Dipen Long Spirit Blong God Blong Stanap Strong Taem Laef i Jenis

“Yu mas traehad long evri rod, blong yu kam prapa man blong wok we God i stap harem gud long yu.”​—2 TIMOTI 2:15.

1. ?Wanem ol jenis we oli save traem yumi long saed blong spirit?

 OL SAMTING long wol raonabaot long yumi oli jenis oltaem. Yumi sapraes blong luk olsem wanem save blong man i stap kam antap bigwan long saed blong sayens mo teknoloji, mo long semtaem ol gudfala fasin oli stap lus we klosap oli lus fulwan. Olsem yumi luk finis long faswan stadi, ol Kristin oli mas faet agensem spirit blong wol ya we i sakemaot God. Be taem ol samting long wol ya oli stap jenis, laef blong yumi tu i stap jenis. Fastaem yumi pikinini be naoia yumi bigman. Maet yumi gat mane no maet yumi faenem i had blong kasem mane. Maet yumi gat gudfala bodi, no maet yumi sik. Maet naoia yumi gat prapa famle blong yumi no maet yumi lusum sam memba blong famle. Plante long ol jenis ya oli samting we yumi no save blokem. Mo oli save traem yumi bigwan long saed blong spirit.

2. ?Olsem wanem laef blong Deved i jenis?

² Tingbaot Deved, pikinini boe blong Jese. Ating i  no gat plante man we laef blong olgeta i jenis bigwan olsem laef blong Deved. Fastaem Deved i wan yangfala boe we i stap lukaot long ol sipsip, i no gat man i save long hem. Be wantaem nomo hem i kam wan jampion long kantri blong hem. Biaen, hem i mas ronwe mo haed from we king i jalus long hem mo i wantem kilim hem i ded. Afta long hemia, Deved i kam king mo wan strong man blong faet. Hem i kasem trabol from wan bigfala sin we hem i mekem. Hem i harem nogud taem ded i kasem sam famle blong hem mo i luk we famle blong hem i seraot. Hem i kam wan rij man, nao hem i kam olfala, mo i harem nogud long sik blong olfala. Yes, plante jenis i hapen long laef blong Deved, be oltaem long laef blong hem, hem i dipen long Jeova mo tabu spirit, mo hem i gat tras tu long Jeova mo tabu spirit. Hem i traehad blong mekem we ‘God i stap harem gud long hem,’ mo from samting ya, God i blesem hem. (2 Timoti 2:15) Nating se laef blong yumi i defren long laef blong Deved, be yumi save lanem plante samting long fasin we hem i mekem taem hem i fesem ol defdefren traem long laef. Eksampol blong hem i save halpem yumi blong kasem save olsem wanem yumi save kasem help blong spirit blong God taem yumi fesem ol jenis long laef blong yumi.

Tingting Daon Blong Deved ​—Wan Gudfala Eksampol

3, 4. ?Olsem wanem Deved i finis long wok blong lukaot long sipsip mo i kam wan jampion long kantri blong hem?

³ Yangfala Deved i no wan boe we i gat hae nem. Famle blong hem tu oli no tingbaot hem olsem se hem i hae. Taem profet Samuel i kam long Betlehem, papa blong Deved i soem seven long ol eit boe blong hem long Samuel. Hem i no soem lasbon boe blong hem Deved, i livim hem nomo i stap lukaot long ol sipsip. Be Jeova i jusum Deved blong i kam nekis king blong Isrel. Ale, oli singaot Deved i kam. Nao stori long Baebol i talem se: “Profet [Samuel] i tekem olifoel, i kafsaedem i go long hed blong hem blong makemaot hem. Hem i mekem samting ya long fes blong ol brata ya blong hem, mo wantaem nomo, Spirit blong Hae God i kam long Deved, i holem hem, mo i stat long dei ya, Spirit ya i stap oltaem long hem.” (1 Samuel 16:​12, 13) Deved i dipen long spirit ya long ful laef blong hem.

