Plante Moa Man i Joenem Trufala Kristin Skul

WOK blong prij blong Jisas i gat bigfala paoa long ol man long faswan handred yia. Mesej blong hem i givim paoa, i givim laet, mo i pulum ol man blong mekem i gud long wan wei we oli no tingbaot. Plante man we oli lesin long ol tok blong Jisas oli harem gud tumas from ol tijing blong hem.​—Matiu 7:​28, 29.

Jisas i no fraet long ol man, hem i no wantem nating blong joen wetem ol lida blong jos no politik we oli stap mekem i strong tumas long ol man, mo hem i mekem se ol man oli no fraet blong kam klosap long hem. (Matiu 11:​25-30) Hem i talem stret we ol rabis spirit oli gat paoa long wol ya, mo hem i soemaot paoa we God i givim long hem, blong hem i bos antap long ol rabis spirit ya. (Matiu 4:​2-11, 24; Jon 14:30) Jisas i soemaot olsem wanem fasin blong safa i kamaot from sin, mo wetem lav, hem i soem we Kingdom blong God nomo i save mekem ol man oli haremgud. (Mak 2:​1-12; Luk 11:​2, 17-23) Blong olwe, Jisas i sakemaot ol giaman tok we oli bin haedem ol trufala fasin blong Papa blong hem, mo hem i talemaot nem blong God long ol man we oli wantem frengud wetem Hem.​—Jon 17:​6, 26.

Taswe yumi no sapraes we ol disaepol blong Jisas oli kwik blong talemaot tok blong hem long evri ples, nomata se ol lida blong jos mo politik oli agensem olgeta. Long samwe 30 yia, oli setemap ol Kristin kongregesen we oli wok strong long Afrika, long Esia, mo long Yurop. (Kolosi 1:23) Ol tijing blong Jisas oli givim save long ol man we oli gat tingting daon mo oli laekem stret fasin, we oli laef long ol ples we Rom i rul long olgeta.​—Efesas 1:​17, 18.

Nating se i olsem, ol niufala disaepol ya oli defdefren: sam blong olgeta oli rij mo sam oli pua, oli gat ol defdefren kalja, lanwis, mo oli kamaot long ol defdefren skul tu. ?Taswe olsem wanem oli save joengud long ‘wan bilif,’ olsem aposol Pol i talem? (Efesas 4:5) ?Wanem bambae i mekem ‘tingting blong olgeta i stap wan nomo’ blong oli no seraot? (1 Korin 1:10) Ol man we oli talem se oli Kristin tede oli stap seraot, taswe i gud yumi lukluk naoia long ol tijing blong Jisas.

Stamba Blong Kristin Fasin Joengud

Taem Jisas i pas long kot long fored blong Ponjes Paelat, hem i eksplenem wanem i stamba blong Kristin fasin joengud. Hem i talem se: “Mi mi bon, mi kam long wol ya blong wan samting nomo, blong mi talemaot ol tok we i tru. Mo man we i glad blong folem ol tok we i tru, hem i save harem ol tok blong mi.” (Jon 18:37) Taswe, taem ol trufala disaepol blong Kraes oli akseptem ol tijing blong Jisas mo oli akseptem Baebol, samting ya i gat bigfala paoa blong mekem olgeta oli joengud.​—1 Korin 4:6; 2 Timoti 3:​16, 17.

 I tru, ol disaepol blong Jisas oli gat ol defdefren tingting long saed blong sam kwestin. ?Wanem samting bambae i halpem olgeta blong joengud long taem olsem? Jisas i eksplenem se: “Taem Spirit ya we i Stamba blong Trutok i kam, hem bambae i save tijim yufala long olgeta tok we i tru. Bambae hem i no save talem ol tok we i kamaot long hem nomo, hem i save talemaot ol samting nomo we hem i harem long mi. Mo hem i save talemaot ol samting long yufala we bambae oli save kamtru biaen.” (Jon 16:​12, 13) Taswe, tabu spirit blong God bambae i halpem ol trufala disaepol blong Jisas blong kasem save ol trutok ya we sloslo God i talemaot long olgeta. Mo tu, tabu spirit ya bambae i givim frut, olsem lav, glad, mo pis, we bambae i mas mekem ol trufala Kristin oli joengud. ​—Ol Wok 15:28; Galesia 5:​22, 23.

Jisas i no wantem we ol disaepol blong hem oli raorao mo seraot. Mo hem i no wantem se ol disaepol oli twistim ol trutok blong God blong mekem oli laenap wetem kalja no kastom blong skul blong ol man. Defren olgeta, long laswan naet we Jisas i stap wetem ol disaepol blong hem, hem i prea se: “Mi mi no prea from olgeta ya nomo, mi prea tu from ol man ya we bambae oli save bilif long mi from tok blong olgeta. Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo, nao ol man blong wol ya oli save bilif we yu yu sanem mi mi kam.” (Jon 17:​20, 21) Taswe, trufala fasin joengud, long spirit mo long trutok, hemia nao samting we i mas makem ol disaepol blong Kraes, i stat long taem bifo kam kasem tede. (Jon 4:​23, 24) Be ol jos tede oli no joengud, oli seraot. ?From wanem i olsem?

?From Wanem Ol Jos Oli Seraot?

Trufala risen from wanem ol man we oli talem se oli Kristin oli gat plante defren bilif mo fasin blong wosip, hemia se oli no folem ol tijing blong Jisas. Wan man blong raetem niuspepa i talem se: “Sem mak olsem bifo, ol Kristin blong tede oli akseptem nomo ol tijing blong Baebol we oli harem se oli nidim​—mo oli sakemaot ol tijing we oli no fit wetem ol kastom blong skul blong olgeta.” Hemia i laenap stret wetem ol profet tok blong Jisas mo ol aposol blong hem.

