?Bilif i Save Hilim Sik?

TAEM yumi sik, yumi lukaot rod blong haremgud mo kam gud bakegen. Tru ya, plante taem Baebol i tokbaot we Jisas Kraes i mekem plante sik man oli kam gud bakegen nomata wanem kaen sik we oli gat. ?Olsem wanem Jisas i hilim ol sikman ya? Baebol i talem se ‘paoa ya blong God’ nomo i mekem ol man ya oli kamgud bakegen. (Luk 9:​42, 43; Ol Wok 19:​11, 12) Yes, tabu spirit we i kamaot long God i mekem we wanwan man ya i kamgud bakegen, i no bilif blong olgeta nomo. (Ol Wok 28:​7-9) Taswe Jisas i no nidim we wan man i talemaot fastaem long hem se hem i gat bilif bifo we hem i kam gud.

Maet yu yu askem se: ‘?Jisas i mekem ol merikel ya bifo nomo, no bambae hem i mekem samting ya bakegen long fiuja? ?I gat hop i stap blong ol man we oli safa from ol sik we i stap spolem bodi?’

Baebol i talem se long niufala wol blong God we stret fasin nomo bambae i stap long hem, God bambae i yusum paoa ya blong hem bakegen blong mekem ol merikel ya we Jisas i bin mekem taem hem i stap long wol ya. Ol Witnes blong Jeova long ples blong yu bambae oli glad blong soem long yu long Baebol, wetaem mo olsem wanem God bambae i finisim olkaen sik, mo ded tu​—i no gat wan man we i naf blong mekem samting ya, nating sipos hem i talem se hem i gat paoa blong hilim man. Tru ya, God ‘bambae hem i finisim ded blong olwe.’​—Aesea 25:8.