Wan Kwestin

Ol Livaet oli no holem wan pis graon olsem ol narafala laen blong Isrel. ?Taswe, from wanem Jeremaea 32:7 i talem se wan man Livaet we nem blong hem Hanamel i salem wan pis graon i go long kasin brata blong hem Jeremaea?

Long saed blong ol man Livaet, Jeova i talem long Eron se: “Bambae yufala i no save holem wan pis graon se i blong yufala, mo graon ya we bambae yufala i stap long hem, bambae yufala i no save givim long ol pikinini blong yufala se i blong olgeta.” (Namba 18:20) Nating se i olsem, Jeova i givim 48 taon long ol Livaet wetem ol graon blong oli putum anamol long hem, raonabaot long Promes Lan. Taon we hem i hom blong Jeremaea hemia Anatot, wan long ol taon we Jeova i givim long ‘ol pikinini blong pris ya Eron.’​—Josua 21:​13-19; Namba 35:​1-8; 1 Kronikel 6:​54, 60.

Long Levitikas 25:​32-34, Jeova i givim loa long ol Livaet long saed blong ‘raet blong pemaot bakegen’ ol haos blong olgeta. I klia se, ol wanwan famle blong ol Livaet oli gat raet blong holem mo yusum wan graon mo oli gat raet tu blong salem haf we oli jusum. Samting ya i minim se oli save salem mo karembak ol graon blong olgeta. * Olsem ol man Isrel blong ol narafala laen, ol Livaet tu oli gat graon mo oli yusum ol graon ya long sem rod olsem ol narafala.

I luk olsem se, ol Livaet ya oli kasem ol haos no graon ya long ol olfala blong olgeta. Mo long saed blong ‘raet blong pemaot bakegen’ ol haos blong olgeta, oli save mekem olsemia nomo wetem narafala Livaet. Mo tu, oli save salem mo pemaot bakegen ol graon ya nomo we i stap insaed long ol taon we oli makem se i blong olgeta, from we “ol graon raon long ol taon ya we ol anamol blong olgeta oli stap kakae long hem, oli no gat raet blong salem. Graon ya bambae i blong olgeta gogo i no save finis.”​—Levitikas 25:​32, 34.

Taswe i klia se, graon ya we Jeremaea i pemaot bakegen long Hanamel i folem rul ya blong pemaot bakegen graon long wan man Livaet nomo. Maet graon ya i stap insaed long taon ya. Jeova hem wan i talemaot stret se, “graon” ya i blong Hanamel, mo Jeremaea i “gat raet blong pemaot graon ya.” (Jeremaea 32:​6, 7) Jeova i yusum bisnes ya bitwin Hanamel mo Jeremaea olsem wan pija blong soemaot se hem i holem strong long promes blong hem se ol man Isrel bambae oli karem bakegen graon blong olgeta afta we oli stap kalabus long Babilon.​—Jeremaea 32:​13-15.

I no gat wan samting we i pruvum se Hanamel i no gat raet long graon ya long Anatot. Mo i nogat wan samting i soem se hem i brekem loa blong Jeova taem hem i askem Jeremaea blong pem pis graon ya long Anatot, mo i no gat samting tu we i soemaot se Jeremaea i no mekem i stret taem hem i yusum raet we hem i gat blong pemaot bakegen pis graon ya.​—Jeremaea 38:​8-15.

[Futnot]