Lukaotgud Blong No Letem Giaman Fasin i Trikim Yu

“Yufala i mas lukaot gud, blong bambae i no gat wan man i kam karemaot yufala olsem wan samting we hem i stilim. Man olsem i save . . . talem ol tok we i blong giaman nomo.”​—KOLOSI 2:​8, NW.

1-3. (a) ?Wanem sam samting we oli soem se yumi fesem giaman fasin long klosap evri haf blong laef blong yumi tede? (b) ?From wanem yumi no mas sapraes long giaman fasin long wol ya?

 SAM yia i pas, wan tija blong loa i askem long plante taosen loea se: “?Hu long yufala we neva wan kastoma i giaman long yufala?” ?Oli ansa olsem wanem? Tija ya i talem se: “Long ol taosen loea we i stap, i gat wan nomo we kastoma i no bin giaman long hem.” ?From wanem? “Man ya i jes kam loea, mo hem i no toktok yet wetem wan kastoma.” Stori ya i soemaot wan trutok, be sore tumas, yumi no haremgud long trutok ya​—giaman fasin mo fasin blong trikim narafala i fulap long wol tede.

² Giaman fasin i save trikim yumi long plante rod, long klosap evri haf blong laef blong yumi. Ol niuspepa oli fulap long ol stori blong ol man we oli giaman, hemia ol man blong politik we oli giaman long saed blong samting we oli mekem, ol loea mo ol man blong lukaot long ol kaon blong ol bigfala kampani we oli giaman se ol kampani ya oli winim moa mane i bitim wanem we oli winim, ol man blong mekem toktok blong salem samting we oli giaman blong pulum ol man blong pem samting ya, ol man we oli trikim ol kampani blong insurens blong oli save kasem bigfala mane, hemia sam nomo long ol man we oli stap giaman. Antap long olgeta ya, i gat ol giaman fasin blong jos. Ol lida blong jos oli tijim ol man long ol giaman tijing, olsem sol we i no save ded samtaem, helfaea, mo Triniti.​—2 Timoti 4:​3, 4.

³ ?Ol giaman fasin ya oli mekem yumi sapraes? Nogat. Baebol i givim woning finis long saed blong ‘ol las dei’ se: “Ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.” (2 Timoti 3:​1, 13) Yumi ol Kristin, yumi  mas wekapgud mo luksave ol giaman tingting we oli save pulum yumi blong lego trutok. Tufala kwestin we i stanap, hemia: ?From wanem giaman fasin i bigwan tede? ?Yumi save mekem wanem blong no letem giaman fasin i trikim yumi?

?From Wanem Giaman Fasin i Fulap Tede?

4. ?Folem ol tok blong Baebol, from wanem giaman fasin i fulap long wol ya?

⁴ Baebol i talem klia from wanem giaman fasin i fulap long wol ya. Aposol Jon i raetem se, “olgeta man blong wol ya oli stap long paoa blong Setan.” (1 Jon 5:19) Long saed blong Setan, Jisas i talem se: “Neva hem i stap wetem olgeta we oli tok tru, from we i no gat trutok nating long hem. Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.” Taswe, yumi no sapraes long ol tingting we ol man blong wol oli gat, mo ol samting we oli ting se i impoten, mo ol giaman fasin blong olgeta. Olgeta ya oli stap folem rula blong wol ya nomo.​—Jon 8:44; 14:30; Efesas 2:​1-3.

5. ?Olsem wanem Setan i stap wokhad moa long taem ya we i klosap en blong wol, mo hu nao we hem i wantem spolem moa?

⁵ Long taem ya we i klosap en blong wol, Setan i wokhad moa blong giaman long ol man. Oli sakemaot hem long heven finis, i kamdaon long wol ya. Hem i save se taem blong hem i sot, mo hem i “kros tumas.” Hem i wantem spolem evri man, taswe ‘hem i stap lidim olgeta man long wol oli go krangke.’ (Revelesen 12:​9, 12) Setan i no stap giaman sam samtaem nomo. Hem i no save stop blong giaman long ol man mo lidim olgeta oli go krangke. * Hem i yusum ol defren kaen fasin​—maet i trikim ol man no i yusum narafala man blong giaman long olgeta—​blong satem tingting blong ol man blong wol, mo blong blokem olgeta blong oli no save kam klosap long God. (2 Korin 4:4) Be Man ya we i waes blong trikim man, i wantem moa blong spolem olgeta we oli stap wosipim God “long spirit mo trutok.” (Jon 4:24, NW; 1 Pita 5:8) Yumi no mas fogetem se Setan i bin talem olsem: ‘Mi mi save pulum evri man blong oli lego God.’ (Job 1:​9-12) Ale, bambae yumi tokbaot sam “giaman trik” blong Setan, mo olsem wanem blong blokem olgeta.​—Efesas 6:11.

