Wan “Slef” We i Stret Mo Waes

“?Hu ya i rili slef ya we i stret mo waes, we masta blong hem i putumap hem blong lukaot long ol man blong hem?”​—MATIU 24:​45, NW.

1, 2. ?From wanem yumi nidim kakae long saed blong spirit evri dei?

 LONG Tusde aftenun, we hem i namba 11 blong manis Naesan long yia 33 K.T., * ol disaepol blong Jisas oli askem wan kwestin we i afektem laef blong yumi. Oli askem long Jisas se: “?Wanem saen we bambae i soemaot we yu bambae yu kambak bakegen [“we yu yu kam finis,” NW ], mo wol ya i finis?” Blong ansa long kwestin ya, Jisas i talemaot wan profet tok. Hem i tokbaot wan taem we wol ya bambae i fulap long ol faet, kakae i sot, graon i seksek, mo sik. Be hemia stat nomo blong ol trabol, “olsem we woman i stat harem we bak blong hem i soa blong i bonem pikinini.” Laef long wol ya bambae i kam moa nogud yet. !Tru, ol tok ya oli save mekem man i fraet tumas!​—Matiu 24:​3, 7, 8, 15-22; Luk 21:​10, 11.

² Stat long 1914 kasem naoia, bighaf blong profet tok ya blong Jisas i kamtru finis. Naoia wol i stap stret long taem ya we i olsem ‘woman i harem bak blong hem i soa blong i bonem pikinini.’ Nating se i olsem, ol Kristin oli no mas fraet. Jisas i promes se bambae hem i givim kakae long saed blong spirit blong givhan long olgeta blong stanap strong. ?Be, from we Jisas i stap naoia long heven, hem i mekem olsem wanem blong givim kakae long saed blong spirit long yumi ya we yumi stap long wol?

3. ?Wanem rod we Jisas i stanemap blong yumi kasem ‘kakae long stret taem blong hem’?

³ Jisas hem wan i givim ansa long kwestin ya. Taem hem i stap talemaot ol profet tok ya, hem i askem se: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem?” Ale hem i talem se: “Sipos masta blong hem i kamtru, nao i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.” (Matiu 24:​45-47, NW ) Yes, bambae i gat wan “slef” we i kasem wok ya blong givimaot kakae long saed blong spirit. “Slef” ya bambae i wok stret long wok we hem i kasem mo hem i waes. ?Olsem wanem? ?Slef ya hem i wan man nomo, hem i plante man we oli folfolem olgeta, we wan i karemaot wok long han blong narawan taem narawan ya i ded, no hem i wanem? I gud yumi faenemaot ansa long kwestin ya from we slef ya i stap givimaot kakae ya long saed blong spirit we yumi nidim tumas.

?Hem i Wan Man No Wan Grup Blong Man?

4. ?Olsem wanem yumi save se “slef ya we i stret mo waes” i no wan man nomo?

⁴ “Slef ya we i stret mo waes” hem i no minim wan man nomo. ?From wanem? From we slef ya i stat givimaot kakae long saed blong spirit long faswan  handred yia, mo folem toktok blong Jisas, slef ya i stap gohed yet blong mekem wok ya taem Masta i kamtru long 1914 K.T. Hemia i min se slef ya i mekem wok ya long samwe 1,900 yia, be i no gat man i save laef longtaem olsem. !Metusela tu, blong bifo, hem i no laef longtaem olsem!​—Jenesis 5:27.

5. Eksplenem from wanem “slef ya we i stret mo waes” i no save minim olgeta Kristin wanwan.

⁵ ?Ale, maet tok ya “slef ya we i stret mo waes” i minim nomo olgeta Kristin wanwan? I tru se olgeta Kristin oli mas man we oli stret long wok mo oli mas yusum waes fasin. Be, Jisas i stap tingbaot wan narafala samting taem hem i tokbaot “slef ya we i stret mo waes.” ?Olsem wanem yumi save samting ya? Yumi save samting ya from we hem i talem se taem ‘masta i kamtru’ bambae hem i putumap slef ya “blong lukaot long olgeta samting blong hem.” !Slef ya i no save minim olgeta Kristin wanwan, from we wan Kristin nomo i no save lukaot long “olgeta” samting blong Masta!

6. ?Olsem wanem nesen blong Isrel i stap olsem “man blong wok” no “slef” blong God?

