666—Hem i No Jes Wan Tok Haed

“Mak ya, hem i nem blong anamol ya, no i namba we i stanap blong talem nem ya blong hem. Man we i no gat mak ya long hem, hem i no save pem wan samting, mo i no save salem wan samting. Samting ya, man i mas gat waes blong i save. Man we i gat save, hem i save faenemaot mining blong namba blong anamol ya, from we namba ya i saen blong nem blong wan man. Hemia namba ya, 666.”​—Revelesen 13:​17, 18.

PLANTE we plante man oli intres long profet tok we i tokbaot mak, no nem blong “wael anamol” ya we i olsem wan tok haed​—hemia namba 666. Long televisin mo long Intenet, long ol sinema, ol buk, mo ol magasin, oli talem fulap defdefren mining blong wael anamol ya.

Sam man oli bilif se namba ya 666 hem i mak blong enemi blong Kraes, no antikraes, we Baebol i tokbaot. Sam narafala oli talem se hem i pija blong wan mak we ol man we oli wok blong wael anamol ya oli mas gat, olsem wan tatu no wan smosmol pis aean we i gat namba long hem we oli planem samples long bodi blong man, aninit long skin. I gat sam narafala man we oli talem se namba ya 666 hem i mak blong ol pop blong Katolik Jos. Oli tekem stret taetel blong pop, hemia Vicarius Filii Dei (we i minim se Pris blong Pikinini blong God), oli karemaot ol leta mo oli putum ol namba blong ol man Rom long ples blong ol leta ya, nao oli jenjenisim ol namba ya gogo oli kasem namba ya 666. Oli talem se sipos oli yusum sem fasin ya long nem blong Hedgavman blong ol man Rom, Diocletian, long lanwis Latin, mo long nem blong Nero Sisa long lanwis Hibru, bambae oli kasem namba ya 666 bakegen. *

Ol defdefren bilif ya oli kamaot long tingting blong man nomo, mo oli no laenap wetem samting we Baebol i talem long saed blong mak blong wael anamol. Haf we i kam biaen i givim tingting blong Baebol. Baebol i talem se ol man we oli gat mak blong wael anamol, bambae oli kasem kros blong God taem hem i spolemgud wol ya. (Revelesen 14:​9-11; 19:20) Taswe, i impoten tumas blong save stret mining blong namba ya 666, i no jes blong faenemaot nomo mining blong wan tok haed. Yumi glad we Jeova God, we hem i lav mo i givim laet long saed blong spirit, i givim save long ol man blong hem long saed blong impoten namba ya.​—2 Timoti 3:16; 1 Jon 1:5; 4:8.

[Futnot]