No Letem Ol Man Blong Apostasi Oli Trikim Yu

6, 7. (a) ?Ol man blong apostasi oli talem wanem? (b) ?Wanem tok blong Baebol we i soem samting we ol man blong apostasi oli wantem mekem?

⁶ Longtaem finis i kam, Setan i yusum ol man blong apostasi blong giaman long ol man blong God. (Matiu 13:​36-39) Maet ol man ya oli talem se oli stap wosipim Jeova mo oli bilif long Baebol, be oli no wantem luksave ogenaesesen blong hem long wol. Sam long olgeta oli gobak bakegen long ol tijing we oli no givim ona long God nating, hemia ol tijing blong ‘Bigfala Babilon’ we i minim ol giaman skul blong wol. (Revelesen 17:5; 2 Pita 2:​19-22) Tabu spirit i pulum ol man we oli raetem Baebol blong yusum ol strong tok blong eksplenem tingting mo wok blong ol man ya blong apostasi.

⁷ ?Ol man blong apostasi oli wantem mekem wanem? Plante long olgeta oli no wantem nomo blong lego skul ya we fastaem oli ting se i tru. Oli wantem pulum ol narafala tu blong lego hem. Oli no go faenem ol man afsaed blong pulum olgeta oli kam disaepol blong olgeta, be oli traem “lidim ol man blong Jisas oli biaen long olgeta, oli go krangke.” (Ol Wok 20:​29, 30) Aposol Pol i givim strong woning agens long ol giaman tija ya, i se: “Yufala i mas lukaot gud, blong bambae i no gat wan man i kam karemaot yufala olsem wan samting we hem i stilim.” (Kolosi 2:8) Tok ya i stretgud long samting we ol man blong apostasi oli wantem mekem. Olgeta ya oli olsem man we i stilim pikinini i aot long famle blong hem. Oli giaman long sam memba blong kongregesen we oli trastem olgeta, i olsem we oli stilim olgeta nao oli karem olgeta oli gowe long ol narafala sipsip.

8. ?Wanem ol rod we ol man blong apostasi oli yusum?

⁸ ?Wanem ol rod we ol man blong apostasi oli yusum? Plante taem oli twistim trutok, oli talem ol tok we i hafhaf tru, mo oli giaman stret. Jisas i save se ol man blong hem bambae oli kasem traem ya. Hem i talem se sam man bambae ‘oli giaman long  olgeta, oli stap talem ol rabis tok agens long olgeta.’ (Matiu 5:11) Ol rabis man blong agens ya oli giaman blong trikim ol man blong God. Aposol Pita i givim woning agens long ol man ya blong apostasi we oli yusum “ol giaman toktok,” oli talemaot ol giaman tijing, mo oli ‘tanem mining blong Baebol’ blong mekem i laenap wetem tingting blong olgeta. (2 Pita 2:​3, 13; 3:16) I nogud tumas we olgeta ya oli “spolem fasin blong bilif blong sam Kristin man.”​—2 Timoti 2:18.

9, 10. (a) ?Olsem wanem blong no letem ol man blong apostasi oli trikim yumi? (b) ?From wanem yumi no kros taem yumi mas jenisim sam tingting blong yumi long saed blong stamba tingting blong God?

⁹ ?Yumi save mekem wanem blong no letem ol man blong apostasi oli trikim yumi? Yumi save folem advaes ya blong Baebol se: “Yufala i mas lukaot gud long olgeta we oli wantem mekem yufala i seraot, mo we oli wantem spolem bilif blong ol man. Yufala i no mas go klosap long olgeta. Olgeta oli stap agens long ol tok ya we yufala i kasem finis long ol man we oli tijim yufala long hem.” (Rom 16:17) Yumi “no mas go klosap long olgeta.” Hemia i min se yumi no mas lesin long ol tok blong olgeta, nating se tok ya i kamaot long maot blong olgeta stret, no oli raetem long niuspepa, no oli putum long Intenet. ?From wanem yumi tekem strong aksin olsem? Faswan risen, se Tok blong God i talem long yumi blong mekem olsem. Yumi trastem tok ya, from we yumi save se oltaem Jeova i wantem mekem i gud long yumi.​—Aesea 48:​17, 18.