⁶ Taswe, i gat wan mining nomo we i stret, hemia se Jisas i stap tokbaot wan grup blong ol Kristin we oli olsem “slef ya we i stret mo waes.” ?I stret blong talem se wan grup blong man i save wok olsem slef ya? Yes i stret. Seven handred yia bifo we Kraes i kam long wol, Jeova i tokbaot nesen blong Isrel se “mi jusumaot yufala blong yufala i man blong wok blong mi.” (Aesea 43:10) Stat long yia 1513 B.K.T., * taem God i givim Loa long Moses, go kasem Pentekos 33 K.T., olgeta man long nesen blong Isrel oli pat blong grup ya we i olsem man blong wok blong God. I no olgeta man Isrel evriwan we oli lidim nesen ya no we oli givim kakae long saed blong spirit. Be Jeova i yusum ol king, ol jaj, ol profet, ol pris, mo ol Livaet blong mekem wok ya. Nating se i olsem, ful nesen blong Isrel i wok long nem blong Jeova blong leftemap rul blong hem mo blong talemaot ol gudgudfala wok blong hem long fes blong ol narafala nesen. Olgeta man Isrel wanwan oli witnes blong Jeova.​—Dutronome 26:19; Aesea 43:21; Malakae 2:7; Rom 3:​1, 2.

Oli Sakemaot Wan “Man Blong Wok”

7. ?From wanem nesen blong Isrel i no moa save stap olsem “man blong wok” blong God?

⁷ Isrel i stap olsem “man blong wok” blong God blong plante handred yia. ?Olsem wanem? ?Isrel hem i slef ya we Jisas i tokbaot? Nogat, from we nesen ya blong Isrel i no stret mo i no waes. Pol i tokbaot samting ya taem hem i talemaot ol tok ya we Jeova i talem long nesen ya i se: “!Ol hiten man oli stap tok nogud long nem blong God, be i fol blong yufala nomo!” (Rom 2:24) Yes, fasin stronghed blong ol man Isrel i kasem fulmak blong hem taem oli sakemaot Jisas, nao long taem ya Jeova i sakemaot olgeta tu.​—Matiu 21:​42, 43.

8. ?Wetaem nao God i putumap wan “man blong wok” long ples blong Isrel, mo wanem i hapen long taem ya?

⁸ Be nating sipos “man blong wok” ya, Isrel, i no stret long wok blong hem, hemia i no min se ol gudfala man we oli wantem wosipim God bambae oli no moa save kasem kakae long saed blong spirit. Fifti dei afta we Jisas i ded, hemia long Pentekos 33 K.T., hem i kafsaedem tabu spirit long raonabaot 120 disaepol blong hem we oli hivap wanples long wan rum long Jerusalem. Long taem ya, wan niufala nesen i bon. Ol man oli stat save long samting ya taem ol memba blong niufala nesen ya oli go olbaot long Jerusalem blong talemaot “bigbigfala wok ya we God i mekem.” (Ol Wok 2:11) Taswe, niufala nesen ya, wan nesen long saed blong spirit, i kam “man blong wok” ya we bambae i talemaot Jeova long olgeta ples blong wol, mo bambae i  givim kakae long stret taem blong hem. (1 Pita 2:9) I stret nomo we biaen oli singaot nesen ya se “Isrel blong God.”​—Galesia 6:​16, NW.

9. (a) ?Hu olgeta we oli mekemap grup ya blong ‘slef we i stret mo waes’? (b) ?Hu ya ol “man” we oli stap kasem kakae?

⁹ Olgeta memba blong “Isrel blong God” oli ol Kristin man we oli givim laef i go long God, oli baptaes, mo tabu spirit i makemaot olgeta. Olgeta ya oli gat hop blong go laef long heven. Taswe, tok ya ‘slef we i stret mo waes’ i minim grup blong olgeta tabu man we oli memba blong nesen ya blong Isrel long saed blong spirit stat long 33 K.T. kam kasem naoia. Hemia i sem mak long nesen blong Isrel we i bin stap olsem man blong wok blong Jeova stat long 1513 B.K.T. kasem Pentekos 33 K.T. ?Ale hu olgeta narafala “man” ya blong masta we slef ya i stap givim kakae long saed blong spirit long olgeta? Olgeta Kristin evriwan, we oli laef long faswan handred yia K.T. oli gat hop blong go laef long heven. Taswe, ol narafala man ya we oli stap kasem kakae oli ol tabu man ya wanwan, i no minim olgeta evriwan olsem wan grup. Olgeta evriwan, wetem sam long olgeta tu we oli holem wok insaed long kongregesen oli nidim kakae ya long saed blong spirit we slef i givim.​—1 Korin 12:​12, 19-27; Hibrus 5:​11-13; 2 Pita 3:​15, 16.

