“Finisim Olgeta Wok Ya We God i Givim Long Yu”

“Yu mas finisim olgeta wok ya we God i givim long yu blong mekem.”​—2 TIMOTI 4:5.

1, 2. ?Nating se ol Kristin oli man blong prij, wanem wok we Baebol i talem se i stap long han blong ol elda?

 ?YU YU wan man blong talemaot Kingdom? Sipos yes, yu mas talem tangkiu long Jeova God from nambawan janis ya we hem i givim long yu. ?Yu yu wan elda long kongregesen? Hemia wan narafala spesel blesing we Jeova i givim long yu. Be yu no mas fogetem se i no edukesen mo i no gud save blong toktok we i mekem se yumi naf blong prij no yumi naf blong lukaot long kongregesen. Jeova nomo i mekem yumi naf blong prij, mo from we sam brata blong yumi oli kasem ol mak we Baebol i putum, ale, oli save mekem wok olsem elda.​—2 Korin 3:​5, 6; 1 Timoti 3:​1-7.

² Olgeta Kristin we oli givim laef i go long Jeova oli mas mekem wok blong talemaot gud nius, mo ol elda oli mas soemaot gudfala eksampol long saed ya. God mo Kraes, mo ol narafala Witnes blong Jeova oli tinghae long wok blong ol elda we oli “stap hadwok blong prij mo blong tijim ol man.” (1 Timoti 5:17; Efesas 5:23; Hibrus 6:​10-12) Oltaem nomo, tijing we wan elda i givim i mas givhan long narafala long saed blong spirit. Hemia samting we aposol Pol i talem long Timoti we i wan elda: “Yu mas mekem olsem, from we i gat taem i stap kam, we ol man bambae oli no moa wantem harem ol trutok. Bambae oli save mekemhed, blong go lukaot plante narafala tija olbaot, we oli save talem wanem tok we olgeta oli wantem harem. Bambae oli no save lesin long ol trutok, be bambae oli gowe long hem blong go lesin long ol kastom stori ya we oli no tru. Oltaem, nomata wanem samting i kamtru long laef blong yu, be tingting blong yu i mas klia gud. Sipos yu stap harem nogud, be yu mas mekem tingting blong yu i strong. Yu mas mekem wok ya blong talemaot gud nius blong Kraes, mo yu mas finisim olgeta wok ya we God i givim long yu blong mekem.”​—2 Timoti 4:​3-5.

3. ?Ol elda oli mas mekem wanem blong bambae i no gat giaman tijing i kam spolem kongregesen long saed blong spirit?

³ Wanwan elda i mas lukaotgud we i nogat giaman tijing i kam spolem kongregesen long saed blong spirit. Blong mekem olsem, hem i mas folem advaes ya blong Pol we i se: “Oltaem, nomata wanem samting i kamtru long laef blong yu, be tingting blong yu i mas klia gud. . . . Yu mas finisim olgeta wok ya we God i givim long yu blong mekem.” (2 Timoti 4:5) Yes, wanwan elda i mas ‘finisim olgeta wok ya we God i givim long hem.’ Hem i mas mekem wok ya fulwan, we i no mestem wan haf blong hem. Wan elda we i mekem wok blong hem long fasin we i fulwan i min se hem i tinghevi long evri wok blong hem insaed long kongregesen, hem i no livim sam wok i stap mo i no mekem wok blong hem hafhaf nomo. Man olsem i lukaot gud long evri wok i nating sipos wok ya i smol nomo.​—Luk 12:48; 16:10.

4. ?Wanem i save halpem yumi blong mekem wok blong yumi fulwan?

⁴ Blong finisim olgeta wok we God i givim, i no min se wan man i mas gat moa taem blong mekem ol wok ya, be i min se hem i yusum taem blong hem long waes fasin. I gud we wanwan Kristin i gat fasin we i skelgud, blong hem i save gohed oltaem long wok we God i givim long hem. Sipos wan elda i wantem spenem moa taem long wok blong prij, hem i mas ogenaesgud. Long rod ya, bambae hem i skelemgud ol wok blong hem, mo bambae hem i luksave wanem wok we hem i save givim long narafala mo olsem wanem hem i save mekem olsem. (Hibrus 13:17) Yumi respektem ol elda we oli joen wetem ol narafala blong mekem wok, olsem Nehemaea we hem tu i joen wetem ol man blong bildim ol stonwol long Jerusalem. (Nehemaea 5:16) Mo olgeta man blong Jeova oli mas joen oltaem long wok blong talemaot Kingdom.​—1 Korin 9:​16-18.

