Ol Man Blong God Oli Olsem Ol Tri—?Wanem Mining Blong Samting Ya?

MAN blong raetem Ol Sam i tokbaot ol man we oli laekem ol loa blong Baebol mo we oli mekem ol loa ya oli wok long laef blong olgeta, hem i se: “Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” (Ol Sam 1:​1-3) ?From wanem i stret blong talem se ol man blong God oli olsem ol tri?

Ol tri oli save laef longtaem. Eksampol, long ol ples klosap long Mediterenian Si, i gat sam olif tri we ol man oli talem se, oli stap laef wan no tu taosen yia finis. Mo tu, ol tri ya baobab long Sentrol Afrika oli save stap laef longtaem, mo plante man oli talem se wan paentri we oli kolem bristlecone, long Kalifonia, i gat 4,600 yia finis. I impoten tumas blong gat ol bigbigfala tri long bus. Ol bigbigfala tri oli save givim sed long ol smosmol tri, mo ol lif blong olgeta we oli folfoldaon, oli olsem kakae blong mekem graon i kam gud moa.

Klosap oltaem, yumi save faenem se ol bigbigfala tri oli gru wanples long bus, olsem nao wanwan tri i sapotem narawan. From we ol rus blong olgeta oli fas tugeta aninit long graon, ol tri ya oli save stanap strong moa agensem bigfala win, i bitim wan tri we i stanap hem wan long open ples. Mo tu, ol bigfala rus oli save karem plante wota mo gudgudfala samting we i stap long graon. Samtaem, ol rus blong wan tri oli longfala moa i godaon long graon i bitim hae blong tri, no samtaem ol rus ya oli save gokros mo kavremap wan bigfala ples i bitim longfala blong han blong tri ya.

Aposol Pol i bin tokbaot wan tri, taem hem i talem long ol Kristin se “laef blong yufala i mas joen long laef blong [Jisas Kraes]. Yufala i mas holem hem strong, olsem we rus blong tri i holem graon. Laef blong yufala i mas stanap long hem, olsem we haos i stanap strong long graon. Mo bilif blong yufala long hem i mas kam strong moa oltaem, olsem we oli tijim yufala long hem finis.” (Kolosi 2:​6, 7) Yes, ol Kristin oli save stanap strong nomo sipos oli holem strong long Kraes olsem we rus blong tri i holem graon.​—1 Pita 2:21.

?Ol man blong God oli olsem ol tri long wanem rod bakegen? Ol tri we oli gru we wan i klosap long narawan, oli save gru gud from we wanwan long ol tri ya i stap sapotem narawan. Long sem fasin, olgeta we oli stap klosap long Kristin kongregesen oli kasem sapot long ol brata sista long kongregesen. (Galesia 6:2) Ol Kristin we oli bigman long saed blong spirit oli gat ol longfala rus long saed blong spirit we oli godaon dip. Taswe, oli save halpem ol niuwan blong stanap strong long bilif, nating se ol niuwan ya oli fesem fasin agens we i olsem strongfala win. (Rom 1:​11, 12) Ol niufala Kristin oli save gohed gud from we ol brata we oli mekem wok blong God longtaem finis oli lukaot gud long olgeta, i olsem we oli givim “sed” long olgeta. (Rom 15:1) Mo olgeta memba blong ol Kristin kongregesen long olgeta ples blong wol oli haremgud from ol gudfala kakae long saed blong spirit we oli kasem long ‘ol bigbigfala tri ya blong stret fasin,’ hemia ol tabu Kristin we oli stap yet long wol.​—Aesea 61:​3, NW.

Mo yumi glad tumas we olgeta man blong God oli gat hop blong luk promes blong Aesea 65:22 i kamtru, we i talem se: ‘Ol man blong mi bambae oli save stap longtaem, olsem tri we i save stap longtaem.’

[Foto Credit Line blong pija long pej 28]

Godo-Foto