⁴ I no longtaem, yangfala boe ya we i stap lukaot long ol sipsip bambae i kam wan jampion long kantri blong hem. Oli singaot hem i go wok blong king mo i plei miusik blong king ya. Hem i kilim bigfala man ya Golaeat. Golaeat i wan strong man blong faet we ol soldia blong Isrel oli fraet tumas long hem, nating se oli ol gudfala man blong faet. Ale, oli putum Deved blong i lidim ol soldia blong king, hem i go mekem faet agensem ol man Filistia mo i win. Ol man oli laekem Deved tumas. Oli wokem sam singsing blong presem hem. Bifo long ol samting ya, taem wan advaesa blong King Sol i tokbaot yangfala Deved se “hem i save plei gud” long gita, hem i talem tu se Deved i ‘wan gudfala soldia we i no save fraet, fes blong hem i naes, mo hem i save toktok gud.’​—1 Samuel 16:18; 17:​23, 24, 45-51; 18:​5-7.

5. ?Wanem samting i save mekem we Deved i kam praod, mo olsem wanem yumi save se hem i no gat tingting olsem?

⁵ Hem i wan jampion, hem i gat naesfala fes, hem i yangfala, hem i save toktok gud, hem i save plei miusik, hem i wan gudfala soldia, mo God i glad long hem. Yes Deved i gat olgeta samting we hem i wantem long laef. Ol samting ya oli save mekem we hem i tinghae long hem wan, be hem i no gat tingting ya nating. Tingbaot tok we Deved i talem long King Sol taem King ya i wantem givim gel blong hem blong i mared wetem Deved. Wetem tingting daon, Deved i talem se: “Mifala i no wan bigfala famle, mo mi mi no wan haeman. Mi no naf blong tekem dota blong yu.” (1 Samuel 18:18) Wan man blong save i tokbaot vas ya i se: “Deved i minim se, nomata wanem samting we hem i gat gudhan blong mekem, no wanem gudnem we hem i gat, no hu ya ol bubu blong hem, be hem i no ting se hem i naf blong kasem ona ya blong kam olsem palika blong king.”

6. ?From wanem yumi mas lanem blong gat tingting daon?

⁶ Deved i gat tingting daon from we hem i luksave se long saed blong evri samting, Jeova i hae moa long ol man. Deved i sapraes se God i tingbaot man. (Ol Sam 144:3) Deved i  luksave tu se sipos hem i kam wan jampion, hemia from we Jeova i soem tingting daon blong givhan mo lukaot long hem. (Ol Sam 18:35) !Hemia wan gudfala lesen blong yumi! Sipos yumi gat gudhan blong mekem wan wok, no sipos yumi kasem sam samting long laef blong yumi, no sipos yumi kasem sam tiokratik wok, yumi neva mas kam praod. Aposol Pol i raetem se: “?Yufala i gat sam samting blong yufala we God i no givim long yufala? !Nogat! ?Be weswe yufala i stap tok flas from ol samting ya we God i givim long yufala, olsem we oli blong yufala fastaem?” (1 Korin 4:7) Blong kasem tabu spirit blong God mo blong mekem God i glad long yumi, yumi mas lanem blong gat tingting daon mo holem fasin ya oltaem.​—Jemes 4:6.

“Yufala i No Givimbak”

7. ?Wanem janis we Deved i kasem blong kilim King Sol i ded?

⁷ Deved i no kam praod from we hem i wan jampion, be King Sol nao i kam jalus long Deved. Spirit blong God i no moa stap long King Sol, ale jalus blong hem i pulum hem blong wantem kilim Deved i ded. Nating se Deved i no mekem wan rong, be hem girap, i ronwe i go stap long draeples. King Sol i stap traehad blong kasem Deved. Ale, wan taem, King ya i go insaed long wan hol blong ston, be hem i no save se Deved mo ol man blong hem oli stap haed insaed long hol ya. Ol man blong Deved oli talem long hem se hem i mas tekem janis ya blong kilim Sol i ded, oli se hemia wan janis we God nao i givim. Oli stap haed long tudak, oli toktok smosmol long Deved se: “!E, hemia nao janis blong yu! Hae God i talem long yu finis, se bambae hem i putum enemi ya blong yu long han blong yu, blong yu save mekem long hem olsem we yu yu wantem.”​—1 Samuel 24:2-6.