5. ?Wanem tingting we yumi mas gat long saed blong wok blong prij?

⁵ !Yumi mas glad bigwan long wok ya we yumi kasem blong talemaot se Kingdom blong heven i stanap finis! Yumi tinghae long janis ya we yumi gat blong talemaot gud nius long olgeta man long wol bifo we en i kam. (Matiu 24:14) Nating se yumi no  stret gud olgeta, yumi tinghevi long tok ya we Pol i talem se: “Mifala i stap holem ol gudgudfala samting ya [wok blong prij] we God i givim, mifala i olsem ol graonpot nomo. Nao fasin ya i stap soemaot, we paoa ya we i bigwan tumas i blong God, i no blong mifala.” (2 Korin 4:7) Yes, God i save glad long wok we yumi mekem, be yumi naf blong mekem wok ya from paoa mo waes we hem nomo i givim.​—1 Korin 1:​26-31.

Soemaot Paoa Blong God

6. ?Olsem wanem nesen blong Isrel bifo i defren long Isrel long saed blong spirit?

⁶ Pol i tokbaot ol Kristin we tabu spirit i makemaot olgeta, i talem se God i ‘mekem olgeta oli naf blong mekem ol wok blong niufala promes,’ no niufala kontrak. Aposol ya i tokbaot tufala kontrak ya, niufala kontrak we God i mekem wetem Isrel long saed blong spirit tru long Jisas Kraes, mo olfala kontrak we God i bin mekem wetem nesen blong Isrel tru long Moses. Pol i talem se taem Moses i kasem tufala ston ya wetem ol Tenkomanmen long tufala, hem i kamdaon long bigfala Hil ya Sinae, nao fes blong hem i saen we i saen, mekem se ol man Isrel oli no save lukluk hem. Be smoltaem biaen, wan samting i hapen long ol man Isrel we i nogud moa i bitim taem ya we oli no save luk fes blong Moses. Yes ‘tingting blong olgeta i fas’ mo i olsem we wan kaliko i stap blokem hat blong olgeta. Be taem oli tanraon mo oli kambak long Jeova wetem fulhat blong olgeta, i olsem we kaliko ya i no moa blokem hat blong olgeta. Afta we Pol i tokbaot samting ya, hem i tokbaot wok we ol man insaed long niufala kontrak ya oli kasem, i se: “Yumi evriwan i stap soemaot paoa blong Masta blong yumi bakegen, olsem bigfala laet we i stap saenaot long fes blong yumi, mo i no gat samting olsem kaliko, we i stap blokem.” (2 Korin 3:​6-8, 14-18; Eksodas 34:​29-35) Tede tu, ol “narafala sipsip” blong Jisas oli gat janis blong soemaot paoa blong Jeova olsem bigfala laet we i saenaot long fes blong olgeta.​—Jon 10:16.

7. ?Olsem wanem ol man oli save soemaot glori blong God?

⁷ Baebol i talem se sipos man i luk fes blong God samtaem, man ya bambae i ded from. ?Taswe, olsem wanem ol sinman oli save soemaot paoa no glori blong God? (Eksodas 33:20) Jeova hem wan i fulap long paoa, be antap long hemia, stamba tingting blong hem blong leftemap hae rul blong hem tru long Kingdom, hemia tu i soemaot bigfala paoa blong hem. Ol trutok we oli joen wetem Kingdom oli sam long “ol bigbigfala wok ya we God i mekem” we ol man oli stat talemaot taem oli kasem tabu spirit long Pentekos 33 K.T. (Ol Wok 2:11) Taem oli letem spirit ya i lidim olgeta, oli save finisim gud wok ya we God i givim long olgeta.​—Ol Wok 1:8.

