Wan Asembli Long Aelan We Oli Kolem “Nambuton Blong Wol”

?Yu yu harem tok ya samtaem se “Te Pito o Te Henua”? Long lanwis Rapa Nui, we i faswan lanwis blong ol man Ista Aelan, toktok ya i min se “Nambuton [no medel] blong Wol ya.” ?Wanem samting i mekem se wan asembli long Ista Aelan i spesel?

HEM i longwe long ol narafala aelan, i wan ples blong sapraes, mo i narakaen. Hemia sam toktok we ol man oli talem long saed blong Ista Aelan, no Rapa Nui, nem ya we ol man Ista Aelan oli stap yusum. I tru se, Ista Aelan i longwe tumas long ol narafala aelan. Hem i stap long Solwota blong Saot Pasifik, 3,790 kilometa longwe long Santiago, Jili. Long Septemba 9, 1888, Ista Aelan i kam wan provins blong Jili.

Ista Aelan i bigwan olsem 166 skwea kilometa, hem i gat tri kona blong hem mo tri volkeno, we trifala i no moa faerap. Olsem plante narafala aelan blong Saot Pasifik, Ista Aelan i olsem tri bigfala hil nomo we bighaf blong trifala hil ya i stap aninit long solwota. Gavman i makemaot ful aelan olsem wan spesel ples. Ating ol man oli save Ista Aelan moa from ol bigbigfala tamtam we ol man blong ples ya oli bin wokem long ston. Nem blong ol tamtam ya se moai. *

Ista Aelan i wan naesfala ples mo i gat plante olfala samting blong bifo long hem. Antap long samting ya, ol garen oli fulap long ol naesfala kakae, olsem, paenapol, avoka, popo, mo naen defren kaen banana. Mo solwota i fulap long ol defdefren kaen fis mo ol narafala kakae blong solwota.

Weta long Ista Aelan i no hot tumas, plante taem i ren mo man i save luk renbo. Ol man we oli kam visitim aelan ya oli harem gud from win we i klin mo ol nambawan ples blong lukluk. Naoia, i gat samwe long 3,800 man we oli laef long ples ya. Ol faswan man we oli kam stap long Ista Aelan oli ol man Polinesia. Ol man we oli  stap long ples ya tede, oli kamaot long olgeta ya, mo oli miks wetem ol man Yurop, ol man Jili, mo ol man blong narafala kantri. I gat plante handred turis blong Yurop mo Esia oli kam visitim aelan ya. Taswe bisnes blong turis i wan impoten haf blong ekonomi blong Ista Aelan.

Ol Faswan Sid Blong Kingdom

1982 Yearbook of Jehovah’s Witnesses i talem se: “Blong smol taem mifala i gat wan pablisa nomo i stap prij long Ista Aelan. Blong givhan long hem long saed blong spirit, wan sista we i misinari long branj ofis [blong Jili], i stap raetem leta long hem. Nating se pablisa ya i gobak finis long Jili, mifala i gat sam man long aelan ya we naoia oli mekem sabskripsen long Wajtaoa. Long Eprel 1980 wan man long aelan ya, we i intres long trutok, i ring i kam long mifala blong askem wetaem i stret blong mekem Memoriol. Mifala i sapraes tumas long samting ya. Biaen, long sem yia ya, wan brata mo waef blong hem we tufala i blong Valparaiso [long Jili], tufala i muf i go long aelan ya mo tufala i stap mekem Baebol stadi wetem ol man we oli intres long trutok. Faswan miting blong Memoriol long aelan ya, hemia long Eprel 1981, mo 13 man oli kam long miting ya. !Mifala i glad tumas we ‘gud nius’ i stap kasem ples ya we i longwe long ol narafala aelan!”