8. ?From wanem Deved i jusum blong no givimbak?

⁸ Deved i no wantem givim kil long Sol. Hem i gat bilif mo longfala tingting, taswe hem i glad nomo blong livim bisnes ya i stap long han blong Jeova. Afta we king i goaot long hol blong ston ya, Deved i singaot i go long hem, i se: “!Hae God nomo bambae i jajem yumitu, se hu long yumitufala i rong! !Be prea blong mi we hem bambae i panisim yu from ol samting ya we yu stap mekem agens long mi, from we mi bambae mi no save mekem wan samting nating blong spolem yu!” (1 Samuel 24:12) Deved i save se Sol nao i rong. Be hem i no gat tingting blong givimbak. Hem i no tok nogud long Sol mo i no tokbaot Sol long ol narafala man se hem i nogud. Nogat. Long plante narafala taem bakegen, Deved i jusum blong no tekem aksin folem prapa tingting blong hem wan. Defren olgeta, hem i dipen long Jeova se hem nao bambae i stretem ol samting.​—1 Samuel 25:​32-34; 26:​10, 11.

9. ?From wanem yumi no mas givimbak long man we i agensem yumi no maet i givim kil long yumi?

⁹ Maet samtaem yu yu olsem Deved we i fesem plante trabol long laef blong hem. Maet ol fren long skul, ol man long ples blong wok, ol famle, no sam narafala man we oli no gat bilif olsem yu, oli agensem yu no maet oli givim kil long yu tu. Yu no givimbak. Yu mas wet long Jeova mo yu mas askem hem blong halpem yu wetem tabu spirit blong hem. Maet olgeta ya we oli agensem yu bambae oli sapraes long  gudfala fasin blong yu mo maet oli kam long trutok. (1 Pita 3:1) Nomata wanem samting i hapen, yu mas sua fulwan se Jeova i stap luk trabol blong yu mo bambae hem i mekem wan samting long stret taem blong hem. Aposol Pol i raetem se: “Sipos wan man i spolem yufala, bambae yufala i no givimbak fasin ya long hem bakegen. Yufala i mas livim hem i stap, blong God bambae i jajem hem, i givim panis long hem, from we Baebol i talem se, ‘Hae God i talem se, “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.” ’ ”​—Rom 12:19.

‘Lesin Long Ol Tok We i Stap Stretem Yu’

10. ?Olsem wanem Deved i foldaon long sin, mo hem i mekem wanem blong traem haedem sin ya?

¹⁰ Ol yia oli pas. Nao Deved i kam wan king we ol man long plante ples oli save long hem mo oli tinghae long hem. Long laef blong hem, hem i holem strong long God, mo hem i raetem plante naesfala Sam blong presem Jeova. Ol samting ya maet oli mekem yumi ting se, neva man ya i save mekem wan bigfala sin. Be si, hem i sin bigwan. Wan dei, king ya i stap antap long ruf blong haos blong hem mo i luk wan naesfala woman i stap swim. Hem i askem ol man se hu ya woman ya. Ale oli talem long hem se woman ya hemia Batseba mo man blong hem Uria i stap wetem ol narafala soldia, oli stap long faet. Nao Deved i askem ol man blong oli tekem woman ya i kam, mo i slip wetem hem. Biaen, hem i faenemaot se woman ya i gat bel. !Sipos ol man oli harem stori ya bambae Deved i lusum gudnem blong hem! Long Loa blong Moses, man i mas ded sipos hem i stilim hasban no waef blong narafala. Maet King Deved i ting se bambae hem i save haedem sin ya. Ale hem i sanem toktok i go long kapten blong ami, se Uria i mas kambak long Jerusalem. Deved i wantem we Uria bambae i go slip wetem Batseba, be Uria i no mekem olsem. Naoia tingting blong Deved i wok moa. Hem i sanem Uria i gobak long faet wetem wan leta we hem i go givim long Joab, kapten blong ami blong olgeta. Leta ya i talem se oli mas putum Uria long ples we faet i strong moa, olsem nao bambae Uria i ded. Joab i mekem olsem we leta ya i talem, nao Uria i ded. Ale, taem Batseba i finis blong krae from man blong hem, Deved i tekem hem i kam woman blong hem.​—2 Samuel 11:​1-27.