“Evriwan Oli Gat Wok Blong Olgeta”

10, 11. ?Olsem wanem yumi save se ol memba blong grup ya blong slef oli no holem semfala wok?

¹⁰ “Isrel blong God” hem i minim fulwan grup ya blong slef we i stret mo waes, mo grup ya i gat wan wok blong mekem, be wanwan memba blong grup ya tu i gat wok blong hem. Ol tok blong Jisas long Mak 13:34 oli soemaot gud samting ya. Hem i se: “I olsem we wan man i go wokbaot long narafala ples. Taem hem i aot long ples blong hem, hem i putum olgeta samting blong hem long han blong ol man blong hem, nao evriwan oli gat wok blong olgeta. Mo hem i talem long man we i stap lukaot long get se, ‘Yu yu mas lukaot gud long olting blong mi.’ ” Taswe olgeta memba blong grup ya blong slef i kasem wan wok, hemia blong mekem ol samting blong Kraes long wol ya oli gru moa. Wanwan long olgeta ya oli yusum save we oli gat mo janis we oli kasem blong mekem wok ya.​—Matiu 25:​14, 15.

¹¹ Aposol Pita i talem long ol tabu Kristin long taem blong hem i se: “Long gladhat blong God, hem i givim ol defdefren kaen paoa long yufala blong mekem ol wok blong hem. Yufala i mas yusum ol paoa ya blong hem blong givgivhan long yufala.” (1 Pita 4:10) Taswe, ol tabu brata ya oli mas wok blong yusum ol paoa ya we God i givim long gladhat blong hem, blong givgivhan long olgeta. Ol tok blong Pita oli soemaot se i no olgeta Kristin evriwan we oli gat gudhan blong mekem semfala wok, mo i no olgeta evriwan we bambae oli kasem semfala wok. Be, evri memba blong grup ya blong slef i stap givhan blong mekem se nesen ya long saed blong spirit i gru. ?Oli mekem samting ya olsem wanem?

12. ?Olsem wanem olgeta memba blong grup ya blong slef, nating se oli man no woman, oli givhan blong mekem se grup blong olgeta i gru?

¹² Faswan samting, wanwan long olgeta oli mas  stap olsem wan witnes blong Jeova, oli mas talemaot gud nius blong Kingdom. (Aesea 43:​10-12; Matiu 24:14) Jes bifo we Jisas i go long heven, hem i givim oda ya long ol disaepol blong hem, ol man wetem ol woman tu, se oli mas mekem wok blong tij. Hem i se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.”​—Matiu 28:​19, 20.

13. ?Wanem blesing we olgeta tabu Kristin oli kasem?

¹³ Taem oli faenem sam niufala disaepol, oli mas tijimgud olgeta ya blong oli folem olgeta tok we Kraes i bin talem finis long ol disaepol blong hem. Ale long rod ya, ol niuwan ya oli kam naf blong olgeta tu oli save tijim narafala. I gat plante gudfala kakae long saed blong spirit blong givim long olgeta we bambae oli kam memba blong slef ya long plante nesen. Olgeta tabu Kristin, ol man mo woman tu, oli stret taem oli joen long wok ya blong mekem disaepol. (Ol Wok 2:​17, 18) Wok ya i stat taem slef ya i jes stanap mo bambae i gohed gogo kasem taem we rabis wol ya i lus.

14. ?Hu nomo i gat raet blong tijim kongregesen, mo wanem tingting blong ol Kristin woman we tabu spirit i makemaot olgeta?