¹⁰ Seken risen, hemia se yumi lavem ogenaesesen we i tijim yumi finis long ol gudfala trutok ya we oli mekem yumi defren long ol skul blong Bigfala Babilon. Be yumi luksave tu se, yumi no gat olgeta save yet long saed blong stamba tingting blong God. Long ol yia we oli pas finis, yumi kasem sam niufala save we i mekem se yumi mas jenisim sam tingting blong yumi. Ol gudfala Kristin oli glad blong wet long Jeova blong givim ol niufala save ya long stret taem blong hem. (Ol Proveb 4:18) Taem yumi stap wet, yumi no lego ogenaesesen ya we God i glad blong yusum, yumi luksave klia se hem i stap blesem wok blong olgeta.​—Ol Wok 6:7; 1 Korin 3:6.

No Giaman Long Yu Wan Bakegen

11. ?From wanem ol sinman oli gat slak fasin ya blong giaman long olgeta bakegen?

¹¹ Ol sinman oli gat wan slak fasin we Setan i glad blong yusum​—oli save giaman long olgeta bakegen. Jeremaea 17:9 i talem se: “Oltaem nomo, tingting [“hat,” NW ] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” Mo Jemes i raetem se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin.” (Jemes 1:14) Sipos wan samting i pulum hat blong yumi,  hat i save giaman long yumi se samting ya we i sin i wan gudfala samting we i no save spolem yumi. Hemia wan trik. Taem yumi letem sin ya i winim yumi, hem i spolem yumi tu.​—Rom 8:6.

12. ?Olsem wanem yumi save giaman long yumi wan bakegen?

¹² I isi nomo blong giaman long yumi wan. Hat blong yumi i save trikim yumi, i save mekem eskius from wan nogud fasin blong yumi no from wan bigfala sin we yumi mekem. (1 Samuel 15:​13-15, 20, 21) Hat ya we i wantem win nomo, i save mekem eskius tu from wan fasin we maet i no rong olgeta, be klosap nomo hem i rong. Tingbaot ol sinema, video kaset mo televisin. Sam stori oli gud mo yumi haremgud long olgeta. Be plante kaset blong ol man blong wol wetem sam program long televisin mo Intenet, oli fulap long doti mo rabis fasin. I isi blong ting se yumi strong mo yumi no save foldaon sipos yumi lukluk ol fasin ya we oli no stret. Maet samfala oli talem se, “I oraet nomo, tingting blong mi i no stap jajem mi.” Be olgeta ya oli ‘stap giaman nomo long olgeta.’​—Jemes 1:22.

13, 14. (a) ?Wanem stori blong Baebol i soem se yumi no save trastem tingting blong yumi oltaem blong i lidimgud yumi? (b) ?Olsem wanem blong no giaman long yumi wan bakegen?

¹³ ?Olsem wanem blong no giaman long yumi  wan bakegen? Faswan samting we yumi no mas fogetem se, yumi no save trastem tingting blong yumi blong i jajem yumi evritaem. Tingbaot aposol Pol. Bifo we hem i kam wan Kristin, hem i ronem mo kilim ol man blong Kraes. (Ol Wok 9:​1, 2) Ating tingting blong hem i no jajem hem from. Be i klia se tingting blong Pol i lidim hem i go krangke. Hem i se: “Mi no bilif yet long [Kraes], nao mi no save ol samting ya we mi mi stap mekem.” (1 Timoti 1:13) Taswe, yumi no mas ting se yumi save lukluk enikaen video kaset no sinema sipos tingting blong yumi i no jajem yumi from. I no samting ya we i soem se stori ya i stret blong lukluk, no nogat. Tingting we yumi save trastem blong lidimgud yumi, hemia tingting ya nomo we yumi trenem folem Tok blong God.

¹⁴ Blong no giaman long yumi wan bakegen, i gat sam advaes we yumi mas folem. Prea mo tingtinggud long laef blong yu. (Ol Sam 26:2; 2 Korin 13:5) Sipos yumi rili luklukgud long laef blong yumi, maet yumi luksave se yumi mas jenisim sam tingting mo fasin blong yumi. Lesin long narafala. (Jemes 1:19) Taem yumi stap skelem laef blong yumi, prapa tingting blong yumi i save blokem yumi blong yumi no lukluk klia ol slak fasin blong yumi. Taswe, i waes blong lesin long ol Kristin we oli bigman long saed blong spirit. Sipos ol Kristin ya we laef blong olgeta i stretgud mo we oli stap longtaem finis long trutok oli ting se yu stap mekem sam disisen no fasin we oli no stret, maet i gud we yu tingbaot se, ‘?Mi mi stap trenem tingting blong mi long fasin we i gud no i nogud? ?Hat blong mi i stap trikim mi?’ Tekem kakae oltaem long Baebol mo long ol buk we oli tokbaot Baebol. (Ol Sam 1:2) Sipos yu mekem olsem, ale ol tingting, fasin mo filing blong yu bambae oli laenap wetem tingting blong God.