11. ?Wanem stori we Natan i talem long Deved, mo Deved i mekem wanem taem hem i harem stori ya?

¹¹ Deved i ting se hem i haedem gud sin ya blong hem, be hem i no tingbaot se Jeova i luk evri samting we i hapen. (Hibrus 4:13) Ol manis oli pas nao bebi blong Batseba i bon. Ale God i sanem profet Natan i kam luk Deved. Profet ya i talemaot wan stori long king. Stori ya hem i long saed blong wan rijman we i gat plante sipsip blong hem, be hem i girap i go kilim i ded wan sipsip ya nomo we wan puaman i gat. Stori ya i mekem Deved i kros from we hem i luk se rijman ya i mekem i no stret long puaman ya. Be hem i no luksave nating se i gat wan mining i stap biaen long stori ya. Kwiktaem nomo Deved i jajem rijman ya. Hem i kros we i kros, i talem long Natan se: !“Man we i mekem samting ya, i stret blong hem i ded”!​—2 Samuel 12:​1-6.

12. ?Wanem jajmen we Jeova i talemaot agensem Deved?

¹² Wantaem nomo profet ya i talem long Deved se: “!Be yu nao yu man ya!” Tru ya, taem Deved i jajem rijman ya hem i jajem hem wan bakegen. Ating Deved i sek taem hem i kasem mining blong stori ya, nao kros blong hem i lus, hem i sem bigwan mo i sore we i sore bigwan. Hem i no moa toktok, i stap lesin nomo long jajmen blong Jeova we Natan i talemaot long hem. Natan i no talem wan tok nating blong leftemap tingting blong Deved. Yes, taem Deved i sin hem i mekem olsem we tok blong Jeova i samting nating nomo. Hem i yusum ol enemi blong i kilim Uria i ded. From samting ya, ded bambae i kasem famle blong Deved tu. Hem i tekem woman blong Uria  long fasin haed. From samting ya, bambae hem i kasem trabol ya tu be long klia ples blong olgeta man oli luk.​—2 Samuel 12:​7-12.

13. ?Deved i mekem wanem taem Jeova i stretem hem?

¹³ Wan gudfala samting we Deved i mekem long taem ya, hemia se hem i no traem mekem eskius from sin blong hem. Hem i no faerap long kros mo agensem profet Natan. Hem i no putum fol long narafala man mo i no traem faenem sam kaen eskius from samting we hem i mekem. Naoia we ol sin blong hem oli kam long klia ples, Deved i rere blong kasem panis from, hem i se: “Mi mi bin mekem wan samting we i nogud olgeta, i agens long Hae God.” (2 Samuel 12:13) Ol tok blong Sam namba 51 i soem se tingting blong Deved i stikim hem bigwan mo hem i rili sore from sin blong hem. Hem i krae i go long Jeova i se: “Plis yu no ronemaot mi mi gowe long yu, mo yu no tekemaot Tabu Spirit blong yu i gowe long mi.” Hem i save se Jeova i gat bigfala sore, mo hem i no save “tanem baksaed long man we i tanem tingting blong hem mo i putum hem i stap daon.” (Ol Sam 51:​11, 17) Deved i gohed blong trastem spirit blong God. Jeova i no blokem ol nogud frut we oli kamaot from sin blong Deved, be hem i fogivim Deved.