¹⁴ Olgeta niuwan we oli tekem baptaes mo tabu spirit i makemaot olgeta, oli kam pat blong grup ya we i olsem slef. Mo nomata hu i bin tijim trutok long olgeta, be oli gohed blong kasem tijing long samfala long kongregesen we oli naf blong wok olsem elda from we oli kasem ol mak we Baebol i talem se ol elda oli mas kasem. (1 Timoti 3:​1-7; Taetas 1:​6-9) Yes ol elda ya oli gat wan spesel wok we i blong givhan blong mekem nesen ya i gru. Ol Kristin woman we tabu spirit i makemaot olgeta oli no kros from we ol Kristin man nomo oli gat raet blong tij insaed long kongregesen. (1 Korin 14:​34, 35) Defren olgeta, ol Kristin woman ya oli glad long bigfala wok we ol man insaed long kongregesen oli stap mekem, mo oli tangkiu from we oli gat janis blong mekem sam Kristin wok, olsem wok ya blong talemaot gud nius. Tede tu, ol Kristin sista we tabu spirit i makemaot olgeta oli gat tingting daon, oli letem ol Kristin elda oli lidim olgeta nating sipos ol elda ya oli man we tabu spirit i makemaot olgeta no nogat.

15. ?Wanem bigfala rod we Jeova i yusum blong givim kakae long saed blong spirit long faswan handred yia, mo hu i lidim wok ya?

¹⁵ Kakae long saed blong spirit we ol Kristin blong faswan handred yia oli stap kasem i kamaot stret long ol leta blong ol aposol mo ol narafala disaepol we oli stap lidim wok long taem ya. Ol leta ya​—antap moa ol 27 buk ya we tabu spirit i pulum olgeta blong raetem, mo we naoia oli mekemap Kristin Grik haf blong Baebol—​oli stap goraon long olgeta kongregesen, mo i sua se olgeta ya nao oli givim save we ol elda oli nidim blong tijim ol Kristin. Long rod ya, sam man we oli wok long nem blong grup ya we i olsem slef, oli no kam slak blong mekem wok blong givim ol gudfala kakae long saed blong spirit long ol Kristin we hat blong olgeta i stret. Long faswan handred yia, grup ya we i olsem slef oli mekem wok ya we oli kasem.

?Olsem Wanem Long “Slef” Ya 1,900 Yia Biaen?

16, 17. ?Sam yia bifo 1914 olsem wanem grup we i olsem slef i pruvum se oli stret long wok ya we Jisas i bin givim long olgeta?

¹⁶ ?Olsem wanem tede? ?Taem Jisas i kam king long 1914, hem i faenem wan grup blong ol tabu Kristin we oli holem strong long wok ya blong givimaot kakae long stret taem blong hem? Yes hem i faenem wan grup olsem. I isi nomo blong luksave grup ya from we oli stap karem ol gudgudfala frut long wok blong olgeta. (Matiu 7:20) Ol samting we oli hapen long yia ya i kam kasem naoia, oli pruvum se grup ya nao oli ol tabu Kristin.

¹⁷ Taem Jisas i kam, samwe long 5,000 man blong wok oli stap bisi blong talemaot trutok blong Baebol. Ol wokman ya oli smol nomo, be slef ya i faenem sam gudfala rod blong mekem se gud nius ya i go kasem plante ples. (Matiu 9:38) Eksampol, oli askem sam kampani blong niuspepa blong prentem wan smol storian long saed blong Baebol, i go long niuspepa blong olgeta. I gat klosap 2,000 kampani blong niuspepa we oli bin agri blong mekem olsem. Long rod ya, trutok blong Baebol i kasem plante taosen man we oli ridim ol niuspepa ya. Antap long hemia, oli wokem ol kala pija we oli  soem ol samting we Baebol i tokbaot, stat long taem we God i wokem ol samting go kasem taem we Wan Taosen Yia Rul blong Kraes bambae i finis. Ol pija ya oli olsem wan sinema we i gohed blong eit aoa. From ol nambawan pija ya, trutok blong Baebol i kasem bitim naen milian man long tri bigfala kantri blong wol. Wan narafala rod we oli yusum hemia ol buk. Long 1914 oli prentem samwe long 50,000 kopi blong Wajtaoa.

18. ?Wetaem Jisas i putumap slef blong i lukaot long olgeta samting blong hem, mo from wanem hem i mekem?