Eksampol, tabu spirit i pusum aposol Pol blong raetem ol tok ya i go long wan narafala elda, hemia Timoti, i se: “I gat taem i stap kam, we ol man bambae oli no moa wantem harem ol trutok. Bambae oli save mekemhed, blong go lukaot plante narafala tija olbaot, we oli save talem wanem tok we olgeta oli wantem harem. Bambae oli no save lesin long ol trutok, be bambae oli gowe long hem blong go lesin long ol kastom stori ya we oli no tru.” ?I min se olgeta Kristin bambae oli gorong? Nogat. Pol i gohed i se: “Oltaem, nomata wanem samting i kamtru long laef blong yu, be tingting blong yu i mas klia gud. Sipos yu stap harem nogud, be yu mas mekem tingting blong yu i strong. Yu mas mekem wok ya blong talemaot gud nius blong Kraes, mo yu mas finisim olgeta wok ya we God i givim long yu blong mekem.” (2 Timoti 4:​3-5; Luk 21:8; Ol Wok 20:​29, 30; 2 Pita 2:​1-3) Timoti mo ol narafala Kristin we oli stap tru long God oli folem advaes ya we i kamaot long God long laef blong olgeta.

Ol Trufala Kristin Oli Stap Joengud Yet

Olsem Timoti, ol trufala Kristin tede oli holem tingting blong olgeta i stap klia gud, taem oli sakemaot ol tijing blong man mo oli akseptem nomo ol tijing we oli stanap long Baebol. (Kolosi 2:8; 1 Jon 4:1) Folem eksampol blong ol Kristin blong faswan handred yia, ol Witnes blong Jeova oli mekem wok blong prij long bitim 230 kantri. Olsem Jisas i bin mekem fastaem, oli karem gud nius blong Kingdom i go long olgeta man long fulwol. Tingbaot fo impoten samting we ol Witnes oli mekem blong folem eksampol blong Jisas mo wokem trufala Kristin fasin long laef blong olgeta, nomata weples oli stap long hem.

Ol bilif blong olgeta oli stanap long Tok blong God. (Jon 17:17) Wan pris long Beljiom i tokbaot olgeta, i talem se: “Wan Samting we yumi save lanem long saed blong olgeta ya [ol Witnes blong Jeova] se oli glad tumas blong lesin long Tok blong God mo oli no fraet blong tokbaot ol samting ya.”

Oli putum hop blong olgeta i stap long Kingdom blong God blong stretem ol problem. (Luk  8:1) Long Baranquilla, Kolombia, wan Witnes i toktok wetem Antonio, wan strong sapota blong wan pati blong politik. Witnes ya i no sapotem grup blong Antonio, mo hem i no leftemap wan narafala tingting blong politik tu. Defren olgeta, hem i askem long Antonio mo long ol sista blong hem sipos oli wantem stadi long Baebol, we hem i no askem mane from. I no longtaem, Antonio i luksave we Kingdom blong God hem i beswan hop blong stretem ol problem blong ol puaman long Kolombia mo long fulwol tu.

Oli ona long nem blong God. (Matiu 6:9) Maria i wan Katolik we i laef long Ostrelia. Fastaem we ol Witnes blong Jeova oli mitim hem, hem i letem olgeta oli soem nem blong God long hem long Baebol. ?Afta, Maria i mekem wanem? “Fastaem mi luk nem blong God long Baebol, mi krae. Taem mi luk we mi gat janis blong save mo blong yusum prapa nem blong God, samting ya i rili tajem hat blong mi.” Maria i gohed blong stadi long Baebol, mo, hemia fastaem long laef blong hem we hem i luk Jeova olsem wan trufala man mo hem i stat blong frengud wetem hem.

Lav i joenemgud olgeta. (Jon 13:​34, 35) Wan atikol blong niuspepa ya Ladysmith-Chemainus Chronicle, long Kanada, i talem se: “Nating se yu folem wan skul no nogat, be yu mas presem ol 4,500 Witnes blong Jeova we oli bin wokhad long dei mo long naet long ol ten dei we i jes pas, taem oli bildim wan Haos Asembli we i bigwan olsem 2,300 skwea meta, long Cassidy . . . Oli no agiu, oli no seraot mo oli no leftemap olgeta wanwan taem oli mekem wok ya, mo samting ya i wan mak blong trufala Kristin Skul.”

Tingbaot samting ya. Ol man blong stadi long tijing blong ol jos, ol misinari blong ol jos ya, mo ol man we oli go long ol jos ya, oli stap agiu from ol tijing insaed long prapa skul blong olgeta. Be long sem taem, plante moa man i stap joenem trufala Kristin skul long fulwol. Yes, ol trufala Kristin oli mekem wok blong olgeta blong prij mo blong tijim ol man long saed blong Baebol. (Matiu 24:14; 28:​19, 20) Sipos yu yu wan long ol man we “oli trabol, oli stap harem nogud” from ol rabis samting we oli hapen, mo sipos tingting blong yu i fasfas lelebet from we ol man oli seraot insaed long ol skul blong Krisendom, mifala i singaot yu blong kam joen wetem ol Witnes blong Jeova we oli joengud tugeta long Kristin wosip blong trufala God ya, Jeova.​—Esikel 9:4; Aesea 2:​2-4.