“Yu Mas Mekem Wok Ya Blong Talemaot Gud Nius”
“Yu Mas Mekem Wok Ya Blong Talemaot Gud Nius”
“Oltaem, nomata wanem samting i kamtru long laef blong yu, be tingting blong yu i mas klia gud. . . . Yu mas mekem wok ya blong talemaot gud nius blong Kraes.”—2 TIMOTI 4:5.
1. ?Wanem oda we Jisas i givim long ol man blong hem?
RAON long wol ol man oli stap harem nem blong Jeova mo ol stamba tingting blong hem. Nius blong samting ya i goraon from we ol man we oli givim laef blong olgeta i go long God oli folem oda ya we Jisas Kraes i givim long ol man blong hem se: “Yufala i mas go . . . blong pulum [ol man] oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.
2. ?Timoti we hem i wan elda i kasem wanem tok, mo wanem wan rod we ol Kristin elda oli folem blong finisim gud olgeta wok ya we God i givim?
2 Ol disaepol blong Jisas long faswan handred yia oli tinghevi long oda ya. Eksampol, aposol Pol i leftemap tingting blong Kristin elda ya Timoti i se: “Yu mas mekem wok ya blong talemaot gud nius blong Kraes, mo yu mas finisim olgeta wok ya we God i givim long yu blong mekem.” (2 Timoti 4:5) Tede, wan elda i save finisim gud olgeta wok ya we God i givim long hem sipos hem i strong long wok blong talemaot Kingdom, hemia se i joen oltaem long wok blong prij. Eksampol, brata we i lukaot long wan long ol Buk Stadi long kongregesen i gat nambawan blesing ya blong lidim wok blong prij mo trenem ol narafala. Pol i mekem wok blong hem fulwan blong talemaot gud nius, mo hem i trenem ol narafala blong olgeta tu oli naf blong mekem wok ya.—Ol Wok 20:20; 1 Korin 9:16, 17.
Sam Man Bifo We Oli Gat Strong Tingting Blong Prij
3, 4. ?Olsem wanem Filip i wok strong long wok ya blong talemaot gud nius?
3 Ol faswan Kristin oli wok strong blong talemaot gud nius. Tingbaot Filip. Hem i wan long ol ‘seven man ya . . . we oli gat gud nem long fes blong ol man . . . we tabu spirit i fulap long olgeta, mo oli waes.’ Ol aposol oli bin jusumaot olgeta ya blong oli mekem wok blong seraotem kakae i go long ol Kristin wido woman long Jerusalem nating we ol woman ya oli toktok lanwis Gris no lanwis blong ol man Isrel. (Ol Wok 6:1-6) Afta long spesel wok ya, trabol we ol man oli mekem agensem ol Kristin i kam bigwan moa mekem se plante Kristin oli ronwe, ol aposol nomo oli stap. Long taem ya, Filip i go long Sameria. Nao hem i stap talemaot gud nius mo tabu spirit i givim paoa long hem blong i ronemaot devel long ol man mo i hilim ol man we leg blong olgeta i nogud, mo i mekem olgeta we haf bodi blong olgeta i ded i kamgud bakegen. Plante man Sameria oli lesin long gud nius blong Kingdom mo oli tekem baptaes. Taem ol aposol long Jerusalem oli harem nius ya, oli sanem aposol Pita mo Jon tufala i go long Sameria blong prea long ol niufala disaepol ya blong tabu spirit i makemaot olgeta.—Ol Wok 8:4-17.
4 Biaen, God i lidim Filip i go long man Itiopia ya long rod we i go long Gasa. Filip i eksplenemgud profet tok blong Aesea long man ya, nao man ya we hem i “wan haeman blong kwin blong Itiopia,” i bilif long Jisas Kraes mo i tekem baptaes. (Ol Wok 8:26-38) Ale, afta long hemia, Filip i go long Asdod, mo biaen bakegen hem i folem rod i go, i stap talemaot gud nius long olgeta taon gogo kasem Sisaria. (Ol Wok 8:39, 40) !Tru hem i soem wan gudfala eksampol long wok blong talemaot gud nius!
5. ?Ol man oli savegud fofala gel blong Filip from wanem samting?
