?Olsem Wanem Blong Selebretem Lodsapa?

KRISTIN aposol Pol i eksplenem gud olsem wanem blong selebretem Lodsapa, i talem se: “Tok ya, mi mi kasem long Masta blong yumi, mo mi talemaot long yufala finis. Mi talem se long naet ya we biaen wan man i letem Jisas, Masta blong yumi i go long han blong ol enemi blong hem, Jisas i tekem bred. Nao hem i prea blong talem tangkiu long God from, mo hem i brekem bred ya, i talem se, ‘Hemia bodi blong mi, we bambae mi letem from yufala. Oltaem yufala i mas mekem samting ya blong tingbaot mi bakegen.’ Mo long sem fasin, taem olgeta oli kakae finis, hem i tekem kap, nao i talem se, ‘Kap ya i olsem niufala promes blong God, we blad blong mi bambae i ron blong mekem i stanap. Evritaem, taem yufala i dring long hem, yufala i mas mekem olsem blong tingbaot mi bakegen.’ From samting ya, taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta blong yumi, gogo hem bambae i kambak bakegen.”​—1 Korin 11:​23-26.

Olsem Pol i talem, Jisas i stanemap Lodsapa ‘long naet ya we biaen wan man i letem Jisas i go long han blong ol enemi blong hem.’ Yes, Judas Iskariot i letem Jisas i go long han blong ol lida blong skul blong ol man Jiu, nao olgeta oli pulum ol man Rom blong nilim Jisas Kraes long wan pos. Oli mekem kakae ya long Tasde naet, Maj 31, 33 K.T. * Jisas i ded long pos long Fraede aftenun, Eprel 1. Long kalenda blong ol man Jiu, wan dei i stat long sapa mo i finis long nekis sapa, taswe Lodsapa mo ded blong Kraes, tufala i hapen long semfala dei, hemia Naesan 14, 33 K.T.

Ol man we oli kakae bred mo dring waen ‘oli mas mekem samting ya oltaem’ blong tingbaot Jisas. Wan narafala Baebol i tanem tok ya blong Jisas se: “Mekem samting ya olsem wan memoriol blong mi.” (1 Korin 11:​24, The Jerusalem Bible) Taswe, narafala nem blong Lodsapa hemia Memoriol blong ded blong Kraes.

?From Wanem Yumi Mas Rimemba Ded Blong Jisas?

Blong ansa long kwestin ya, yumi mas save mining blong ded blong Kraes fastaem. Jisas i ded olsem nambawan man blong sapotem hae rul blong Jeova. Taswe hem i pruvum we Setan i giaman taem hem i talem se ol man oli mekem wok blong God blong kasem ol blesing nomo. (Job 2:​1-5; Ol Proveb 27:11) Jisas i ded olsem wan man we i stretgud olgeta, taswe hem i ‘givim laef blong hem blong pem rod blong plante man oli go fri.’ (Matiu 20:28) Taem Adam i sin agensem God, hem i lusum laef  blong hem we i stretgud olgeta mo hem i lusum hop blong laef foreva long wol ya. Be ‘God i lavem tumas ol man long wol, nao hem i givim Jisas, stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) Baebol i talem se “ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.”​—Rom 6:23.

Taswe ded blong Jisas Kraes i joen wetem tu bigfala fasin blong soem lav​—faswan, hemia bigfala lav we Jeova i soem long ol man taem hem i givim Pikinini blong hem from olgeta, mo sekenwan, hemia lav we Jisas i soem long ol man taem hem i agri blong givim laef blong hem from olgeta. Memoriol blong ded blong Kraes i leftemap tufala nambawan fasin ya blong soem lav. Yumi kasem blesing from lav ya. Taswe, ating bambae yu agri we yumi mas tangkiu long God mo long Jisas from lav ya. Bambae yumi soem tangkiu sipos yumi joen wetem ol narafala blong selebretem Lodsapa.

Mining Blong Bred Mo Waen

Taem Jisas i stanemap Lodsapa, hem i yusum bred mo red waen olsem pija blong bodi mo blad blong hem. Jisas i tekem wan bred, “hem i prea blong talem tangkiu long God from, mo hem i brekem bred ya, i talem se, ‘Hemia [“i olsem,” NW ] bodi blong mi we bambae mi letem from yufala.’ ” (1 Korin 11:24) Jisas i mas brekem bred ya blong givimaot long ol aposol blong hem, from we oli wokem bred ya long flaoa mo wota, be i no gat is long hem, taswe hem i strong lelebet. Long Baebol, is i pija blong sin. (Matiu 16:​11, 12; 1 Korin 5:​6, 7) Jisas i no gat sin long hem. Taswe, God i yusum bodi ya we i stretgud olgeta olsem wan ransom sakrefaes blong pemaot sin blong ol man. (1 Jon 2:​1, 2) !I stret nomo we yumi yusum wan bred we i no gat is long hem olsem pija blong bodi blong Kraes we i no gat sin!