Biaen, long Jenuware 30, 1991, branj ofis i sanem tu spesel paenia, Dario Fernandez mo waef blong hem Winny, tufala i go long aelan ya. Brata Fernandez i tingtingbak i se: “Afta we mitufala i flae blong faef aoa, mitufala i kasem wan haf blong wol ya we i longwe tumas long ol narafala ples, mo mitufala i faenem wan kalja we ol man long wol oli no save plante samting long saed blong hem.” Kwiktaem nomo oli ogenaesem ol miting mo wok blong prij. Wan brata we i blong aelan ya mo wan sista wetem tufala pikinini blong hem, we trifala i kam long aelan ya i no longtaem, oli givhan long tufala paenia ya. Nating se oli kasem plante traem from famle blong olgeta, from ol man we oli strong long saed blong skul, mo from sam fasin blong laef we plante man Polinesia oli stap folem, Jeova i blesem traehad blong olgeta. Naoia, brata mo sista Fernandez, tufala i no moa mekem wok olsem spesel paenia, be tufala i stap yet long aelan ya, tufala i stap lukaot long pikinini boe blong tufala, we i bon long ples ya. Tede, i gat 32 man long aelan ya we oli glad blong talemaot Kingdom. Sam long olgeta oli ol manples blong Rapa Nui, mo tu, sam long olgeta oli muf i kam from we Ista Aelan i nidim moa man blong talemaot Kingdom.

Oli rerem Seket Asembli

From we Ista Aelan i longwe long ol bigfala kantri, kongregesen long ples ya i stap kasem ol video tep blong ol program blong spesel dei asembli, seket asembli, mo distrik asembli. Be long en blong yia 2000, Komiti blong Branj Ofis long Jili i stat tingbaot blong mekem faswan asembli long aelan ya. Biaen, oli tekem disisen blong mekem wan seket asembli long Novemba 2001. Oli singaot sam brata sista blong ol defren ples long Jili, blong kam joen long spesel asembli ya. From we ol plen oli no stap flae evri dei, oli mekem asembli ya long Sande mo Mande.

I gat 33 brata sista blong Jili we oli kasem invitesen blong kam long asembli ya. Olgeta ya oli glad blong kam long aelan ya mo joen long faswan seket asembli we oli mekem long farawe ples ya. Afta wan longfala trep long plen antap long Solwota blong Pasifik, oli harem gud tumas  from gudfala welkam we ol brata, we oli wet long epot, oli mekem long olgeta. Ol brata ya oli hangem ol naesfala nekles long olgeta, we oli wokem long ol flaoa, wan presen we oltaem oli stap givim long ol man we oli kam long aelan ya. Biaen oli tekem olgeta oli go long ples we bambae oli slip long hem. Afta we oli wokbaot smol blong lukluk ol naesfala ples, olgeta we oli gat haf long program blong asembli ya oli kam wanples long Haos Kingdom.

Wan Man i Talemaot Asembli Ya

Taem sam brata blong Jili oli tekem trak blong go long asembli ya, oli sapraes tumas blong harem pris blong aelan ya i tok long radio long saed blong visit blong olgeta. Hem i talem se i gat sam turis blong Saot Amerika we bambae oli kam visitim ol man long hom blong olgeta blong tokbaot en blong wol. Nating se hem i pulum ol man blong hem blong no lesin long olgeta, toktok blong hem i givhan, from we hem i talemaot se wan bigfala grup blong ol Witnes blong Jeova oli stap long aelan ya. Mo tu, from toktok blong hem, ol man blong aelan ya oli stap wet long visit blong ol Witnes. Long ol dei we oli kam biaen, ol brata blong Jili oli yusum kaen fasin blong serem gud nius wetem olgeta.

Asembli i Stat

Long Sande moning, ol brata blong aelan ya oli stap wet long doa blong Haos Kingdom blong mekem welkam long ol narafala brata sista we oli kam long faswan dei blong asembli. “!Iorana Koe! !Iorana Koe!” “!Welkam!” Sam long ol sista oli werem ol klos blong man Ista Aelan, mo oli werem flaoa long hea blong olgeta folem kastom blong ol man Polinesia.

Afta sam naesfala miusik, wan handred man oli joen long singsing ya se “Yumi Mas Stanap Strong.” !Hemia fastaem long aelan ya we plante man olsem oli joen long singsing ya! Taem jeaman blong program i mekem welkam long ol brata long prapa lanwis blong olgeta, Rapa Nui, wota i ron long ae blong olgeta. Long taem blong spel long medel dei, tri niufala Witnes i tekem baptaes long wota, blong soemaot se trifala i givim laef blong trifala i go long God. Taem program long faswan dei i finis, evriwan i harem se oli klosap moa long Jeova mo long olgeta brata sista.​—1 Pita 5:9.