5 Samwe long 20 yia biaen, Filip i stap gohed strong yet long wok blong talemaot gud nius long Sisaria. Taem Pol mo Luk tufala i kam stap long haos blong hem, “hem i gat fo gel blong hem we oli no mared yet, mo we oltaem oli stap talemaot tok we God i givim long olgeta.” (Ol Wok 21:8-10) I sua se Filip i bin tijimgud ol gel blong hem long saed blong spirit, mo oli gat strong tingting blong prij. Mo tu, i luk olsem se oli kasem spesel blesing ya blong talemaot profet tok we God i givim long olgeta. Tru ya, tede tu, strong tingting we ol papa mama oli gat long wok blong prij i save gat paoa long ol pikinini blong olgeta mo i save pulum ol pikinini ya blong wantem yusum ful laef blong olgeta long wok blong prij.
Ol Man Blong Talemaot Gud Nius Tede
6. ?Wanem gudfala frut we ol man blong talemaot Kingdom oli kasem long faswan handred yia?
6 Taem Jisas Kraes i givim bigfala profet tok ya long saed blong taem blong yumi, we hem i taem blong en, hem i talemaot se: “Gud nius ya i mas go long olgeta man long wol fastaem.” (Mak 13:10) En bambae i kam nomo afta we gud nius ya i go kasem “olgeta ples long wol.” (Matiu 24:14) Taem Pol mo ol narafala Kristin blong faswan handred yia oli stap gohed blong talemaot gud nius, plante moa man oli bilif, mo plante niufala kongregesen oli stanap long olgeta kantri ya we Rom i rul long olgeta. Ol elda we oli gat wok blong lukaot long ol kongregesen oli joen wetem ol brata mo sista blong olgeta blong talemaot gud nius mo oli mekem se wok blong prij i go kasem plante ples farawe. Tok blong Jeova i goaot moa mo i stap kam strong moa oltaem. Sem samting i stap hapen tede from we plante milian Witnes blong Jeova oli stap mekem wok blong talemaot gud nius. (Ol Wok 19:20) ?Yu yu tekem disisen finis blong joenem ol hapi man ya we oli stap presem Jeova?
7. ?Ol man blong talemaot Kingdom tede oli stap mekem wanem?
7 Plante man blong talemaot Kingdom tede oli tekem evri janis we oli gat blong spenem moa taem long wok blong prij. Plante taosen long olgeta oli joen long wok blong misinari, plante taosen moa oli joen long wok blong haftaem no fultaem paenia. Mo plante narafala man, woman, mo pikinini oli stap mekem nambawan wok olsem ol pablisa blong talemaot Kingdom. Yes, olgeta man blong Jeova oli harem gud long ol blesing blong hem taem oli wok tugeta long Kristin wok blong prij.—Sefanaea 3:9.
8. ?Wanem wok ya i stap gohed tede blong putum mak long ol man, mo hu i stap mekem wok ya?
8 God i givim wok long ol tabu man blong Jisas blong olgeta nao oli talemaot gud nius long olgeta ples blong wol. “Ol narafala sipsip” blong Kraes, olgeta tu oli joen long wok ya blong prij, mo namba blong olgeta ya i stap gru oltaem. (Jon 10:16) Profet tok blong Baebol i talem se wok ya we i blong sevem laef blong ol man, i olsem we i putum mak long fored blong olgeta man we oli stap harem nogud from ol samting nogud ya we i stap hapen long wol. I no longtaem, ol nogud man bambae oli lus. !Be bifo we samting ya i hapen, yumi gat nambawan janis ya blong karem trutok i go long olgeta man blong wol blong sevem laef blong olgeta!—Esikel 9:4-6, 11.
9. ?Olsem wanem blong givhan long ol niuwan long wok blong prij?
9 Sipos yumi bin mekem wok blong prij blong longtaem lelebet, ating yumi naf blong halpem ol niuwan insaed long kongregesen. Wanwan taem, ating yumi save askem olgeta blong oli folem yumi long wok blong prij. I gud sipos ol brata we oli elda oli traem mekem bes blong olgeta blong halpem ol brata blong olgeta blong oli gru long saed blong spirit. Bigfala traehad blong ol elda we oli gat tingting daon i save givhan bigwan long ol narafala blong olgeta tu oli wok strong mo karem frut long wok blong prij.—2 Pita 1:5-8.