8. ?Long saed blong wok blong prij, Pol i gat strong tingting blong mekem wanem?

⁸ Pol i gat strong tingting blong no letem wan samting nating i blokem hem blong finisim wok blong hem. Hem i raetem se: “God i gat sore long mifala, mo hem i givim wok ya long mifala blong mifala i mekem, mo from samting ya, tingting blong mifala i no save foldaon. Mifala i lego finis ol fasin blong haed, mo blong sem. Mifala i no save mekem ol giaman fasin, mo mifala i no save tanem tok blong God i kam narafala. Mifala i stap talemaot trutok long klia ples. Mo long fes blong God, mifala i stap traem soemaot mifala long olgeta man, blong bambae long tingting blong olgeta, oli save glad long mifala.” (2 Korin 4:​1, 2) “Wok” ya we Pol i tokbaot, i mekem we trutok i goaot moa mo laet long saed blong spirit i kasem olgeta ples.

9, 10. ?Olsem wanem yumi naf blong soemaot glori blong Jeova?

⁹ Pol i tokbaot hu i Stamba blong prapa laet mo laet long saed blong spirit tu, taem hem i raetem se: “God ya we bifo i tok, i talem se, ‘Laet i mas saenaot  long tudak ya i kam,’ hemia sem God ya nomo we i mekem laet blong hem i saenaot finis, i kam kasem tingting blong mifala. Laet ya blong hem i mekem mifala i waes blong save bigfala paoa ya blong God, we mifala i luk long fes blong Kraes.” (2 Korin 4:6; Jenesis 1:​2-5) From we yumi kasem nambawan blesing ya blong mekem wok blong God, i gud yumi stap klin oltaem blong bambae yumi save soemaot gud paoa no glori blong Jeova olsem wan laet we i saenaot long fes blong yumi.

¹⁰ Ol man we oli stap long tudak long saed blong spirit oli no save luk glori blong Jeova, mo oli no save luk glori ya tu we i stap saenaot tru long Bigfala Moses ya, Jisas Kraes. Be yumi ol man blong wok blong Jeova, yumi kasem laet blong glori blong hem long Baebol, mo yumi mekem laet ya i saenaot bakegen long ol narafala man. Sipos ol man ya we oli stap long tudak long saed blong spirit oli wantem sef long taem we God bambae i spolem ol rabis man, oli nidim laet ya we i kamaot long God. Taswe yumi glad tumas mo yumi gat strong tingting tu blong obei long tok ya we i kamaot long God, se yumi mas letem laet blong yumi i saenaot long ples we i tudak blong leftemap nem blong Jeova.

Letem Laet Blong Yu i Saenaot Long Ol Baebol Stadi

11. ?Jisas i talem wanem long saed blong fasin blong letem laet blong yumi i saenaot, mo wanem wan rod blong mekem samting ya long wok blong prij?

¹¹ Jisas i talem long ol man blong hem se: “Yufala i olsem laet long ol man long wol. Taon we i stap antap long wan hil, i no save haed. Mo i no gat man we i laetem laet, nao i kavremap long wan baket. Taem man i laetem laet, hem i mas putum i stap antap long ples blong laet, blong mekem we ol man insaed long haos oli gat laet. Nao long sem fasin, laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Matiu 5:​14-16) Gudfala fasin blong yumi i save pulum ol man blong oli leftemap nem blong God. (1 Pita 2:12) Mo ol defdefren haf blong wok blong prij oli givim janis long yumi blong letem laet blong yumi i saenaot long plante defren rod. Wan long ol faswan bigfala samting we yumi traem blong mekem blong letem laet blong spirit we i stap long Tok blong God i saenaot, hemia ol Baebol stadi. Hemia wan impoten rod blong yumi finisim wok ya we God i givim long yumi. ?Wanem sam advaes we oli save halpem yumi blong mekem ol Baebol stadi we oli tajem hat blong ol man we oli stap lukaot trutok?

12. ?Olsem wanem prea i joen wetem wok blong mekem ol Baebol stadi?