¹⁸ Yes, taem Masta i kamtru, hem i faenem we slef blong hem we i stret i stap holemgud wok blong givim kakae long ol narafala man blong wok, mo long semtaem hem i stap talemaot gud nius. From samting ya, i gat bigfala wok moa i stap wet long slef ya. Jisas i talem se: “Tru mi talem long yufala, masta ya i save putumap hem blong i lukaot long olgeta samting blong hem.” (Matiu 24:47) Jisas i mekem samting ya long 1919, afta we slef ya i pastru long sam traem. ?Be from wanem “slef ya we i stret mo waes” i kasem moa wok? From we olting blong Masta oli kam plante moa. Jisas i kam king long 1914.

19. Talem olsem wanem “bigfala kampani” i kasem ol samting long saed blong spirit we oli nidim.

¹⁹ ?Wanem olting we niufala king ya i putum long han blong slef blong hem? Olgeta samting blong hem long saed blong spirit we oli stap long wol ya. Eksampol, twanti yia afta we Kraes i sidaon long jea blong king long 1914, slef ya i kasem mining blong “bigfala kampani” ya blong ol “narafala sipsip.” (Revelesen 7:​9, NW; Jon 10:16) Kampani ya i no ol memba blong “Isrel blong God,” be hem i ol man mo woman we oli gat hop blong laef long wol ya. Olgeta ya oli rili lavem Jeova mo oli wantem mekem wok blong hem olsem we ol tabu brata oli stap mekem. I olsem we oli talem long “slef ya we i stret mo waes” se: “Mifala i wantem kam fren blong yufala, from we mifala i harem nius se God i stap givhan long yufala.” (Sekaraea 8:23) Ol Kristin ya we oli jes baptaes, oli tekem semfala kakae long saed blong spirit olsem ol tabu man blong wok, mo stat long taem ya i kam, tufala grup ya tugeta oli kakae long sem tebol. !Hemia wan bigfala blesing blong olgeta we oli pat blong “bigfala kampani” ya!

20. ?Olsem wanem “bigfala kampani” i bin givhan blong mekem we ol samting blong Masta oli kam plante moa?

²⁰ Ol man blong “bigfala kampani” oli glad blong joen wetem slef ya we tabu spirit i makemaot hem, blong talemaot gud nius. Moa we oli prij, moa we olting blong Masta oli kam plante, mo samting ya i mekem we “slef ya we i stret mo waes” i gat plante moa wok blong mekem. From we namba blong ol man we oli wantem save trutok i kam plante moa, i nidim moa mesin blong prentem ol buk. Sloslo oli stat wokem ol branj ofis blong ol Witnes blong Jeova raon long wol. Oli sanem ol misinari oli go long “olgeta ples long wol.” (Ol Wok 1:8) Long 1914 namba blong ol man we oli presem God hem i raonabaot long faef taosen, mo olgeta ya evriwan oli ol man mo woman we tabu spirit i makemaot olgeta. Be tede i gat bitim sikis milian man we oli stap presem God, mo bighaf blong olgeta ya oli blong “bigfala kampani.” Tru ya, ol samting blong King long wol ya oli kam plante we plante stat long 1914 i kam kasem naoia.

21. ?Wanem tufala parabol we bambae yumi tokbaot long nekis stadi?

²¹ Olgeta samting ya oli soem se slef ya i rili “stret mo waes.” Afta we Jisas i tokbaot “slef ya we i stret mo waes,” hem i talem tu parabol we oli soemaot tufala fasin ya blong slef. Wan parabol hem i long saed blong ol ten yang gel, we sam oli waes mo sam oli no waes. Mo narafala parabol hem i long saed blong trifala man we oli holem mane blong masta blong olgeta. (Matiu 25:​1-30) !Yumi intres tumas long samting ya! ?Tufala parabol ya oli minim wanem long yumi tede? Bambae yumi ansa long kwestin ya long nekis stadi.

[Ol Futnot]

?Wanem Tingting Blong Yu?

• ?Hu olgeta we oli “slef ya we i stret mo waes”?

• ?Hu ya ol “man” we oli kasem kakae?

• ?Wetaem Masta i putumap slef ya blong i lukaot long olgeta samting blong hem, mo from wanem i long taem ya?

• ?Hu olgeta long taem blong yumi we oli givhan blong mekem we olting blong Masta oli kam plante moa, mo oli mekem samting ya olsem wanem?

[Kwestin]

[Tok blong pija long pej 10]

Long faswan handred yia, grup ya we i olsem slef oli mekem wok ya we oli kasem