Ehud i Flatem Paoa Blong Wan Strong Enemi

HEMIA wan trufala stori blong wan man we i no fraet mo i yusum waes blong hem blong trikim enemi blong hem. Samting ya i hapen 3,000 yia bifo finis. Fas haf blong stori ya long Baebol i go olsem: “Ol laen blong Isrel oli stap mekem ol fasin we i nogud long fes blong Hae God bakegen. Nao from samting ya, hem i mekem we King Eglon blong kantri ya Moab i stap kam strong moa long olgeta. King ya i singaot ol man Amon, wetem ol laen blong Amalek blong oli kam joen long hem, nao olgeta oli kam mekem faet long ol laen blong Isrel ya, mo oli winim olgeta. King ya i holem taon ya Jeriko we i ples blong pamtri, nao ol laen blong Isrel ya oli stap aninit long han blong hem eitin yia.”​—Jajes 3:​12-14.

Ples blong ol man Moab i stap long is saed blong Jodan Reva mo Ded Si. Be olgeta ya oli gokros long narasaed blong reva ya, oli stap klosap long taon ya Jeriko, “ples blong pamtri” mo oli mekem ol laen blong Isrel oli stap aninit long han blong olgeta. (Dutronome 34:3) King blong Moab, Eglon, hem “i wan fatfat man.” Blong klosap 20 yia, hem i bin mekem i strong long ol man Isrel mo i daonemgud olgeta, taem i fosem olgeta blong pem bigfala takis long hem. (Jajes 3:17) Be takis ya i mekem rod blong ol laen blong Isrel oli save finisim rabis king ya.

Baebol i talem se: “[Ol laen blong Isrel] oli krae i go long Hae God bakegen blong i jusumaot wan man, blong i tekemaot olgeta long han blong king ya, i mekem olgeta oli fri. Nao hem i jusumaot wan man, nem blong hem Ehud. Man ya i lefhan, mo papa blong hem Geraha, we i laen blong Benjamin. Nao olgeta oli sanem hem blong i karem takis blong olgeta, i go givim long King Eglon.” (Jajes 3:15) Jeova nao i mekem se ol man oli jusum Ehud blong karem takis blong olgeta i go long king ya. Baebol i no talem sipos Ehud i bin mekem wok ya bifo finis no nogat. Be, taem yumi luk olsem wanem Ehud i reregud blong mitim king ya mo trik we hem i yusum, i luk olsem we hem i save haos blong Eglon lelebet, mo i save wanem bambae i hapen taem hem i go long ples ya. Wan impoten samting we i mekem se plan blong Ehud i wokgud, hemia se i yusum lefhan blong hem.

?Wan Handikap No Wan Strong Man Blong Faet?

Tok ya “lefhan” i rili minim se ‘raethan i sat finis, i nogud, no oli fasem raethan.’ ?Olsem wanem? ?Hemia i min se Ehud i handikap from we hem i no save yusum raethan blong hem? I no minim olsem. Baebol i tokbaot ‘seven handred gudfala man blong faet’ long laen blong Benjamin we olgeta tu oli lefhan. Jajes 20:16 i talem se, “olgeta ya evriwan oli save sakem ston long sling, mo sipos oli stonem samting we i smol tumas olsem wan hea nomo, be oli no save mestem.” Ating oli jusum ol man ya from we oli nambawan man blong faet. Sam man blong stadi long Baebol oli talem se “lefhan” i minim wan man we i yusum lefhan mo raethan tugeta, hemia se, i save yusum eniwan long tufala han ya.​—Jajes 3:15.