Jisas i prea blong talem tangkiu from kap ya blong red waen we i klingud, nao hem i talem se: “Kap ya i olsem niufala promes blong God, we blad blong mi bambae i ron blong mekem i stanap.” (1 Korin 11:25) Red waen long kap ya i minim blad blong Jisas. Long 1513 B.K.T. * blad blong ol buluk mo ol man sipsip we ol man Isrel oli givim olsem sakrefaes i mekem kontrak blong Loa i stanap bitwin God mo nesen blong Isrel. Long sem fasin, blad blong Jisas we i ron i mekem niufala kontrak i stanap.

?Hu i Gat Raet Blong Kakae Bred Mo Dring Waen?

Blong talem stret hu i gat raet blong kakae bred mo dring waen long Memoriol, fastaem yumi mas save wanem ya niufala kontrak, mo hu ya olgeta we oli insaed long niufala kontrak. Baebol i talem se: “Ol man Isrel mo ol man Juda. I gat taem i stap kam, we mi bambae mi mekem wan niufala promes [“kontrak,” NW ] wetem yufala . . . Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi . . . Nao mi bambae mi fogivim yufala, mi tekemaot ol sin blong yufala, mo bambae mi no moa save tingbaot olgeta bakegen.”​—Jeremaea 31:​31-34.

Niufala kontrak ya i openem rod long sam man blong oli gat wan spesel fasin fren wetem Jeova God. Tru long kontrak ya, wan grup blong man i kam ol man blong hem, mo hem i kam God blong olgeta. Jeova i raetemdaon loa blong hem long hat blong olgeta, mo sam man we oli no man Jiu mo oli no sakomsaes, olgeta tu oli save gat wan spesel fasin fren wetem God tru long niufala kontrak ya. (Rom 2:29) Long Baebol, Luk i raetemdaon stamba tingting blong God we i ‘kamtru long ol man we oli no laen blong Isrel blong tekemaot sam long olgeta, blong oli holem nem blong hem.’ (Ol Wok 15:14) Vas blong 1 Pita 2:10 i talem se ‘fastaem oli no man blong God, be naoia oli kam man blong hem finis.’ Baebol i singaot olgeta se “Isrel blong God,” i minim se, Isrel long saed blong spirit. (Galesia 6:​16,  NW ; 2 Korin 1:21) Taswe niufala kontrak ya, hem i wan kontrak bitwin Jeova God mo Isrel long saed blong spirit.

Long laswan naet we Jisas i stap wetem ol disaepol blong hem, hem i mekem wan narafala kontrak wetem olgeta. Hem i talem long olgeta se: “Mi mi mekem wan kontrak wetem yufala, olsem we Papa blong mi i mekem wan kontrak wetem mi, from wan kingdom.” (Luk 22:​29, NW ) Hemia kontrak blong Kingdom. Bambae i gat 144,000 man we oli tekpat long kontrak blong Kingdom ya. Afta we oli ded bambae oli laef bakegen long heven, mo oli rul wetem Kraes olsem ol king mo pris. (Revelesen 5:​9, 10; 14:​1-4) Taswe, ol man we oli insaed long niufala kontrak wetem Jeova God, oli tekpat long kontrak blong Kingdom wetem Jisas Kraes tu. Olgeta nomo oli gat raet blong kakae bred mo dring waen taem yumi selebretem Lodsapa.

?Olsem wanem ol man we oli gat raet blong kakae bred mo dring waen long Memoriol oli save we oli gat wan spesel fasin fren wetem God, mo se oli joen wetem Kraes? Pol i eksplenem samting ya, i se: “Spirit ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we hem i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.”​—Rom 8:​16, 17.

Tru long tabu spirit, God i mekem ol man we oli joen wetem Kraes oli tabu. Taswe ol man ya oli sua we oli joen long Kingdom. From samting ya, ol tabu Kristin oli gat hop blong laef long heven. Evri samting we Baebol i talem long saed blong laef long heven, oli harem olsem se i blong olgeta nomo. Antap long samting ya, oli rere blong lego evri samting long wol ya, wetem laef blong olgeta mo ol fren mo famle blong olgeta. Ol tabu Kristin ya oli save we laef long Paradaes long wol bambae i nambawan, be nating se i olsem, hop blong olgeta i defren. (Luk 23:​43, NW ) Hop blong olgeta i blong laef long heven, mo hop ya i no stanap long wan rong tijing blong skul, be i stanap long wok blong tabu spirit blong God. Taswe, i stret nomo we oli kakae bred mo dring waen long Memoriol.

Tingbaot wan man we i no sua fulwan se hem i tekpat long niufala kontrak mo kontrak blong Kingdom. ?Olsem wanem sipos tabu spirit i no putum long tingting blong hem we hem tu i joen wetem Kraes? Sipos i olsem, i rong we man ya i kakae bred mo i dring waen long Memoriol. Yes, God bambae i harem nogud tumas sipos wan man i soem se hem i gat hop blong laef long heven olsem king mo pris, be man ya i no rili sua se hop ya i blong hem.​—Rom 9:16; Revelesen 22:5.