14. ?Yumi mas mekem wanem taem Jeova i stretem yumi?

¹⁴ Yumi evriwan i sinman, mo yumi evriwan i mestem samtaem. (Rom 3:23) Maet yumi mekem wan bigfala sin olsem Deved i mekem. Olsem wan papa we i gat lav i stap stretem ol pikinini blong hem, Jeova tu i stap stretem olgeta we oli wantem mekem wok blong hem. Fasin stretem i wan samting we i save givhan bigwan long yumi, be hem i no wan samting we i isi blong akseptem. I tru, samtaem, fasin stretem i save “mekem we yumi harem nogud.” (Hibrus 12:​6, 11) Be sipos yumi ‘lesin long ol tok we oli stap stretem yumi,’ bambae yumi save frengud wetem Jeova bakegen. (Ol Proveb 8:​33, NW ) Sipos yumi wantem we spirit blong Jeova i stap oltaem long yumi, yumi mas letem man i stretem yumi mo traehad blong mekem we God i harem gud long yumi.

No Putum Tingting Blong Yufala Long Mane

15. (a) ?Sam man oli yusum mane blong olgeta olsem wanem? (b) ?Deved i wantem yusum mane blong hem olsem wanem?

¹⁵ Baebol i no talem se Deved i kamaot long wan famle blong ol haeman no se famle blong hem i rij. Be taem hem i king, hem i kam rij we i rij. Yumi luk finis we, tede, plante man we oli gat mane oli stap griri long mane blong olgeta, no maet oli lukaot rod blong winim moa mane oltaem, no maet oli spenem mane ya long ol samting we olgeta nomo i wantem. Sam man we oli gat mane oli yusum samting ya blong leftemap olgeta wan. (Matiu 6:2) Deved i yusum mane blong hem long defren rod. Hem i wantem tumas blong presem Jeova. Hem i talemaot tingting blong hem long Natan se hem i wantem wokem wan haos prea blong Jeova, we bambae oli save putum bokis blong kontrak long hem. Long taem ya, bokis ya i stap long “wan haos tapolen nomo.” Jeova i glad long gudfala tingting ya blong Deved, be hem i yusum Natan blong talem long Deved se wok ya blong bildim haos prea bambae i stap long han blong pikinini blong Deved, hemia Solomon.​—2 Samuel 7:​1, 2, 12, 13.

16. ?Wanem ol samting we Deved i givim blong oli save wokem haos prea long hem?

¹⁶ Deved i hivimap fulap samting we bambae oli nidim blong bildim bigfala haos ya blong wosip. Deved i talem long Solomon se: “Mi stap hivimap ol samting finis blong yu save yusum blong wokem haos ya. I gat moa long tri taosen fo handred tan gol i stap, wetem moa long toti fo taosen tan silva, mo i gat ol bras mo aean tu i stap we oli plante we plante.  Mo i gat ol wud tu wetem ol ston we i rere finis i stap, be bambae yu mas karem plante moa.” Deved hem wan i givim mane we long fasin blong kaontem mane bifo, hem i 3,000 talen gol, mo 7,000 talen silva. * (1 Kronikel 22:14; 29:​3, 4) Presen we Deved i givim i no wan samting we hem i mekem blong soem hem nomo. Hem i givim from we hem i bilif mo hem i fasgud long Jeova God. Hem i savegud se olgeta samting we hem i gat oli kamaot long Jeova nomo, i se: “Olgeta samting ya we mifala i stap givim long yu oli kamaot long yu nomo.” (1 Kronikel 29:14) Deved i givim samting long gladhat blong hem, mo from samting ya hem i rere blong givim eni samting we hem i gat blong sapotem trufala wosip.