I gat plante man long laen blong Benjamin we oli save yusum lefhan blong olgeta. Long Fas Kronikel 12:​1, 2 Baebol i tokbaot “plante man we oli nambawan soldia, we oli savegud fasin blong faet. . . . Olgeta ya oli save sut gud long bonara, mo oli save sakem ston long sling long lefhan mo raethan blong olgeta.” Wan buk i talem se, maet oli olsem from we oli “fasem raethan blong olgeta taem oli  smol pikinini​—taswe tok ya ‘lefhan’ i minim ‘oli fasem raethan’—​nao oli lanem blong yusum lefhan nomo.” Ol enemi blong Isrel oli tren blong faet agensem ol soldia we oli yusum raethan blong olgeta. Taswe, sipos oli fesem wan soldia we i yusum lefhan blong hem, maet trening we oli bin kasem i no save givhan long olgeta.

Wan Tok ‘We i Blong King Nomo’

Fastaem, Ehud i wokem “wan naef blong faet” we i sap tu saed. Hem i mekem se naef ya i sot nomo, blong hem i save haedem insaed long klos blong hem. Maet hem i ting se ol gad blong king bambae oli jekem hem blong luk sipos i stap karem wan naef. Klosap oltaem, ol soldia oli fasem naef blong faet long lefsaed blong bodi blong olgeta, olsem nao, oli save yusum raethan blong olgeta blong pulumaot naef ya kwiktaem. Be Ehud we i lefhan, i fasem naef blong faet “long raet leg blong hem, insaed long klos blong hem.” Ating ol gad blong king oli no tingbaot blong jekem saed ya. Taswe, i no gat samting i blokem hem, hem i ‘karem takis ya i go, i givim long king’ blong Moab, Eglon.​—Jajes 3:​16, 17.

Yumi no save wanem ol faswan samting we oli hapen long haos blong Eglon. Baebol i talem nomo se, Ehud i givim takis ya long king, nao “biaen, hem i talem long [ol man blong hem] se, ‘Yumi gobak long ples blong yumi.’ ” (Jajes 3:18) Ehud i givim takis ya long king finis, ale i aot bakegen wetem ol man blong hem, oli go longwe lelebet long haos blong Eglon, nao hem i livim olgeta, i tanemraon, i kambak blong luk king ya bakegen. ?From wanem hem i mekem olsem? ?From wanem hem i tekem ol man blong hem oli kam wetem hem long haos blong king fastaem? ?Oli kam blong mekem gad long hem, no from we hemia fasin we oli stap folem long taem bifo, no maet oli kam nomo blong givhan long hem blong karem takis ya? ?Mo taem hem i tekem ol man blong hem oli go longwe long haos blong king, hem i mekem olsem blong oli stap sef taem hem i wokem plan blong hem? Nating se tingting blong Ehud i olsem wanem, hem i tanemraon, i livim olgeta, i gobak blong luk king bakegen.

“Taem oli kam klosap long Gilgal, stret long ol bigfala ston ya we ol man oli katem olgeta . . . [Ehud] i tanemraon, i gobak, i go luk king bakegen. . . . Ehud i talem long hem se, ‘King. Mi mi gat wan tok blong talem long yu, we i blong yu nomo.’ ” Baebol i no talem olsem wanem ol gad oli letem hem i pas blong i go insaed long haos blong king bakegen. ?Oli no haremsave se man ya i mas gat wan plan? ?From we hem i kambak hem wan nomo, maet oli ting se wan man Isrel olsem i no save mekem wan samting long masta blong olgeta? ?Maet oli ting se Ehud i kam hem wan nomo blong i putum ol manples blong hem long han blong enemi blong olgeta? Nating se i olsem wanem, Ehud i wantem luk king hem wan nomo, mo hemia nao samting we i hapen.​—Jajes 3:19.

