Ol Nambawan Samting We Jeova i Wokem

‘Yu Yu Hae We Yu Hae, Yu Antap Long Ol Bigfala Hil’

SIPOS yu gat janis samtaem blong stap antap long bigfala Hil ya Fuji taem i brok delaet mo san i stap kam antap, bambae yu no save fogetem taem ya. Bambae yu sek taem bigfala san we i red we i red i kamaot wantaem nomo, mo i saen i go long sno we i waetgud mo ol ston blong volkeno we oli sem kala olsem asis blong faea. Yes, wan niufala dei i stat, mo top blong Hil ya Fuji we i sapgud, i mekem wan sado we kwiktaem nomo, i kavremap plante kilomita blong ol hil mo vali.

Tok ya Fuji i min se “i no gat narawan we i olsem hem.” Nating sipos i olsem, be oltaem yumi sapraes long ol bigbigfala hil. !Taem yumi luk we oli hae we i hae, yumi harem se yumi smol tumas, yumi nating nomo! From samting ya, plante man oli ting se ol hil we oli hae moa long ol narawan, mo we smok mo klaod i kavremap top blong olgeta, oli ples blong ol god.

I gat wan God nomo we ol bigbigfala hil oli presem, hemia nambawan Man blong Wokem ol samting, Jeova. “Hem nao i mekem ol hil.” (Amos 4:13) Ol hil oli kavremap klosap 25 pesen blong wol ya. Taem God i wokem wol blong yumi, hem i letem sam samting i hapen we i mekem ol bigbigfala hil mo ol smosmol hil tu oli stanap. (Ol Sam 95:4) Olsem nao, ol man blong hae save oli ting se ol bigbigfala hil blong Himalaya mo Andes oli stanap from sam bigfala jenis we oli hapen daon olgeta, aninit long graon blong wol ya, mo tu, from we graon antap, we ol man oli wokbaot long hem, i mufmuv.

Yumi ol man, yumi no naf blong savegud olsem wanem ol bigfala hil oli stanap. Tru ya, yumi no save ansa long ol kwestin we God i askem long gudfala man ya Job: “?Taem we mi [Jeova] mi mekem wol ya, yu yu stap wea? . . . ?Ol pos ya [we oli holem wol] oli stanap long wanem?”​—Job 38:​4-6.

Be i gat wan samting we yumi kasem save long hem, hemia se yumi nidim ol hil blong yumi save stap laef. Oli olsem ol tang blong wota, from we oli stamba blong ol bigfala reva. Stret haf blong olgeta man long wol oli kasem wota blong olgeta long ol hil. (Ol Sam 104:13) Buk ya New Scientist i talem se: “Long ol 20 kaen kakae we ol man oli nidim moa, sikis i stap gru antap long ol hil.” Long niufala wol, ol samting raonabaot long yumi bambae oli wok tugeta folem prapa rod blong olgeta. Taswe, long taem ya “bambae i gat plante kakae long [wol ya], we bambae ol hil oli fulap gud long hem.”​—Ol Sam 72:16; 2 Pita 3:13.

Tok ya ol bigbigfala hil i mekem plante man oli tingbaot ol Alps blong Yurop. Olgeta ya wetem Hil ya Civetta we yu luk long pija ya, oli soemaot gud paoa blong Bigfala Man we i Wokem olgeta. (Ol Sam 98:8) Yes, ol hil ya oli presem Jeova, we hem nao i ‘stanemap ol bigbigfala hil long paoa blong hem.’​—Ol Sam 65:6. *

Tru ya, ol Alps oli naes tumas, yumi sapraes long olgeta. Aes i kavremap top blong olgeta, sno i stap olbaot long olgeta, plante vali mo lek oli stap long medel blong olgeta, wetem ol naesfala open ples we gras i gringud. King Deved i talem se Jeova nao “i stap mekem gras i gru long ol hil.”​—Ol Sam 147:8.

Ol smosmol hil​—olsem long pija ya blong Guilin, Jaena—​maet oli no mekem yumi sapraes olsem ol Alps, be i gat sam spesel samting we i mekem se olgeta tu oli naes tumas. Ol turis we oli kam long ples ya, oli laekem tumas blong luk ol hil ya we oli laen folem Reva Li. I gat plante laen blong ol bigbigfala waet ston ya we oli folfolem olgeta, mo top blong olgeta  i sap. Sipos yu gat janis samtaem blong luk ol naesfala hil ya we smok i stap raon long olgeta oltaem, wetem ol naesfala krik long medel blong olgeta we wota blong olgeta i klingud, ating bambae yu tingbaot tok blong man we i raetem Sam ya, se: “Yu [Jeova] yu mekem ol springwota oli stap ron long ol krik, mo yu mekem ol reva oli stap ron long medel blong ol hil.”​—Ol Sam 104:10.

I stret nomo we yumi haremgud long ol naesfala hil ya. Yumi luksave se oli wan nambawan samting we Man blong Wokem ol samting i mekem blong soem lav blong hem. Hem i givim ol hil ya long yumi blong mekem i gud long yumi mo blong yumi save haremgud long olgeta. Yes, i tru se yumi sapraes long ol hil ya. Nating se i olsem, be oli smol nomo taem yumi skelem olgeta wetem Jeova. Tru ya, Jeova i hae we i hae, i “antap olgeta long ol bigfala hil.”​—Ol Sam 76:​4, NW.

[Futnot]

[Bokis/Foto blong pija long pej 9]

Ten pesen blong olgeta man long wol oli laef antap long ol bigfala hil. Be ol hil ya oli no blokem ol man we oli stap talemaot gud nius blong Kingdom blong God. Ol Kristin ya oli bisi long wok ya long ol ples antap long ol bigfala hil tu. “I gud tumas blong luk man blong karem tok, we i wokbaot, i kamkros long ol bigbigfala hil, blong kam talemaot gud nius, we i nius blong pis.”​—Aesea 52:7.

Man we i raetem Sam, i singsing se: “Ol bigfala hil i ples blong wael nani.” (Ol Sam 104:18) Yes, plante wael nani oli laef long ol hil, olsem ol Nubian ibex we oli gat ol bigbigfala hon. Olgeta ya oli save wokbaot isi nomo long ol ston mo antap long ol bigfala hil, i bitim ol narafala anamol we oli laef long ol hil ya. Ol wael nani ya oli no fraet blong wokbaot long ol smosmol rod blong bus antap long ol bigfala klif, ol ples we i luk olsem se oli no naf nating blong wan anamol i pas long olgeta. Ibex i nafgud blong laef long ol ples we oli had tumas, mo we man i no save go long olgeta. Leg blong ibex nao i mekem se hem i save stap long ol ples ya. Leg blong hem daon i gat tu haf blong hem, nao taem hem i purumbut long graon, hol long medel blong tufala haf ya i kam bigwan, mekem se nani ya i save holemgud ston we i stap stanap no wokbaot long hem. !Tru ya, Jeova i wokem ibex folem wan nambawan plan!

[Tok blong pija long pej 9]

Bigfala Hil ya Fuji, Honshu, Japan