¹² Prea long Jeova long saed ya. Hemia i soemaot se yumi rili wantem gat wan Baebol stadi. Hemia i soem tu se yumi luksave se i impoten blong halpem ol narafala blong kasem stret save blong God. (Esikel 33:​7-9) I sua se Jeova bambae i ansa long ol prea ya blong yumi mo bambae i blesem traehad we yumi mekem long wok blong prij. (1 Jon 5:​14, 15) Be yumi no prea nomo blong faenem wan man we yumi save stadi Baebol wetem hem. Afta we yumi statem wan stadi olsem, yumi mas prea mo tingting dip long ol nid we Baebol studen ya i gat. Samting ya bambae i halpem yumi blong mekem se stadi i stret long nid blong studen ya, nao bambae stadi ya i save karem frut.​—Rom 12:12.

13. ?Wanem i save halpem yumi blong karem frut long ol Baebol stadi blong yumi?

¹³ Sipos yumi wantem we ol Baebol stadi blong yumi oli karem frut, yumi mas rere gud ol stadi ya evri taem. Sipos yu harem se yu no naf blong mekem ol stadi, i gud blong luk olsem wanem brata we i lukaotem Buk Stadi blong yu i eksplenem ol wanwan poen blong buk stadi evri wik. Wanwan taem, maet yumi gat janis tu blong folem ol narafala pablisa we oli stap karem gudfala frut long ol Baebol stadi blong olgeta. Be antap long olgeta samting ya, i gud blong lukluk long fasin mo wei blong tij blong Jisas Kraes.

14. ?Olsem wanem yumi save kasem hat blong ol Baebol studen?

¹⁴ Jisas i glad tumas blong mekem wok blong Papa blong hem long heven mo blong tokbaot God long ol narafala. (Ol Sam 40:8) Hem i gat tingting daon mo hem i kasem hat blong ol man we oli lesin long hem. (Matiu 11:​28-30) Taswe i gud yumi traehad blong kasem hat blong ol Baebol studen blong yumi. Blong mekem olsem, yumi mas rerem evri stadi mo tingbaot olsem wanem blong mekem stadi ya i laenap wetem nid mo laef blong wanwan studen. Eksampol, sipos hem i gruap long wan kantri we ol man blong hem oli no bilif long Baebol, maet yu nidim blong pruvum long hem se Baebol i tru. Sipos yu nidim blong mekem olsem, bambae yu mas ridim plante vas blong Baebol mo eksplenem ol vas ya.

 Halpem Ol Studen Blong Kasem Save Long Ol Pijatok

15, 16. (a) ?Olsem wanem blong halpem wan studen we i no kasem save long wan pijatok blong Baebol? (b) ?Yumi save mekem wanem sipos buk we yumi stadi long hem i yusum wan pijatok we Baebol studen i no kasem save long hem?

¹⁵ Maet wan Baebol studen i no kasem savegud long sam pijatok long Baebol. Eksampol, maet hem i no kasem save long mining blong tok blong Jisas se yumi mas putum laet i stap long ples blong laet. (Mak 4:​21, 22) Jisas i stap tokbaot ol laet blong bifo we oli laetem wetem oel. Ol laet ya oli gat spesel ples blong olgeta we oli save saenem wan ful rum insaed long wan haos. Sipos yumi jekemap buk ya Insight on the Scriptures aninit long ol tok ya “Lamp” mo “Lampstand” (long Franis hemia “Lampe” mo “Porte-lampe”) yumi save kasem sam moa save we i mekem pijatok blong Jisas i klia moa. * !Tru ya, Baebol stadi blong yumi i save karem gudfala frut sipos yumi givim ol gudfala klia toktok we studen i save kasem save long hem kwiktaem mo harem gud from!