Blokem Ol Giaman Tingting Blong Setan

15, 16. (a) ?Wanem ol giaman tingting we Setan i stap yusum blong trikim yumi? (b) ?Yumi save mekem wanem blong blokem ol giaman tingting ya?

¹⁵ Setan i stap yusum plante giaman tingting blong trikim yumi. Hem i wantem pulum yumi blong ting se ol sas samting oli save givim glad long yumi mo mekem yumi haremgud. Be plante taem, narafala samting i tru. (Prija 5:​10-12) Hem i wantem we yumi ting se rabis wol ya bambae i gohed blong olwe, nating se i gat plante samting blong soem klia se yumi stap finis long “ol las dei.” (2 Timoti 3:​1-5, NW ) Setan i stap leftemap tingting ya se i oraet nomo blong mekem ol rabis fasin blong seks, nating se olgeta we oli folem ol fasin ya oli stap kasem nogud frut from. (Galesia 6:7) ?Yumi save mekem wanem blong blokem ol giaman tingting ya blong Setan?

¹⁶ Lanem samting long ol stori blong Baebol. Baebol i tokbaot sam man we oli bilif long ol giaman tingting ya blong Setan. Ol stori ya oli givim woning long yumi. Ol man ya oli lavem ol sas samting, oli no tinghevi long impoten taem we oli stap laef long hem, mo oli foldaon long rabis fasin long saed blong seks. Oltaem i gat nogud frut i kamaot. (Matiu 19:​16-22; 24:​36-42; Luk 16:14; 1 Korin 10:​8-11) Lanem samting long mastik blong sam Kristin tede. Sore tumas, tede tu sam Kristin oli no moa tinghevi long impoten taem ya we yumi stap long hem, oli ting se i westem taem blong mekem wok blong God from we oli stap mestem gudtaem we wol i save givim. Maet oli lego trutok blong ronem ol pleplei we oli save haremgud long olgeta. Be, olgeta ya oli stap wokbaot ‘long ples we i glis.’ I no longtaem, bambae oli kasem nogud frut from fasin blong olgeta. (Ol Sam 73:​18, 19) Yumi waes sipos yumi lanem samting long ol mastik blong olgeta.​—Ol Proveb 22:3.

17. ?From wanem Setan i wantem we yumi ting se Jeova i no moa lavem yumi mo yumi no sas long ae blong hem?

¹⁷ I gat wan narafala giaman tingting we Setan i stap yusum​—se Jeova i no moa lavem yumi mo yumi no sas long ae blong hem. Long plante taosen yia we oli pas finis, Setan i wajemgud ol sinman. Hem i save se taem tingting blong yumi i foldaon, yumi no moa strong. (Ol Proveb 24:10) Taswe, hem i save mekem yumi ting se yumi nating nomo long ae blong God. Sipos ol trabol i ‘kilim yumi’ nao yumi stat ting se Jeova i no moa kea long yumi, maet yumi wantem lego hem. (2 Korin 4:9) !Hemia nao samting we Bigfala Man blong Trikim yumi i wantem! ?Ale, olsem wanem yumi save blokem giaman tingting ya we i kamaot long Setan?

18. ?Baebol i talem wanem blong soem se Jeova i lavem yumi?

¹⁸ Tingting dip long ol tok blong Baebol we i  soem se God i lavem yumi. Baebol i yusum sam nambawan pijatok blong soem se God i stap lukluk yumi mo i lavem yumi wanwan. Jeova i stap putum ol wota blong ae blong yu long ‘botel we oli wokem long skin blong anamol.’ Hemia i min se hem i stap luk mo i no save fogetem ol wota we i ron long ae blong yu taem yu stap traehad blong winim ol traem mo stap tru long hem. (Ol Sam 56:​8, NW ) Taem ‘tingting blong yu i kam nogud,’ Jeova i save, mo long taem ya hem i kam stap klosap long yu. (Ol Sam 34:18) Hem i save evri smosmol samting long saed blong yu, wetem stret namba blong ‘ol hea long hed blong yu.’ (Matiu 10:​29-31) Antap moa, God i ‘givim stret Pikinini blong hem, wan nomo we hem i gat,’ blong i ded from yumi. (Jon 3:16; Galesia 2:20) Sam samtaem, ating yu faenem i had blong luksave se ol vas ya oli stret long yu wan. Be, yumi mas bilif long tok blong Jeova. Hem i wantem we tingting blong yumi i strong se hem i lavem yumi wanwan, i no yumi olsem wan grup nomo.