Oli Prij Long Moning

From we fasin blong laef long aelan ya i defren, program long seken dei blong seket asembli i stat afta long kakae blong medel dei. Taswe, ol brata sista we oli kam long Jili, oli tekem janis long moning ya blong joen long wok blong prij. ?Wanem ol ekspiriens we oli kasem?

Wan olfala woman we i gat eit pikinini i talem se hem i no save storian wetem ol Witnes from we hem i Katolik. Afta we oli talem long hem se oli wantem tokbaot ol problem we olgeta man oli fesem, olsem fasin blong yusum drag mo ol trabol long famle, hem i glad blong lesin.

Wan narafala olfala woman, we i blong ples ya, i tok nogud long tu Witnes, wan man wetem waef blong hem. Hem i talem long tufala se i gud sipos tufala i go prij long ol man blong ol bigfala kantri, from we olgeta nao oli gat fasin blong mekem i nogud long ol man. Tufala Witnes ya i talem long hem se mesej blong ‘gud nius blong kingdom’ i mas go long olgeta man mo risen from wanem tufala i kam long aelan ya i blong joen long wan asembli we i save halpem ol man blong lavem God moa. (Matiu 24:​14, NW ) Tufala i askem long hem sipos hem i glad blong laef  longtaem long wan paradaes, lelebet olsem aelan ya, be i no gat sik mo ded long hem. Tufala i mekem hem i tingting long saed blong hamas yia we trifala volkeno i stap finis long aelan ya. Biaen woman ya i tingbaot se laef i sot tumas. Nao hem i askem se: “?From wanem laef blong yumi i sot nomo?” Hem i sapraes tumas taem hem i ridim toktok we i stap long Ol Sam 90:10.

Stret long taem ya, tufala Witnes i harem we ol man long haos narasaed oli stap singaot bigwan. Nating se tufala i no kasem save wanem we ol man ya oli stap talem, woman ya i talem se ol man ya oli stap tok nogud long tufala mo oli no wantem se ol Witnes oli kam long haos blong olgeta. Be, woman ya i wan nua, we i min se hem i fasbon dota long famle ya. From we papa blong hem i ded finis, hem nao i mas mekem disisen long saed blong wanem we i gud long famle. Ale, long fored blong famle blong hem, mo long prapa lanwis blong hem, hem i toktok long saed blong ol Witnes mo wetem kaen fasin hem i tekem ol buk we tufala i soem long hem. Long sem wik ya, taem hem i pasem ol Witnes long trak, hem i talem long brata blong hem blong stop. Nating se brata blong hem i no glad, woman ya i talem tata long ol Witnes mo hem i hop se bambae oli karem gudfala frut long wok blong prij blong olgeta.

Nating se sam man long aelan ya oli no wantem harem mesej we ol Witnes blong Jili oli stap talemaot, ol Witnes ya oli luksave se ol man Rapa Nui oli gat kaen fasin mo oli frengud. Bighaf blong olgeta oli glad blong lesin long mesej blong gud nius. Tru ya, long ol 20 Witnes we oli baptaes long aelan ya, 6 oli blong ples ya. Wan long olgeta i lanem trutok blong Baebol taem waef blong hem i mekem Baebol stadi. Hem i stap long wan rum klosap mo i lesin long stadi blong waef blong hem. Hem wetem waef blong hem, tufala i baptaes olsem ol Witnes, mo brata ya i mekem wok long kongregesen olsem man blong givhan.

Program Long Saed Blong Spirit i Gohed

Afta long medel dei, namba tu dei blong asembli i stat. Sam man we oli intres long trutok oli joen wetem ol 32 brata sista blong aelan ya mo ol 33 brata sista blong Jili. Klosap wan handred man oli lesin long program wetem pablik tok ya se “?Olsem Wanem Lav Mo Bilif i Save Winim Wol?” Yes, olgeta we oli stap long asembli ya oli luk strong pruf blong lav ya we i stap long medel blong ol man blong Jeova, nating se oli blong ol defren kalja.​—Jon 13:35.