¹⁶ Maet studen i faenem i had blong kasem save long wan pijatok we i stap long buk blong stadi. Yu mas tektaem blong eksplenem gud pijatok ya, no yu save yusum wan narafala pijatok we i soemaot sem poen ya. Maet wan buk i tokbaot se insaed long mared, i impoten we man mo woman tufala i wokgud tugeta. Ale maet buk ya i yusum pijatok blong wan man blong jimnastik we i stap swing long wan rop we i antap olgeta. Taem man ya i lego rop ya blong jam i go holem han blong narafala man long narafala rop, man ya i mas trastem fulwan se narafala ya bambae i holem hem. Sipos pijatok ya i no klia, yumi save yusum wan narafala pijatok blong soem se insaed long mared i nidim we man mo woman i wok gud mo i traehad tugeta. Maet yumi talem se taem ol man oli karemaot ol bokis long wan sip, oli mas wokgud tugeta blong wan i save pasem bokis i go long narawan.

17. ?Wanem eksampol we Jisas i givim long yumi long saed blong fasin blong yusum ol pijatok?

¹⁷ Be blong yusum wan narafala pijatok olsem, yumi mas reregud fastaem. Long rod ya yumi soem se yumi intres gud long ol Baebol studen ya wanwan. Jisas i yusum ol isi pijatok blong givhan long man blong kasem save long sam samting we oli had. Bigfala Toktok we hem i mekem antap long Hil i soemaot gud samting ya, mo Baebol i soemaot tu se tijing blong hem i gat paoa long ol man we oli lesin long hem. (Matiu 5:​1–7:29) Jisas i gat longfala tingting blong eksplenem ol samting from we hem i kea long ol man.​—Matiu 16:​5-12.

18. ?I gud blong mekem wanem wetem ol vas blong Baebol we oli stap long ol buk blong stadi?

¹⁸ Taem yumi kea long ol man, bambae yumi wantem ‘yusum Baebol blong pulum tingting’ blong olgeta. (Ol Wok 17:​2, 3, NW ) Hemia i min se yumi mas stadi gud mo prea, mo yumi mas yusum gud ol buk we yumi kasem long grup ya we i olsem ‘man blong wok we i save lukaot gud long wok blong masta blong hem.’ (Luk 12:​42-44) Tingbaot buk ya Save Blong Lidim Yu Long Laef We i No Save Finis. * Hem i yusum plante vas blong Baebol. Be from we buk ya i smol, oli no raetem toktok we i stap long olgeta vas ya. Long taem blong stadi, i impoten blong ridim mo eksplenem sam long ol vas ya. Yes, yumi mas mekem olsem from we tijing blong yumi i stanap long Tok blong God, mo Tok ya i gat bigfala paoa. (Hibrus 4:12) Taem yu stap mekem stadi, i gud blong lukluk i go long Baebol plante taem, jekemap plante vas we oli stap long ol wanwan paragraf. Halpem studen blong luk wanem we Baebol i talem long saed blong samting we yufala i stap stadi long hem no long saed blong sam fasin no aksin. Traehad blong soem long hem olsem wanem hem i save kasem blesing sipos hem i obei long God.​—Aesea 48:​17, 18.

 Askem Sam Kwestin We Oli Pulum Man Blong Yusum Tingting

19, 20. (a) ?From wanem i gud blong askem kwestin blong save tingting blong Baebol studen? (b) ?Yumi save mekem wanem sipos i gat wan poen we Baebol studen i no kasem gud?

¹⁹ Fasin blong Jisas blong yusum ol kwestin i halpem ol man blong tingting. (Matiu 17:​24-27) Taem yumi askem kwestin blong save tingting blong Baebol studen, i gud blong no askem kwestin we i save mekem hem i sem. Ol kwestin ya oli blong givhan long yu blong save tingting we Baebol studen i gat long saed blong samting we yutufala i stap stadi long hem. Maet bambae yu faenemaot we hem i stap holem yet sam tingting we oli no stanap long Baebol. Eksampol, maet hem i bilif long Triniti. Long japta 3 blong Save buk, yumi lanem se tok ya “Triniti” i no stap long Baebol. Buk ya i givim sam vas we oli soem se Jeova i no Jisas, mo se tabu spirit hem i paoa blong God, be i no wan man. Samtaem maet i naf nomo blong ridim mo eksplenem ol vas blong Baebol we oli stap long japta ya. ?Be olsem wanem sipos Baebol studen i nidim moa save? Afta long nekis stadi maet yumi save spenem smol taem blong storebaot poen ya long fasin we i klia moa, folem wan narafala buk we ol Witnes blong Jeova oli wokem, olsem buklet ya Should You Believe in the Trinity? Ale biaen, yumi save gobak bakegen blong stadi long Save buk.