?Hamas Taem Long Wan Yia Yumi Mas Selebretem Lodsapa?

?Yu ting se yumi mas selebretem ded blong Jisas evri wik, no maet evri dei? Jisas i stanemap Lodsapa mo hem i ded long fasin we i no stret, long dei blong Pasova. Pasova i wan lafet blong ol man Jiu blong rimemba taem ya we Jeova i mekem olgeta oli fri long Ijip, mo oli mekem lafet ya wan taem long wan yia, long Naesan 14. (Eksodas 12:​6, 14; Levitikas 23:5) Taswe, wan taem evri yia, yumi mas selebretem ded blong ‘Kraes we i olsem smol sipsip blong yumi blong Pasova,’ be i no wan taem long wan wik no wan taem long wan dei. (1 Korin 5:7) Taem ol Kristin oli selebretem Lodsapa, oli folem eksampol blong Kraes taem hem i stanemap spesel lafet ya.

?Sipos i olsem, wanem mining blong ol tok blong Pol se: “Taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta blong yumi, gogo hem bambae i kambak bakegen”? (1 Korin 11:26) Long vas ya Pol i talem se evri taem we ol tabu Kristin oli kakae bred no oli dring waen, oli stap talemaot bilif blong olgeta long ransom sakrefaes blong Jisas.

 Ol tabu Kristin oli mas selebretem ded blong Kraes “gogo hem bambae i kambak bakegen.” Oli mas gohed blong mekem spesel lafet ya gogo Jisas i “kambak bakegen” blong tekem ol tabu man oli go long heven. Long taem ya bambae hem i mekem olgeta oli laef bakegen olsem ol spirit man. (1 Tesalonaeka 4:​14-17) Samting ya i laenap wetem ol tok blong Jisas long ol 11 aposol we oli stap tru long hem se: “From we mi go blong mekemrere ples blong yufala bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”​—Jon 14:3.

?Olsem Wanem Memoriol i Joen Wetem Laef Blong Yu?

?Yumi mas kakae bred mo dring waen long Memoriol blong kasem ol blesing from sakrefaes blong Jisas, mo blong gat hop blong laef olwe long wol? Nogat. Baebol i tokbaot plante man mo woman we oli onagud long God, olsem Noa, Ebraham, Sera, Aesak, Rebeka, Josef, Moses, mo Deved, be hem i neva talem we ol man ya bambae oli kakae bred mo dring waen taem oli laef bakegen long wol. Nating se i olsem, ol man ya wetem ol narafala we oli wantem laef foreva long wol, bambae oli mas soemaot we oli bilif long God mo long Kraes, mo long rod we God i mekem blong sevem ol man tru long ransom sakrefaes blong Jisas. (Jon 3:36; 14:1) Blong kasem laef we i no save finis, yu tu yu mas soemaot bilif. Sipos yu stap long lafet ya blong selebretem ded blong Kraes, bambae samting ya i pulum yu blong rimemba nambawan sakrefaes ya, mo bambae i mekem fasin tangkiu blong yu i kam dip moa.

Aposol Jon i makem we sakrefaes blong Jisas i impoten tumas, taem hem i talem se: “Mi mi stap raetem ol tok ya i kam long yufala [ol narafala tabu Kristin] blong blokem yufala, blong yufala i no mekem sin. Be sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.” (1 Jon 2:​1, 2) I stret we ol tabu Kristin oli talem se sakrefaes blong Jisas i karemaot ol sin blong olgeta. !Be sakrefaes blong Jisas i karemaot ol sin blong olgeta man long wol tu, taswe ol man we oli obei long God oli save kasem laef we i no save finis!

?Bambae yu yu stap long Eprel 4, 2004, blong rimemba ded blong Jisas? Long fulwol, ol Witnes blong Jeova bambae oli selebretem dei ya long ol haos miting blong olgeta. Sipos yu stap long miting ya, bambae yu glad blong lesin long wan impoten tok we i stanap long Baebol. Bambae tok ya i pulum yu blong rimemba ol gudfala samting we Jeova God mo Jisas Kraes tufala i mekem blong yumi. Mo tu bambae yu haremgud long saed blong spirit from we yu joen wetem ol man we oli gat tangkiu long God mo long Kraes mo long ransom sakrefaes blong Jisas. Spesel lafet ya i save pulum yu blong wantem kasem ol blesing we God i givim long gladhat blong hem, we i save lidim yu long laef we i no save finis. Plis, no letem wan samting i blokem yu. Yu mas stap long spesel lafet ya we i givim ona long Papa blong yumi long heven, Jeova God, mo i mekem hem i glad.

[Ol Futnot]

[Tok blong pija long pej 5]

Ded blong Jisas i joen wetem tu bigfala fasin blong soem lav

[Tok blong pija long pej 6]

I stret blong yusum bred we i no gat is long hem mo waen, olsem pija blong bodi blong Jisas we i no gat sin mo blad blong hem we i ron