Wan Kwestin

Afta we Bigfala Wota i draonem evri samting, Noa i letem wan sotleg i goaot long sip, mo sotleg ya i kambak wetem “wan lif blong tri ya olif.” ?Hem i faenem lif ya wea?

Baebol i talem se “wota ya i stap kam fulap moa long graon, . . . gogo wota ya i kavremap olgeta hil ya we i hae we i hae.” (Jenesis 7:​18, 19) Taem bigfala wota ya i stat godaon bakegen, Noa i letem wan sotleg i goaot long sip ya wan taem long wan wik, gogo tri wik i pas. Long namba tu taem, sotleg ya i kambak wetem “wan lif blong tri ya olif long maot blong hem, nao Noa i save se wota ya klosap i finis.”​—Jenesis 8:​8-11.

I tru, tede, yumi no save talem stret se evri haf blong wol ya oli stap aninit long wota blong hamas taem, from we Bigfala Wota ya i jenisim saes blong plante samting long graon ya, olsem ol hil mo ol flat ples. Be nating se i olsem, i klia se wota ya i kavremap gud fulap ples taswe sam tri oli ded. Be i luk olsem se sam tri oli laef, mekem se oli naf blong gru bakegen afta we wota i stat godaon.

Long saed blong tri ya olif, diksonari ya The New Bible Dictionary i talem se: “Sipos oli katem [oliftri] i godaon, ol niufala branj i save kamaot long ol rus blong hem, mekem se i gat plante niufala stamba oli gru. Ol olif tri we klosap oli ded olgeta tu oli karem ol niufala stamba olsemia.” Mo long buk ya The New Schaff-​Herzog Encyclopedia of Religious Knowledge i talem se i olsem we “ol tri ya olif oli no save ded samtaem.” I no gat wan man long wol tede we i save talem stret se wanem tempraja mo hamas sol i stap long wota ya we i bin kavremap wol. Taswe yumi no save sua gud olsem wanem bigfala wota ya i gat paoa long ol tri ya olif mo ol narafala gras.

Mo tu, ol tri ya olif, oli no save gru long ol ples we i hae, olsem antap long ol hil we i kolkol. Plante taem, oli no save gru long ol ples we oli hae bitim 1,000 mita, from we tempraja i mas stap antap long 10 digri selsius. Buk ya The Flood Reconsidered, i talem se: “Taswe taem Noa i luk lif ya blong tri ya olif hem i save se ol ples we i gat vali long hem i no moa gat wota.” Taem Noa i letem sotleg ya i goaot bakegen, wan wik biaen, be sotleg ya i no moa kambak bakegen, samting ya i soemaot se i gat plante ples finis blong sotleg ya i spel gud long hem.​—Jenesis 8:12.