²⁰ ?Olsem wanem sipos yumi askem wan kwestin blong faenemaot tingting blong studen, nao ansa we hem i givim i mekem yumi sek no maet tingting blong yumi i foldaon? Sipos samting ya i hapen taem yumi stap tokbaot wan samting we i had long studen blong lego, olsem fasin blong smok, ale yumi save talem long hem se bambae yumi gohed fastaem wetem stadi ya mo bambae yumi storebaot samting ya bakegen wetem hem long wan narafala taem. Sipos yumi save se studen ya i no lego yet fasin blong smok, ale bambae yumi save lukaot sam advaes long ol buk blong Sosaeti we oli save halpem hem blong gru long saed blong spirit. Taem yumi stap wokhad blong kasem hat blong studen, i gud yumi prea blong Jeova i halpem hem blong gru long saed blong spirit.

21. ?Wanem i save hapen sipos yumi traem mekem we fasin blong yumi blong tij i stret long nid blong wanwan Baebol studen?

²¹ Sipos yumi rere gud mo yumi askem help blong Jeova, bambae yumi naf blong mekem we fasin blong yumi blong tijim Baebol studen ya i stret long nid blong hem. Ale, sloslo bambae yumi save halpem hem blong lavem God. Mo tu, maet bambae yumi save givhan long hem blong gat bigfala respek long ogenaesesen blong Jeova mo gat tangkiu from wok we ogenaesesen ya i stap mekem. Yes, yumi save glad bigwan taem wan Baebol studen i luksave se ‘tru, God i stap long medel blong yumi.’ (1 Korin 14:​24, 25) Taswe i gud yumi mekem Baebol stadi long fasin we i karem frut mo yumi traem bes blong yumi blong halpem ol man blong oli kam ol disaepol blong Jisas.

Wan Sas Samting We Yumi Tinghae Long Hem

22, 23. ?Yumi nidim wanem sipos yumi wantem finisim gud olgeta wok we God i givim long yumi blong mekem?

²² Blong finisim olgeta wok we God i givim long yumi blong mekem, yumi nidim paoa blong God. Pol i tokbaot wok blong prij taem hem i raet i go long ol Kristin brata blong hem we tabu spirit i makemaot olgeta, se: “Mifala ya, we mifala i stap holem ol gudgudfala samting ya we God i givim, mifala i olsem ol graonpot nomo. Nao fasin ya i stap soemaot, we paoa ya we i bigwan tumas i blong God, i no blong mifala.”​—2 Korin 4:7.

²³ Nomata sipos yumi wan long ol tabu brata no yumi wan long ol “narafala sipsip,” be yumi olsem graonpot nomo we yumi no strong nating. (Jon 10:16) Be, Jeova i save givim paoa we yumi nidim blong finisim wok ya we yumi kasem, nating sipos i gat sam samting we i hadwok long yumi. (Jon 16:13; Filipae 4:13) Taswe, yumi mas trastem Jeova fulwan, yumi mas tinghae long wok blong prij olsem we hem i wan sas samting, mo yumi mas finisim olgeta wok ya we God i givim long yumi blong mekem.

[Ol Futnot]

?Bambae Yu Yu Ansa Olsem Wanem?

• ?Ol elda oli save mekem wanem blong finisim gud wok ya we God i givim blong oli mekem?

• ?Olsem wanem yumi save kam gud moa long fasin blong yumi blong mekem ol Baebol stadi?

• ?Bambae yu mekem wanem sipos wan Baebol studen i no kasem save long wan pijatok no i nidim moa save long saed blong wan poen?

[Kwestin]

[Tok blong pija long pej 16]

Ol Kristin elda oli tijim kongregesen mo oli trenem ol narafala Kristin long wok blong prij

[Tok blong pija long pej 18]

Wan rod blong letem laet blong yumi i saenaot hemia taem yumi traem karem frut long ol Baebol stadi