17. ?Olsem wanem vas blong 1 Timoti 6:​17-19 i stret long rijman mo puaman tu?

¹⁷ I gud yumi tu, yumi yusum olting blong yumi wetem mane blong yumi long gudfala rod. Bitim we yumi ronem mane, i moagud blong lukaot rod blong mekem God i glad​—hemia nao rod blong soem trufala waes mo kasem trufala glad. Pol i raetem se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem. Yu mas talem long olgeta se oli mas mekem ol gudfala fasin, mo ol gudfala wok, mo oli mas kam rij long fasin ya. Oli mas gat gladhat blong givhan long ol man, mo blong seraot ol samting blong olgeta long ol narafala man. Long fasin ya, i olsem we oli stap putumgud plante gudgudfala samting blong olgeta, we i olsem fandesen blong laef blong olgeta, we i save stap strong oltaem. Nao bambae oli save kasem laef ya we i prapa wan.” (1 Timoti 6:​17-19) Nating sipos yumi gat mane no yumi trabol long saed blong mane, i gud yumi dipen oltaem long spirit blong God mo gat wan laef we ‘long fes blong God yumi rijman.’ (Luk 12:21) I no gat wan samting we i gud moa i bitim hemia, se yumi gat gudnem long fes blong Papa blong yumi long heven, we hem i lavem yumi tumas.

Yu Mas Kam Man We God i Stap Harem Gud Long Hem

18. ?Olsem wanem Deved i wan gudfala eksampol blong ol Kristin?

¹⁸ Deved i lukaot oltaem blong mekem Jeova i glad long ful laef blong hem. Hem i singsing se: “God, yu sore long mi. Plis yu sore long mi from we mi mi stap long bigfala trabol we i olsem hariken. Mi mi kam blong haed long yu, blong yu blokem mi mi stap gud.” (Ol Sam 57:1) Tras we hem i gat long Jeova i no blong nating. Deved i laef longtaem, gogo hem i “kam olfala tumas.” (1 Kronikel 23:1) Nating se Deved i mekem sam bigfala sin, yumi tingbaot hem olsem wan long olgeta witnes ya blong God we oli soemaot strongfala bilif.​—Hibrus 11:32.

19. ?Olsem wanem yumi save kam man we God i harem gud long hem?

¹⁹ Taem sam samting long laef blong yu i jenis, tingbaot se Jeova i save givhan long yu, givim paoa long yu, mo stretem yu tu olsem we hem i bin mekem long Deved. Aposol Pol tu i fesem plante jenis long laef blong hem olsem Deved. Be hem tu i holem strong long bilif from we hem i dipen long spirit blong God. Hem i raetem se: “Mi save mekem evri samting, long paoa blong [“God,” NW ] ya we i stap mekem mi mi strong.” (Filipae 4:​12, 13) Sipos yumi dipen long Jeova, bambae hem i halpem yumi blong win. Hem i wantem we yumi win. Sipos yumi lesin long hem mo stap klosap long hem, bambae hem i givim paoa long yumi blong yumi save mekem ol samting we hem i wantem. Mo sipos yumi gohed blong dipen long spirit blong God, bambae yumi save ‘kam prapa man blong wok we God i stap harem gud long hem,’ naoia mo blong olwe.​—2 Timoti 2:15.

[Futnot]

?Bambae Yu Yu Ansa Olsem Wanem?

• ?Olsem wanem blong blokem fasin praod?

• ?From wanem i nogud blong givimbak long man we i mekem i nogud long yumi?

• ?Yumi mas tingbaot fasin stretem olsem wanem?

• ?From wanem yumi mas trastem God moa i bitim mane?

[Kwestin]

[Tok blong pija long pej 16]

Deved i dipen long spirit blong God mo i lukaot rod blong mekem God i glad long hem. ?Yu tu yu mekem olsem?

[Tok blong pija long pej 18]

“Olgeta samting ya we mifala i stap givim long yu oli kamaot long yu nomo”