19, 20. (a) ?From wanem i impoten blong luksave mo sakemaot giaman tingting ya blong Setan se Jeova i no moa lavem yumi? (b) ?Wan elda we i goraon long ol kongregesen i stap mekem wanem blong givhan long ol Kristin we oli harem nogud?

¹⁹ Luksave mo sakemaot ol giaman tingting. Sipos yu save se wan man i stap giaman long yu, yu save mekem wan samting blong no lesin long ol giaman tok blong hem. Long sem fasin, taem yumi save se Setan i stap giaman long yumi, i wantem we yumi ting se Jeova i no moa lavem yumi, samting ya i save mekem yumi strong moa blong winim hem. Wan Kristin woman i ridim wan Wajtaoa we i givim woning from ol trik blong Setan, nao hem i se: “Bifo, mi no luksave se Setan i stap yusum filing blong mi blong daonem mi. Naoia mi save, mo samting ya i givhan long mi blong winim ol filing ya.”

²⁰ Tingbaot wan elda we i stap visitim ol kongregesen long wan kantri long Saot Amerika. Taem hem i go luk ol Kristin we tingting blong olgeta i foldaon, hem i askem kwestin ya long olgeta: ‘?Yu yu bilif long Triniti?’ Kristin we i harem nogud bambae i ansa se, ‘Nogat,’ from we hem i save se Triniti i wan giaman tijing blong Setan. Nao elda i askem long hem se, ‘?Yu yu bilif long helfaea?’ Bakegen, Kristin ya bambae i talem se, ‘!Nogat!’ Nao elda i tokbaot wan narafala giaman tingting blong Setan we plante man oli no luksave. Hem i tekem buk ya Draw Close to Jehovah, * nao i openem i go long pej 249 haf 21 we i tokbaot giaman tok ya se Jeova i no moa lavem yumi wanwan. Long rod ya, elda ya i stap givhan long plante Kristin we tingting blong olgeta i foldaon, blong oli luksave mo sakemaot giaman tingting ya blong Setan.

No Letem Giaman Fasin i Trikim Yu

21, 22. ?From wanem yumi no stap long tudak long saed blong ol giaman trik blong Setan, mo yumi mas gat strong tingting blong mekem wanem?

²¹ Long ol las dei ya, yumi save se Setan bambae i gohed nomo blong giaman long ol man mo trikim olgeta bitim mak. Yumi talem tangkiu tumas long Jeova, we i no letem yumi stap long tudak, be i givim save long yumi long saed blong ol giaman trik blong Setan. Baebol mo ol buk blong “slef ya we i stret mo waes” oli tokbaot klia ol rabis rod we Setan i stap yusum. (Matiu 24:​45, NW ) Taem yumi save ol plan blong Setan, i moa isi blong faet agens long hem.​—2 Korin 2:11.

²² Ale, yumi mas lukaotgud long ol tok blong ol man blong apostasi. Yumi no mas foldaon long trap ya blong giaman long yumi wan bakegen. Mo yumi mas luksave mo sakemaot ol giaman tingting blong Setan. Sipos yumi mekem ol samting ya, bambae yumi holem gudfala fasin fren wetem ‘God ya blong trutok,’ we hem i no laekem nating ol giaman fasin.​—Ol Sam 31:​5, NW; Ol Proveb 3:32.

[Ol Futnot]

Yu Yu Tingbaot?

• ?From wanem wol ya i fulap long ol giaman fasin?

• ?Olsem wanem blong no letem ol giaman tok blong ol man blong apostasi i trikim yumi?

• ?Olsem wanem blong no giaman long yumi wan bakegen?

• ?Olsem wanem blong no letem ol giaman tingting blong Setan oli trikim yumi?

[Kwestin]

[Tok blong pija long pej 17]

Yu no mas giaman long yu wan bakegen long saed blong ol pleplei ya

[Tok blong pija long pej 18]

Blong no giaman long yu wan bakegen, yu mas prea mo tingting gud long laef blong yu, lesin long narafala, mo tekem kakae long Tok blong God