Prij Long Ol Haos Wanwan
10. ?Wanem eksampol we Jisas Kraes mo ol man blong hem oli soem long saed blong wok blong prij?
10 Jisas Kraes i soem wan nambawan eksampol long ol man blong hem long saed blong wok blong prij. Baebol i tokbaot wok blong Jisas mo ol aposol blong hem i se: “Jisas i stap wokbaot, i stap pas long ol taon mo long ol vilej. Hem i stap prij, mo i stap talemaot gud nius ya we God i stap kam King blong ol man blong hem. Mo long taem ya ol twelef man blong hem oli stap biaen long hem.” (Luk 8:1) ?Be olsem wanem long ol aposol? Afta we tabu spirit i kamdaon long olgeta long Pentekos 33 K.T., “evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.”—Ol Wok 5:42.
11. ?Folem ol tok blong Ol Wok 20:20, 21, aposol Pol i mekem wanem long wok blong prij?
11 From we aposol Pol i wok strong long wok blong talemaot gud nius, hem i save talem long ol Kristin elda blong Efesas se: “Taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala.” ?Taem Pol i talem se hem i stap ‘tij long ol haos’ hem i minim haos blong ol brata sista blong hem we oli wosip finis long Jeova, olsem we wan elda i go visitim wan Kristin brata blong leftemap tingting blong hem? Nogat, from we hem i gohed blong talem se: “Long fes blong ol laen blong Isrel mo long fes blong ol narafala man, mi mi stap talemaot ol trutok long olgeta. Mi talem stret long olgeta, se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.” (Ol Wok 20:20, 21) Olgeta we oli givim laef i go long Jeova finis, oli no nid we man i tijim olgeta bakegen se “oli mas tanem tingting blong olgeta from ol sin blong olgeta blong kam long God, mo oli mas bilif long Jisas.” Nogat. Pol i tijim ol Kristin elda long Efesas blong oli mekem wok blong prij long haos blong ol man, be hem i tijim ol man we oli no Kristin yet, se oli mas tanem tingting blong olgeta from sin blong olgeta mo oli mas bilif. Taem Pol i mekem samting ya, hem i folem fasin we Jisas hem wan i bin stanemap.
12, 13. ?Folem ol tok blong Filipae 1:7, ol man blong Jeova oli bin mekem wanem blong kasem raet blong prij?
12 Wok blong prij long ol haos wanwan i no isi. Sam man oli kros taem yumi kam long haos blong olgeta blong tokbaot Baebol. Yumi no wantem mekem man i kros. Be yumi go prij from we Baebol i talem se yumi mas mekem olsem, mo tu from we yumi lavem God mo ol man raonabaot long yumi. Samting ya nao i pusum yumi blong go prij long ol haos wanwan. (Mak 12:28-31) Blong ‘blokem ol enemi blong gud nius mo mekem we gud nius ya i stanap strong long saed blong loa,’ samtaem yumi bin karem bisnes ya i go long kot, wetem Saprim Kot blong Yunaeted Stet tu. (Filipae 1:7, NW ) Klosap evri taem kot ya i tekem disisen we i long saed blong yumi. Hemia wan tok we yumi harem plante taem long kot ya se:
13 “Fasin blong givimaot ol pepa blong jos i wan wei blong talemaot gud nius we ol misinari oli yusum longtaem finis i kam. Hem i stat longtaem finis, olsem we fasin blong wokem ol mesin blong prentem buk i stat longtaem finis. Long ol handred yia we oli pas, fasin ya i bin gat bigfala paoa blong pulum plante man oli kam long ol jos. Tede yet i gat man i stap yusum fasin ya blong prij. Olgeta we oli yusum moa fasin ya hemia ol smosmol jos we ol man blong olgeta oli stap wokbaot olbaot blong prijim Gospel long plante taosen haos. Olgeta ya oli visitim ol man long ol haos wanwan from we oli wantem pulum sam man i kam long bilif blong olgeta. . . . Long Faswan Amenmen [long Konstitusen blong Yunaeted Stet] fasin ya [blong prij long ol haos wanwan] i wan wok blong jos we i sem mak nomo long fasin blong wosip mo prij insaed long jos.”—Murdock v. Pennsylvania, 1943.
?From Wanem Yumi Mas Gohed Blong Prij?
14. ?Wanem frut we yumi save kasem taem yumi mekem wok blong prij?