Tok blong God i gohed se: “Taem [Ehud] i kamtru, king [Eglon] i stap sidaon long kios blong hem we i kolkol gud, antap long ruf blong haos blong hem, mo Ehud i talem long hem se, . . . ‘King, mi mi gat wan tok we God i talem long mi blong mi kam talemaot long yu.’ ” Ehud i no stap tokbaot wan mesej we God i givim long hem blong talemaot long king ya, nogat. Ehud i gat plan blong yusum naef blong faet blong hem. Ating king i ting se Ehud i karem wan mesej i kam long god blong hem Kemos, taswe “king i stanap.” Wantaem nomo, Ehud i pulumaot naef blong faet blong hem, i sperem Eglon long bel blong hem. Ating naef ya i no gat wan aean we i gokros long handel blong hem. Taswe, “naef ya i go insaed olgeta i kasem handel blong hem wantaem, mo ol gris blong king i kavremapgud we man i no save luk. . . . Naef ya i gotru long bel blong king ya,” mo sitsit blong hem i ronaot, maet tru long kil long bel blong hem no tru long as blong hem.​—Jajes 3:20-22.

Ehud i Ronwe Isi Nomo

Ehud i no moa tekemaot naef blong hem long bel blong Eglon. Hem i hareap “i go afsaed [“gotru long wan hol we win i stap pas long hem,” NW ], i satem tufala doa blong haos ya, i lokem tufala, nao i aot i go. Taem ol man blong wok blong king oli kam, oli luk we tufala doa ya i lok, be oli ting se king i stap long klosis.”​—Jajes 3:​23, 24.

?Wanem ya “hol we win i stap pas long hem” we Ehud i gotru long hem? Wan buk i talem se: “Yumi no save stret mining blong [Hibru tok long ples ya],” be “samfala oli ting se maet Ehud i pas ‘long medel blong tu bigfala pos,’ no i pastru ‘long wan smol rum we i stap jes insaed long bigfala doa.’ ” ?Olsem wanem? ?Ehud i lokem doa insaed,  nao i pas long wan narafala ples blong go afsaed? ?No hem i lokem doa afsaed wetem wan ki we hem i faenem long dedbodi blong king, nao hem i wokbaot i go pas long ol gad olsem we i no gat wan samting i hapen? Baebol i no talem stret. Be, nating se Ehud i mekem olsem wanem, ol gad blong Eglon oli no ting se wan samting i rong taem oli luk se doa i lok. Oli ting se king “i stap long klosis” nomo.

Taem ol gad blong king oli stap wet, Ehud i aot finis, i stap ronwe. Nao hem i singaot ol laen blong Isrel mo i talem long olgeta se: “!Yufala i kam! !Yufala i biaen long mi! Hae God i putum ol man Moab finis long han blong yumi.” Ol man blong Ehud oli blokem ol ples blong krosem Jodan Reva we i blong go long Moab, mekem se ol man Moab we lida blong olgeta i ded finis, oli no save krosem reva blong ronwe i gobak long ples blong olgeta. “Nao long dei ya, [ol man Isrel] oli kilim klosap ten taosen soldia blong ol man Moab, we oli nambawan man blong faet, mo i no gat wan long olgeta i ronwe long taem ya. Long dei ya, ol laen blong Isrel oli winimgud ol man Moab, mo biaen oli stap eiti yia we kantri ya i stap kwaet nomo, i no moa gat faet long ples blong olgeta.”​—Jajes 3:​25-30.

Ol Lesen We Yumi Lanem

Samting we i hapen long taem blong Ehud i tijim yumi se man we i mekem samting nogud long ae blong Jeova, hem i mas kasem trabol from. Be yumi lanem tu se Jeova i stap givhan long olgeta we oli tanem tingting blong olgeta from sin, mo oli kam long hem.

I no from spesel waes blong Ehud we plan blong hem i wokgud, mo i no from we ol enemi oli no save faet strong, nogat. God i no nidim waes mo paoa blong man blong mekem tingting blong hem i kamtru. Bigfala samting we i mekem se plan blong Ehud i wokgud, hemia se God i stap wetem hem. Samting we Ehud i mekem i laenap wetem tingting blong God, hemia blong mekem ol man blong Hem oli kamfri. God i jusumaot Ehud, mo “oltaem, taem we Hae God i jusumaot wan man blong i lida blong [ol man blong hem], hem i stap wetem lida ya, i stap givhan long hem.”​—Jajes 2:18; 3:15.