long saed blong wol ya. Sloslo, mi kasem save from wanem man i laef long wol ya.”

Svetlana, we hem i stap long taon ya Ussuriysk, 80 kilometa long not blong Vladivostok, i raet se: “!I no longtaem we mi stat blong ridim ol Wajtaoa mo Wekap magasin! Yumi rili nidim ol magasin ya long taem blong yumi naoia. Mi mi laekem tumas ol stori we i stap insaed long ol magasin. Oli givim save long man, leftemap tingting, mo oli gud blong ridim. !Tangkiu! Tangkiu tumas we yufala i laef long wol ya mo mekem wok ya we i soem kaen fasin mo we i impoten tumas.”

Ol Witnes blong Jeova long fulwol oli tinghevi long kwestin we aposol Pol i askem se: “?Mo sipos man i no go talemaot nius blong God, bambae ol man oli save harem nius ya olsem wanem?” (Rom 10:14) I gud blong tekem smol taem blong lesin long ol Witnes blong Jeova taem oli visitim yu nekis taem. Yu tu bambae yu haremgud long mesej blong hop we i stap insaed long Tok blong God Baebol.