14 I gat plante risen from wanem yumi go prij long ol haos wanwan. Evri taem we yumi prij long wan man blong haos, yumi traem blong planem wan sid blong trutok. Taem yumi gobak blong visitim man ya, i olsem we yumi wantem wasem sid ya blong i gru. Fasin ya i save karem gudfala frut long laef blong man, from we Pol i raetem se: “Mi mi planem sid, Apolos i wasem, be God nomo i mekem i gru.” (1 Korin 3:6, NW ) Taswe yumi mas gohed blong ‘planem mo wasem’ ol sid ya, mo trastem se bambae Jeova i ‘mekem oli gru.’
15, 16. ?From wanem yumi gobak bakegen mo bakegen long haos blong ol man?
15 Yumi talemaot gud nius from we yumi save se laef blong ol man i stap long denja. Wok blong prij i save sevem yumi wan mo olgeta ya tu we oli lesin long yumi. (1 Timoti 4:16) ?Sipos yu save se laef blong wan man i stap long denja, yu ting se bambae yu traem smoltaem nomo blong givhan long hem no bambae yu yusum ful paoa blong yu blong givhan long hem? !Ating bambae yu traehad blong givhan long hem! Yes, from we yumi save sevem laef blong man, taswe yumi gobak bakegen mo bakegen long haos blong olgeta. Laef blong ol man i stap jenis oltaem. Maet long faswan taem we yumi mitim wan man, hem i bisi tumas ale i no lesin, be nekis taem we yumi kam, maet hem i lesin long toktok blong Baebol. Sipos no, maet wan narafala memba blong famle i save openem doa long yumi, mo maet yumi gat janis blong serem tok blong Baebol wetem hem.
16 Laef blong man i save jenis, be i no hemia nomo. Fasin blong man tu i save jenis. Sipos wan man i lusum wan memba blong famle blong hem long ded, maet hem i rere moa blong lesin long gud nius blong Kingdom. Yumi wantem tumas blong mekem man i harem gud mo givhan long man blong luksave se oli nidim ol samting long saed blong spirit, mo blong soem tu long olgeta, olsem wanem oli save kasem samting ya we oli nidim.—Matiu 5:3, 4.
17. ?Wanem bigfala risen we i pusum yumi blong prij?
17 Be faswan bigfala risen from wanem yumi prij long ol haos wanwan, no long eni narafala ples bakegen, hemia se yumi wantem tekpat long wok ya blong mekem ol man oli save long nem blong Jeova. (Eksodas 9:16; Ol Sam 83:18, NW ) !Yumi harem gud tumas taem yumi luk we wok blong prij i halpem ol man we oli lavem trutok mo stret fasin blong oli kam ol man blong presem Jeova! Man blong raetem Sam i singsing se: “Yufala ol gel wetem ol boe, yufala ol ololfala wetem ol pikinini tu, yufala i mas presem hem. Yumi evriwan i mas presem nem blong Hae God. Nem blong hem i hae moa i winim ol narafala nem, mo paoa blong hem i kasem evri ples long heven mo long wol.”—Ol Sam 148:12, 13.
Wok Blong Prij i Givhan Long Yumi Wanwan
18. ?Olsem wanem wok blong prij i halpem yumi?
18 Wok blong prij i save givhan bigwan long yumi wan. Wok blong talemaot gud nius long ol haos wanwan i halpem yumi blong wokem tingting daon, antap moa taem ol man oli no wantem lesin long yumi. Sipos yumi wantem karem frut long wok blong prij yumi mas mekem olsem Pol. ‘Long fes blong ol man we oli gat ol defdefren kaen fasin, Pol i mekem olsem we hem tu i gat sem fasin we olgeta oli gat, blong yusum olgeta rod blong sevem sam long olgeta.’ (1 Korin 9:19-23) Moa we yumi spenem taem long wok blong prij, moa we yumi save olsem wanem blong toktok long man. Taem yumi dipen long Jeova mo yumi jusum gud ol tok we i stret blong talem, yumi mekem advaes ya blong Pol i wok se: “Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan.”—Kolosi 4:6.
19. ?Olsem wanem tabu spirit i stap halpem ol man we oli prij?