Long asembli ya, seket elda mo distrik elda i mekem miting wetem ol paenia. Long miting ya, trifala fultaem paenia blong aelan ya i joen wetem  ol brata sista blong Jili we oli fultaem mo spesel paenia. Miting ya i leftemap tingting blong olgeta evriwan.

Long nekis dei, sam brata oli tekem ol brata sista blong Jili oli raon long aelan. Oli go luk ples ya we ol man bifo oli katem ol moai long ston, ol hol blong volkeno we bifo ol man oli mekem resis long hem, mo tu, naesfala sanbij blong Anakena we kala blong hem i olsem gol, hemia ples we ol faswan man Polinesia oli kamso long hem. *

Laswan janis blong joen wetem ol brata blong Ista Aelan hemia long Buk Stadi blong kongregesen. Afta long miting ya, ol brata sista blong Jili oli kasem bigfala sapraes, taem ol Witnes blong aelan ya oli mekem aelan kakae blong olgeta. Oli werem ol klos blong aelan ya, mo oli mekem sam kastom danis. Ol brata sista blong Jili, tugeta wetem ol brata sista blong Rapa Nui, oli sua se ol traehad blong olgeta blong rerem asembli ya i karem gudfala frut.

Ol brata sista blong Jili we oli kam long asembli ya oli kam gud fren wetem ol brata sista blong Ista Aelan. Wik ya we oli spenem tugeta i gud tumas. Oli sore blong lego olgeta. Neva bambae oli save fogetem ol niufala fren blong olgeta mo ol gudfala toktok we i leftemap tingting blong olgeta evriwan. Long epot, ol brata oli hangem ol nekles long ol brata blong Jili, we olgeta nomo oli wokem long ol sel blong solwota.

Taem ol brata blong Jili oli aot, oli mekem promes se: “!Iorana! Iau he hoki mai e Rapa Nui ee,” we i min se: “!Tata! Bambae mi kam luk yu bakegen, Rapa Nui.” !Yes, oli wantem tumas blong luk bakegen ol niufala fren mo famle long saed blong spirit, mo kambak bakegen long aelan ya we i rili defren, we i longwe long ol narafala aelan, we i fulap long ol samting blong sapraes mo we ol man blong hem oli frengud!

[Ol Futnot]

[Bokis blong pija long pej 24]

Wok Blong Prij Long Ista Aelan

Klosap tu yia bifo long asembli ya, wan seket elda mo waef blong hem, tufala i visitim aelan ya mo tufala i harem gud long plante gudfala ekspiriens. Eksampol, tufala i sapraes taem sista we i tekem tufala i go long ples blong slip, i talem long tufala se 16 yia bifo, tufala nao i mekem Baebol stadi wetem hem long saot Jili, taem hem i yangfala yet. Biaen, sid ya we tufala i planem i karem frut long Rapa Nui.

Mo tu, wan fani samting i hapen long tufala. Bos blong wan stoa blong ol turis i tekem Baebol ya New World Translation of the Holy Scriptures mo wan buk we nem blong hem Save Blong Lidim Yu Long Laef We i No Save Finis. Tufala buk ya ol Witnes blong Jeova oli wokem. Taem tufala i kam luk hem bakegen, hem i talem long tufala se hem i no save ridim Baebol ya. !Tufala i bin givim Baebol long hem long lanwis Franis, i no long lanwis Spen! Kwiktaem nomo tufala i givim wan narafala Baebol long hem, nao ol Witnes blong ples ya oli halpem hem wetem Baebol ya long prapa lanwis blong hem, blong luksave se i no hadwok tumas blong kasem save long Baebol.

[Map blong pija long pej 22]

(Lukluk niuspepa)

ISTA AELAN

JILI

[Tok blong pija long pej 23]

Tu long olgeta ya we oli tekem baptaes long seket asembli

[Tok blong pija long pej 25]

Saed blong volkeno we nem blong hem Rano Raraku; smol pija: Wan frut we i gru long bus blong aelan ya, nem blong hem gwayaba