19 Wok blong prij i givhan long yumi tu blong trastem moa tabu spirit blong God. (Sekaraea 4:6) Biaen, taem yumi prij, bambae yumi soemaot moa ol frut blong tabu spirit—hemia “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.” (Galesia 5:22, 23, NW ) Taem yumi letem tabu spirit i lidim yumi, yumi save frengud moa wetem ol man from we tabu spirit i halpem yumi blong gat lav, blong stap glad mo holem pis, mo blong gat longfala tingting mo kaen fasin, mo blong soemaot gud fasin wetem bilif. Mo tu, hem i givhan long yumi blong gat kwaet fasin mo bos long tingting blong yumi, taem yumi stap talemaot gud nius ya.
20, 21. ?Wanem sam blesing we yumi kasem taem yumi stap bisi long wok blong prij?
20 Wan narafala blesing we yumi kasem taem yumi talemaot gud nius, hemia se yumi naf moa blong harem save filing blong narafala. I tru, wok blong yumi i no blong givim advaes long saed blong laef. Be taem ol man oli talemaot problem blong olgeta long yumi—olsem sik, no gat wok, no ol wari blong famle laef—yumi save serem sam gudfala vas blong Baebol we oli leftemap tingting blong olgeta mo mekem oli harem gud. Yumi sore long ol man we oli laekem stret fasin be oli blaen long saed blong spirit. (2 Korin 4:4) !Yes, yumi harem gud tumas taem yumi save givim help long saed blong spirit long “olgeta we oli stret blong kasem laef blong olwe”!—Ol Wok 13:48, NW.
21 Taem yumi joen oltaem long wok blong prij, samting ya i halpem yumi blong putum tingting blong yumi i stap oltaem long ol samting long saed blong spirit. (Luk 11:34) Hemia i givhan bigwan long yumi from we sipos i no gat hemia, ating ol sas samting blong wol ya bambae oli pulum yumi. Aposol Jon i talem long ol Kristin se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi. Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:15-17) Taem yumi stap bisi long wok blong talemaot gud nius mo yumi mekem plante wok blong Masta, samting ya i halpem yumi blong no lavem wol ya.—1 Korin 15:58.
Hivimap Ol Gudgudfala Samting Long Heven
22, 23. (a) ?Wanem gudgudfala samting we ol Kristin man blong prij oli stap hivimap? (b) ?Nekis stadi bambae i halpem yumi olsem wanem?
22 Ol blesing we yumi kasem taem yumi wok strong long wok blong talemaot Kingdom, oli stap olwe. Jisas i soemaot samting ya taem hem i talem se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos, blong go insaed blong stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos, blong go insaed blong stil. Mi mi talem olsem, from we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.”—Matiu 6:19-21.
23 I gud yumi gohed blong hivimap ol gudgudfala samting long heven from we yumi luksave se i no gat wan samting we i gud moa i bitim hemia, se yumi wok olsem ol Witnes blong Haefala Masta Jeova. (Aesea 43:10-12) Taem yumi gohed long wok blong prij we God i givim long yumi, maet bambae yumi filim olsem Kristin woman ya we i bitim 90 yia blong hem finis, taem hem i tokbaot olgeta yia we hem i spenem long wok blong God i se: “Mi mi tangkiu bigwan long Jeova from we hem i letem mi mi gohed long wok ya nating se mi gat sam slak fasin. Mo mi prea strong se bambae hem i stap olsem Papa blong mi blong olwe.” Sipos yumi gat tingting ya tu, se fasin fren blong yumi wetem God i sas tumas, bambae yumi wantem mekem wok blong talemaot gud nius fulwan. Nekis stadi bambae i halpem yumi blong luksave olsem wanem yumi save finisim olgeta wok ya we God i givim long yumi blong mekem.
?Bambae Yu Yu Ansa Olsem Wanem?
• ?From wanem yumi mas mekem wok blong talemaot gud nius?
• ?Yu save talem wanem long saed blong wok blong ol man blong prij bifo mo tede?
• ?From wanem yumi go prij long ol haos wanwan?
• ?Olsem wanem wok blong prij i givhan long yu wan?
[Kwestin]
[Tok blong pija long pej 10]
I gat sam man tede we oli talemaot gud nius wetem glad olsem Filip mo ol gel blong hem
[Tok blong pija long pej 14]
?Olsem wanem wok blong talemaot gud nius long ol narafala i givhan long yu wan?